Minggu 27 Pebruari 2022

Invocatio: Perb 14:22

Ogen : Matius 13:18-23
Kotbah: Jesaya 55:10-13
Thema: Kata Dibata Mereken Keriahen

Kitab Ende-Enden No.204 ngatakenca maka Kata Dibata e seh kal perluna bas geluh
enda. Adi si perdiateken mulai ibas ayat 1-6 ibas lagu enda ngatakenca maka kata Dibata e
jadi gegeh, jadi senjata, mereken dame, ngajari, pengapul man banta. Intina maka kata
Dibata e erkuasa kap. Janah adi si nen kubas Yohanes pasal 1 pe ikataken maka pada
mulanya adalah firman. Firman entah pe kata e me si njadiken kerinana, sebab kata e rehna
ibas Dibata nari, kata e me pe Dibata. jadi tanpa kata Dibata ibas geluhta situhuna maka
geluhta enda labo lit ertina.
Adi si ne pe kubas bahan kotbahta si ituriken ibas kitab Jesaya maka kata Dibata
berperan penting ibas kegeluhen bangsa Yehuda. Kitab Jesaya njelasken 3 masa penting
ibas kegeluhen bangsa Yehuda eme: I. masa ancamen Asyur; II. Masa pembuangen ku Babel;
III. Mulihna bangsa Yehuda ku kutana. Ibas 3 masa enda kata Dibata tetap ipeseh man
bangsa e arah nabi Tuhan. janah bagin kotbahta nuriken maka situhuna bangsa e nggo mulai
ndarat ibas situasi kritisna nari sebab go banci mulih ku kutana. Tupung si e pe ulihi ka
ipeseh Tuhan maka KataNa e bali ras udan si nusur i langit nari mpeturah sinuan-
sinuan( ay.10-11). Ertina kata Dibata e me si erdahin ibas geluhta maka terjadi kai si
irencanaken Tuhan ibas geluhta. Janah rencana Tuhan ibas geluhta pasti lalap maba
kedamen ras kesejahteraan. Jenari kata Dibata e pe maba keriahen (ay.12). sebab kata
Dibata e erkuasa mereken kedamen, mpetetap ukur ras mereken pengarapen si terulin man
bangsa e ibas ia nadingken Babel. Si terakhir kata Dibata e erkuasa mengubahkan situasi
sulit/suram menjadi situasi damai (ay.13). bali ras situasi Kanaan si enggo ndekah itadingken
bangsa e nggo kap turahen semak duri si galang ije, tapi alu kemulihen bangsa e, iubahken
Tuhan me mulihi taneh e alu mpeturah si mehuli ibas taneh e nari eme pohon sanobar ras
murad ( LAI). Bage ka me pengubahken Tuhan situasi bangsana ibas si mesera nari kubas
situasi si mehuli.
Amin gia kata Dibata e penting kel ras dem ibas kuasa tapi erbage-bage nge kalak ibas
ngaloken kata Dibata e. emaka ituriken Tuhan Yesus pe arah ogenta kitab Matius 13 maka lit
4 erbagena kalak ibas merespon kata Dibata e:
1. Bagi benih si ndabuh i tepi dalan: labo teralokena kata Dibata e, labo atena tutus pe
megikensa kata Dibata e. ku gereja pe rusur, pJJ ras PA pe rusur tapi bosan janah
labo atena tutus megiken kata Dibata e, emaka labo banci turah kata Dibata e ibas
pusuhna.
2. Si turah ibas taneh si erbatu-batu: begikenna nge kata Dibata tupung ituriken janah
meriah akapna ngalokensa. Tapi ula kin lit kendala ibas ia ersembah man Dibata e.
dikune lit perbebenna lit si jadi ka bagi ukurna minter tondel ukurna, lanai ka reh-reh
pe ku gereja tah ku perpulungen.
3. Ndabuh ku tengah peren duri: turah nge ia seh galang tapi dungna kicat ban peren
duri emaka la ia erbuah. Kalak kristen si bagenda, rajin nge tetap ku gereja-rajin nge
ku PJJ ras sidebanna, tapi ibas pusuhna ras geluhna lenga bo tertalukenna sura-sura
dagingna. Perayakenna lenga bo seh kubas kinirajan Dibata Dibata tapi perayakenna
terjeng doni saja nge ngenca lalap.
4. Benih si ndabuh kubas taneh mehumur: begikenna, alokenna alu meriah ukur jenaeri
turah bas pusuhna (renungkenna bas pusuhna) emaka dalankenna me kata Dibata e.
perbahanenna eme buah ibas kata si enggo ibegikenna.
Tentu si erbuah nge maka banci bengket kubas kinirajan Dibata. janaha guna banci
turah ras erbuah alu mehuli tentu lit nge perjuangen si labo nukah. Emaka arah invocationta
ituriken uga ajar-ajar la erlatih-latih nuriken kata Dibata janah melala pe kiniseran
inanamina guna Dibata. tapi si e kerina labo soal sebab kinirajan Surga nggo jadi
sikerajangenna.

Pengkenaina:
1. Kita manusia situhuna terbatas janah labo erkuasa emaka perlu kel kita Dibata.
janah Dibata erdahin ibas kita arah kataNa. Emaka kata Dibata e nge si erkuasa ras
erdahi ibas geluhta. Alu bage kata Dibata e seh kel pentingna bas geluhta.
2. Ibas kerina masa geluhta, la banci kita lepas ibas kata Dibata nari. Baik susah,
senang, sakit, sehat ras sidebanna kata Dibata harus tetap sibegiken.
3. Kata Dibata e erkuasa ibas geluhta guna nehken rencana Dibata man banta eme
rancangan damai sejahtera, bagepe erkuasa mereken keriahen (sebab Kata Dibata e
erkuasa mereken kedamen, mpetetap ukur ras mereken pengarapen man banta),
kata Dibata e pe erkuasa mengubahken situasinta si la mehuli jadi situasi si mehuli.
4. Mulai nai nari, genduari, seh rasa lalap Kata Dibata e tetap nge rkuasa. Uga kata
Dibata e erdahin ras erkuasa ibas geluhta tentu ipengaruhi kubas caranta merespon
kata Dibata e. ibas si 4 tipe ndai. Jelas maka la sia-sia kita megiken kata Dibata e adi
kita bagi benih si ndabuh ibas taneh si mehumur. Tutus ateta megikenca, si
renungken bas pusuhta jenari si dalanken kata Dibata e bas geluhta.
5. Kalak si ngaloken Kata Dibata, maka kegeluhenna tentu ijamini Dibata ibas doni enda
bagepe i surga.