 King lagyu ning Ibpa ampon ning Anak, ampon ning Banal a Espiritu. Amen.

Pamuklat a Dalit kang Maria:

KAPANISYAN
Manimuna: Ginu ko at Dios ko, manigapu ku arapan mu, kipnuan beluan
king aku tau kung makasalanan. Ika mu kabud ing Ginung
mapamakalulu at mapamatawad. Likwan me ing kekang kawan
ban panintunan me ing metung mung tupang mebating. Sisisian
ku ing sablang kasalanan ku at makasadia kung magbalik lub
keka king kapamilatan ning kapagnasan kung dumurup king
sakramento ning pamikasundu. Saupan mu ku king mal mung
gracia ban mirinan kung sikanan apakit keka ing tune kung
lugud; tanda ning dalise kapaglarinan king nanu mang kasiran a
agawa ku king milabas kung pamibie-bie. Kasumangid ning
kanakung dewakan, Ginu, ika naman parati lang makaladlad
ding gamat mu king pamanenaya mu kanaku. Patawaran mu ku
Dios ko! Ipanigapu ku keka ing maglarin ku at tupad king
kaburian mu. Amen.
PANALANGIN
Manimuna: O Dios a mayupaya’t mapamakalulu, a king ba yang
mipamingua ing balayan Cristianos, inalal meng pelagiung
Talapanampun ing Kasantusantusan a Virgen Maria,
ipagkalam mu kekami king ikaming mipasiknangan lub king
kapamilatan ning kayang kayampunan, makipamuk kekaba
ning bie mi at akarnan mi ing maguagi king masingil ming
kasalang. Iti aduan mi kapamilatan nang Cristong Guinu mi.
Amen.
PANALANGIN KANG MARIA A TALAPANAMPUN KARING CRISTIANOS

Manimuna: O Maria, Indung Mapanampun karing Cristiano, sari king

kalinangan, itugtug mu karing pusu mi ing pamikasundu at
kapayapan. Iti sanang panyulung ning kabiasnan mamunga
yang lalung malalam a pamiyampangan sarili. Ding sablang
kalam a tinggap mi keka magamit la sana king panyulung ning
pamiabe-abe ding atinan at kalulu, ding matula at maluka.
Deti sanang mayap a kapagnasan at kayaduanan idala ra kami
king kayarian ning kekang Anak nung nukarin mag-ari ing
katuliran at kapayapan. Amen.
Santa Ana Parish Liturgical Commission 1|Page
 MEMORARE
Ganacan mu sa, king capilan man e pa merandam O Cabanal-banalan a
Virgen Maria ing ating catau mu man linapit pepayampun, menigapu at
meniauad king kekang saup ing mipabustan ya. Ikami, metung a
palpicasala mesican kami lub caniting capaniualan lalapit kami keka O
Indung Virgen ding Virgenes, kecayu ke dururup, arap yu ini kekaming
daraing. O Indu ning Dios, e mo pisasauilian ing kekaming amanu, nune
bagkus malam mung pakirandaman manga apianan. Amen.

V: Ibpa mi atyu ka banua, misamban ya ing lagyu mu datang kekami

ing kayarian mu mipamintuan ing lub mu keti sulip anti banwa.

R: Ing kakanan mi king aldo-aldo ibie mu kekami king aldo ngeni,

ampon ipatawad mo kekami ring sala mi keka anti ing
pamamatawad mi karing mikasala kekami manga e mu ke ipaisaul
king tuksu nune ikabus mu kami king sablang marok.

V: Bapu Maria mitmu ka king grasya, ing Guinu atyu keka,

Nuan ka karing sablang babai at nuan ya pa naman ing bunga
ning atyan mu i Jesus.

R: Santa Maria, Indu ning Dios, ipanalangin mu kaming makasalanan

ngeni ampon king oras ning kamatayan mi. Amen.

V: Ligaya king Ibpa, ampon king Anak, ampon king Banal a Espiritu.
R: Antimo ing sadia rang ligaya, ibat king kamumulan, ngeni at king
kapilan man, at manga king alang angga. Amen.

ING DAPAT PAMAGTAGULALING KING KALINISLINISAN A

PUSU NANG MARIA
O Maria, mayupayang Birhen at Indu ning pakalulu, reyna ning
banua at santungan ding palpikasala, tatagulaling mi ing kekeng sarili
king kalinislinisan mung pusu.

Tatagulaling mi keka ing kabilugan ming panga-tau at ing egana-

gana ming bie, ing sablang atyu kekami, ing sablang lugud mi, at ing
sablang ikami. Keka babie mi la ring kekeng katawan, pusu at kaladua;
keka daraun mi la ring kekeng pibale-bale pamilya at bansa. Pagnasan mi
king ing sablang bage atyu kekami, at ing sablang bage tungkul kekami,
Santa Ana Parish Liturgical Commission 2|Page
makirake karing kalam ning makaindu mung kanwanan at karing bunga
na niti. at iti sanang pamagtagulaling tune yang maging mabisa at
manatili, a babaywan mi karing bitis mu king aldo ngeni. Ibayu mi la ding
pangaku ning kekeng binyag at ning kekeng primera komunyon.
Magtantu ming mipasiag mitmung tetagan king sablang panauning
katutwan ning kekatang banal a kasalpantayanan katolika, at mibie-bie
anting katoliku king lubus a pamipaylalam karing anggang utus ning
santo papa at ding obispo king pamakisamak keya. Ipangaku mi ing
kekeng sariling tupad karing kautusan ning Dios at ning Banal a
Kapulungan, lalung lalu na king pamipabanal king aldo domingo.
pagkapilitan ming kumaul king aldo-aldo ming pamibie-bie, angga mu
ring malyari, ring makapasno nang kaugalian ning relihiyon Cristiano at
babo ning sabla, ing banal a pamakinabang.

Katataulian, ipangaku mi keka, o maligayang Indu ning Dios at

mayubung indu ning tau, ing pangabalanan mi karing mabilug ming
pusu ing debosyon king kekang nuan a kasuywan, ban keta
apamaligwanan mi’t apatutwan kapamilatan ning pamag-ari ning
kalinislinisan mung pusu, ing kayarian ning kalugud-lugud mung anak,
karing kaladwa mi’t katawan ring sabla a magkarinan king pakamalan
ming bansa, at king kabilugan a yatu keti sulip anti banua. Amen.

PANGAKO KING
NUAN A VIRGEN MARIA, MAPANAMPUN KARING CRISTIANOS
Ikaming Cristiano Catolico, manuknangan king Vicaria nang Maria,
mapanampun karing Cristianos, sasalpantaya kami king tuturu nang
JesuCristo at manalig king kasaupan nang Maria, karing sablang
Cristianos. Itatagulaling ming lubus ing sarili mi king pamikatulad king
kabanalan ng Maria, mibiebie kawangis ning keya layun ilaganap mi ing
lugud at debosyun keya king kekaming pamilia, eskuela, at parokia king
kapamilatan ning panalangin ampon dapat a mayap. Ipangaku mi ing
tuparan mi ing katungkulan mi king Vicaria nang Maria, Mapanampun
karing Cristianos. Mananu na sanang saupan na kami ning Dios ampon
ning Virgen maging tapat king kekaming masusing pangakung iti. Amen.

Santa Ana Parish Liturgical Commission 3|Page

 PAMUPUS A PANALANGIN

Maligayang tutu at mapamakalulung Dios, king makapagmulalang

paralan. ing Nuan a Virgen Maria pepalyarian meng Talapanualu at
Talapanampun da ring sablang sasalpantaya keka. Lalam nang kayampunan,
parati ke sanang magtagumpe king alang patanat ming pamipagkal king
kasalang ding kaladua mi, lalung-lalu na king oras ning kamatayan mi.
Iti aduan mi kapamilatan ng JesuCristong Anak mu, Dios a mabibie ampon
mag-ari kambe mu king kametungan ning Banal a Espiritu mangga man king
alang angga. Amen.

Dalit Pamun
I
Mamun na ke ngeni
O Indung malugud
At keka Jesus ko
King sala menatbus
At bayu ke sana
Kekayu gumulut
Bendisyunan yu ke
King kalam yu't lugud

II
At kabang ati ke
King dalan lalakad
Ilisya yu ke sa
King marok a gasgas
Mata ming malabug
Pasalan yung ganap
Karetang bale mi
Malagwa keng miras

III
Mamun na ke ngeni
Mako na arap yu
Karetang bale mi
Ba nang painturu
Dinan yu ke sana
King mal a grasya yu
//Antimong pabakal
Kekaming anak yu//

 King lagyu ning Ibpa ampon ning Anak, ampon ning Banal a Espiritu. Amen.

Santa Ana Parish Liturgical Commission 4|Page