HULYO 4, 2021

IKANAPULO’G-UPAT NGA DOMINGO SULOD SA TUIG

Usa sa atong tawhanong kinaiya, bisan dili tanan pero gasagaran, ang pagkapul-anon. sagad nato
kining makit-an diha sa atong mga kabataan karon ug pipila usab sa mga hamtong. Kung ibutang
nato kini diha sa butang, dali dayon kitang pul-an kay para kanato pamilyar na kini kanato. Gani
mangita dayon kita ug kapuli. Unya ang atong ipuli mao gayud kadtong latest o at least duol-
duol gamay. Kung ibutang usab nato kini diha sa atong pakigrelasyon sa tawo, kung aduna kitay
nailhan nga popular nga tawo nga moduol sa atoa, atimanon dayon nato kini apan kung kining
tawhana familiar na kanato, ibaliwala na nato kini. Mahitabo usab kini diha sa Santos nga
Eukaristiya. Usahay mawad-an na kita ug gana o ato kining baliwalaon kay para kanato balik-
balik na kini. Nahimo na kining mikanikal para sa atoa. Subo mang palandongon apan mao kini
ang reyalidad nga atong makita karon.
Mga igsoon, sa nilabay’ng dominggo, gipahinumduman kita sa kamahinongdanon sa atong
pagtoo. Ug karong domingoha gipahinumduman usab kita sa atong misyon isip mga sumosunod
ni Cristo – ang misyon sa pagpakaylap sa atong pagtoo. Apan diha sa atong pagtubag sa maong
misyon – ang pagkapropeta, usahay makasinati kita ug mga kalisdanan ug mga pasulay. Gani
ang atong mga pagbasa naghisgot sa usa ka reyalidad sa pagka-propeta ilabina diha sa atong
Ebanghelyo karon. Diha sa Ebanghelyo ni San Marcos, atong nadungod nga si Jesus nagtudlo sa
synagoga kay sagad kini man ang pagabuhaton sa mga devout Jews ang pagsangyaw sa mensahe
sa Dios ilabina panahon sa adlaw’ng igpapahulay, ug daghan sa mga tawo ang nahibulong ug
natingala sa kaalam nga iyang gipakita kanila. Nahibulong ug natingala sila kay nakaila sila kang
Jesus. Gani adunay nag-ingon: dili ba usa man kana siya ka panday? Anak ni Maria? Kini
nagpasabot nga sila nagtan-aw sa gawas nga pakatao ni Jesus ug wala naminaw sa lalom nga
kahulogan sa iyang pulong. Ug mao kini usab ang masinati sa mga propeta nga kanunay
pangandaman.
Kinsa man diay kining mga propeta? Sila kadtong tawo kinsa napili nga ipadala aron
pagsangyaw sa Maayong Balita ngadto sa katawhan, pagtawag sa mga tawo nga dawaton ang
Pulong sa Dios ug pag-aghat kanila sa pagbag-o sa ilang kinabuhi subay diha sa kamatuoran ug
gugma. Example niini mao si propeta Jeremias ug propeta Ezekiel kinsa gitawag aron
magsagyaw sa Maayong Balita ngadto sa katawhan.
Kita usab, gitawag ug nakaambit sa tawag pagkapropeta pinaagi sa atong bunyag. Diha sa atong
Cristohanong bunyag nakaambit kita sa tulo ka misyon ni Cristo – ang pagkahari, pakapari ug
pagkapropeta. Mosugot man kita ug sa dili diha sa bunyag kita gitawag sa pag-alagad sa uban,
pag-ampo ug pagtabang sa uban nga mahiduol sa Dios ug pagsangyaw sa Maayong Balita ilabina
sa mga tawo nga wala makaila sa Dios.
Mga igsoon, niining ika-napulog upat nga dominggo sa ordinaryong panahon kita
gipahinumdoman nga diha sa atong tawag sa pagpropeta dili kini sayon. Diha sa atong
pagkapropeta adunay mga kalisud, pagtamay, pagbiay-biay ug mga paglutos. Kalisud sa
pagsangyaw sa mga tawo nga dili halos maminaw kanimo. Pagtamay kanimo nganong nahimo
kang magsasangyaw. Gani ingnon pa kita “kahilas” niing tawhana. Pagbiay-biay sa kaugalingon
sa pag-ingon “maayo pa man ako ana niya” ug uban pang mga paglutos. Apan kining tanan
sayod ta nga ang Dios dili mobiya kanato. Anaa Siya sa atong kiliran aron pagtabang kanato.
Mao kini ang giingon ni San Pablo diha sa atong ikaduhang pagbasa bisan nakasinati si Pablo ug
gitawag nga “thorn in the flesh” ug naghangyo sa Dios nga wagtangon kini apan ang Dios
miingon “ang Akong grasya igo alang kanimo, kay ang gahom gibuhat nga hingpit diha sa
kahuyang…” Kini unta ang usa sa mahimo tang inspirasyon. Bisan aduna kining mga kalisud,
pagtamay, pagbiay-biay ug mga paglutos kita sa kanunay magpadayon unta diha sa atong
misyon. Gani matud pa ni Propeta Ezekiel bisan gahi ang ilang ulo, motuo man sila ug sa dili,
kailangan masayod sila ang propeta naa uban kanila.
Sa katapusan, bisan sa kahimtang sa atong sosyudad, sa atong katilingban ug sa atong tagsa-tagsa
ka pamilya dili unta kita mabugnaw diha sa pagpadayon sa atong misyon nga atong naambitan
diha sa bunyag. Magmadasigon unta kita nga motuman niini bisan pa sa mga pagsulay nga atong
naangkon ug batunan ta kanunay nga ang Dios ania nag-uban kanato. Hinaut pa unta.
Sem. Rechie M. Omas-as

PASIUNA
Matag Domingo o kada adlaw atong madungog ang mga pulong sa Ebanghelyo. Dili lamang kini
mga pulong nga gisulti ni Jesus ngadto sa katawhan sa Palestina kaniadto, apan si Jesus mismo
ania kanato karon diha sa iyang mga pulong ug buhat. Nakigsulti siya kanato karon. Gihagit kita
niya karon sa pag-ingon: Naminaw ba kamo sa akong mga Pulong? Nakapatandog ug
nakapausab ba kini kaninyo? Andam ba kamo sa pagsunod kanako karon ug sa pagpuyo sumala
sa akong mga paagi? Busa karon paminawon nato ang iyang mga pulong kay nagsulti siya alang
kanato karon.
Unang Pagbasa (Ezeq. 2: 2-5)
Gipiyal sa Dios ang iyang pulong ngadto sa usa ka yanong tawo. Si Ezequiel, usa ka ordinaryong
tawo, gitawag sa Dios aron mahimong propeta. Iyang isulti ang pulong sa Dios ngadto sa
katawhan ngadto sa dili gustong maminaw.
ANG PAGBASA GIKAN SA BASAHON NI PROPETA EZEQUIEL (Ez. 2:2-5)
Misulod kanako ang Espiritu sa Dios ug gipatindog niya ako. Unya miingon ang tingog kanako,
“Ipadala ko ikaw ngadto sa katawhan sa Israel, katawhan nga masupilon. Sila ug ang ilang mga
katigulangan nagmasupilon kanako. Mga gahi silag ulo, ug walay tahod kanako. Busa ipadala ko
ikaw ngadto kanila, ug ingna sila nga kini ang gisulti sa GINOONG DIOS. Sa ingon masayod
sila nga aduna diay propeta diha kanila motuo sila’g dili.”
ANG PULONG SA GINOO.
SALAMAT SA DIOS.
SALMO RESPONSORYO
(Ps. 123:2, 3-4)
T. Nagatutok ako sa Ginoo, nangaliyupo sa iyang kaluoy.
Kanimo giyahat ko ang akong mga mata kanimo nga nagalingkod sa trono diha sa kalangitan—
Maingon nga ang mga mata sa mga sulugoon nga lalaki nagabantay sa mga kamut sa ilang mga
agalon.
T. Nagatutok ako sa Ginoo, nangaliyupo sa iyang kaluoy.
Maingon nga ang mga mata sa sulugoon nga babaye nagabantay sa mga kamut sa iyang agalon
nga babaye, Sa ingon usab ang atong mga mata nagatutok sa Ginoo nga atong Dios hangtud nga
maluoy siya kanato.
T. Nagatutok ako sa Ginoo, nangaliyupo sa iyang kaluoy.
Kaloy-i kami, O Ginoo, kaloy-i kami kay natagbaw na kami sa mga pagtamay; Ang among mga
kalag gipuno pag-ayo sa bugalbugal sa mapahitas-on sa pagtamay sa tawong garboso.
T. Nagatutok ako sa Ginoo, nangaliyupo sa iyang kaluoy.
Ikaduhang Pagbasa (2 Cor. 12: 7-10)
Ang kalig-on sa Dios makita diha sa mga huyang nga tawo. Gipanalipdan ni Pablo ang
kamakatarunganon sa iyang ministro. Diha sa kahuyang ni Pablo isip tawo, mipatigbabaw ang
kalig-on sa gahum sa Dios.
ANG PAGBASA GIKAN SA IKADUHANG SULAT NI SAN PABLO NGADTO SA TAGA-
CORINTO (2 Cor. 12:7-10)
Mga igsuon: Aron dili ako magmapahitas-on tungod sa daghang katingalahang mga butang nga
akong nakita, gihatagan ako’g sakit nga gigamit ni Satanas aron paghasol kanako aron dili ako
magpagarbo. Sa makatulo nag-ampo ako sa Ginoo nga iyang kuhaon kining sakita, apan ang
iyang tubag mao kini, “Igo kanimo ang akong grasya kay musamot kalig-on ang akong gahom
kon luya ka.” Busa gikalipay ko pag-ayo ang pagpagarbo sa akong mga kahuyang aron
maangkon ko ang gahom ni Cristo. Gikalipay ko ang mga kahuyang, mga panamastamas, mga
kalisdanan, mga paglutos, ug ang mga kakulian tungod kang Cristo. Kay kon huyang ako, nan
lig-on ako.
ANG PULONG SA GINOO.
SALAMAT SA DIOS.
ALELUYA (Lk. 4:18)
T. Aleluya
Ang Espiritu sa Ginoo ania kanako. Gidihogan ako niya aron pagsangyaw sa Maayong Balita
ngadto sa mga kabos, Gipadala ako niya aron pagsangyaw sa kagawasan ngadto sa mga binihag,
Ug pagpahiuli sa panan-aw sa mga buta; Pagpagawas sa mga dinaogdaog.
T. Aleluya.
ANG PAGBASA GIKAN SA EBANGHELYO SUMALA NI SAN MARCOS (Mk. 6:1-6)
Si Jesus mibiya niadtong dapita ug mipauli sa Nazaret nga iyang lungsod, ug mikuyog kaniya
ang iyang mga tinun-an. Sa Adlawng Igpapahulay miadto siya sa sinagoga ug nagtudlo sa mga
tawo. Daghan ang mga tawo didto, ug sa ilang pagkadungog kaniya, nahibulong silang tanan.
Busa nangutana sila, “Diin man niya hikat-uni kining tanan? Unsa mang matanga sa kaalam
kining nabatonan niya? Ug giunsa man niya paghimog mga milagro? Dili ba siya mao man ang
panday nga anak ni Maria, ug igsuon nila ni Santiago, ni Jose, ni Judas, ug ni Simon? Dili ba ang
iyang mga igsuong babaye ania man dinhi magpuyo?” Tungod niini wala sila motuo kaniya.
Ug miingon si Jesus kanila, “Ang propeta gitahod sa tanang dapit gawas sa iyang kaugalingong
lungsod, sa iyang mga kadugo ug sa iyang banay.” Wala siya makahimog milagro didto gawas sa
pagtapion sa iyang mga kamut niadtong pipila ka masakiton ug naayo sila. Natingala siya pag-
ayo nga wala sila motuo. Unya miadto si Jesus sa kasikbit nga balangay ug nagtudlo sa mga
tawo.
ANG EBANGHELYO SA GINOO.
DAYGON IKAW, O CRISTO.
The Creed is said.
KATILINGBANONG PAG-AMPO
P: Mag-ampo kita ngadto sa Amahan nga makabaton kita sa hiyas sa pagkamapaubsanon ug ato
kining mapuy-an ug mapaambit sa uban. Sa matag pangamuyo kita moingon: GINOO,
PATALINGHUGI KAMI.
a. Nga ang tanang nagdumala sa Simbahan ilabi na sa atong Santo Papa, mga kaobispohan, mga
pari ug mga layko nga magmakanunayon unta silang mosangyaw sa pulong sa Dios ilabina sa
mga sinalikway sa katilingban. Mag-ampo kita sa Ginoo.
b. Nga ang tanang mga lideres sa atong nasyonal ug lokal nga panggamhanan maantigong
mogamit sa ilang kaalam o kahibalo aron mapalambo ang atong nasud dili tungod sa garbo apan
tungod sa kaangayan ug gugma. Mag-ampo kita sa Ginoo.
c. Nga ang atong mga igsuon nga nag-antus sa nagkadaiyang mga pagsulay sa kinabuhi,
nagkalisodlisod, biktima sa pagpanlupig mapaubsanon unta nilang ihalad ngadto sa Dios nga
maoy mohatag kanila sa ganti nga dili matupngan. Mag-ampo kita sa Ginoo.
P: Amahan, malaumon kami nga Imong hatagan og katumanan ang among mga pag-ampo.
Tabangi kami sa among pagpaningkamot sa pagsunod ug pagbuhat sa Imong kabubut-on ilabi na
sa inadlaw-adlaw namong panginabuhi. Kini among gipangayo pinaagi ni Cristo among Ginoo.
Amen.
Source:
Balitang Hari

Ania ang imong katawhan

nga karon nag-ambahan
Nagasimba ug nagadayeg
Malipayong nag-awit

Saulugon nato karon

ang imong mga pulong
agi ug pasalamat
sa imong mga hatag

Ania ang imong katawhan

nga karon nag-ambahan
Nagasimba ug nagadayeg
Malipayong nag-awit
Saulugon namo karon
ang imong mga pulong
agi ug pasalamat
sa imong mga hatag
agi ug pasalamat
sa imong mga hatag
Download the app:

133133
17 Comments
5 Shares
Like
Comment
Share