Ang Dalan Sa Krus

ANG DALAN SA KRUS
PAGSUGOD
Pasiunang Awit..
Pangulo: Sa ngalan sa Amahan, ug sa Anak ug sa Espiritu Santo.
Tanan: Amen
Pangulo:
Mga igsoon, ania kita sa pagsubay sa dalan sa krus aron sa
makausa pa, mapamalandungan nato pag-ayo ang dakung gugma sa
Dios alang kanato. Diha sa misteryo sa iyang kasakitan, kamatayon
ug pagkabanhaw, kita makaangkon uban kaniya sa kagawasan ug
kaluwasan gikan sa kadautan ug sa sala nga maoy hinungdan niini.
Hinaut pa unta nga niining atong pagpamalandong molambo ang
atong pagtoo ug pagkamasinugtanon sa dalan sa katarung alang sa
kabag-ohan sa atong kaugalingon nga kinabuhi ug niining kalibutan
nga atong gipuy-an.
Mag-ampo kita.
Langitnong Amahan, sa makadiyot mihunong una kami sa tanan
namong gimbuhaton, sa pagpanginabuhi ug sa mga butang nga
among gihatagan ug pagtagad sa kinabuhi aron sa paggahin ug pipila
ka gutlo sa pagpamalandong sa mga hitabo labot sa kamatayon ug
pagkabanhaw sa imong pinalanggang Anak, among Ginoo. O
Espiritu Santo, lamdagi ang among salabutan ug tandoga ang among
kasingkasing aron ang among pagtoo molambo ug malig-on. Kini
among gipangayo kanimo pinaagi ni Kristo among Ginoo.
Tanan: Amen.
Awit...
ANG UNANG ESTASYON:
ANG KATAPUSANG PANIHAPON
Pangulo: Nagasimba ug nagadayeg kami kanimo, O Kristo,
Tanan: Kay tungod sa imong santos nga Krus, gitubos mo ang kalibutan.
Pagbasa: Ang pagbasa gikan sa Ebanghelyo sumala ni San Juan. (Juan 13:2-5, 12-15,17)
Samtang nanihapon si Jesús ug ang iyang mga tinun-an, ang yawa mihulhog kang Judas, ang
anak ni Simon Iscariote sa pagbudhi kang Jesús. Nasayod si Jesús nga gitugyan kaniya ang tanang
gahum ug nga siya gikan sa Dios ug moadto sa Dios. Busa, mibiya si Jesús sa lamisa., gihukas niya
ang iyang sapaw ug nagbakos siya ug tualya. Unya naghuwad siya'g tubig sa planggana ug
gihugasan niya ang tiil sa mga tinun-an ug gipahiran sa tualya nga iyang gibakos. Human niya
kahugasi ang ilang mga tiil, gisul-ob pag-usab ni Jesüs ang iyang sapaw ug mibalik siya sa iyang
dapit sa lamisa. Unya nangutana siya, "Nakasabot ba kamo sa akong gibuhat kaninyo? Kamo
nagtawag kanako'g Magtutudlo ug Ginoo, ug husto kana kay mao man kana Ako. Kon Ako nga
inyong Ginoo ug Magtutudlo naghugas sa inyong tiil, paghinugasay usab kamo sa inyong mga tiil.
Naghatag ako kaninyo'g panig- ingnan aron inyong buhaton ang gibuhat ko kaninyo. Karon nga
nasayud na kamo sa maong kamatuoran, bulahan kamo kun inyo kining buhaton.
Pamalandong:
Ang katapusang Panihapon gipadayon karon sa Simbahan diha sa iyang pagsaulog sa Sakramento
sa Yukaristiya diin maangkon nato ang katubsanan ug kaluwasan. Usa kini ka langitnon ug
bililhong gasa gikan sa Dios. Apan wala nato kini kahatagi ug igong kahulugan ug pagtagad.
Gihikawan nato ang Dios sa angayang pagsimba, ingon nga gihikawan nato ang atong kaugalingon
sa grasyang makasantos.
(Hunong sa makadiyot)
Mag-ampo kita:
Langitnong Amahan, dili gayud namo matugkad ang gihimo ni Jesus alang kanamo. Sa dihang
gitigom niya ang iyang mga tinun-an sa Katapusang Panihapon una siya namatay, iyang gihugasan
ang ilang mga tiil aron pagtudlo kanamo nga kami usab kinahanglan nga mag-alagaray sa usag-usa.
Ug diha sa kan-anan, sa iyang pagpikaspikas sa pan ug pagpa-ambit sa kupa sa bino, gihalad ni
Jesus ang iyang kaugalingon ingon nga gasa sa iyang mga tinun-an ug kanamo usab karon. Taliwala
sa mga pag-antus ug kalisod namo sa kinabuhi, sayon kaayo namong malimtan nga kinahanglan
kaming moalagad sa uban, ingon sa gihimo ni Jesus. Diha sa iyang paghatag kanamo sa iyang
kaugalingon sa Yukaristiya, lig-ona kami aron mapaambit namo ang iyang kinabuhi ug gugma
ngadto sa uban. Kini among gipangayo sa ngalan ni Jesus nga among Ginoo.
Tanan: Amen.
Amahan namo...Maghimaya ka...Himaya...
Pangulo: Ginoong Jesus nga gilansang sa krus ug nabanhaw,
Tanan: Kaloy-i kami
Awit… (Kini mao akong lawas)
ANG IKADUHANG ESTASYON:
ANG TANAMAN SA GETSEMANI
Pagbasa: Ang pagbasa gikan sa Ebanghelyo sumala ni San Lukas. (Lukas 22:40-46)
Si Jesus ug ang iyang mga tinun-an nahiabot sa tanaman sa Getsemani. Si Jesus miingon kanila,
"Pag-ampo kamo aron dili kamo madaog sa panulay." Unya mipahilayo siya kanila sa gilay-on nga
ma-abot sa paglabay sa bato, ug miluhod siya ug nag-ampo "Amahan," miingon siya. "Kun buot ka,
kuhaa kining kopa gikan kanako. Apan dili ang akong pagbuot, kon dili ang imo ang matuman."
May mga anghel nga mitungha gikan sa langit ug milig-on kaniya. Ug samtang nag-antus siya labi
pa gayud ka mainiton. Nangahulog sa yuta ang iyang mga singot ingon sa dagkung tulo sa dugo.
Human sa iyang pag-ampo, mitindog siya ug mibalik ngadto sa iyang tinun-an. Nakaplagan niya
sila nga mahitulog tungod sa hilabihang kasubo. Ug miingon siya kanila, "Nganong nangatulog
man kamo? Bangon ug pag-ampo kamo aron dili kamo madaog sa panulay."
Pamalandong:
Mga igsoon, sa makausa pa, atong pamalandungan ang pag-ampo ni Jesus sa tanaman sa
Getsemani. Uban sa iyang kabalaka ug kasubo, pagduhaduha ug kahadlok, Siya nangamuyo ngadto
sa Amahan. Bisan pa tuod niining tanan, Siya nagmasinugtanon sa kabubut-on sa Amahan. Ang
iyang pag-ampo nagdala kaniya ngadto sa pagsunod sa kabubut-on sa Amahan ug naglig-on kaniya
batok sa mga pagsulay nga iyang gisagubang alang sa kaluwasan.
(Mohilom sa makadiyot)
Mag-ampo kita:
O maluloy-on nga Dios, samtang nangatulog ang mga tinun-an, si Jesus nga napuno sa kasakit
nag-inusarang nag-ampo nga unta malikay siya sa kamatayon.Wala ka magpaka-buta bungol sa
iyang pangamuyo, hinuon pinaagi sa iyang pagkabanhaw gihatag mo kaniya ang kadaugan batok sa
kamatayon. Ang among kaugmaon malisod ug mahadlok nga dawaton. Naga-ampo kami nga imo
unta kaming luwason sa among mga pag-antus, kasakit ug pag-inusara nga daw makapahimulag
kanamo gikan kanimo. Ipadala ang imong Espiritu aron pinaagi sa iyang pagkabanhaw gihatag mo
kaniya ang kadaugan batok sa kamatayon, aron paghupay ug pagtabang kanamo sa pagsalig sa
imong kabubut-on. Kini among gipangayo sa ngalan ni Jesus nga among Ginoo.
Tanan: Amen.
Amahan namo...Maghimaya...Himaya...
Tanan: Kaloy-i kami
Awit… (Dios namo sa kalooy)

ANG IKATULONG ESTASYON:
SI JESUS ATUBANGAN NI PILATO
Pagbasa:Ang pagbasa gikan sa Ebanghelyo sumala ni San Lukas.(Lukas 23:1-5)

Ang tanan mitindog ug gidala nila si Jesus sa atubangan ni Pilato, ug didto gisumbong nila siya;
sila miingon, "Kining tawhana hisakpan namo nga nagpasalaag sa atong mga tawo ug nag-awhag
kanila sa dili pagbayad ug buhis ngadto sa Emperador, ug miangkon nga siya mao ang Mesiyas,
usa ka hari. Si Pilato nangutana kaniya, "ikaw ba ang hari sa mga Judeyo? Si Jesus mitubag,
"Giingon mo. Unya miingon si Pilato sa mga kadagkoan sa mga pari ug sa mga tawo. "Wala ako'y
nakaplagang katarungan nga silotan kining tawhana," Apan misamot hinoon sila sa pag-ingon,"
Nagpasiugda siya og kagubot sa mga tawo tungod sa iyang mga pagtulon-an. Nagsugod siya sa
Galilea, unya milibot sa tibuok Judea, ug karon ania na dinhi."
Pamalandong:
Sa walay kalooy ug kaulaw, gikondenar si Jesus sa iyang isigka-tagilungsod ug sa langyaw nga si
Pilato. Gibutang-butungan nila siya'g sala ug krimen nga wala man gani niya nahimo. Binasi sa
maong pagpanghimakak, gihukman siya wala misukol si Jesus. Wala siya nakiglantugi ni makig-
away. Hinunoa, iya kining gihambin sa iyang malumo nga kasingkasing ug nagpabilin siya nga
walay timik tungod ug alang sa atong kapasayloan.
(Hilom sa makadiyot)
Mag-ampo kita:
Amahan nga langitnon, tungod sa ilang kahadlok sa gahum ni Jesus ug sa tinguha sa pagpatay
kaniya, ang iyang mga kaaway midala kaniya ngadto kang Pilato aron siya pahamtangan sa silot sa
kamatayon. Walay sala si Jesus. Nagtindog siya nga walay tingog, wala motubag aron sa
pagpanalipod sa iyang kaugalingon sa mga, bakak nga sumbong nga ilang gidala batok kaniya. Ang
kalibutan nagapadayon paghukom ug pagsalikway sa imong paagi, O Ginoo. Nagpadayon kami sa
pagbuhat og mga butang nga sukwahi sa imong kabubut-on. Lig-ona ang among tinguha sa
pagsunod kanimo, O Ginoo, aron ang among kinabuhi nagasaksi kanunay sa among pagtoo diha
kanimo. Kini among gipangyo sa ngalan ni Jesus among Ginoo.
Tanan: Amen.
Amahan namo... Maghimaya... Himaya...

Tanan: Kaloy-i kami
Awit… (Pag-abot na sa hukmanan)

ANG IKAUPAT NGA ESTASYON:
ANG PAGLAPDOS UG ANG PAGPURONGPURONG UG TUNOK

Pagbasa: Ang pagbasa gikan sa Ebanghelyo sumala ni San Juan. (Juan 19:1-3)
Unya gikuha ni Pilato si Jesus ug iyang gipalatos. Ang mga sundalo

naghimo' purongpurong sa mga sangang tunokon ug gipahaom nila sa ulo
ni Jesüs. Gisul-oban usab nila kini siya ug sapot nga dagtom pula, ug
nanuol sila kaniya ug miingon, "Mabuhi ang Hari sa mga Judeyo!" Ug
siya ilang gisagpa.
Pamalandong:
Pinaluyohan sa tawhanong gugma, gipalatos ni Pilato si Jesús. Ginamit ang ilang kusog ug kaisog.
gilatos, gibugalbugalan ug gidagmalan sa mga sundalo, si Jesús nga inosente ug malinawon nga
pagkatawo. Dayag kaayo ang pagdaugdaug sa mga gamhanan niadtong walay gahum sa pagpakig-
away ug niadtong walay gahum sa sala. Hain naman ang pagtahud sa atong isigkatawo? Ikaw nga
nahimong kabahin niini unsa may imong baruganan?
Mag-ampo kita.
Manggiluy-on nga Dios, bisan walay sala si Jesus, gilatos ug gipurongpurongan siya og tunok.
Ang among hari gibunalan ug gibugalbugalan. Giantus ni Jesus ang mga kasakit sa iyang pasyon
aron pagluwas kanamo sa sala ug sa kamatayon nga dayon. Pinaagi sa among bunyag, imo kaming
gipili nga imong katawhan ug gihimo mo kaming harianong nasud ug paríanong banay ingon nga
manununod sa imong Gingharian. Pinaagi sa mga pag-antus sa among Ginoong Jesus, hatagi kami'g
kaisog sa pag-atubang sa mga kalisud ug kasakit sa among mga sala, ug hatagi kami sa imong
pasaylo. Kini among ipangayo sa ngalan ni Jesus among Ginoo.
Tanan: Amen.

Tanan: Kaloy-i kami
Awit… ( Pag-abot sa hukmanan)

ANG IKALIMANG ESTASYON
GIDAWAT NI JESUS ANG KRUS

Pagbasa: Ang pagbasa gikan sa Ebanghelyo sumala ni San Juan. (Juan 19:17)
Si Jesús migula sa Siyudad sa Jerusalem nga nagpas-an sa krus ug

miabot sa dapit nga gihinganla'g "Dapit sa kalabera" Sa Hebreo
gihinganlan kini'g "Gólgotha."
( Mohilom sa makadiyut)
Pamalandong:
Gidawat ni Jesús ang iyang kaugalingong krus. Gipas-an niya kini duyog sa mga pagbiaybiay ug
pagtamay sa katawhan. Gipanamastamasan ang iyang pagkatawo. Apan iya kining krus nga palas-
anon. Gidawat niya kini nga masinugtanon sa kabubut-on sa iyang Amahan. Sa ingon gipakita niya
ang paagi sa tiunay nga paghigugma sa Dios. Kita giunsa man nato pagpakita ang atong tim-os nga
paghigugma sa Dios? Giunsa man nato pagdawat ug pagsagubang sa mga pagsulay nga atong
nahiaguman?
Mag-ampo kita:
Amahan nga langitnon, ang imong anak nga si Jesus midawat sa iyang krus, gipakaulawan,
gibiaybiay ug gipaantus. Apan mao kadto ang iyang krus ang iyang kaugalingong krus. Iya kining
gidawat uban sa mapaubsanong pagsugot kanimo,isip iyang Amahan, aron pagtudlo kanamo sa
dalan sa matuod nga paghigugma sa Dios. Kami usab nagapas-an sa among krus. Ang among krus
naggikan sa among pagsugot kanimo, ang Dios sa kamatuoran, kaangayan ug kalinaw. Himoa kami
nga maisog ug malig-on sa pagpas-an sa among krus ingon nga mga tinood nga tinun-an. Himoa
kaming malaumon bisan taliwala sa mga kahimtang nga walay paglaum, ug pagpaningkamot nga
madasigon aron pagkab-ot sa kinabuhi nga imong ginamithi alang kanamo. Tabangi kami sa
pagpadayon sa pagbuntog sa kadautan ug pagdaog batok niini pinaagi sa pagbuhat og maayo. Kini
among gipangayo sa ngalan ni Jesus among Ginoo.
Tanan: Amen.

Pangulo: Ginoong Jesus nga gilansang sa krus ug nabanhaw.
Tanan: Kaloy-i kami
Awit… (Sa pagpas-an na ni Hesus)

ANG IKAUNOM NGA ESTASYON
ANG PAGKAHISUKAMOD NI JESUS
Pagbasa: Ang pagbasa gikan sa unang Sulat ni San Pablo Apostol ngadto sa taga-Corinto. (ICor. 1:27-31)
Gituyo pagpili sa Dios ang giisip sa mga tawo nga walay kapuslanan aron pagpakaulaw sa mga
maalamon, ug gipili niya kadtong giisip nga huyang aron pagpakaulaw sa mga tawong gamhanan.
Gipili niya ang mga sinalikway ug tinamay ug ang gipakawalay bili sa mga tawo aron pagpaila nga
walay bili ang giisip nga mahinungdanon sa mga tawo aron wala gayuy makapagarbo sa atubangan
sa Dios.Apan kamo gihiusa sa Dios kang Kristo Jesus, ug gihimo niya si Kristo nga atong kaalam.
Pinaagi kaniya nahimo kitang matarong atubangan sa Dios ug kita nahimong balaang katawhan niya
ug gihatagan kita'g kagawasan. Busa sumala sa giingon kasulatan, "Ang buot magpagarbo
kinahanglan magpagarbo sa mga butang nga nahimo sa Ginoo".
Pamalandong:
Gipili sa Dios ang mga sinalikway ug tinamay ug gipakawalay bili sa mga tawo aron pagpaila nga
walay bili ang giisip nga mahinungdanon sa mga tawo aron walay makapagarbo atubangan sa Dios,
ug nga siya simbahon labaw sa tanan. Pagatahuron ang iyang kahalangdon ingon sa pagtahod nato
sa atong isigkaingon sumala sa iyang kasugoan kay sa atong kaugalingong kagustohan.
Mag-ampo kita.
Makagagahum nga Amahan gipili namo ang kinabuhi kay sa kamatayon, ang kamatuoran kay sa
bakak ug pagpanglimbong. Gipili namo ang matarong ug matinud-anong pagpangalagad kay sa
pagpangurakot. Among gipili ang pagpas-an sa krus sa hustisya ug katarung. Apan ang
pagpakigbisog hilabihan kalisod ug walay makita nga kadaugan. Kami nangawala sa maayong
dalan. Ang among palibot nagapadayon daw sa mao lang gihapon pinusilay, pagpatay, mga
pagbudhi, pangawat ug pangurakot, pag-abuso ug paggamit sa druga, pahimulos sa mga babaye,
sugal, panapaw, pagpanglupig ug pagpanglugos. Nangaluya kami ug ingon nga daw walay
kapaingnan, ingon nga wala kami’g kusog, dili na buot mopadayon sa pagpakig-away sa dautan,
motalikod ug mobiya sa among responsibilidad. Busa, Amahan, tabangi kami niining among
reponsibilidad. Busa, Amahan, tabangi kami niining among pagkaluya ug hatagi kami ug igong
kusog nga mopadayon sa pagpakigbatok sa mga dautan sa among palibot sama nga si Kristo
mibangon gikan sa iyang pagkahisukamod nga naangkon niya ang kadaugan. Kini among
gipangayo sa ngalan ni Jesus among Ginoo.
Tanan: Amen.
Pangulo:Ginoong Jesus nga gilansang sa krus ug nabanhaw.
Tanan: Kaloy-i kami.
Awit… (Kining unang paghidugmo)

ANG IKAPITONG ESTASYON
SI SIMON NGA TAGA CIRENE MITABANG KANG JESUS

Pagbasa: Ang pagbasa gikan sa Ebanghelyo sumala ni San Mateo. (Mateo 27:32-34)
Sa ilang pagpanggula sa Siyudad hisugatan nila ang usa ka tawo nga gihinganla'g Simon nga
taga Cirene, ug gipugos nila siya sa pagpapas-an sa krus ni Jesus. Unya nahiabot sila sa usa ka
dapit nga gihinganla'g Golgotha, nga sa ato pa, Ang dapit sa mga kalabera." Didto ila siyang
gitunola'g bino nga sinagola'g apdo aron iyang imnon. Apan tapos niya tilawi kini, wala siya
moinom niini.
Pamalandong:
Si Simon nga Taga-Cirene gipugos sa mga sundalo sa pagpapas-an sa krus ni Jesus. Wala kini
magpadayag sa kalooy sa mga sundalo kang Jesus. Ang pagtabang ni Simon kang Jesus usa ka
pagtabang nga walay gugma tungod kay pinugos man. Si Jesus nag-anam nag kaluya tungod sa
kabug-aton sa krus nga iyang gipas-an, ang krus nga naglangkob sa atong kaluwasan. Sa atong
kinabuhi usab, daghan mga higayon nga kita nakatabang sa uban. Unsang klase ba kana nga
pagtabang? Duna ba kini’g gugma? Napugos lang ba kita sa pagtabang tungod kay gisugo, o tungod
kay sakop kita sa usa ka organisasyon kansang tumong mao ang pagtabang, o mitabang lang ba kita
kay duna tay gipaabot nga balos sa umaabot nga panahon?
(Hilom sa makadiyot )
Mag- ampo kita.
Langitnong Amahan, usahay ang mga palas- anon sa among kinabuhi bug-at ra kaayo kun mag-
inusara kami sa pagpas-an niini. Ug sa makadaghan nakahibalag kami ug laing tawo nga
nanginahanglan sa among tabang aron madaug nila ang ilang mga palas-anon sa kinabuhi. Himoa
kaming madasigon sa pagtabang kanila kutob sa among mahimo. Himoa nga dili kami
magpakaaron- ingnon nga walay labot sa sala ug dautan nga naglibot kanamo diha sa mga buhat ug
sa wala pagbuhat sa angayang buhaton. Tabangi kami ug hatagi kami'g igong kaisog sa pag-atubang
sa among kaugalingon diha sa pagpaubos ug pagkamatinud-anon sa among pagdawat sa kamatuoran
ug sa mga lintunganay sa among mga binuhatan. Kini among gipangayo sa ngalan ni Jesus among
Ginoo.
Tanan: Amen.
Tanan: Kaloy-i kami
Awit… (May naluoy sa Ginoo)
ANG IKAWALONG ESTASYON
ANG MGA BABAYE SA JERUSALEM
Pagbasa: Ang pagbasa gikan sa Ebanghelyo sumala ni San Lukas. (Lukas 23:27-29)
May dakong panon sa mga tawo nga misunod kang Jesus ug pipila kanila mga babaye nga
naghilak ug nagminatay tungod kaniya. Unya milingi si Jesus kanila ug mingon." mga babaye sa
Jerusalem! Ayaw ako ninyo'g hilaki, kondili hilaki hinoon ninyo ang inyong kaugalingon ug ang
inyong mga anak. Moabot ang mga adlaw nga moingon ang mga tawo. “Bulahan ang mga babaye
nga wala makapanamkon, ug ang wala gayud makapasusong mga bata."
Pamalandong:
Si Jesus miingon sa mga babaye sa Jerusalem nga dili nila siya hilakan kondili ang ilang
kaugalingon ug ang ilang mga anak. Tinood kini. Angay natong hilakan ang atong pagpadayon sa
pagsupak ug pagdumili sa pagsunod sa kabubut-on sa Dios. Angayan kitang magmasulub-on ug
magmahinulsulon tungod sa atong mga kasaypanan. Kanus-a man kaha kita makat-on sa pagdawat
sa mga kasakitan ug kapakyasan bunga sa atong pagkamasinupakon sa Dios? Hangtod asa kutob
ang katig-a sa atong kasingkasing?
Mag-ampo kita.
Maloloy-ong Amahan, ang mga babaye sa Jerusalem naghilak tungod sa ilang kalooy kang Jesus.
Apan si Jesus miingon kanila: "Hilaki ninyo ang inyong kaugalingon ug ang inyong mga anak.” Dili
kami malooy sa kasakit sa uban ug sa kalibutan, pagpasangil sa hinungdan niini nganha sa butang,
dapit, ug sa ubang mga tawo, ug sa bisan unsa basta dili kami. Among nahikalimtan nga aduna kami
labot niini. Busa, himoa kami nga dili magpaka-aron-ingnon, ug sa pag-angkon nga kami usab
adunay kalabutan sa sala ug sa dautan nga anaa sa among palibot kini tungod kay wala kami
mohimo sa among angayang buhaton. Nan, kami karon moingon: "Nagakumpisal ako sa Dios
Amahan nga makagagahum sa tanan, ug kaninyo mga igsoon kay nakalapas ako og daku sa buhat
ug sa wala pagbuhat sa angayang buhaton." Kini among gipangayo sa ngalan ni Jesus, among
Ginoo.
Tanan: Amen

Tanan: Kaloy- kami
Awit… (Pulong pa ni Hesukristo)

ANG IKASIYAM NGA ESTASYON
SI JESUS GIHUKASAN SA IYANG SAPOT UG GILANSANG SA KRUS.
Pagbasa: Ang pagbasa gikan sa Ebanghelyo sumala ni San Marcos.(Marcos 15:22-26)

Gipadala nila si Jesus sa usa ka dapit nga gihinganla'g Golgotha, nga sa ato pa, "ang dapit sa
mga kalabera." ug didto misulay sila paghatag kaniya og bino nga sinagola'g tambal nga
gihinganla'g mira, apan midumili si Jesus sa pag-inom niini. Unya gilansang nila siya sa krus ug
gibahinbahin ang iyang sapot ug nagripa sila kon unsang bahina sa sapot ni Jesus ang ilang
maangkon. Alas nuybe kadto sa buntag sa ilang paglansang kaniya sa krus. Ang sumbong nga
nahisulat sa karatola mao kini: "Jesus Nazaretnon, ang Hari sa mga Hudiyo".
Pamalandong:
Human nila pakaulawi ug bugalbugali si Jesus, siya ilang gidala sa dapit nga gitawag og Golgotha,
diin didto ila silang gihukasan sa iyang sapot ug gilansang sa krus. Tungod sa iyang way sukod nga
gugma kanato ni Jesus ang mabangis nga kasakit nga iyang nahiaguman. Iyang giantus ang dakong
kaulaw sa dihang gihuboan siya sa iyang sapot. Siya nagmasinugtanon sa Amahan hangtud sa krus
tungod sa iyang dakung gugma alang kanato. Ikaw, ako, kitang tanan kabahin sa maong
pagbangutan ni Jesus.
Mag-ampo kita:
Maloloy-on ug makagagahum nga Dios, ang among mga sala mao ang nakapalansang kang Jesus
sa krus, Giantus ni Jesus ang mga kapait sa iyang mga kasakit aron maluwas kami sa kaulipnan sa
sala ug sa kamatayon dayon. Ubani kami karon. Luwasa kami sa bung-aw sa among pagka
makasasala ug sa tanang mga kayugot. Pasayloa kami sa among sala, hiusaha ang among nabahin
nga kasingkasing ug ihatag kanamo pagbalik ang bag-ong kinabuhi.Kini among gipangayo sa
ngalan ni Jesus, among Ginoo.
Tanan: Amen.

Awit… (Gipahigda ang Ginoo ) &

(pag-abot na sa kalbaryo)
ANG IKANAPULO NGA ESTASYON
ANG MAHINULSOLON NGA KAWATAN
Pagbasa: Ang pagbasa gikan sa Ebanghelyo sumala ni San Lukas (Lukas 23:39-43)
Usa sa mga kriminal nga nagbitay sa krus tupad ni Jesus, mibugalbugal kaniya, " Dili ba ikaw
mao man ang Mesiyas? Luwasa ang imong kaugalingon ug kami! “Apan gibadlong siya sa iyang
kauban nga nag-ingon, "Kita ania dinhi gisilotan sa mao rang silot. Apan ang silot natong duha
angay ug sibo kanato. Kay gisilotan man kita sumala sa atong nahimo. Apan siya, walay sala. "Ug
miingon siya kang Jesus, "hinumdumi intawon ako kon maghari ka na!" Miingon si Jesus kaniya,
"Sultihan ko ikaw, karong adlawa adto ka sa Paraiso uban kanako".
Pamalandong:
Atong nasaksihan kun giunsa pagpasaylo ni Jesus ang usa ka kawatan nga naghinulsol sa tibuok
niyang kasingkasing. Sa atong pagkinabuhi, adunay mga higayon nga dili kita andam modawat ug
mopasaylo sa atong isigka-ingon, ni modawat sa atong pagkamakasasala. Si Jesus, atong hari
nagtanyag sa iyang kaugalingon alang sa atong kaluwasan. Ug gani bisan sa iyang pag-antos ug
kasakit, siya nagmasinabtanon, nagmapasayloon ug nagmahigugmaon sa mahinulsulong kawatan.
Unsa pa kaha kita nga iyang giluwas?
Mag-ampo kita:
Walay katapusan nga Dios, Sa panahon diin libo-libo nga gitawag aron pagpakamatay alang sa
pagpakigbisog sa kamatuoran, anaa kami Hari nga mitugyan sa iyang kaugalingong kinabuhi aron
kami tabangan sa among pakigbisog batok sa sala ug sa kamatayon. Ug taliwala sa kapait nga iyang
giantus, Si Jesus mibungat ug madasigong mga pulong ngadto sa mga mahinulsulong kawatan. Siya
mipasaylo sa iyang mga sala ug midawat kaniya ngadto sa iyang gingharian. Ug karon Amahan,
nagahangyo kami kanimo nga hatagan mo kami ug igong kusog sa pagsunod sa dalan ni Jesus ug sa
kanunay andam kami sa pagpasaylo sa among isigka-ingon sama sa gibuhat ni Jesus nga among
Hari. Kini among gipangayo sa ngalan ni Jesus among Ginoo.
Tanan: Amen.

Tanan: Kaloy-i kami
Awit… (Dios namo sa kalooy)
ANG IKANAPULOG USA NGA ESTASYON

SI STA. MARIA UG SI JUAN SA TIILAN SA KRUS
Duol sa Krus ni Jesus nagtindog ang iyang inahan ug ang igsoon sa iyang Inahan, ug si Maria
nga asawa ni Cleofas ug si Maria Magdalena. Sa pagkakita ni Jesus sa iyang inahan ug sa tinun-an
nga gimahal nga nagbarog didto miingon siya sa iyang inahan, "Babaye, ania ang imong anak"
Unya miingon siya sa tinun-an. "Ania ang imong inahan". Sukad niadto gipatipon si Maria
pagpuyo sa tinun-an.
Pamalandong:
Dili matukib ang kasakit ug kaguol ni Maria sa dihang iyang nakita ang iyang pinalanggang Anak
nga himatyon na nga nagbitay sa krus. Sa dihang nakita ni Jesus ang iyang inahan ug minahal nga
tinun-an, siya miingon. "Babaye, ania ang imong anak!" Ang matag babaye, sama kang Maria sa
iyang pagkababaye ug pagka-inahanon. Si Juan usa ka igsoon tungod kay siya usa man usab ka
anak. Ang matag tawo anak ug igsoon. Babaye ug lalakı, angayang tahuron ug higugmaon, dawaton
ug tagdon ug bantayan ug amomahon.
Mag-ampo kita:
Langitnong Amahan, samtang nagbarog kami sa tiilan sa krus ni Hesus, gisud-ong namo ang
iyang inahan, si Maria nga among inahan sa kinabuhi ug sa kanunay'ng panabang. Ang matag
babaye usa ka inahan, angayan dawaton tahuron ug higugmaon sama kang Santa Maria nga
gihigugma pag-ayo ni Jesus. Gihatag nimo usab kanamo si Juan nga among igsoon, himoa kami nga
tim-os diha sa paghigugma sa among isigkaingon aron molipang ang gugma sa Dios dinhi kanamo
nga imong giluwas nga katawhan. Kini among gipangayo sa ngalan ni Jesus among Ginoo.
Tanan: Amen.

Awit… (Kaguol nga dili Hitupngan )

ANG IKANAPULOG DUHA NGA ESTASYON
ANG KAMATAYON NI JESUS SA KRUS
Human niini, si Jesus nga nasayud nga ang tanan natuman na ug aron pagtuman sa Kasulatan,
miingon: "Giuhaw ako" Didto may usa ka panaksan nga puno sa suka ug gibutang sa usa ka sanga
sa isopo, ug giisa nila kini ngadto sa iyang baba. Human makatilaw si Jesus sa suka, miingon siya,
"Natapos na!" Unya miduko siya ug namatay.
Pamalandong:
Mao kini ang takna sa pagkamatay ni Jesus. Atong hinumduman ang maong takna diin ang gugma
sa Dios gihatag sa tanan ug nagkahulogan sa kamatayon nagbag-o ug nag-abli sa ganghaan sa
kinabuhing walay katapusan. Nagmadaugon ang kinabuhi ug kahayag batok sa kamatayon ug
kangitngit.
Mag-ampo kita:
Mahigugmaong Amahan, kini mao ang takna sa kamatayon ni Jesus. Buot ka nga among
hinumduman ang takna kanus-a ang gugma mihatag sa tanan, ug mihatag ug kahulugan bisan sa
kamatayon. Ang sala sa kalibutan giwagtang na. Dili lang kay magpas-an kami sa among
kaugalingong krus. Kinahanglan magpakamatay kami sa among kaugalingon, sa among garbo ug
kahakog aron mosibol dinhi kanano ang bag-ong kinabuhi diha sa kamatuoran, kagawasan ,
kaangayan ug kalinaw. Nan, Amahan, hatagi'g kahulugan ang among inadlaw-adlaw nga
pagkinabuhi ug ang among katapusang kamatayon. Himoa nga diha kanila mapadayag namo ang
among gugma kanimo ug sa among isigkatawo ug sa ingon maangkon namo ang kinabuhing walay
katapusan. Kini among gipangayo sa ngalan ni Jesus among Ginoo.
Tanan: Amen.

Awit… ( Namatay si Hesukristo)

ANG IKANAPULOG TULO NGA ESTASYON
ANG PAGPAHIMUTANG KANG HESUS SA LUBNGANAN
Pagbasa: Ang pagbasa gikan sa Ehanghelyo sumala ni San Juan. (Juan 19:38, 41-42)
Human niini, Si Jose nga Taga-Arimatea mihangyo kang Pilato nga kuhaon niya ang lawas ni
Jesus. ( Si Jose usa ka sumusunod ni Jesus, apan sa tago lamang kay nahadlok man siya sa mga
kadagkoan sa mga Judeyo.) Gitugutan siya ni Pilato, busa miadto si Jose ug gikuha ang lawas ni
Jesus. May usa ka tanaman didto sa dapit diin gilansang si Jesus, ug sa maong tanaman may usa
ka lubnganan, nga wala pa gayud kalubngi. Ug sanglit adlaw man kadto sa pagpangandam ug kay
duol ra man ang lubnganan ilang gilubong si Jesús didto.
Pamalandong:
Sa pagkamatay ug paglubong kang Jesus, hain man ang iyang tinun-an ug mga sumusunod?
Namiya ang tanan gawas niadtong pipila nga nagmaisogon ug nagmahigugmaon hangtud sa
katapusan. Taliwala sa atong kasubo ug kahingawa, dili kita angayan mawad-an sa paglaum. Bisan
pa sa kadulom sa atong palibot ug panglantaw, batonan nato ang kalig-on sa pagtoo diha sa mga
saad ni Jesús sa pagkabanhaw, ug magmadasigon kita sa pagsubay sa dalan sa katarung ngadto sa
kinabuhing tunhay.
Mag-ampo kita.
Makagagahum nga Amahan, pagkamasulob-on niadtong nagpabilin nga pipila nga misapnay sa
patay'ng lawas ni Jesús gikan sa krus. Gitalikdan siya sa kadaghanan sa iyang mga tinun-an ug mga
sumusunod, ug ang iyang patay 'ng lawas gipahiluna sa usa ka lubnganan nga hinulaman. Amahan,
kinsa kahay makatuo nga dunay usa ka tawo nga makahatag sa iyang kaugalingon sa ingon nianang
paagiha. Alang sa mga walay alamag, ang iyang kamatayon mao na ang iyang kapildihan, apan
alang sa mga dunay pagtoo, ang iyang kamatayon ug pagkabanhaw maoy mipahimugso sa mga
kalipay sa bag-ong kinabuhi. Busa Amahan, tabangi kami pagdawat sa mga pagsulay ug sa
kinabuhing dayon. Kini among gipangayo sa ngalan ni Jesús among Ginoo.
Tanan: Amen
Pangulo:Ginoong Jesus nga gilansang sa krus ug nabanhaw.
Awit… (Paglubong kang Hesukristo)
ANG IKANAPULOG UPAT NGA ESTASYON

ANG PAGKABANHAW
Pagbasa: Ang pagbasa gkan sa Ebanghelyo sumala ni San Markos. (Markos 16:1-7)
Sa paglabay Sa Adlawng lgpapahulay, namalit ug mga pahumot si Maria Magdalena, si Maria
nga inahan ni Santiago, ug si Salome aron pagdihog sa lawas ni Jesus. Ug sayo kaayo sa Domingo
sa buntag miadto sila sa lubnganan samtang sila naglakaw, nag ingnanay sila, Kinsa may atong
paligiron sa bato aron pag-abli sa lubnganan. Busa nanulod sila sa lubnganan ug nakita nila didto
ang usa ka batan-ong lalaki nga naglingkod sa tuo, nagsul-ob og taas ug puting sapot ug
nangahadlok sila. Apan miingon siya kanila, "Ayaw kamo kahadok: Nangita kamo kang Jesus nga
taga-Nazareth, ang gilansang sa krus. Wala na siya dinhi. Nabanhaw na siya. Tan-awa ang iyang
gilubngan kaniya. Lakaw kamo ug sultihi ang iyang mga tinun-an, lakip si Pedro, nga si Jesus nag-
una kaninyo didto sa Galilea; didto inyo siyang makita sumala sa iyang gisulti kaninyo."
Pamalandong:
Taliwala sa atong kapit-os ug mga suliran, unta ang Anghel nga nagsangyaw "Ayaw kamo
kahadlok. Nabanhaw na siya..." Ug kon mamatay kita uban kaniya makabaton usab kita sa pagka-
banhaw mao kini ang kahibulongan ug katingalahan sa misteryo sa kaluwasan sa tawo. Ang
kinabuhi ug kamatayon ug pagkabanhaw ni Jesus nagtudlo kanato ug naghatag og kalinaw taliwala
sa atong kangitngit, nagpasaylo kanato sa atong pagkamakasasala, naghupay ug nagpahiuli kanato
sa atong pagkabahinbahin, ug paghatag kanato ug bag-ong kinabuhi taliwala sa daghang kamatayon.
Mag-ampo kita
Among buhi nga Dios, ang among kasinatian nagtug-an nga sa kanunay nagabuhat ikaw ug mga
katingalahan dinhi kanamo. Sa pag-abot sa mga babaye sa lubnganan natingala sila nga abli na kini.
Ug sa ilang pagsulod nahadlok sila sa presensiya sa imong anghel. Ang misteryo sa kamatayon ug
pagkabanhaw ni Jesus nagpadayag kanamo nga taliwala sa kangitngit, ikaw nagahatag ug kahayag:
taliwala sa kasal-anan, ikaw nagapasaylo; taliwala sa pagka-bahinbahin, ikaw nagahiusa; ug taliwala
sa kamatayon, ikaw nagahatag ug kinabuhi. Nan, Amahan, ipadayon dinhi kanamo ang imong
katingalahang mga buhat pinaagi sa imong presensiya dinhi sa among kinabuhi ug sa among
kalibutan. Kini among gipangayo sa ngalan ni Jesus among Ginoo.
Tanan: Amen.
Pangulo:Ginoong Jesus nga gilansang sa krus ug nabanhaw,
Awit… (Sa ikatulo nga adlaw)
PAGTAPOS
Pagbasa: Ang pagbasa gikan sa Ebanghelyo sumala ni San Mateo. (Mateo 28:17-20)
Sa pagkakita sa mga tinun-an kang Jesus, gisimba nila siya bisan tuod may pipila kanila ang
nagduhaduha. Miduol si Jesus ug miingon kanila, "Gihatag kanako ang tanang gahum sa langit ug
yuta. Busa panglakaw kamo ngadto sa tanang katawhan sa tibuok kalibutan ug himoa sila nga
akong mga tinun-an, ug bunyagi sila sa ngalan sa Amahan, ug sa Anak, ug sa Espiritu Santo, tudlo-
i sila pagtuman sa tanan nga akong gisugo kaninyo. Ug hinumdumi, ako mag-uban kaninyo sa
kanunay hangtud sa katapusan sa kalibutan."
Ang Ebanghelyo sa Ginoo.
Tanan: Daygon Ikaw, O Kristo
Amahan namo… Maghimaya .. Himaya… (Pahinungod pag-ampo alang sa katuyoan sa atong Santo
Papa)
Katapusang Pag-ampo:
Mag-ampo kita.
Langitnong Amahan, hinaut unta nga kami nga namalandong sa kamatayon ug pagkabanhaw ni
Jesus mapuno unta sa paglaum ug kalipay sa iyang kinabuhi. Masaligon sa iyang pagka-ania uban
kanamo ug sa iyang gahum pagtandog kanamo, pagtudlo kanamo, pag-ayo ug pagpasaylo kanamo,
makabaton unta kami'g kalig-on ug gahum pagpadangat sa iyang gugma ug kalinaw sa tanang mga
tawo nga among ikahibalag. Kini among gipangayo sa ngalan ni Jesus, nga among Ginoo hangtud
sa kahangturan.
Tanan: Amen
Panalangin
(Kun walay Pari)
Pangulo: Hinaut nga ang Dios manalangin kanato, manalipod kanato sa tanang dautan ug magdala
kanato ngadto sa kinabuhing dayon.
Tanan: Amen
(Kun adunay pari )

Pari: Ang Ginoo maanaa kaninyo
Tanan: Maanaa usab kaninmo
Pari: Manalangin kaninyo ang Dios nga makagagahum sa tanan, +Amahan, +Anak, +Espiritu Santo.
Tanan: Amen.
Katapusang Awit...
Mga Awit
Pasiuna:
Diosnong Magtutudlo
Diosnong magtutudlo, ania kami karon,

Binuksan ang kasing-kasing sa Imong Pulong.
Dinhi niining tigum, Imo kaming gitawag:
Aron lamang mabuhi sa imong mga hatag,
Aron lamang mabuhi sa imong mga hatag.
Unang Estasyon
KORO:
KINI MAO ANG AKONG LAWAS NGA ‘KONG GIHATAG SA INYONG KALUWASAN.
DAWATA KINI, DAWATA KINI SA AKONG HANDUMANAN.
KINI ANG AKONG DUGO,

GIULA SA INYONG KAPASAYLOAN.
DAWATA KINI, DAWATA KINI SA AKONG HANDUMAN.
I
NIINING LAGITNONG KALAN-ON GIDAWAT SA KABUS.
ANG SAAD NGA WA’Y KAPAKYASAN SA NAMATAY SA KRUS.
(KORO)
II
NIINING LANGITNONG KALAN-ON KITA MAKADAWAT,
KALINAW NGA IYANG KABILIN KABASKUG SA KALAG.
(KORO)AWIT SA ESTASYON SA KRUS
Ikaduhang Estasyon:
Dios namo sa kalooy
Ikaw ang among Amahan
Magbubuhat ug Manunubos
Ug Ginoo sa nga tanan.
KORO:
HESUS MALOOY KA KANAMO
PASAYLOON MO KAMI
ANG SALA GIDUMTAN NAMO
DILI NA MAG-USAB KAMI.
Ikatulong Estasyon:
Pag-abot na sa hukmanan
Ni pilato ginahukman
Sa tunok gipurong-purongan
Ug sa krus na gipapas-an. (koro)
Ikaupat nga Estasyon:

Pag-abot na sa hukmanan
Ni pilato ginahukman
Sa tunok gipurong-purongan
Ug sa krus na gipapas-an. (koro)
Ikalima nga Estasyon:

Sa pagpas-an na ni Hesus
Mihangad sa kahitas-an
Nahinumdom sa gipanubos
Ug gihalad sa Amahan. (koro)
Ikaunom nga Estasyon:
Kining unang paghidugmo
Ni Hesus ubos sa iyang krus
Gibunalan ug gitukmod
Giantos sa manunubos. (koro)
Ikapito nga Estasyon:

May nalooy sa Ginoo
Nga si Simon Cireneo
Gipulihan si JesuCristo
Kay naluya na kaayo. (koro)
Ikawalo nga Estasyon:

Pulong pa ni JesuCristo
Ayaw pagpanghilak kamo
Angay nga hilakan ninyo
Ang salang inyong nahimo. (koro) .
Ikasiyam nga Estasyon:

Pag-abot na sa Kalbaryo
Gihuboan ang Ginoo
Ug natandog ang kasamdam
Kay sa saput gilangkatan. (koro)
Gipahigda ang Ginoo

Gipadupa ug maayo
Ug ang tampalasan
Si Hesus ilang gilansang. (koro)
Ikanapulo nga Estasyon:

Dios namo sa kalooy
Ikaw ang among Amahan
Magbubuhat ug Manunubos
Ug Ginoo sa nga tanan.
KORO:
HESUS MALOOY KA KANAMO
PASAYLOON MO KAMI
ANG SALA GIDUMTAN NAMO
DILI NA MAG-USAB KAMI.
Ikanapulog-usa nga Estasyon:

Kaguol nga dili hitupngan
Ang gibati sa Inahan
Kasingkasing daw gilagbasan
Sa punyal sa kagul-anan. (koro)
Ikanapulog-duha nga Estasyon:

Namatay si JesuCristo
Sa bukid sa kalbaryo
Aron nga kita maluwas
Sa kasubo nga dako. (koro)
Ikanapulog-tulo nga Estasyon:

Paglubong kang JesuCristo
Uban ang iyang Inahan
Ug giandam ang Sepulcro
Pagkatapos gitak-opan (koro)
Ikanapulog-upat nga Estasyon:

Sa ikatulo nga adlaw
Nabanhaw si Jesukristo
Kay ang saad Niya
Mabanhaw gayud Siya.

Ang Dalan Sa Krus

Uploaded by

Document Information

Original Title

Copyright

Available Formats

Share this document

Share or Embed Document

Sharing Options

Did you find this document useful?

Is this content inappropriate?

Copyright:

Available Formats

Ang Dalan Sa Krus

Uploaded by

Copyright:

Available Formats

ANG DALAN SA KRUS

Awit… (Dios namo sa kalooy)

Pagbasa:Ang pagbasa gikan sa Ebanghelyo sumala ni San Lukas.(Lukas 23:1-5)

Amahan namo... Maghimaya... Himaya...

Awit… (Pag-abot na sa hukmanan)

Pangulo: Nagasimba ug nagadayeg kami kanimo, O Kristo,

Unya gikuha ni Pilato si Jesus ug iyang gipalatos. Ang mga sundalo

Amahan namo... Maghimaya... Himaya...

Awit… ( Pag-abot sa hukmanan)

Pangulo: Nagasimba ug nagadayeg kami kanimo, O Kristo,

Si Jesús migula sa Siyudad sa Jerusalem nga nagpas-an sa krus ug

Amahan namo... Maghimaya... Himaya...

Awit… (Sa pagpas-an na ni Hesus)

Awit… (Kining unang paghidugmo)

Pangulo: Nagasimba ug nagadayeg kami kanimo, O Kristo,

Amahan namo... Maghimaya... Himaya...

Awit… (Pulong pa ni Hesukristo)

Pagbasa: Ang pagbasa gikan sa Ebanghelyo sumala ni San Marcos.(Marcos 15:22-26)

Amahan namo... Maghimaya... Himaya...

Awit… (Gipahigda ang Ginoo ) &

Amahan namo... Maghimaya... Himaya...

ANG IKANAPULOG USA NGA ESTASYON

Amahan namo... Maghimaya... Himaya...

Awit… (Kaguol nga dili Hitupngan )

Amahan namo... Maghimaya... Himaya...

Awit… ( Namatay si Hesukristo)

ANG IKANAPULOG UPAT NGA ESTASYON

(Kun adunay pari )

Diosnong magtutudlo, ania kami karon,

KINI ANG AKONG DUGO,

Ikaupat nga Estasyon:

Ikalima nga Estasyon:

Ikapito nga Estasyon:

Ikawalo nga Estasyon:

Ikasiyam nga Estasyon:

Gipahigda ang Ginoo

Ikanapulo nga Estasyon:

Ikanapulog-usa nga Estasyon:

Ikanapulog-duha nga Estasyon:

Ikanapulog-tulo nga Estasyon:

Ikanapulog-upat nga Estasyon:

You might also like