DIVINE WORSHIP MESSAGE | WM 25 ANNIVERSARY SABBATH

August 22, 2020

“Patinayon nga Aguk-ukrad”
Panangiyammo:
Nalasin yo kadi nga no agmula kayo iti aniaman ti daga ket agtubo no sadino ti nangimulaan yo kenkuana?
Kalpasan a ti bukel ket maimula iti nadam-eg a daga, masibugan ket maaywanan ti init a mangted ti gundaway
tapno agrusing ken agtubo. Wen, namnamaen tayo ti bukel nga agtubo ken mangted ti bunga tapno makaipaay
iti aniaman agpaay kadatayo. Saan tayo laeng nga agmula iti bukel, kayat tayo nga agsabong ken mangted ti
naimbag a bunga.
Iti daytoy a panawen ti pandemic, dagiti tattao ket rinugian da nga nagsubli kadagiti pagmulaan da tapno
agmula. Gapu iti kinawadwad ti panawen, nabaelan da manen nga riingen ti kinalaing da nga agmula ti nateng,
sabsabong ken prutas. Dagiti addaan taltalon ket agragsak da nga mangtaming iti talon da. Dagiti tattao nga
awan pagesman na iti mula ket agsiddaaw da ken rugian da nga makita a makayatan da metten dagiti
sabsabong wenno natnateng, ket rugian da nga aramiden a kas maysa a pagwatwatan wenno pagliwliwaan da.
Nu agmula tayo, siguradoen tayo nga ti imula tayo ket agtubo, agsabong ken agbunga. Tapno maarpat tayo
dayta a gakat, taripatoen tayo dayta a mula, sibugan ken bay-an a masilnagan iti init, ken ikkan abono no
kasapulan. Aywanan tayo dagiti mulmula agsipud ta ammo tayo a makaipaay da iti napintas nga banag
kadatayo.
Kasta met, datayo nga tattao ket kapada ti mula. Ti inted ti Dios a biag ket addaan iti gannuat, tapno agbunga
agpaay ti sabsabali, ken mangipaay iti naimbag kadagiti makapulapol na. Ti plano ti Dios ket naaramid a
nasayaat. Datayo ket naaramid tapno agdakkel no sadino nga inmula natayo ti Dios.
Teksto nga Adalen: Salmo 92:12-14
12 
Ti nalinteg agrangpayan to a cas iti cayo a palma: bumaludbod to a cas iti cedro ti Libano.
13 
Adda da a naimula idiay balay ni APO; agrangpaya danto cadagiti paraangan ti Dios tayo.
14
Agbunga danto pay laeng iti kinalacay da; situtubbog danto ken silalangto danto:

Kararag: Amami a nailangitan, Namarsua iti langit ken daga, iti daytoy a gundaway ket mamati kami a
dakami ket naparsua iti naisangsangayan a pamay-an ken naparsua tapno mangted iti liwliwa ken bang-ar
kadagiti sabsabali. Numan pay naparsua kami nga awan pagkurangan na, ngem gapu iti natawid a basol
kadagiti amma mi, dakami ket nasarakan nga agbasbasol ken nagaramid ti maicaniwas iti pagayatam. Sapay
kadi ta pakawanen nakami ken ugasan nakami ket aramiden nakami a maikari a sumaklang Kenka ket maam-
ammo daka a naan-anay tapno maaddaan tayo iti napintas a relasyon. Patien mi la unay nga dakami ket kasla
mula a naimula ditoy daga ket awan ti mabalinan mi no saan kami a nakasilpo kenka. Isut’ gapu na nga sapay
kadi ta sika ti agtimek kadakami ita nga agsapa ken ti Santo nga Espiritu ket ipakaawat na ti adalen mi tapno
maammoan mi ti panggep mo iti biag mi. Dawaten mi ngarud nga ikkatem kadi ti kabusor iti nagtetengngaan
mi tapno saan nakami a masinga iti inkam panagadal, dagitoy ti ipakpakaasi mi a dawaten iti nagan ni Apo
Jesus, Amen.

I. Abigail: ti babai a Natured ken Napigsa

Idiay 1 Samuel 25 mabasa tayo ti estoria ni Abigail, ti asawa ni Nabal. Isu ket “babai nga addaan naimbag a
pannakaawat ken napintas.” Daytoy a kapitulo ket ibaga na ti estoria ti babai nga mangilungalong iti
pannakawayawaya na ken ti kinalaing nga mangpunno iti umay a didigra. Ni Abigail ket natured a babai nga
nagaramid ti naimbag iti narigat a kasasaad. Ti pannakidenna na ti nabayag a tawen ken Nabal ket saan nga
namagbalin kenkuana a napait wenno manangibales. Ti Dios ket dinayaw na ni Abigail gapu iti kinatakneng na,
ti kinalaing na, ken ti panagduyos na nga agaramid iti naimbag iti baksay ti narigat a kasasaad.
Iti bersikulo 7 ken 16 ket makita tayo ni David nga inaywanan na dagiti karnero ni Nabal ket dumawat iti pabor
kenkuana a kas subad: nga ni Nabal ket mangted koma iti pagpakan na inton umay da iti maysa a nasayaat nga
aldaw. Ni Nabal ket nabaknang (addaan ti tallo ribu a carnero ken sangaribu a calding sabali laeng dagiti bunga
ti talon na), ket saan met siguro a makasinga kenkuana no mangted iti bassit kadagiti arban na, ngem saan nga
nagbalin a nasirib ken impetteng na ti kinaimot na a kas iti nagan na (ti kayat a sawen ti Nabal ket maag iti
pagsasao a Hebreo), ket pinili na ti nanglalais kadagiti imbaon ni David, isu a napilitan ni David a manglaban
kenkuana. Innala na ti armada na nga 400 a lallaki, ket rimmuar ni David tapno ikisap na ti sangkabalayan ni
Nabal, ngem no saan koma a gapu iti sirib ti maysa a babai naikisap koma ti balay na.
Nabigbig na nga ni David ket adipen ti Apo, ni Abigail ket nangipatulod iti nawadwad a regalo ken ni
David, (v18 nangala ni Abigail iti dua gasut a tinapay, dua gasut a casupot a lalat nga arac, lima a carnero
a naparti, lima casucat ti kinirog a bucbukel, sangagasut a caraay a pinakebbet nga ubas, ken dua gasut a
catipkel nga higos) ket karaman dayta a regalo impakumbaba na ti bagi na iti sakaanan ni David a
nagpakpakaasi iti biag ti asawa na. Saan na nga inlibak nga ni Nabal ket nagusbang ken awan ti
pagustoan na, ngem dimmawat iti parabur gapu kenkuana.

Iti daytoy a napintas nga estoria, makita tayo ni Abigail nga nagukrad iti laksid ti narigat a kasasaad na
iti biag.

1. Idinto a ni Abigail ket nabaknang, nagtalinaed nga naemma. Saan na nga insaad ti puso na
kadagiti kinabaknang da ken saan met a nagbuteng nga mapukaw na dagiti amin a sanicua da.
2. Nagaramid a nainsiriba. Idin a ti biag na ken ti amin nga am-ammo na ket agngangabit ti biag da, saan
nga nagpaiduyos iti buteng; Iti amin a panawen ti panagbiag na, idinto nga nagtalinaed a naemma iti saklang ti
nauyong nga asawa na bayat ti panawen ti panagdenna da, ti Dios ket binukel na ti kababalin iti puso na, nga
isu ket dimmakkel a nadayaw ken mannakabalin nga babai, uray iti baksay ni pannakapukaw.
3. Saan na nga kinagura ni lakay na wenno kinanunungan ti aramid na, numan pay karbengan na
ken kalintegan na ti agsao, nagtalinaed a natalna ken kalmado. Numan pay saan na a kayat ti ar-aramiden ti
asawa na, ngem saan na a kinanunungan ti kinadakes na.
4. Isu ket natured a babai. Nagna isu a sinabat ti tao, nga ammo na nga isunto ti agari iti Israel, nga addaan
ti uppat a gasut nga napipigsa ken makakaunget a lallaki ti gubat.
5. Addaan dackel a pammati iti Dios ken bigbigen na ti plano ti Dios agpaay iti Israel maipapan ken ni
David, ti lalaki a nagpanggep a mangrippuog iti amin nga adda iti balay na. Daytoy a pammati ket nangted
kenkuana iti kired ken pakinakem nga ni David ket ispalen na ti biag ti sangkabalayan na maipagapu kenkuana
agsipud ta ni David ket managbuteng iti Dios.
6. Isu ket managpakawan. Ti kinaemma, dayaw, respeto ken kinasirib ket mapukaw gapu iti kinagusbang
ken kinaawan nakem a mamakawan. No ni Abigail ket nagbalin a kas iti asawa na a maag, ket nagbalin met a
nagusbang, saan na koma a naaramid ti napan nagpakaasi ken David ket di met koma a nangipaay iti sagsagut
idinto nga agngangabit ti biag da a maikisap.
7. Inkanawa na ti pagimbagan dagiti kabusor na. Ammo ni Abigail a ni David ken dagiti buyot na ket
kasapulan da ti makan – tapno adda pammigsa da a makigubat. Pinanunot ni Abigail ti kasapulan da, saan nga
ti unget ken ti pangta da a panangikisap iti balay da.

Ni Abigail ket natured, a nangaramid ti nasisita a desisyon numan pay kabutbuteng nga aramiden. Saan nga
nga inkankano ti peggad agpaay iti pagimbagan dagiti sabsabali. Importante nga maammoan no kasano ti
aramiden iti kastoy a kasasaad. Adalen nga agaramid ti maiyannatup nga pamuspusan tapno mangsalbar
kadagiti ayaten iti biag nga uray no saan nga ammo dagiti kaadduan.
Ti kinalaing nga agpanunot ti pamuspusan nga bukbukod tapno agtalinaed ti kappia ket marka ti nasirib a
babai. Ti panangilungalong iti natalna nga aglawlaw a saklawen ti impluwensya tayo ket mangipasimudaag iti
kinauneg ti kinasirib ti maysa a tao. Kuna ni Jesus kadatayo, “Nagasat dagiti mamagcacappia, ta managan
danto annac ti Dios” (Mateo 5:9). Ti bunga ti kappia ket masarakan no datayo ket makikayyamet iti patigmaan
ti Espiritu Santo kabayatan ti panangidalan Na kadatayo iti narikut ken nadawel a pannakirelasyon.

II. Agrusing No Sadino a Naimula (Bloom Where You are Planted)

Ti pagsasao nga “agrusing no sadino a naimula” kayat na a sawen nga ti maysa a tao ket masapul nga alaen na
amin nga gundaway nga adda iti biag na ken agbalin nga managyaman iti kasasaad nga agdama. Masansan, no
saan ka a naragsak gapu iti biag mo, agparigat ka iti daytoy a pagsasao. Nupay kasta, adda adu a banbanag nga
mabalin mo nga aramiden tapno makasaranget kadagiti panawen a saan a nasayaat kas iti agdama a pandemic.
 Umuna, agtrabaho iti panangwatwat iti nasimbeng a kapanunotan. Padasen nga ayaten ti
agdama ken awaten ti panagbaliw ken ti ibunga na. Adu a tao ti makarikna a ti panunot da ket saan da
a matengngel. Idinto a saan tayo nga addaan iti naan-anay a panangtengngel iti bukod tayo a rikna ken
kapanunotan, adda dagiti banbanag nga mabalin nga aramiden tayo tapno maidalan ti panpanunot
tayo. Idinto a saan mo a mabalin a masukatan ti kasasaad ti lubong, ngem mabalin nga agtrabaho ka
tapno maisimpam ti lubong mo a kas iti pagayatam. Awaten tayo ti panagbaliw inton umay ken
mapasamak da. Sadinoman ti nakaimulaam, ti kasasaad ken pagbanagan ket agbalin iti panaglabas ti
tiempo. No kayat mo nga agsabong iti laksid dagiti makalapped a kasasaad ti biag, importante nga
maadal mo ti napakumbaba a panangarakup iti panagbalbaliw wenno pagbaliwan. Laglagipem, ti
panagbaliw ket nasken tapno agprogreso. No dagiti banbanag ket agtalinaed da a kas iti kasisigud da
idi ugma, awan ti panagdakkel wenno panagaddang iti masakbayan. No adda banag a nagbaliw iti
kallabes, nasken nga awaten a saan ket nga agtanabutob wenno makaunget gapu ta masuktan dagiti
banbanag a nakairuaman. Nasken nga kumita tayo kadagiti gundaway ken wagas tapno mabaliwan ti
kasasaad tayo. No adda ka iti maysa a kasasaad a saan nga naimbag kenka, adda dagiti pamuspusan
tapno sukatam wenno ti bagim agpaay iti pagimbagan. Ipateg mo ti aniaman nga ik-ikutam. No
agsarumadeng ka ket makitam ti biag mo a saan a kapkapnekan, maapektaran ti panangkitam iti
sangalubongan, ket mapaksuyan ka iti panagbiag mo. Ti negatibo a kapanunotan ket mangparigat a
makasabong wenno agrusing ti maysa a tao, a kas iti mula. Imbes nga agtarigagay iti naimbag a
 kasasaad, mangkita kadagiti banbanag nga mabalin mo nga maapresyar ita. Daytoy ti mangtulong
kenka tapno mamuli ti positibo a kababalin a kasapulan tapno dumakkel ken agsabong.

 Maikadwa, kumita kadagiti gundaway sadinoman ti pakasarakam. Saan a mabuteng,

agaramid ti adu a pakikadwaan, ken agtrabaho a kas kabaelan. Liklikan ti kanayon nga
panagtanabutob gapu iti saan a nasayaat a kasasaad. No saan mo a kayat ti maysa a banag, kitaem no
ania ti mabalin mo nga aramiden tapno masukatan a saan ket nga agpanunot kadagiti negatibo a
banbanag. Agtaeng ka iti agdama. Saan mo nga ukagen dagiti napalabas a kalman, ta nicaanoman ket
di ka makagteng iti masakbayan, ta mataktak ti pangrusing mo iti agdama. No adda ti pagbabawiam ti
kallabes ket ipakitam ken karitem iti bagim tapno agsimpa ti panunot mo ken aramidem ti amin a
kabaelam tapno maartapan aniaman a sumangbay a riribuk ken didigra iti biag mo. Iperreng mo ti
bagim iti mabalin mo nga aramiden a naimbag ken makaay-ayo iti imatang ti Dios iti agdama. Agimula
ka iti natibker a relasyon. Kadagiti adda iti aglawlaw mo ket mabalin nga isu da ti aramatem tapno
mangted kenka iti pammapigsa wenno kired nga agtuloy iti laksid ti sagsagrapem a naladingit a
kasasaad. Ti pannakikayyamet ket saan laeng nga agpatingga iti agdama no di ket mabalin nga isu pay
ti tumulong kenka iti masakbayan.
 Maudi, aramidem amin a kabaelam iti maysa (tunggal) nga aldaw. Padasem nga agbalin a
positibo iti maysa nga aldaw ken iti sumaruno, ket makitam to nga in-inut ti panagrusing mo – a kas
maysa a nalasbang a sabong. Ipakitam ti kinakaradkad ken impluwensiyam kadagiti sabsabali iti
positibo a pamay-an. Uray babassit a banag ket mabalin ka nga agrusing iti maysa nga aldaw no
inaramid mo amin a kabaelam. Ti panangtulong kadagiti tattao nga mangital-o a saan ket nga
mangipababa ket dackel ti maaramidan na a panagbaliw kenka ken iti aglawlaw mo. Mabukel met ti
napintas a gald mo, a mangtubay kaniam tapno maaddaan ti positibo nga enerhiya ken kababalin nga
agtuloy iti panagbiag. Agtrabaho tapno mapukaw ti kinaimbubukudan ken maaramid dagiti bambanag
iti dadduma nga awan ti ur-urayen a supapac na. Ti panagserbi kadagiti sabsabali ket mangiwanwan
kenka iti nasimbeng a panunot ken kapadasan a mamaragsak iti kararua.
Agaramid ti babassit a banbanag kadagiti tattao a masalaw mo. Agisem kabayatan ti panagbayad,
wenno tulungan ti naiwawa ken saan na ammo ti dalan na. Wenno padasem ti agbalin a kalmado uray
no saan a napintas ti napasamak kenka. Nupay naupay ka iti trabahom, saludsudem ti bagim no apay a
napasamak kenka dayta a banag. Iyugalim iti managyaman. Bumangong tunggal agsapa nga silalagip
iti Namarsua ken dagiti ay-ayaten iti biag, ken dadduma a nasken a pagyamanan. Daytoy ket tumulong
tapno maiparang kenka a saan laeng a sika ti makin-iggem iti biag mo no di ket maysa ka laeng a
managaywan. Iti agsapa, panunotem dagiti banbanag a nasken a pagyamanan. Daytoy ti mangted
kenka iti naimbag a kapanunotan ken positibo a masakbayan. Panunotem ti dacdackel nga parang
wenno ladawan. Ania kadi ti dacdackel nga rason nga agbibiag tayo ditoy rabaw ti daga? Ti kadi
sanikua, dagiti kadi nagannak, wenno dagiti annak, dagiti kaarruba, wenno kaeskwela kadi, wenno
gagayyem or katrabahoan? Saan, no di ket ni Apo Dios. Adda tayo a sibibiag iti baksay ni basol agsipud
ta insalakan natayo ni Jesus ket sitatalged tayo a makitipon to idiay langit nga naisagana agpaay
kadagiti agkamatalek iti panagparang na a maikadwa. Inton makitam ti pagturungan ti biag mo,
maanag mo a nasken gayam nga agpatuloy ka a magna ditoy daga numan pay adu ti saan a nasayaat a
pagteng a sumangbay kenka. Inton mapanunot tayo ti rason ken gannuat tayo ditoy rabaw ti daga,
dayta metten iti kanito nga agrusing tayo ken umadu ti alaen tayo nga gundaway tapno lumaglag-an ti
kasasaad tayo iti agdama agpaay iti masakbayan.

Maudi a Pannarita (Conclusion):

Iti daytoy a tiempo ti karit gapu ti COVID-19 a pandemic, ikkan natayo ti Dios iti tured ken positibo a
kababalin. Ilukat na dagiti ruangan no sadino a makita tayo ti gundaway tapno agdackel ken saan nga
maiperreng kadagiti problema a mangidasay kadatayo. Kas ken ni Abigail, usaren tayo ti sirib nga inted ti Dios.
Managkarkararag tayo koma ken kanayon nga basaen ti Nasantoan a Biblia tapno makaala kadagiti paltiing
ken pangpakired. Agbalin a naemma nga mangawat kadagiti pagkurangan ken agadal kadagiti
pagkamkamalian iti kallabes. Gapu laeng iti patinayon nga pannakikadwa ti Espiritu Santo a mabalin tayo ti
mangabak iti dangadang ti biag.

Mapapigsa tayo koma babaen dagiti karkari ti Dios iti

Jeremias 33:3 “Awagannac ket sungbatan canto, ket ipakitac to kenca dagiti dadackel a banbanag, ken naricut,
isuda a saanmo nga ammo.”

Deuteronomio 31:6 “Pumigsa ca, ket umingel ca a naimbag, dica agbuteng, wenno makigtot cadacuada: ta ni
APO a Dios mo isu ti makicuyog kenca; dinto agcurang kenca, wenno di met agliway kenca.
8 Ket ni APO isu ti mapan iti sangoanam; isu ti cumuyog to kenca, isu dinto agcurang kenca,
wenno dimet agliway kenca: dica agbuteng, wenno agcullayaw.”
Filipos 4:13 “Mabalinac dagiti amin a banbanag gapu ken Cristo a mamapigsa caniac.”

Kakabsat ken gagayyem, agtangkaya koma ti sabong tayo ken agbunga iti panawen na tapno dagiti
tattao a makapulapol tayo ket masarakan tayo inton umay ni Apo Jesus nga mangala kadagiti annak na.
Pampanunoten, agbiag a kas ken ni Abigail tapno mangkita iti pamuspusan a mawatwat ti nasimbeng a
kapanunotan, makakita iti gundaway nga makaaramid iti pagsayaatan, ken makaaramid segun iti kabaelan
tapno awan ti pagbabawian inton kanibusanan ti lubong a pagbibiagan.