1. Personam tragicam forte vulpes viderat: "o quanta species" inquit
"cerebrum non habet!". Haec fabula est illis quibus honorem et gloriam Fortuna tribuit, sensum communem abstulit. FHAEDR. 1,7
2. Numquam Hadrianus nisi in Traiani patris templo nomen suum
scripsit. In Urbe instauravit Pantheum, basilicam Neptuni, forum Augusti. Fecit et sui nominis pontem et sepulchrum iuxta Tiberim et aedem Bonae Deae. Transtulit colossum stantem atque suspensum per Decrianum architectum de eo loco in quo nunc templum Urbis est, ingenti molimine ita ut operi etiam elephantos viginti quattuor exhiberet. HIST. AUG. Hadrianus 19, 9-13
3. Caesar legionem nonam subsidio ducit; hostem subprimit rursusque
terga vertere seque ad oppidum Ilerdam recipere et sub muro consistere cogit. Sed nonae legionis milites, dum sarcire acceptum detrimentum volunt, temere insequuntur longius fugientes et in locum iniquum progrediuntur et sub montem in quo erat oppidum ilerda positum succedunt. Hinc se recipere cum vellent, rursus illi ex loco superiore nostros premebant. CAES. civ. 1, 45, 1.
4. Caesar coactus est exercitum in hibernis collocare legionesque in
plures civitates distribuere. Ex quibus unam C. Fabio legato dedit, alteram Q. Ciceroni, tertiam L. Roscio; quartam, cum T. Labieno in confinio Treverorum hiemare iussit. Tres in Belgis collcavit; eis M. Crassum quaestorem et L. Munatium Plancum et C. Trebonium legatos praefecit. Unam legionem, quam proxime trans Padum conscripserat, et cohortes V in Eburones, quorum pars maxima est inter Mosam et Rhenum, qui sub imperio Ambiorigis et Catuvolci erant, misit. CAES. Gall. 5, 24, 1-4
5. Etenim , credo, Manlius iste centurio qui in agro Faesulano castra
posuit, bellum populo Romano suo nomine indixit, et illa castra nunc non Catilinam ducem exspectant et ille, eiectus in exsilium, se Massiliam, non in haec castra, confert. CIC. Catil. 2, 14.
6. O di immortales! Ubinam gentium sumus? Quam rem publicam
habemus? In qua urbe vivimus? Hic, hic sunt in nostro numero, patres conscripti, in hoc orbis terrae sanctissimo gravissimoque consilio, qui de nostro omnium interitu, qui de huius urbis atque adeo de orbis terrarum exitio cogitent. CIC. Catil, 1,4.
7. O Roma nobilis, orbis et domina,
cunctarum urbium excellentissima, roseo martyrum sanguine rubea, albis et virginum liliis candida; salutem dicimus tibi per omnia, te benedicimus: salve per saecula! ANÓNIMO DEL SIGLO X.
8. Ad Alpes posteaquam venit, quae Italiam ab Gallia seiungunt, quas
nemo unquam cum exercitu ante eum praeter Herculem Graium transierat, Alpicos concidit, loca patefecit, itinera munivit, effecit ut ea elephantus ornatus ire posset, qua antea unus homo inermis vix poterat repere. Ac copias traduxit et in Italiam pervenit. NEP. Hann. 3, 4. 9. HIs rebus confectis, Caesar milites in proxima municipia deducit; ipse ad urbem proficiscitur. Coacto senatu, iniurias inimicorum commemorat. CAES. Civ. 1, 32, 1.
10.Eodem tempore clamore exaudito, dat tuba signum suis
Vercingetorix atque ex oppido educit. Nostri ad munitiones accedunt; fundis librilibus sudibusque, quas in opere disposuerant, ac glandibus Gallos proterrent. Prospectu tenebris adempto, multa utrimque vulnera accipiunt. At M. Antonius et C. Trebonius legati, quibus hae partes obvenerant, auxilio (milites) ex ulterioribus castellis deductos summittebant.
CAES. Gall. 7, 81, 3.
11.Tunc (homines) aliena tecta observantes et suis cogtationibus res
novas adicientes, efficiebant in dies meliora genera casarum. Cum essent autem homines imitabili docilique natura, cotidie inventionibus gloriantes ostendebant aedificiorum effectus. Primumque furcis erectis et virgulis interpositis luto parietes texerunt. Alii luteas glaebas arefacientes struebant parietes, et contra imbres et aestus tegebant harundinibus et fronde. Posteaquam per hibernas tempestates tecta non potuerunt imbres sustinere, fastigia facientes, luto inducto proclinatis tectis, stillicidia deducebant.