Date – 05/11/2021 Time - 7:30 -7:40Hrs

REGIONAL NEWS BULLETIN

HEADLINES (MORNING)

1. Tukina Covid19 dinhmun hriat thar berah hrikai 508 hmuhchhuah a ni.

2. Prime Minister Pu Narendra Modi-an State leh Union Territory hotute chu
vaccine pechhuak tlem zual state-te chu tan la turin a fuih.

3. World Health Organisation (WHO) chuan India siam COVID-19

vaccine Covaxin chu tulbik huna hman turin phalna a pe.

4. Prime Minister Narendra Modia chuan vawiin hian Kedarnath

Dham Uttarakhand ami a tlawh dawn.

<><><>
COVID ADVISORY

India chuan COVID-19 do kawngah hlawh tlinna ropui tak changin Covid 19
Vaccine dose vaibelchhe 100 a pe ta a. He dinhmun thlengthei tura thawktu
doctor,nurse leh a hma tawnga thawktute bakah mipui vaccine la zawng zawngte All
India Radio chuan zahna chibai a buk che u a. Hetih rual hian ngaithlatute hrileng a
la reh loh avangin fimkhur chhun zawm zel turin kan ngenche u a, Vaccine dose
kima la la lo te pawh la kim thuai ula, mi dang pawh la ve tura sawm turin kan ngen
a che u.
Sakhaw hunpui lo thleng turah hian hmaituamna vuah, midang hnaih loh, kut
leh hmai tih faite lo ngai pawimawh zel ang che u.
Covid-19 kaih hnawih a hriat duh nei chuan rampum huap helpline number -
01123978046 leh 1075 bakah, Mizoram tan 102 te hi biak pawh theih reng a ni e.

(Desk)
<><><>

COVID UPDATE

Tukina Covid19 dinhmun hriat thar berah mi 508 in an kai tih hmuhchhuah a
ni a, Sample test zawng zawng zat 3581 zinga zaa 14.18 an positive a ni.
Tun dinhmunah hri kai tawh zawng zawng hi 124026 an ni a, 117745 enkawl
dam an ni tawh a, enkawl lai hi 6141 tling in, mi 440 in an thihpui tawh a ni.
Nimin khan ZMC RT-PCR laboratory-ah sample test zingah 65 an positive a,
TrueNAT laboratory-a sample test zingah 40 an positive a, Rapid Antigen Test
hmanga COVID-19 positive hmuhchhuah thar hi 401 an ni a. FIA sample test zingah
12 an positive tih hmuhchhuah a ni bawk a ni.
 Mihring 1000 zela positive hmuhchhuah tawh zat hi 113 an ni a, mi nuai 1
zela COVID-19 vanga nunna chan tawh zat hi 40 anga chhut a ni.

(DIPR)
<><><>

HEALTH MINISTER

Health & Family Welfare Minister Dr. R. Lalthanglianan Mizorama COVID-

19 dinhmunin ziaawm lam a pan hret hret nia lang chu mi zawng zawng tanrualna
rah a ni a ti.

Health Minister chuan theitawp chhuaha tha leh zung senga mi zawng zawng
tan rualna rah seng mek hi tihchhe lo turin mimal tin an la fim khur chhunzawm rih
zel erawh a pawimawh a ni a ti

Nilaini khan Health Minister Dr R. Lalthangliana ho hian State-Level Expert

Committee on COVID-19 Management an thukhawm a, an hmalakna kal mek leh
hmalak belh ngaite an sawiho a. Health Minister chuan hripui leng vanga tawrhna
nasa tak karah thil lawmawm Mizoramin tawng ve leh zel thin a, hriselna tehfung
pawimawh tak nausen thi zat (Infant Mortality Rate) thar ber Sample Registry
Survey in October, 2021-a a tichhuahah Mizoram leh Nagaland chu nausen piang
1000 zelah 3 boral anga chhut an ni a, he tehfung atanga chhutin India ram State
zingah Mizoram chu nausen thi tlem berna a ni, a ti a. Hemi kawnga hmalatu bik
Health department, Women & Child Development Department, Social Welfare
Department, School Education Department leh mipuite thawhona rah a ni a ti.

Chief Secretary thar Dr. Renu Sharma pawhin Mizorama COVID-19 hri leng
mek chu tun dinhmunah India rama State dangte aiin a la sang deuh a, hei hi amah
pawhin a ngaih pawimawh hmasak ber tur a ni tih sawiin, tha tak leh theihtawp
chhuah tlanga thawhho a duh takzet tih a sawi a, hmasawnna hna dang thawh
kawngah pawh sawrkar hnathawkte thawhona tha tak neih a beisei tih a sawi a ni.
Prime Minister in vaccination drive a ngaih pawimawh thu sawiin target group te
chu kumin Krismas hmaa thleng kim vek turin tan lak a ngai dawn a ni,a ti .

(DIPR)

<><><>

MEETING ON COVID 19

State-Level Expert Committee on COVID-19 Management meeting nilaini-a

Health Minister hova neihah mahni in lama RAgT sample test kit hmanga lo in test
positive, a tira inzep an nat zual tak hnua buaipui ngai an awm thin tih tarlan a ni a,
mahni a sample test zingah positive an awm a nih chuan medical mite emaw
LLTF/VLTF hnenah emaw in report zel se an duh thu an sawi a ni.

Symptom neite a hma thei ang bera hmuhchhuah a pawimawh thu sawilan leh
ni a, a bik takin hritlang leh khawsik neite chu rang taka in test vat zel turin an duh
thu an sawi a, Aizawl khawpui hmun hrang hrang 19 ah sample test na ‘kiosk’ dah a
nih tawh thu report a ni.
 COVID-19 hri kaite hmuhchhuah an nih hnu a an dinhmun enchiannaah
zunthlum, BP sang leh natna dang nei tih hriatchhuah hnuhnawh an tam thu tarlan a
ni a, mipuiten anmahni hriselna inchik uluk lehzual se an duh thu tarlan a ni.

Meetingah hian khawvel hmun hrang hrangah COVID-19 a hluar thar leh thu
tarlan a ni a, Europe ram thenkhat leh China ahte chuan inkhuahkhirhna khauh zawk
an kalpui leh mek a, England ah phei chuan mask an vuah that tawk loh vanga hri
kai an pung leh nia an inhriat avangin tan an la thar leh nasa hle a ni, an ti a. Positive
hmuhchhuah zat zaa 5 aia hniam a nih hma chuan hripui leng hi thunun a la nih loh
avangin mipuite chu la inthlahdah rih lo se an duh thu an sawi bawk a ni.

COVID-19 vanga nunna chante hi natna benvawn nei vek an nih loh avang
leh thalai insawiselna nei lote pawh an awm avangin mitin fimkhur a ngai tih an
sawi a, hri kai inhriatchhuah hma a, inenkawl hma a nih chuan damchhuahna chance
a sang tih a vangin mitinin mahni inchik reng a, ngaihthatlohna neih emaw symptom
nei emaw an awm anih chuan rang taka in test ngei ngei turin mitinte an chah a ni.

COVID-19 positive dam leh ten a hnu lamah an taksaah harsatna an tawk nasa
tih tarlan a ni bawk a, symptom nei vak lo te zingah leh a tuar nep nia inhriate
zingah pawh hetiang harsatna chi hrang hrang hi an nei a,

taksa peng pawimawhte bakah an hriselna hrim hrim pawhin a tawrh

chhunzawmte an awm avangin hri kai damchhuak ta te chu mahni inchik reng se, a
tul anga daktawr te rawn thuai thuai thin se a that thu an sawi a ni.

Sample lak sak ngai an tam telh telh karah Sample la tute an indaih loh
avangin mipuiten awlsam taka an pan zung zung theih turin sample test na hmun
‘kiosk’ a tam thei ang ber veng hrang hrangah dah a tul thu meeting ah hian tarlan
niin, mahni inringhlelte leh symptom neite chuan rang taka sample test na hmun an
pan vat vat hi a pawimawh hle tih sawi a ni.

(DIPR)
<><><>

FUEL TAX CUT

Central Sorkar chuan nimin atang khan petrol leh diesel atanga chhiah a
lak thin Central Excise chu tihniamin, petrol ah Cheng 5, diesel ah
Cheng 10 in a tihniam a. Hemi piah lamah hian State tin ten an State
VAT atanga petrol leh diesel chhiah an lak thinte chu tihniamin,
mipuite tana man tlawm zawka lei theih turin an ruahman.
Chief Minister in a lo puan tawh angin Mizoram Sorkar pawhin
Central Excise tihhniam bakah hian petrol leh diesel atanga Mizoram
VAT a lo lak thin chu a rate tihniamin, petrol leh diesel ah Rs. 7 ve ve
in a tlakhniam phah dawn a ni.
MVAT Act, 2005 hnuaiah hianVAT chhiah petrol ah zaa 25 leh
diesel ah zaa 14.5 a la thin a. Nimin November ni 4 atang hian VAT
rate hi petrol ah zaa 16.36 leh diesel ah zaa 5.23 ah tihniamin, hei hian
liter khatah Rs. 7 ve ve ah a tihniam dawn a ni. Tihhniam hma hian
Petrol a pangai Cheng 107.12 a hralh chhuah chu vawiin khan Cheng
101.30 a hralh chhuah a ni a, extra premium Cheng 110.76 chu nimin
lamah chuan 104.94 a hralh a ni.
Diesel pawh nilaini lama cheng 97.89 a hralh chu nimin khan cheng
86.37 a pek chhuah a ni.

(CORR)
<><><>

LUNGLEI NGO DEMAND RTPCR

Lunglei Sub.Hqtr.YMA leh NGO hrang hrang kalkhawm chuan

Chhimbial mipui te tana RT-PCR khawl bun chungchangah vawiin
thlenga sorkar atanga thu an hmulo anih chuan total bandh hmanga
lungawilohna lantir an tum tih an sawi.
Lunglei Sub.Hqtrs.YMA Vice President Pu K.Lalfakzuala
kaihhruaiin hmalak an tum zel dan hi thuthar thehdarhtute an hrilh a, Pu
Lalfakzuala chuan Covid-19 hripui a len avangin nunphung a buai a,
tunah phei chuan a hri /hmuhchhuahna khawl RT PCR chu mitinin an
rilru in an en thuap a ni ber tawh a, hei hi hman ve theih ngei duhna a
lian hle a ni a ti a. YMA pawh in fimkhur takin a thlir a, mahse loh
theihlohna avangin inrawlh a ngai ta tih sawiin All NGO te nen rorel in
Sub.Hqtr.YMA SEC in October thla chhung ngei a he khawl hman anih
ngei theih nan a thutlukna a lo siam tawh chu Mizoram Sorkar ah thlen
a ni a, mahse October thla a zo a, khawl ber hman a theih tak si lovah
chuan sorkar au eih turin NGO te chuan ruahmanna an siam ta a ni a ti.
Ruahmanna an siam dan chuan vawiin zirtawpni thleng hian
Sorkar ngaihchan nise, chhanna rintlak a awm loh chuan Inrinniah All
NGO meeting neih nise, hetah hian Total bandh huaihawt dan tur
ruahman a ni tawh ang a ti a. YMA chuan Total bandh hi huaihawt loh
hram a duh a, tun dinhmunah chuan lohtheihlohna in a nawr ta a ti a, he
an hmalakna turah hian political party tin te lo in thiarfihlim se an duh
tih a sawi.
Tun dinhmunah RT PCR khawl dah lailawkna tur Zotlang Tourist
Lodge ami chu sak zawh tawh niin hripui leng karah October thla
chhung a an zo hman chu a sa tu te chungah pawh YMA chu a lawm a ni
a ti a. Hetihrual hian October thla chhung ngei a hman theih tura RT
PCR chhawpchhuah chu NGO te thutlukna a ni tiin a sawi.
He hunah hian Lunglei Thalai Pawl leh RT-PCR for chhimbial
aiawh te chuan Building chei that nan ni 40 vel hun Sorkar in a hmang
a, hetih chhung hian Khawl bun chungchangah hmalakna a awm lo hle
a, a lungawi thlak tawh loh takzet a ni an ti.
(Thanghmingliana Lunglei PTC)
<><><>

DIWALI

Nimin kha Hindu sakhaw betute eng kutpui Diwali a ni a, HIndu sakhua
vuantute'n khawvel ram hrang hrang-ah he 'eng' kut an hman laiin
Mizoram-ah erawh Covid-19 hrileng avangin kum dang angin he kut hi
hman theih a ni lo.
Aizawl-ah chuan sakhaw puithiam te'n Mandir ah mipui nawlpui tel
lovin an sakhaw serh leh sang puja te tiin hun an hmang a, in lamah in
leh a vel te engmawi hmangin an chei , chhungku leh thenrual tha te nen
he hun hi hman a ni.
Kolasib-a Gorkhali te chuan Kolasib Hmarveng a an biak in Shiv
mandir ah nimin khan mandir chei hnatlang an nei a, zanin dar 6 khan
diwali puja pualin mombati hal in, eng thei dangte an chhi a, mandir ah
hian a remchan angin hun an hmang nghal ani.
Covid hrileng avangin kumin hian kum dang angin durga puja leh
diwali puja lawm theih a ni lo a ni.
(Andrew Kolasib PTC)

<><><>

COVAXIN APPROVED BY WHO

World Health Organisation (WHO) chuan India siam COVID-19 vaccine

Covaxin chu tulbik huna hman turin a phalna a pe. G-20 Summit-ah
khan Prime Minister Narendra Modia chuan Covaxin hman phalna pe
turin WHO chu a lo nawr tawh a. Hemi tum hian PM Modi-a chuan
Covaxin hmanphalna pek anih chuan India-in kum 2022 hmain dose
tluklehdingawn nga a siamchhuah hman tur thu a lo sawi tawh a ni.
WHO hnuaia mithiamte chuan Covaxin chungchangah hian
inhmukhawmin hman phalna hi an pe ta a. Tunah hian ramchhungah
Drugs Controller General of India chuan COVID-19 vaccine hman phal
paruk a nei mek a. Heng zingah hian Covaxin pawh hi a tel a ni.
Union Health Minister Mansukh Mandaviya chuan Indian Council of
Medical Research (ICMR) leh Bharat Biotech-a thawk scientist-te WHO
in Covaxin hmanphalna a pektak avanga a lawmpui thu a sawi a ni..

(Newsonair)

<><><>

PM

Prime Minister Narendra Modia chuan vawiin hian Kedarnath

Dham Uttarakhand ami a tlawh dawn. AIR Corr sawidanin PM hian
cheng vaibelchhe tam tak hu khawchhung siamthathna thawhturte
lungphum a phum dawn a. Kedarnath hi kum 2013-a tuilian nasatak
khan khawchhung hmun tam tak a tichhia a. Tun tum hi PM Modi-an
kum 2014-a PM hna a chelh hnua Kedarnath a tlawh vawingana tur a ni
ang.
PM Modi-a hian nimin Diwali kha Jammu & Kashmir-a Nowshera
hmuna sipai awmte a hmanpui a. Pu Modia chuan sipaite nena Diwali
hman ho chu a chhungte nena hmanho nen a danglam lo a ti a.
Ramchhung mipuivai belchhe 130 te duhsakna nen sipaiho hmun chu a
rawn pan tih a sawi a ni.

<><><>