Professional Documents
Culture Documents
O Impresionismo e o Século XX
O Impresionismo e o Século XX
Debemos situar os pintores do estilo artístico impresionista no último tercio do século XIX,
nun contexto dominado polo triunfo pleno, na economía e na política, dos ideais liberais dos
burgueses. Estes ideais plasmáronse na segunda fase da revolución industrial e no auxe do
colonialismo imperialista europeo. É un período de cambios ós que se une a aparición desta nova
postura estética.
O Impresionismo foi a culminación dunha evolución da arte: Captar a luz mediante uns
toques cromáticos soltos, foi a ambición de tódolos grandes mestres: Piero della Francesca,
Leonardo, Tiziano, Velázquez, Hals, Rembrandt, etc. … pero serán sobre todo os paisaxistas
ingleses Turner e Constable (preocupados pola captación do vento, do sol, da chuvia) os
antecedentes máis directos do Impresionismo.
Os impresionistas (Manet, Monet, Degas, Renoir) son realmente os que rompen coa pintura
tradicional e o punto de partida da pintura do XX.
1
Gustan de traballar ó aire libre, polo tanto foxen ós exteriores tanto campestres coma urbanos
… a atracción pola pintura ó aire libre levounos a coincidir en distintos lugares: beiras do Sena,
costas normandas, Agenteuil…
Todos están unidos por un desprezo común pola arte oficial, as regras académicas e o estilo
vixente, pero cada un encamiñarase por vías diferentes:
Este cadro provocou un grande escándalo e foi rexeitado polo Salón oficial por indecente,
curiosamente está inspirado nun tema clásico: Concerto campestre de Giorgone, onde aparecía
representada unha muller espida entre dous homes vestidos.
Manet ofrece unha visión da luz e da composición diferente, a luz non é un raio que ilumina os
corpos senón que a luz se representa con mancha tonal clara (corpo feminino) que contrasta coas
zonas en sombra (tons escuros das figuras masculinas). As figuras, preséntanse como zonas planas
de cor, sen claroscuros como xustaposición brutal de manchas negras e brancas(o feito de colocar
as figuras espidas e vestidas e para marcar contrastes de branco e negro) .
A composición estructúrase en torno ás figuras, que aparecen presentadas en escorzo e ubicadas
nunha paisaxe cunha estructura perspectivista, con telóns laterais arbóreos.
Manet neste cadro liberaliza o tema, xa que non pretende mostrar ningún contido, ideolóxico,
moral, etc.
O que non se lle perdoa a Manet é pasar un tema clásico á época, transformar ás divindades en
parisinos de vacacións e, o concerto campestre nun almorzo. O rexeitamento era tanto polo tema
como polas fortes contrastes de cor e a pincelada grosa.
O título (Impresión), que os críticos que a rexeitaron deron a esta obra, acabou por servir
para designar ó movemento impresionista.
Monet trata de plasmar non o que sabe que hai, senón o que ve, por iso non realiza liñas, senón que
emprega manchas; opta por superpor distintas tonalidades para tentar transmitir a aparencia veraz
da realidade que contempla. Monet acada unha grande luminosidade empregando cores claras e
ricas.
Este pintor neste cadro, e ó longo de toda a súa obra (sobre todo nas series da catedral de
Rouen e dos Nenúfares), ten unha verdadeira obsesión por lograr interpretar con fidelidade os
cambios nas nubes, na auga, na luz; e os propios efectos da luz sobre a auga...sen dúbida, como se
2
percibe neste cadro da súa primeira época, a auga será a que mellor mostre que todo é efémero e
cambiante.
Podemos considerar este cadro como impresionista e a Monet como a figura central do
impresionismo non figurativo, tomando como referencia o feito da temática paisaxístico-mariña, a
desaparición dos contornos, a xustaposición de cores e a predominancia da luz.
• Catedral de Rouen
Degas garda certo paralelismo con Manet, pois é de familia da alta burguesía e viviu nun
ambiente culto ligado a arte. A pesar de convivir cos Impresionistas, non se chegou a considerar
integrante deste movemento pictórico, pois presenta unha clara oposición a pintar ó exterior e
valora o debuxo e a liña, como Renoir representa un impresionismo figurativo coa presencia
especial da figura feminina.
Degas, neste cadro trata de representar un paso de ballet. Recolle un instante dun
movemento individual dunha bailarina.
É un retrato cun enfoque novo e atrevido, influído polas estampas xaponesas e a fotografía. Logra
plasmar o instantáneo, o xesto momentáneo … aproveitando os seus amplos coñecementos sobre a
técnica fotográfica, para captar os instantes efémeros
A escena está captada posiblemente desde o foso da orquestra, pois era o lugar elixido por
Degas para observar, nos ensaios, as distintas posturas e movementos das bailarinas da ópera de
París.
Esta composición é novidosa, pois o pintor acota o espacio e a escena semella prolongarse
máis aló do cadro.
Técnicamente percíbese o dominio do debuxo e a liña sobre a cor … cabe considerar que
Degas era máis debuxante que colorista.
É unha escena que se desenvolve nun espacio interior, na que a luz é claramente artificial e
tende a aplanar a figura.
Degas defendeu o credo impresionista, pero representa como Renoir, un impresionismo
figurativo centrado na figura feminina. Podemos consideralo impresionista polo interese pola
captación do instantáneo e a tendencia a pintar o contemporáneo, pero difire dos restantes
3
impresionistas en manter un interese preferente pola figura humana, o movemento, os interiores e a
luz artificial.
Renoir foi un pintor que buscou no pasado, nos grandes mestres como Tiziano, Rubens,
Delacroix os referentes para aprender a pintar e, así como eles, ten o desexo de seducir pola beleza
das súas modelos cunha factura chea de colorido e gusto pola vida, alegría de vivir. Gústalle a luz e
a claridade nos cadros, luz de día e emprega case que sempre as horas do medio día. Emprega unha
pincelada pastosa e curta. Foi grande admirador do realista Courbet e ó contrario que os
impresionistas vai preferir como motivo a figura humana, optando por pintar mulleres e escenas
populares en merendeiros.
• Desnudo ó sol
O POSTIMPRESIONISMO
Cezanne fixo da pintura o obxectivo da súa vida, fórmase no Impresionismo pero pronto vai
criticar o carácter efémero do representado nesta pintura.
4
A súa obra caracterízase por:
Inspirarse na propia realidade: paisaxes, figuras femininas, retratos, bodegóns, etc; pero estes
motivos non os entende como algo a imitar ou copiar, senón como un incentivo para crear un
substitutivo plástico da realidade; estes obxectos transfórmanse, non nunha imaxe aparente,
senón en toda unha nova construcción.
Empregar cores puras: brancos, vermellos, marelos, azuis, verdes (combinando tons cálidos con
fríos) e unhas pinceladas de técnica metódica.
Ter como obxectivo central a multiplicidade de puntos de vista e non a luz.
Poñer a xeometría ó servicio da pintura, interpretando a natureza como cilindros, esferas, conos,
etc. Pero non pretende que os obxectos reproducidos se reduzan a formas xeométricas, senón
que o proceso de creación debe guiarse polo principio de saber identificar e tratar estas formas
da natureza… plasmar os aspectos non cambiantes da realidade.
Usar a cor, cunha pincelada ampla e case prismática, para construír os volumes, as masas, a luz,
a perspectiva e o espacio.
Para Cezanne a pintura era un traballo continuo e solitario de investigación. Aínda as súas
primeiras exposicións non tiveron éxito e a súa pintura a penas foi comprendida, salvo por Matisse,
cabe consideralo como o pai da pintura moderna, posto que partindo do Impresionismo recupera o
interese pola forma, o volume e a xeometría, e libera á pintura da perspectiva tradicional que será
clave en movementos como o Cubismo.
O seu xeito de traballar a cor construíndo a forma, será fundamental para artistas posteriores.
Gauguin (1848-1903)
Gauguin, como Cezanne, dedícase de cheo á pintura e trata de recuperar a forma, pero elixe
un camiño diferente.
5
Nun principio séntese atraído polo impresionismo pero moi pronto tras sentirse atraído polas
civilizacións primitivas e pouco coñecidas en Occidente ó viaxar á Bretaña francesa e á Martinica
(ambientes exóticos) centra a súa pintura en exaltar a cor e exaltar as formas.
Opta por abandonar o impresionismo, xa que non lle interesa unha arte que plasma só o que ten
ante si, el busca unha pintura que exprese sensacións interiores, ocultas e misteriosas e polo tanto
opta por inspirarse nunha natureza e unha sociedade non contaminada pola industria e o progreso
… Consideraba que a pintura debía ser a expresión da vida interior do ser humano, xa que o home
ten experiencias que os sentidos non poden captar e nin o realismo nin o impresionismo poden
pintar.
Usa composicións sinxelas con figuras en primeiro plano e fondos pechados, buscando chegar á
sinxeleza do primitivo.
A súa obra está influída polo impacto de Boticelli, as estampas xaponesas e as vidreiras medievais.
Podemos considerar a Gauguin inspirador de movementos posteriores como o Fauvismo.
O pintor fai que as sensacións e o recordo, que o sermón produciu na imaxinación das
aldeás, se materialice no mesmo plano pictórico: dota de realidade simultánea tanto á presencia das
campesiñas como a loita do anxo con Jacob.
A composición é singular, pois o tema central queda desprazado e ubicado nun primeiro
plano, quedando as figuras das mulleres cortadas, e o secundario situado nun segundo plano
separado por unha ampla franxa curva sobre a diagonal.
6
É un holandés de vida curta e tráxica, un home atormentado e inadaptado á sociedade, que
decide dedicarse á pintura coa intensidade e a forza dun neurótico. Durante os dez anos que dedicou
a pintar realizou gran de cantidade de obras.
A súa obra caracterízase por ser a busca persoal dun home por atopar na arte a resposta ó
interrogante da vida, da sociedade e da ausencia do amor.
En Amberes, tras coñecer a obra de Rembrandt e Hals comezará a practicar unha pintura
comprometida coa miseria de mineiros e campesiños. Ó chegar a París busca o ambiente xa
inexistente, dos pintores realistas … para acabar aceptando as teses dos Impresionistas, quedará
fascinado polas estampas xaponesas. E inclinarase polos azuis, amarelos e cores planas,
abandonando as tonalidades. Abandona París e viaxa a Arles (Provenza francesa), en busca da luz e
do sol, coa pretensión de crear un taller de pintores dedicados a investigar, na que fracasa. Dedícase
a pintar unha variada temática (rios, pontes, mariñas) cunha luz e cor intensas.
Ó final da súa curta e tráxica vida alternará períodos de fortes crises con outros de calma e
tranquilidade e tras permanecer recluído no psiquiátrico de Saint-Remy, terminará por suicidarse en
Auvers.
Realizará retratos e autorretratos nos que vai mostrando os seus avances na pintura e a
evolución da súa enfermidade, as pinceladas faranse cada vez máis tortuosas.
A súa obra pódese resumir como unha grande investigación da cor e da súa aplicación.
Para pintar sempre parte da observación da natureza e expresa nas figuras humanas, na paisaxe e
nos detalles interiores das vivendas a forza da súa propia vida… parte da realidade pero ó pasala
polo seu filtro alónxase dela.
Van Gogh coincide con Gauguin na súa conexión co simbolismo, nas malas relacións familiares e
na inadaptación social, no alonxamento da sociedade industrial, na busca da luz do sur e na
exaltación da cor. .. Ambos pintores servirán de referencia Fauvistas e Expresionistas.
7
A ARQUITECTURA DO SÉCULO XX; WRIGHT, LE CORBUSIER. MIES VAN DER ROHE.
No século XX aparece unha nova linguaxe arquitectónica que se apoia nunhas premisas establecidas
xa no XIX; estas son:
• Profundos cambios sociais orixinados pola Revolución Industrial; as cidades crecen e é necesario
ordenalas así como hai preocupación por construír vivendas dignas.
•Novas necesidades constructivas para reunir á xente: pavillóns de exposicións, almacéns, oficinas, etc.
•A revolución estética feita pola Art-Nouveau. que racha coa tradición.
En 1925 a Bauhaus trasladouse a Dessau e optan pola arquitectura racionalista sendo dirixida por
arquitectos importantes como Rohe. En 1930 entra en decadencia e despois é clausurada en 1933 pero
exercerá unha gran influencia ó emigrar os seus compoñentes fóra de Alemaña.
En 1930 o estilo racionalista xa está definido e ten un gran corpo teórico que se difunde con
ensaios, artigos de revistas especializadas, exposicións e os CIAM (congresos de arquitectos modernos)
8
Le Courbusier (1887-1965)
A súa obra supuxo unha renovación formal baseada na perfección estética; reduce os volumes a
formas simples e defende o espacio libre.
En 1926 publicou “Os cinco puntos dunha nova arquitectura” onde quedan exposto os principios da
súa arquitectura, onde emprega como material o formigón armado:
a) pilotes para soster a casa: illa a casa do chan, elimínanse humidades e prolóngase a natureza.
b) teitos-xardín
c) planta libre: o sistema de piares e a ausencia de muros de carga permite que cada piso poida ser
distribuído de xeito diferente.
d) ventás alongadas: xa que o muro non ten función sustentante
e) fachada libre
Entre 1914-30 proxecta diferentes tipos de vivendas entre as que destaca:
Villa Saboya (1929-31).
Nela aparecen tódolos elementos que definen a arquitectura racionalista: casa sobre pilotes,
ventás lonxitudinais ó longo da fachada, planta libre e cuberta plana.
Debaixo da casa podes circular e así non se obstaculiza o movemento; a natureza non se detén
senón que penetra na casa.
O edificio é un paralelepípedo de formigón illado do chan cos pilotes; o corpo superior está
alixeirado cas ventás horizontais continuas; o teito é terraza; a planta baixa permite e facilita a vida
diaria, xa que pódese entrar co coche na mesma casa. O teito serve ademais como solarium
• Igrexa de Ronchamp (1950)
Obra da época final onde Le Courbusier xoga máis coas curvas, bóvedas e alabeados que
parecen máis expresivos que racionalistas; nesta época prefire o artístico por encima do práctico
que fora o que caracterizara o principio a súa obra; agora traballa cos xogos de luces e sombras e
efectos plásticos. Vén sendo unha escultura ó aire libre. No interior logra un ambiente intimista
gracias á luz; esta obra abre camiño á arquitectura organicista.
No interior permite albergar a unhas duascentas persoas e no exterior tamén se aproveita cun
espacio amplo; a cuberta a modo de concha.
9
A arquitectura orgánica: Frank Lloyd Wright (1868-1959)
No ano 1933 hai un súbito paro da arquitectura racionalista; a crise provocada polos sistemas
totalitarios europeos e a II guerra Mundial deteñen a actividade constructora; será en América onde continúe
a actividade constructiva. Aquí desenvolverase unha arquitectura nova, moderna e menos intelectual ca
europea: a Arquitectura orgánica
É unha arquitectura que satisfai as necesidades humanas e concibida como un organismo que ten
vida propia, integrada nun ambiente natural e que ten en conta as necesidades dos que a van ocupar.
O arquitecto ha de ter en conta a acústica, a harmonía de cores, os materiais máis adecuados para
que a vida sexa o máis agradable posible.
10
AS VANGARDAS DO SÉCULO XX
a) O Fauvismo.
11
Henri Matisse (1869-1954)
Matisse sentiuse atraído pola luz e a cor do Mediterráneo e do norte de África, coñeceu a
través de exposicións e viaxes o mundo islámico e sentiu grande atracción por el e por todo o
mundo oriental .
A forma de pintar de Matisse pasou polo impresionismo, o postimpresionismo, o puntillismo e o
cubismo, pero mantivo sempre o gusto pola cor intensa… incluso cando se separou do grupo dos
fauves. Entre os temas preferidos de Matisse cabe destacar o seu interese pola figura feminina
relaxada.
Matisse defendía a teoría da ruptura con toda a pintura anterior e o predominio absoluto da cor e as
liñas grosas… pintar xogando con cores primarias e complementarias, provocando fortes
contrastes.
No cadro titulado “Gran interior vermello”, Matisse busca representar un espacio interior
como se se tratase de plasmar unha natureza morta… pinta unha sala con mesa, cadeiras e cadros na
parede, todo bañado de cor vermella.
O elemento clave do cadro é a forza da cor vermella, posto que a Matisse o que lle interesa é lograr
a expresión a través da cor.
Matisse esquécese da perspectiva e intenta intensificar as formas, pero sobre todo resaltar o
binomio liña-cor, sempre presente en todas as súas obras.
A súa técnica caracterízase por empregar grandes superficies de cor plana, pura e intensa; procurar
que as cores estean contrastadas entre si de forma violenta; prescindir do claroscuro, da perspectiva
e do volume… mostrando preferencia pola liña ondulante (arabesco). Rompendo deste xeito cos
elementos claves da pintura tradicional.
Como debuxante optou claramente por dar forma con liñas grosas e como pintor mostrouse
apaixonado polas grandes explosións cromáticas, aplicando as cores en grandes superficies… no
caso deste cadro decídese por dar protagonismo ó vermello.
Matisse, sendo o pintor máis destacado da pintura fauvista, irá evolucionando a través de diversas
fases polas estéticas impresionista, postimprtesionista, puntillista, cubista …. Ó remate da súa vida
tende á simplificación e a crear con recortables de papel a modo de collage
Nesta obra Representa un interior, a maneira dunha natureza morta, onde atopamos as
características típicas do fauvismo: cores fortes, con predominio do vermello, cores planas, e liñas
ondulantes (arabescos).
b) O Expresionismo
O termo expresionismo pode ser aplicado a pintores de distintas épocas que a través dos
seus cadros tentaban expresar os seus sentimentos; sen embargo non será ata comezos do século
XX cando apareza como un movemento artístico, que vai aglutinar a distintos creadores en clara
oposición ó Impresionismo.
Este movemento ten a súa orixe en Alemaña e esténdese entre 1905 e 1933. Garda relación coas
causas que provocaron a Primeira Guerra Mundial e estivo ligado á filosofía de Nietszche e a teoría
da Psicoanálise de Freud.
Os seus antecedentes poden encontrarse en Goya (pinturas negras) e en Van Gogh (liñas retortas e
aplicación violenta da cor).
O Expresionismo é un berro de rebeldía contra unha sociedade hipócrita e inxusta … de tentar
trasladar ó cadro aquilo que o pintor sinte… o expoñente máis claro da angustia contemporánea.
12
Os pintores do movemento expresionista podemos caracterizalos por: rexeitar as formas agradables,
usar distorsións e aplicar cores discordantes de forma moi violenta.
Se ben no expresionismo alemán é imprescindible falar de Kandinsky, o pintor impulsor do
movemento expresionista é o noruegués Eduard Munch. Munch foi un home obsesionado pola
enfermidade, a morte, a soidade e a angustia do ser humano; tiña unha visión pesimista do mundo e
do der humano. Na súa obra cabe destacar “O grito”
•O grito (1893)
Munch representa un home no medio dunha paisaxe…
As formas están simplificadas ó máximo e o rostro desaparece quedando como unha caveira.
A natureza oscila e cúrvase facéndose sinuosa igual que o personaxe central.
Pero Munch non busca coas curvas sinuosas e as grandes manchas de cor representar a beleza,
senón destruír as formas, deformar a realidade e expresar a angustia.
O personaxe central berra e o seu berro transmítese a toda a Natureza; ese berro transmite a soidade
do ser humano ante a vida e a morte... o pintor reflexa nesta obra a angustia, a soidade, a
incomunicación.
Tecnicamente apréciase, ademais dun desprezo pola perspectiva, o emprego da curva sinuosa e do
colorido arbitrario aplicado de xeito violento en grandes manchas de cor pura.
Este cadro é o manifesto do expresionismo e a obra mestra de Munch.
Tódolos elementos plásticos, (a cor, o debuxo) quedan subordinados á expresión, posto que Munch
opta por unha clara falta de realismo, a irracionalidade das cores e o dominio absoluto da súa
subxectividade.
c) A Abstracción
1. Kandisnsky (1866-1944).
Este cadro é un conxunto de liñas e cores, polo tanto estamos ante un cadro de temática non
figurativa… responde á linguaxe da abstracción.
“O arco negro” é un exemplo do inicio da abstracción posto que desaparece todo elemento
figurativo e o cadro caracterízase polo dinamismo intrínseco das liñas e a vitalidade cromática.
Este cadro, como os restantes obras que agrupamos no movemento abstracto, deixa de poder ser
considerado como un duplicado da realidade e debemos tomalo como unha realidade autónoma en
si mesmo: non trata de representar ningunha realidade, nin tan sequera facer referencia a algo
existente ó marxe do propio cadro.
13
Kandinsky busca conmover ó espectador recorrendo a unha composición dominada pola
combinación harmónica de liñas e cores, rompendo con todo principio de perspectiva e do valor
estético da luz.
Kandinsky é abstracto, pero aínda así sempre intenta darlle un sentido espiritual ás súas obras. Para
acadar esta espiritualidade fai que a súa pintura se asemelle á música de tal xeito que os seus
cadros, mediante a harmonía de liña e cor provocan o efecto emocional da música. Moitos dos seus
cadros titúlanse Improvisación, Composición, igual que na linguaxe musical.
2. Mondrian(1872-1944).
•Táboa número 1
14
- Interpretar de xeito persoal e orixinal todos os elementos que constitúen a pintura: a forma, o
espacio, a cor, a técnica...
- Concibir a pintura como unha actividade intelectual e científica.
- Prescindir da perspectiva e do movemento por consideralos elementos artificiosos da pintura, en
clara ruptura coa pintura tradicional.
- Buscar a representación da esencia de obxectos e persoas e non a súa aparencia
(antiimpresionistas).
- Dar preferencia á liña e a forma sobre a cor e prescindir totalmente da luz (mostrando aprecio
pola pintura de Cezanne e rexeitando así ós pintores fauves e impresionistas)
- Preferir as cores apagadas, como as ocres as pardas, as grises …
O cubismo está considerado como un dos momentos máis importantes da historia da arte
despois do Renacemento. Representa a destrucción dos principios espaciais tradicionais e a
creación dunha nova forma de concibir o cadro e o espacio. Pretende conseguir unha orde plástica
que supere a nebulosa lumínica do impresionismo, a anarquía cromática do fauvismo e as
esaxeracións expresivas do expresionismo.
Entre os pintores cubistas ( como Picasso, Braque ou Juan Gris) podemos distinguir certas fases:
- Un Cubismo cezanniano (1907-09) no que domina a busca de formas esenciais a base de liñas
e formas angulosas.
- Un cubismo analítico (1910-12) na que domina a destrucción das formas, ata o punto de non
recoñecer o que se representa sendo case abstracción, e a preferencia polas cores apagadas:
ocres, grises…
- Un cubismo sintético (1912-13) caracterizado por manter a visión simultánea, pero
recoñecéndose as formas, as figuras e os obxectos; por empregar cores claras. Na fase sintética
téndese a introducir o collage (anacos de papel, teas, xornais) na composición … isto supón un
xesto revolucionario, pois implica unha revisión total do feito artístico e un cambio completo
no método de traballar dos pintores; posto que, en vez de representar a realidade, están a
introducir a realidade no cadro mesmo…o cadro pasa así a ter realmente tres dimensións.
Picasso romperá coa tradición artística que existía desde o Renacemento. Nace en Málaga e,
tras vivir uns anos da súa infancia en A Coruña, no ano 1895 trasládase xunto coa súa familia a
Barcelona (onde frecuentará os ambientes intelectuais modernistas cataláns que o marcarán) e
acaba por trasladarse a París, onde contactará coa intelectualidade europea e cambiará radicalmente
a súa forma de pintar.
Picasso vai mostrar sempre unha grande tendencia a asimilar todo aquilo que coñece e, partindo
dunha base estética postimpresionista e expresionista, acabará por experimentar ata converterse nun
xenio da pintura.
A obra pictórica de Picasso estará influída por as tallas das máscaras africanas, as esculturas
ibéricas e a arte exipcia.
Na obra pictórica de Picasso podemos distinguir varios períodos:
1. Período previo á Primeira Guerra Mundial, a obra de Picasso vai pasar por tres etapas:
A. Etapa Azul (1901-1905)
15
Nos seus comezos Picasso aborda temáticas de carácter social utilizando a estética realista,
impresionista ou expresionista... Inflúe nel o expresionismo, pero sen embargo Picasso non retorce
as formas senón que as alonga como recordando ó Greco.
Desde a morte dun amigo en 1901 tende a empregar de forma reiterada a cor azul (Período Azul).
Polo tanto nos cadros deste período van predominar as tonalidades azuis e unha visión amarga da
vida, carente de rebeldía. Os temas que trata son o frío, a fame, a soidade, a pobreza....
B. Etapa Rosa (1905-1906)
En París cambia tanto a tonalidade da cor (preferencia polo rosa) como a temática dos seus cadros,
representa a nenos e a xentes do circo, mostrando a dureza da súa vida, cun certo contido
melancólico aínda que transpirando optimismo e dignidade. A preocupación de Picasso polos
desfavorecidos está en relación coa pintura de Van Gogh e Toulouse-Lautrec.
• O saltimbanqui
Picasso representa a un personaxe do circo, nunha actitude que reflexa unha indiferencia sosegada
ou certa tristeza altiva.
Reflexa unha vida de farándula e aplausos, aínda que mostrando preferentemente o lado duro da
vida do artista ambulante ou nómade.
Os rasgos da figura contrastan coas formas angulosas e escuálidas e os xestos desesperanzados das
figuras do período azul.
“O saltimbanqui” pertence ó período rosa pero, aínda que abandona o cromatismo azul, segue a
manter o compromiso e solidariedade cos humildes e desherdados (reflexo do aprecio de Picasso
pola obra de Van Gogh e Toulouse-Lautrec).
A opción polos personaxes marxinais (saltimbanquis, arlequíns,…) está en relación coa súa propia
sensación de artista que renuncia ós convencionalismos e á vida burguesa sedentaria e ordenada.
Polo tanto o período rosa ven a significar a superación do pesimismo amargo do seu período azul.
C. Etapa cubista (1907-1919)
Picasso recolle as influencias da escultura negra africana, da escultura ibérica e das obras de
Cezanne e dá un xiro na súa creación artística. Plantexa unha nova maneira de plasmar a realidade a
través da xeometrización das formas, da introducción de múltiples puntos de vista simultáneos
superpostos no mesmo cadro e da incorporación da técnica do collage.
Dentro do período cubista cabe distinguir:
Unha fase inicial de cubismo cezanniano, no que aínda pinta cadros nos que se poden
distinguir as formas. Destaca “As señoritas de Avignon”.
16
A introducción da visión simultánea apréciase claramente na figura da dereita, que ten o corpo de
costas e o rostro de fronte, o nariz, a boca e un ollo de perfil e o outro ollo e as orellas de fronte.
Polo tanto con “As señoritas de Avignon” Picasso rompe coa tradición pictórica occidental
imperante desde o Renacemento.
Este cadro está considerado como o emblema e o inicio do cubismo.
3.
“Os tres músicos” (1921).
Os tres personaxes da Comedia da Arte (Arlequín con frauta, Pierrot con guitarra e O Malo con
partitura) está representados en posición sentada, hierática e frontal, detrás dunha mesa baixo a que
asoma unha especie de can fantasmagórico.
As formas son esquemáticas, desproporcionadas e xeometrizadas, pero as figuras resultan
facilmente recoñecibles.
As figuras parecen feitas a base de papeis recortados e pegados simulando un collage, pero en
realidade non o son.
A linguaxe pictórica está simplificada ó dispor unha composición en friso frontal e prescindir da
ilusión de profundidade.
A representación do espacio resulta orixinal, pois logra a sensación de ambiente recorrendo a pintar
os ángulos de tonalidades diversas e a dar unidade á composición coa cor azul do fondo.
Emprega cores vivas e ricas, optando por cores primarias que fai destacar sobre o fondo neutro.
Desde 1913 Picasso simultánea obras cubistas con outras moi clásicas, experimenta con todos os
estilos e salta dun estilo a outro sen querer encasillarse en ningún… nin sequera no seu propio (esa
é unha das grandezas deste xenio).
Este cadro supón a culminación do cubismo sintético, pero ó mesmo tempo a simbiose de cubismo
e figuración.
4. Período bélico (1936-1945), a creación pictórica de Picasso vese moi afectada polo pesimismo
e o compromiso cos movementos antifascistas. Os seus cadros convértense nun alegato a favor
da liberdade e contra a barbarie da guerra. Debemos resaltar como cadro emblemático “O
Guernica”
“O Guernica” (1937)
Picasso realiza esta obra, en plena Guerra civil (1936-39), por encargo do goberno da II
República española, para ser exposto no pavillón de España da Feira Universal de París.
O tema acaba sendo o bombardeo da cidade vasca de Guernica pola Lexión cóndor alemana (en
apoio do bando de Franco).
É un cadro mural de grandes dimensións tecnicamente moi elaborado, posto que o pintor
chegou a realizar 45 debuxos preparatorios antes de decidirse pola composición definitiva.
A composición está organizada a modo de tríptico e todas as figuras parecen fuxir do bombardeo
correndo cara a esquerda do cadro: a escena da parte dereita está centrada nunha muller que grita
ante un incendio, a escena central xira en torno á muller que porta unha lámpada e a escena da
esquerda está dominada pola muller que sostén un neno morto en brazos. Picasso encadra os grupos
en compartimentos triangulares en clara liña cubista.
17
A nivel técnico podemos considerar “O Guernica” como un cadro cheo de renuncias
intencionais, posto que Picasso prescinde da cor, renuncia á beleza formal e despreza os conceptos
tradicionais de espacio e luz.
Con respecto ó espacio cabe afirmar que domina a planitude (aínda que certos elementos
está tratados en perspectiva) e a ambigüidade de aparentar ó meso tempo que as escenas suceden no
interior, no exterior, e ante un telón teatral.
5. Período da segunda posguerra e guerra fría ( a partir de 1945), coincidindo con obras de
renovado optimismo e fondo lirismo, Picasso crea cadros expresionistas ou elabora grandes
reflexións pictóricas sobre obras mestras do pasado. Sobre todas as creacións despuntan as súas
variacións sobre “As Meninas”
“As Meninas”
Na etapa da segunda posguerra, durante os anos 50 e 60, Picasso vai pintar un grande número
de variacións sobre o cadro “As Meninas” de Velázquez.
As variacións poden recoller o cadro completo ou simples fragmentos, pero sempre tende a manter
os personaxes principais.
Picasso no seu traballo creativo sobre esta obra de Velázquez non ten ningún reparo en
reducir ou alterar a obra ó seu enteiro capricho.
18
Entre as reduccións máis relevantes cabe destacar a desaparición da tridimensionalidade, a
eliminación dos efectos de luz e a xeometrización das anatomías dos personaxes.
Como símbolos claves Picasso opta por centrarse na cruz que Velázquez porta no peito,
criticando así o seu servilismo para alcanzar esa distinción de nobreza, e por representar os ganchos
das lámpadas como se fosen ganchos dunha carnicería, querendo quizais poñer de manifesto que
está despedazando ou sometendo a tortura a obra de Velázquez.
Nos corenta cadros que Picasso pinta, tomando como referente o cadro de “As Meninas”, sobresae
por un lado o carácter libre e irreverente do pintor e polo outro a súa enorme paixón pola
experimentación e por esgotar todas as posibilidades que pode ofrecer un mesmo tema.
Picasso está considerado como un dos grandes xenios da pintura e sobre todo como o
grande renovador da linguaxe pictórica do século XX, unha das súas grandezas é a de atreverse a
experimentar con todos os estilos mostrando sempre un grande entusiasmo creador.
O movemento Dadá (1915-1922) foi máis unha actitude que un estilo e caracterizouse pola
provocación constante contra o modo de vida burgués e as súas contradiccións, postas de manifesto
na absurda guerra que se vivía e por dar máis importancia ó xesto que a propia obra… Os dadaístas
propoñíanse destruír os diversos modos de arte establecida; burlábanse dos obxectos artísticos que
foran venerados durante séculos; usaban obxectos de uso cotián e expoñíanos presentándoos como
obxectos artísticos, calquera obxecto vulgar cun pequenos cambios ou sacado do seu contexto podía
ser chamado obra de arte e lograr a atención do espectador.
Polo tanto o dadaísmo é unha das vangardas máis radicais, pos supón toda unha mutación na
arte contemporánea, posto que abandonan as preocupacións estéticas tradicionais e crean unha
corrente de gran liberdade creadora: presentan os collages, recorren á pinto-escultura e expoñen
obxectos atopados ou prefabricados (os ready-made). Os pintores dadás introducen o irracional e o
inconsciente na arte.
Moitos dos artistas dadaístas acaban por evolucionar cara á tendencia surrealista. Como o máis
xenuíno dadaísta podemos destacar a Marcel Duchamp(1887-1968).
No ano 1917 intenta Duchamp presentar, nunha exposición na cidade de Nova Iorque, o
seu primeiro ready-made. A obra presentada é un urinario elevado á categoría de fonte.
19
Duchamp escollerá un obxecto que estaba xa fabricado en serie e simplemente o asina co
pseudónimo R.Mutt, de tal forma que para poder lelo había que inverter o urinario aparecendo a
imaxe dunha fonte. Os organizadores da exposición negáronse a expoñer tal obra de arte.
A pretensión de Duchamp era provocar o escándalo, pero tamén facer posible que o
espectador tivera a oportunidade de mirar as imaxes dun xeito diferente… obrigar ó observador a
poñer en tela de xuízo as realidades aceptadas e a recoñecer o papel do azar e da imaxinación. No
fondo Duchamp buscaba desmitificar a arte.
Ó pouco de acabar a Guerra, mentres Duchamp renuncia a toda actividade
artística(seguindo o principio de que Dadá debía destruír a Dadá), moitos dos artistas dadaístas
comprométense co surrealismo.
Podemos considerar a Duchamp como o antecedente da Pop Art e da Arte Conceptual da segunda
metade do sáculo XX.
Surrealismo
Neste cadro Dalí recorre ós seus temas obsesivos: ás imaxes dobradas e simbólicas
(asociadas ó sexo, á morte e ó tempo), ás formas alongadas que se descompoñen, ás distorsións e
ós espacios baleiros … á desmembración alucinada dun monstro humano.
A composición rompe co sentido do equilibrio e está dotada dunha perspectiva espacial ilimitada.
O debuxo está moi coidado e trazado con grande corrección.
A cor resulta discordante, luminosa e brillante.
A luz é transparente e limpa, con influencias do Renacemento e do Barroco.
20
É unha obra da súa etapa surrealista, na que domina a linguaxe onírica, a desmembración do corpo
humano e a ruptura co concepto tradicional de espacio.
O propio título “Presaxio da Guerra Civil” garda paralelismo co carácter visionario do tema e co
ambiente de pesadelo que se reflexa no cadro … o cadro reflexa un mundo alucinado cheo de
distorsión, desmesura e irracionalidade.
Dalí, como se pode constatar neste cadro, foi un pintor cun grande dominio do debuxo e da pintura
figurativa. Chegou a dominar todas as novas linguaxes: fauvismo, cubismo, futurismo,
expresionismo, surrealismo… pero, tras ser expulsado do movemento surrealista en 1939 pola súa
actitude política conservadora, tende a unha estética máis barroca e a un sentido do espacio e da
composición máis clásicos.
Este é un dos primeiros cadros surrealistas de Miró e unha das súas obras máis representativas.
Todas as formas están distribuídas nos estreitos límites dunha habitación e teñen un tratamento a
modo de signos, pero mantendo certo carácter figurativo, que desaparecerá en obras posteriores.
A arte de Miró é o resultado dun proceso de simplificación da pintura, tende a reducila ós seus
elementos esenciais: liña-cor-composición.
Na composición existen dúas realidades opostas: un home de elegantes bigotes e longa pipa, que
mira con expresión triste ou amarga ó espectador e unha enorme cantidade de animais, bestas e
organismos despregados en baile alegre e desenfreado… Miró tivo a intención de representar as
alucinacións producidas pola fame (o Arlequín triste imaxina todo aquilo que o podería alegrar).
Nesta composición sobresae ademais a posición de dúas grandes liñas onduladas (branca-
negra)entrecruzadas creando a unión home-muller.
A técnica empregada é o automatismo psíquico, que propón a creación sen intervención da razón.
Miró a través do automatismo acadou a absoluta espontaneidade… ata o punto de poder ser
considerado o máis surrealista entre os surrealistas.
O espacio resulta estrañamente invertido, por efecto da perspectiva da ventá aberta á noite.
As cores, aplicadas de forma plana son vivas e preferentemente vermellas, marelas e azuis.
Miró pinta cunha linguaxe precisa e minuciosa a realidade que xurde do soño, enchendo os seus
cadros de estrelas, lúas, signos, animais e filamentos cheos de lirismo … esta linguaxe imaxinativa
recorda a pintura de O Bosco, ó que el tanto admiraba.
O cadro carece dun simbolismo específico, máis ben é a expresión da brillante e fantástica
imaxinación de Miró.
Miró iníciase no modernismo, será un grande coñecedor das vangardas e, tras pasar por unha etapa
fauvista, derivará logo cara unha esquematización surrealista de automatismo psíquico puro.
21
Esta obra ten unha forte carga de expresionismo, pois o espectador queda impresionado polo vigor
que desprende e chega a sentir a expresión do xesto da súa boca como se en realidade o estivese
escoitando.
Pablo Gargallo, xunto con Xulio González, está considerado como un dos grandes representantes
da escultura cubista. Influído polo cubismo de Picasso, desde 1925, comeza a compoñer as súas
esculturas mediante planos recortados montados con posterioridade, usando perfís curvos como
elemento expresivo.
Expresionismo Abstracto
Trala Guerra o centro artístico trasládase a Nova York xa que o florecemento artístico do mundo
americano é o gran fenómeno artístico do noso século. América está influída polos emigrantes europeos
procedentes de Alemaña, Rusia, etc. Dous emigrantes, Gorky e de Kooning, son claves nos inicios da
abstracción en América; precisamente de Kooning converte o expresionismo europeo en expresionismo
abstracto.
Entre os expresionistas abstractos destaca Pollock, influído polo anterior. Desde 1940 compón
grandes lenzos en forma continua, con gran rapidez, cortándoos ó seu gusto. O tema sempre é abstracto e o
interese está na pintura en si. A súa técnica consiste en salpicar sobre un lenzo branco colocado no chan
chorros de pintura. É unha pintura de acción, de rapidez de acción.
En Europa, trala reconstrucción, xorde a tendencia Informalista paralela ó expresionismo abstracto
norteamericano. Estamos nun ambiente de postguerra e influídos polo existencialismo, o cal provoca unha
situación de tristeza.
As obras informalistas non soen ter ningunha relación co mundo real e son máis abstractas que as propias
abstractas.; son o resultado dunha elaboración moi persoal do artista e difíciles de captar polo espectador.
En España xorden os grupos máis significativos da nosa vangarda; en Barcelona aparece o grupo
Dau al Set integrado por artistas como Tàpies, ou Cuixart ;e en Madrid outro grupo chamado el Paso (1950-
60), no que estaba Saura, Millares, etc.
O primeiro grupo adopta unha postura dobre: surrealista e existencialista; pero quen define o estilo e
Antoni Tàpies que desenvolve desde 1950 a pintura matérica usando materiais diversos (papel, cartón,
fío,cordel,etc) en composicións con escasos elementos figurativos e con gammas cromáticas escuras.
Fronte ó informalismo xorden tamén nos sesenta novas tendencias abstractas de formas xeométricas simples
máis claras que os escurantistas informalistas. Un exemplo disto é a obra do grupo Equipo 57.
Nos anos seguintes aparecen novos pintores abstractos que realizan pintura en grandes formatos non
rectangulares, usando cores brillantes, planos e ordenados (ART OP) ; deles derivará o Cinetismo tanto en
pintura como en escultura: a relación imaxe-fondo produce sensación de movemento. Destacan como artistas
cinéticos Vasarely que prefire liñas ondulantes e cores deslumantes.
A obra cinética podía estar composta por móbiles, que se axitan con correntes de aire; ás veces o espectador
debía contribuír a ese movemento e polo tanto participar na arte.
Neofiguración
Dubuffet e Francis Bacon son os artistas representativos desta tendencia; recorren de novo á figuración.
22
Bacon ( 1909) representa na súa obra esta figuración; ten series dedicadas a Inocencio X de Velázquez, a
quen recrea cunha cor e pincelada barroca pero cunha acción e xesto contemporáneo. Os seus retratos
preséntansenos como vistos a través dun cristal deformante; hai carga expresionista nos seus cadros
Retrato de Henrietta Morales
POP ART
HIPERREALISMO
É unha das últimas tendencias; o Hiperrealismo é de orixe americana e foi estendido por Europa en
torno ós anos sesenta e setenta. Supón unha volta ó retrato realista e á pintura da paisaxe. Usan a fotografía
como referencia pero o acabado faino a pintura. Un exemplo de autor hiperrealista é o español Antonio
López.
ULTIMAS TENDENCIAS
Desde os anos 70 temos novas tendencias na arte, influída polos acontecementos políticos (maio
francés) e económicos (crise do 73); o trazo máis significativo da arte actual pode ser o eclecticismo, a
pluralidade de estilos.
Temos tendencias como o Minimal Art, Land Art, Arte Povera, Body Art,etc que aparecen como oposición á
comercialización da obra artística.
Minimal art: arte mínimo relacionado con experimentos pictóricos e escultóricos de base xeométrica e
formas elementais
Arte Povera: Usa materiais pobres e non de orixe industrial.
Land art: Realízase en escenarios naturais modificándoos
Escultura
Desde mediados de século asistimos á etapa de madurez de grandes escultores contemporáneos como Henry
Moore (1898-1986). Evoluciona da figuración á no figuración. Un dos temas preferidos é a figura feminina
recostada que comeza a representar desde 1929: é unha muller vital, nai, fonte de vida e terra fecunda; ten
influencia da escultura prehistórica, maya, etc. Tamén se inspiraba en formas que lle suxiren ósos, pedras
que recollía; fascínao o baleiro, as formas envolventes e escavar volumes sólidos para revelar formas
internas. Soen ser obras de pequeno tamaño pero mostran monumentalidade.
• Figura recostada (1929)
23
24