PANAGTRABAHO TI NABALLIGI A BABAI

“Ket ni Pedro kinuna na: Awan caniac ti pirac uray balitoc; ngem ti adda caniac, isu ti
itdec kenca; iti nagan ni Jesu-Cristo a taga-Nazaret, magna ca.” (Dagiti Aramid 3:6)

Kasano ti panangkita dagiti pada tayo a tao kadatayo? Masansan nga bayat ti panagbiag
tayo, padasen tayo nga pagbiagan ti ekspektaren dagiti tattao kadatayo. Ngem saan nga
amin a banag ket mabalin tayo nga aramiden a perpekto wenno nalinteg agsipud ta tao
tayo, nga addaan ti natawid a basol sipud pay naiyanak tayo. Masapul nga awaten tayo ti
kinasiasino tayo iti imatang ni Cristo ket kitaen no ania ti ekspektaren ti Dios kadatayo.
Panunoten tayo nga ti Dios ket adda laeng ti sumagmamano a talento nga impaay na
kadatayo. Ti pangngarig dagiti talento ket isuro natayo nga nadumaduma ti tukad ti
talento a naipaay iti tunggal tao. Nasken nga usaren tayo dagiti talento tayo tapno
mabendisionan dagiti dadduma ken makaipaay ti dayaw ken dayag iti Dios.
Ania ngarud ti rebbeng nga aramiden tayo tapno matungpal tayo ti panangaramat
kadagiti talento nga impaay iti Dios?
1. Nagannak. Iti linteg ti Dios ket inkabil na ti maysa a bilin nga addaan iti kari.
Daytoy a bilin ket nasken a panunoten tayo agsipud ta awan ti kapada na kadagiti
siyam. Ania kadi daytoy? Dayawem da amam ken inam tapno umatiddog dagiti
aldaw mo iti daga nga ni Jehova a Dios mo ited na kenka. (Exodo 20:12)
2. Asawa. Idi punganay ket inaramid ti Dios ti tao a lalaki ken babai. Inaramid na met
a nasantoan ti panagassawa. Ni Apostol Pablo ket ibaga na kadatayo ti maysa a
balakad:
A. Lallaki = Lallaki, ayaten yo dagiti assawa yo, a cas met iti panagayat ni
Cristo iti Iglesia, ket inyawat na ti bagi na gapu kenkuana. Casta met ti
rebbeng a panangayat dagiti lallaki cadagiti assawa da, cas cadagiti bagi da.
Ti agayat iti asawa na, ayaten na ti bagi na. (Efeso 5:25, 28).
B. Babbai = Dacayo babbai, agtulnog cayo cadagiti assawa yo, a cas iti Apo. Ket
ti babai padayawan na coma ti asawa na. (Efeso 5:22, 33)
3. Dagiti Kameng ti Iglesia. Magnacay coma a maicari iti pannacaayab a nacaawisan
yo. Nga agawaan yo a salimetmetan ti panagmaymaysa ti Espiritu iti singgalut ti
talna. Ngem iti tunggal maysa kadakayo naiccan iti parabur, cas iti rucod ti sagut
ni Cristo. (Efeso 4:1,3,7).
4. Dagiti annak. Tubngarem ti anac mo, ket itden nanto kenka ti inana; wen, itden
nanto ti rag-o ita cararuam. (Proverbio 29:17) Anacco, itdem caniac ta pusom; ket
dagiti matam pagayatan da coma dagiti daldalan co. (Proverbio 23:26).
5. Dios. Ket apay-apay awagandac iti Apo, Apo, ket dicay met aramiden ti ibagac?
(Lucas 6:46). Gapuna, uray mangancayo, uray uminum cayo, wenno uray ania nga
aramiden yo, aramiden yo amin a maipaay iti dayaw ti Dios. (1 Corinto 10:31)

PANANGARAMAT ITI SAGUT TI DIOS

Adda dua a tao nga napan iti templo tapno agkararag ti nakasarak iti maysa nga pilay
nga agpalpalama. Dinawat na nga ikkan da isu iti sanicua nga adda kadakuada. Ngem da
Pedro ken Juan ket awan sanicua da. Isu nga kinuna da, “Awan caniac ti pirac uray
balitoc; ngem ti adda caniac, isu ti itdec kenca; iti nagan ni Jesu-Cristo a taga-Nazaret,
magna ca.” (Dagiti Aramid 3:6).
Saan tayo mabalin nga maipaay ti awan kadatayo. Da Pedro ken Juan ket inted da no
ania laeng ti adda kadakuada. Daytoy ket maawagan nga parabur ti panangagas. Saan nga
amin a tao ket kabaelan na ti mangagas. Ngem aniaman ti talento nga inted ti Dios
kadakayo, aramaten yo tapno makapagserbi kayo iti pada yo a tao ken kasta met iti Dios.
Saan nga namnamaen ti Dios nga ipaay kadagiti tattao ti banag nga saan Na nga
impaay kadatayo. Kas babbai nga Adbentista, nasken a mangibingay tayo kadagiti tattao,
saan a gapu iti inanamaen da kadatayo, no di ket segun iti wagas ken pamay-an a kayat ti
Dios nga pangaramatan tayo kadagiti sagut na kadatayo.
Adda idi ti nalibnos a babai nga nangabak iti maysa a beauty pageant. Iti kasta,
nagbalin nga reyna ken asawa ni ari Asuero iti pagarian ti Persia. Ngem ni reyna Esther ket
saan laeng a kinapintas ti adda kenkuana. Addaan pay iti napigsa a kababalin ken
panagayat iti Dios a nangnangruna agraman dagiti tattao Na.
Kalpasan a nagbalin a reyna ni Ester. Adda maysa a lalaki ti nagpanggep a
mangpapatay kadagiti amin a Hudyo. Idi naammoan ni Ester, imbaga na nga nasken nga
makiballaet ket aramiden na ti kabaelan na tapno maisalakan dagiti kakailian na iti
pannakapapatay. Numan pay saan pay a tiempo tapno agparang ni Ester iti ari,
nakasagana isu na nga aramaten ti sagut ti Dios kenkuana. Naawatan na nga ti sagut ti
Dios ket isu ti kaadda na iti pagarian ken “maipaay iti tiempo a cas itoy” (Ester 4:14).
Ammo tayo ti napasamak kalpasan na nga naispal dagiti Hudyo gapu iti inaramid a
pannakiballaet ni Ester.
Kasta met kadi a datayo, babbai nga Adbentista, ket adda met iti pagarian ti Dios iti
daytoy a tiempo iti pakasaritaan ti lubong nga addaan dackel nga akem? Amin tayo ket
addaan ti naduma-duma a sagut, abilidad ken arapaap. Ania ti ar-aramiden tayo kadagiti
gundaway nga inted ti Dios kadatayo? Amin tayo ket addaan iti paset iti pagarian ti langit.

PANAGLEPPAS
Ti Dios iniccan natayo kadagiti sagsagut tapno aramaten tayo. Ket awan karbengan
tayo a mangaramat iti talento a saan a naipaay kadatayo. No kasta ti aramiden tayo ket
saan tayo nga agballigi.
Numan pay saan nga agpapada ti naipaay a sagut ti Dios kadatayo. Ngem ammo na
nga inton aramaten tayo dagitoy ket makaay-ayo iti imatang Na ken kadagiti tattao a
pagserbian tayo. Ni Ellen White insurat na iti Balbalakad Kadagiti Ig-Iglesia ti kastoy:
Idianyo dagiti naimbubukodan a ragragsak yo. Aramaten yo dagiti laing yo nga
agparnuay iti panangitured. Iti saad ti panangpennek iti naimbubukodan a duyos,
adalen yo no kasanot’ panangpaidam iti bagi, tapno adda maipaay yo iti
pannakaitag-ay ti wagayway ti pudno kadagiti baro a kataltalonan. Maysa a
talento ti saririt; isut’ aramaten yo a panangadal iti kasayaatan a panangaramat
iti sanikua [ken talento] yo iti pannakaisalakan dagiti karkararwa.
Dagidiay mangipaidam iti bagi tapno makaaramid da iti naimbag kadagiti
sabsabali, ken mangaramat kadagiti bagbagi da ken amin nga adda kadakuada iti
 panagserbi ken Cristo, ti makabigbig to iti kinaragsak a sapulen nga awan
maganganab ti naimbubukodan a tao.
Kinuna ti Mangisalakan tayo: “Uray siasino kadakayo a dina paglikudan dagiti
isuamin a kukuana saan a makapagbalin nga adalak.” (Lucas 14:33). Ti ayat “saan
a naimbubukodan.” Daytoy ti bunga dayta saan a mangilidlidding nga ayat ken
kinamanagparabur a nakarasaritaan ti biag ni Cristo.
Gapu kadagiti di naimbubukodan a sao ken ar-aramid inagawaan da a
pinarubrob daytoy nga ayat kadagiti sabsabali a puso. Masapul a taginayonen
dagiti mamati a kupikopan ti ayat a mangpunno iti puso.

Ania kadi ti kabaelam nga ipaay iti Apo? Ti oras mo? Ti talentom? Ti sanicuam? wenno ti
ayat mo? Panunoten tayo nga immuna inayat natayo ni Cristo isu a kinunana, “Kas iti
panagayat ko kadakayo, kasta met agayan-ayat kayo koma iti maysa ken maysa.” (Juan
13:34).
Panunoten tayo ti imbaga ni Apostol Pablo, iti 1 Corinto 10:31 nga amin koma nga
aramiden tayo ket maipaay iti dayaw ti Dios. Sapay koma nga naballigi ti aramiden tayo a
panagserbi iti Dios kadagiti sumarsaruno nga aldaw ti panagbiag tayo.

Dios ti mangbendision iti tunggal maysa kadatayo.