HULYO 18, 2021

IKANAPULO’G-UNOM NGA DOMINGO SULOD SA TUIG

Sa atong Ebanghelyo karon atong nadungog unsa ang hiyas sa maayong magbalantay. Ang usa ka maayong magbalantay dili
lang moatiman ug mogiya sa iyang mga karnero ngadto sa matarong apan kabalo usab mobati sa pagbati niini. Diha sa atong
Ebanghelyo gisaysay ni San Marcos ang senaryo nga para sa atoa makahuluganon kaayo – ang senaryo tali kang Jesus ug ang
iyang mga apostoles ug ang senaryo tali kang Jesus ug ang katawhan.
Sa unang bahin, Ang mga apostoles nagkatigum pag-usab uban kang Jesus, ug kaniya ilang gisugilon ang tanan nga ilang nahimo
ug gipanudlo. Ug si Jesus miingon kanila, “Pangadto kamo nga kamokamo ra sa usa ka dapit nga awaaw, ug pamahulay kamog
makadiyot.” Kay daghan man ang mga tawo nga nagpangadto-nganhi, ug si Jesus ug ang mga tinun-an halos dili na makahigayon
bisan sa pagpangaon. Sa laing bahin, sa dihang daghan ang nakakita kanila sa ilang paggikan, ug nakaila kanila. Sila midali
pagpanagan sa mamala paingon didto gikan sa tanang kalungsuran, ug miabut sila didto nga una pa kanila. Ug sa pagtakas ni
Jesus sa mamala, iyang nakita ang usa ka dakung pundok sa mga tawo, ug siya naluoy kanila, kay sila sama sa mga karnero nga
walay magbalantay; ug iyang gisugdan ang pagpanudlo kanila sa daghang mga butang.
Sa duha ka senaryo mga igsoon, tataw ug dayag kaayo kung unsa ka concern si Jesus sa tawo. Dinhi gipaklaro kini ni San Marcos
ang pagkamaloloy-on ug ang tawhanong pagsabut ni Jesus sa tawo. Sa unang bahin si Jesus concern kaayo sa iyang mga
apostoles. Sayud si Jesus kong unsa kalisud ang ilang naagian – gikalimtam nila ang iyang kaugalingon tungod ug alang sa ilang
misyon. Mao kanang miingon si Jesus: “Pangadto kamo nga kamokamo ra sa usa ka dapit nga awaaw, ug pamahulay kamog
makadiyot.” Siguro kong sa ato pa kining dapit, si Jesus miingon “chill-chill sa mo” o “pabugnaw sa mo” o “pagrelax sa mo sa
makadyot” kay para andam napud kamo sa sunod ninyong misyon. Niining mga pulong, gipadayag ni San Marcos nga si Jesus
mipakita ug dako nga konsedirasyon ngadto sa mga Apostoles. Sila naghago kaayo ug sila angayan tagan ug higayon sa
pagpahulay. Dinhi atong Makita na si Jesus mipakita ug kalooy sa mga tawo. Daw sama sila sa karnero nga walay magbalantay,
mga tawo nga walay direksyon, mga tawo nga gihidlaw sa kahayag ug mga tawo nga nangita ug kahulogan sa ilang kinabuhi.
Daw walay ni isa nga miatiman kanila. Ug tungod sa iyang kalooy, bisan gikapoy pa si Jesus, iyang gisugdan ang pagpanudlo
kanila sa daghang mga butang ug ang mga tawo namati pag-ayo kaniya.
Mga igsoon, diha sa atong pagpuyo sa Cristohanong pagpangalagad, kailangan batunan nato kanunay ang pagkamaayong
magbalantay – ang pagkamasinugtanan ug ang pagkamaloloy-on. Isip kabahin diha sa Cristohanong katilingban, anaa unta
kanato ang (1) pagkamasinugtanon sa kabubut-on sa Dios ug ang (2) pagkamaloloy-on sa atong isigkatawo.
Ang pagkamasinugtanon wala lang kini nagpasabot sa pagtuman kung unsay gisulti kanato kon dili nagpasabot kini sa halalom
nga kahulogan sa pagtuman – ang pagbuhat sa maayong butang bisan sakit ug supak sa atong kabubut-on. Pipila kaha sa atong
mga lider ang nagmasinugtanon karon? Pipila sa mga magtiayon karon ang nagmasinugtanun sa ilang panaad sa panahon sa ilang
kaminyoon? Ug pipila kaha sa mga kabataan karon ang nahimong magmasinugtanon sa ilang mga ginikanan? Susama usab diha
sa pagkamaloloy-on. Mahimo unta kitang maloloy-on sama ni Jesus. Kabalo unta kitang malooy ngadto sa uban ilabina sa mga
nagkinahanglan. Dili unta mopatigbabaw ang katig-a sa atong kasingkasing ug dili unta kita mahisama sa magbalantay nga
giingon ni propeta Jeremiah diha sa atong unang pagbasa karon.
Sa katapusan, kita manghinaut nga ang atong pagkamagbalantay magdala unta ug kalinaw ug kahusayan sama ni Jesus kansa
giingon ni San Pablo diha sa atong ikaduhang pagbasa. Pangayuon ta kang Jesus nga iya kitang hatagan sa espirito sa
pagkamaloloy-on para mahimo kitang sensitibo ug responsible sa panginahanglan sa uban libut kanato. Ug andamon ta ang atong
kaugalingon sa pagpuyo niini. Hinaut pa unta.
Sem. Rechie M. Omas-as
PASIUNA
Daghan sa mga tawo karon nahisalaag tungod kay wala silay hustong pangulo ug sila nagkatibulaag sa pagpangita’g kahulogan
sa ilang kinabuhi. Sa panahon ni Jesus, ang katawhan mibati nga sila gisalikway. Apan miadto sila kang Jesus uban sa paglaum
nga uban kaniya makaplagan nila ang kalipay ug matuod nga kahulogan sa ilang kinabuhi.
Uban ni Jesus, nakaplagan nila ang ilang gipangita ug gipangandoy. Kita, gidala nato kining nagkatibulaag nga katawhan sa
atong panahon karon ngadto sa hustong dalan sa kinabuhi paingon sa usa ka Maayong Magbalantay?
Unang Pagbasa (Jer. 23: 1-6)
Nagpangita sa usa ka matuod nga magbalantay. Sa ngalan sa Dios gisalikway ni Propeta Jeremias ang mga pangulo sa katawhan
sa wala nila’y kamatinud-anon isip magbalantay. Ang Dios mismo mogiya sa iyang katawhan pinaagi sa mga maayong pangulo.
Sa katapusan hatagan niya sila ug usa ka maayong magbalantay aron sa paggiya kanila sa pagsunod kabubut-on sa Dios.
ANG PAGBASA GIKAN SA BASAHON NI PROPETA JEREMIAS (Jer. 23:1-6)
Pagkamakalilisang sa silot sa GINOO niadtong mga pangulo nga nagpasagad lang nga pamatyon ug patibulaagon ang iyang
katawhan! Mao kini ang giingon sa GINOO, ang Dios sa Israel, sa mga pangulo nga angay untang mag-atiman sa iyang
katawhan: “Gipatibulaag ug giabog ninyo ang akong katawhan inay inyo untang atimanon. Karon, silotan ko kamo tungod sa
dautan ninyong mga buhat. Ako, ang GINOO, maoy nagsulti niini. Tigomon ko ang nahibilin sa akong katawhan gikan sa
kanasuran diin ko sila palaaga, ug dad-on ko sila balik sa ilang nasod. Unya mosanay sila pag-ayo. Hatagan ko sila’g mga
pangulo nga mag-atiman kanila. Dili na sila mahadlok o malisang, ug dili ko na sila silotan pag-usab. Ako, ang GINOO, maoy
nag-ingon niini.”
Nag-ingon ang GINOO, “Taliabot ang panahon nga magpili ako’g matuod nga kaliwat ni David aron mahimong hari. Ang maong
hari magmando sa tumang kamaalamon, ug ipatunhay niya ang hustisya ug katarong sa tibuok nasod. Kon maghari na siya,
mahilikay na sa kadaut ang katawhan sa Juda, ug magpuyo nang malinawon ang katawhan sa Israel. Paganganlan siyag, ‘Ang
GINOO Atong Kaluwasan.”
ANG PULONG SA GINOO.
SALAMAT SA DIOS.
SALMO RESPONSORYO
(Ps. 23:1-3, 3-4, 5, 6)
T. Magbalantay kanako ang Ginoo wala nay magmakulang pa kanako.
Magbalantay kanako ang Ginoo, wala nay magmakulang pa kanako. Sa lunhaw nga sibsibanan iya ako nga gipapahulay; Sa
daplin sa malinaw nga tubig iya akong gidala; iyang gihupay ang akong kalag.
T. Magbalantay kanako ang Ginoo wala nay magmakulang pa kanako.
Iya ako nga gitultolan sa matarong nga mga agianan tungod sa iya nga ngalan. Bisan kon magalakaw ako sa walog nga
mangitngit wala akoy kahadlokan nga dautan; Kay anaa ka man sa akong kiliran sa imong igbubugaw ug sungkod gihatagan mo
ako og kaisog.
T. Magbalantay kanako ang Ginoo wala nay magmakulang pa kanako.
Gihikyaran mo ako og lamesa sa akong atubangan samtang nagatan-aw ang akong mga kaaway; Gidihogan mo ang akong ulo og
lana; nagaawas gayod ang akong kopa.
T. Magbalantay kanako ang Ginoo wala nay magmakulang pa kanako.
Ang kaayo Iamang ug kaluoy maoy nagasunod kanako, sa tanang mga adlaw sa akong kinabuhi; Ug magpuyo ako sa balay sa
Ginoo sa mga katuigan sa katuigan.
T. Magbalantay kanako ang Ginoo wala nay magmakulang pa kanako.
Ikaduhang Pagbasa (Ef. 2: 13-18)
Si Cristo, atong kalinaw. Gidala ni Cristo ang kalinaw taliwala sa Dios ug sa katawhan pinaagi sa iyang kamatayon diha sa krus
ug sa gasa sa Espiritu.
ANG PAGBASA GIKAN SA SULAT NI SAN PABLO NGADTO SA TAGA-EFESO (Eph.2:13-18)
Mga igsuon: Sa inyong pagkahiusa kang Cristo Jesus, kamo nga kaniadto layo sa Dios, karon nahiduol na pinaagi sa kamatayon
ni Cristo. Kay si Cristo mismo mao ang atong kalinaw pinaagi sa paghimo sa mga Judio ug sa mga Dili Judio nga usa lamang ka
katawhan. Pinaagi sa iyang lawas giguba niya ang paril nga nag-ulang ug naghimo kanilang mga kaaway. Giwagtang niya ang
Balaod sa mga Judio, lakip ang mga kasugoan ug mga kalagdaan niini, aron gikan sa duha ka kaliwatan, mahimo diha kaniya ang
usa ka katawhan, ug sa ingon makab-ot ang kalinaw. Pinaagi sa iyang kamatayon sa krus gihiusa kita niya ug gipasig-uli ngadto
sa Dios, ug sa ingon niana giwagtang niya ang pagdinumtanay. Busa mianhi si Cristo ug gisangyaw niya ang Maayong Balita sa
kalinaw alang sa tanan kaninyong mga Dili Judio nga kaniadto layo sa Dios ug sa mga Judio nga duol kaniya. Pinaagi kang
Cristo kitang tanan, Judio ug dili Judio, makaduol sa Amahan diha sa usa ka Espiritu.
ANG PULONG SA GINOO.
SALAMAT SA DIOS.
ALELUYA (Jn. 10:27)
T. Aleluya.
Ang akong mga karnero namati sa akong tingog; nakaila ako kanila ug sila nagsunod kanako.
T. Aleluya.
ANG PAGBASA GIKAN SA EBANGHELYO SUMALA NI SAN MARCOS (Mk. 6:30-34)
Namalik ang mga apostoles ug nakigkita sila kang Jesus, ug ilang gisugilon kaniya ang tanan nilang nahimo ug natudlo. Daghan
kaayo ang mga tawo nga nagpulipuli pagpangabot ug pagpanlakaw; tungod niini si Jesus ug ang iyang mga tinun-an wala nay
higayon bisan gani sa pagpangaon. Busa miingon si Jesus sa iyang mga tinun-an, “Mangadto kita sa dapit nga awaaw aron
makapahulay kamog diyutay.” Busa nanakay sila sa usa ka sakayan ug nangadto sa usa ka dapit nga awaaw. Apan daghang mga
tawo ang nakakita sa ilang pagbiya ug nailhan sila dayon; busa ang mga tawo sa tanang lungsod miadto nga nagdagan ug nahiuna
pa gani pag-abot sa dapit nga giadtoan ni Jesus ug sa iyang mga tinun-an. Sa pagkawas ni Jesus sa sakayan, nakita niya kining
dakong panon sa katawhan ug naluoy siya pag-ayo kanila, kay sama man sila sa mga karnero nga walay magbalantay. Ug
gitudloan niya sila og daghang mga butang.
ANG EBANGHELYO SA GINOO.
DAYGON IKAW, O CRISTO.
The Creed is said.
KATILINGBANONG PAG-AMPO
P: Mga igsuon, diha sa atong hiniusang pag-ampo, mangamuyo kita sa atong Ginoo sa gasa sa kaalam ug pagsabot sa mga
kamatuoran sa kinabuhi nga atong nasinati matag adlaw. Sa matag pag-ampo kita moingon. GINOO, DUNGGA KAMI.
a. Alang sa tibuok Simbahan nga ang grasya sa Ginoo mamahimong dayag diha sa iyang pagpakigbatok sa mga buhat nga
dautan. Mag-ampo kita sa Ginoo.
b. Alang sa mga naghupot og katungdanan sa publiko nga pinaagi sa giya sa Ginoo dili unta sila mamahimong sagbot sa
katilingban. Mag-ampo kita sa Ginoo.
c. Alang sa mga kaumahan nga makabaton unta kini og maayong abot aron matubag ang mga materyal nga panginahanglan sa
katawhan. Mag-ampo kita sa Ginoo.
d. Alang sa mga tawo nga nawad-an na og paglaum sa pagpakabuhi, mga tawo nga puno sa mga pangandoy nga kalibutanon
masinati unta nila ang grasya sa Dios nga maoy makabag-o sa ilang kinabuhi. Mag-ampo kita sa Ginoo.
e. Alang kanatong tanan nga ania, karon dinhi atong paningkamotan ang pagpuyo subay sa mga mensahe nga atong nadungog
karon ug atong ipaambit ngadto sa uban. Mag-ampo kita sa Ginoo.
P: O Dios Amahan, ania kami sa Imong atubangan puno sa pagtoo ug pagdayeg sa Imong kaayo. Dungga ang among mga
pangamuyo nga among gihimo sa ngalan ni Cristo Imong Anak nga among Ginoo. Amen
Source:
Balitang Hari

566566
48 Comments
53 Shares
Like
Comment
Share
48 Comments
View 46 more comments
All Comments

Saturnino Gaylan

Amen

o
o  · 

Like

o  · 

Reply

o  · 

Share

o  · 3d


Junrey Galleto

Amen

o
 o  · 

Like

o  · 

Reply

o  · 

Share

o  · 3d

Active
Write a public comment…






Top Posts