SEPTEMBER 13, 2020

“Palanggaa ako kag tudlui sa dalan sa Dios”

Salmo 127:3, Panultihon 22: 6

Palanggaa ako, Ipabatyag sa akon nga importante ako kag tudlui sa insakto nga dalan. Bata man
ako pero dasig lang tudloan.Si Asa Don Brown- Isa ka Psychologist nag siling “Children are
sponges, soaking up every verbal and non-verbal interaction.” Ang mga bata ginpa anggid niya
sa isa ka spongha nga kon sa diin madasig lang magsuyop sang tubig, pareho sa amon, kadasig
lang sa amon makasunod sang amon mabatian kag Makita. Tungod ang bata ara pa lang sa
sulod sang tyan sa isa ka eloy may abilidad na nga magsunod kag magtuon.

Maayong adlaw sa tanan! Kag malipayon nga dominggo para sa tanan nga mga kabataan
pareho ko. Nalipay ko nga ako ang napili just to share Gods message. Bisan sa pandemic nga
aton gina atubang sa gihapon malipayon kita nga padayon sa pagsimba sa aton buhi nga Dios.
Sa new normal nga na experience naton tanan, ilabe na asa amon nga mga bata nga limitado
ang pag guwa sa balay, bisan pasa pagkadto sa eskwelahan-bawal na.

Ang mga anak sa nabasa nga texto, gift from God kag ini sila ang mga matuod nga panalangin.
Ang mga bata regalo halin sa Dios. Pero ngaa ayhan nga gin consider kami nga regalo halin sa
Dios? Siguro tungod nalipay ang ginikanan nga nahatagan sang isa ka anak? Or nalipay kamo
tungod kami bibo? Or mingaw ang balay kon may bata? pero ngaa sa pagdako na sa bata,
nahimo man nga problema sa ginikanan kag sa comunidad? Ma consider pa ayhan nga blessings
sila?

Kami nga mga bata dasig kami makasunod sa inyo mga ginahimo, sa amon nakita sa palibot kag
naandan nga mga ginahimo. Sa nahambal na nga kami nga mga bata daw pareho sang spongha
nga dasig lang makasuyop dali lang makasunod sa mga butang kag impormasyon nga amon
makita kag mabatian. Amo na ang batasan sang isa ka bata dasig lang makasunod tungod kami
wala pa makabalo kon anu ang insakto kag indi.

Bilang bata nag kinahanglan kami sa inyo pag giya, pagtudlo kag pagmatutoto sa insakto nga
dalan kag insakto nga pamaagi sa pagkinabuhi nga uyon sa kabubut-on sa Dios. Kon may
panahon nga makasala kami indi kami pag yagutaa o pag kadlawi, kay nagkinahanglan kami nga
tudluan kon anu ang dapat. Kay ang matuod nga paghigugma sa bata gina disiplina kon maka
sala, wala ginapabay an. Kami nga mga bata naghimo lang sang kon anu ang inyo gintudlo kag
kon anu ang amon nakita sa amon palibot. Paminsara nga kon sala ang inyo pagtudlo sigurado
madala ini namon sa amon pagkadako. Kag amo ini ang patihan nga insakto.

Gani kinahanglan nga mintras bata kami matudloan na kami sang insakto nga dalan. Kon
makasala kami, sawaya kami nga may upod nga paghigugma. Kon may pangayoon kami, bisan
may ikabakal pa kamo kinahanglan paminsaron nyo man kon ini bala makahatag kaayohan sa
amon. Indi kami pagpa anara nga kon may pangayoon ihatag dayon. Tudloi kami sa batasan sa
paghulat. Kay ang Paghulat isa ka proceso sa kabuhi para aton ma inchindihan ang isa ka bagay
nga uyon gid man sa kabubut-on sa Dios. Pareho sa paghulat sa sabat sa aton mga pangamuyo.
Kay kon wala kami matudloan sa batasan sa paghulat dasig kami mangakig kon may
kinahanglan nga indi dayon mahatag or dasig kami magsunggod sa inyo kag malain dayon ang
buot kon indi dayon mahatag ang gusto, kag ang pinakalala ma rebelde kami kag makahimo
sang butang nga indi maayo ina tungod wala kami matudluan kon paano maghulat.

Pabay i kami nga mahibi kay nasubuan lang kami, ipakita lang nga palangga nyo kami. Pareho
sa pagtudlo sang Dios nga amay nga may tatlo ka sabat sa aton mga pangamuyo.una, “ Huo”
kon ini makapaayo sa aton. Ika duha,”indi” kon ini makaguba sa aton kabuhi kag ika tatlo,
“dason lang” kay indi pasa husto nga panahon. Ang importante na tudluan kami nga daan para
madala namon ini isa amon pagdako.

Patilawa kami sa mga kabudlayan agud mabal an namon kon paano mangabudlay. Ini wala man
gapa inchindi nga inyo kami pabudlayan kondi tudloan nyo lang kami paano mangabudlay sang
amon man ikasarang. Sa sini nga paagi maangkon man namon ang blessings sa Ginoo. Aton
mabasa sa Hulubaton 13: 4 kon matamad ang isa ka tawo, bisan anu pa ang iya ginahandom ,
indi gid niya ini maangkon, pero kon mapisan siya, maangkon niya ang sobra pa sa iya
ginahandom. Madamo sang leksyon ang kabuhi, ipabatyag sa amon ang inyo pag giya para
makabalo kami nga motindog sa amon kaugalingon sa amon pagdako. Kay kamo nga mga
ginikanan o mga hamtong na, o kita tanan lumalabay lang sa sini nga kalibutan,kon wala na
kamo paano kami makatindog sa amon kaugalingon kon wala na kamo kay naanad kami nga ara
kamo sa amon tupad.

Ang childrens Sunday naka hatag sang dako nga challenge ilabe na sa amon nga mga kabataan
subong. Ini nagapabatyag sa amon nga may part kami sa Iglesya kag may part kami sa pagtubo
sini. Kon makabalo na kami sa insakto tungod inyo na kami natudluan, amon man ini ma share
sa pareho namon nga bata upod ang inyo pagpalangga, pag-atipan kag pagtudlo nga inyo
ginpabatyag sa amon. Ang pagtudlo paano maghulat kag paano mangabudlay sa amon
ikasarang. Aton man mabasa sa Isaias 54: 13 naga siling; Ako mismo ang magatudlo sa imo
katawhan, kag mangin maayo gid ang ila kahimtangan.” kabalo kita nga kami nga mga bata
regalo sa Dios gani kinahanglan kami atipanon, tudluan sa insakto nga pamatasan,kag ma
tudluan permi sa mga pulong sa Dios.

Ang pag angkon sa batasan sa paghulat Makita tane sa amon bilang isa ka bata. Kabalo kita nga
may dako nga mahimo ang Eglisya kon kami na training na nga daan sa husto nga pamaagi sa
pagkinabuhi. Salamat sa Dios sa paghatag sa akon sang time para ma share ang iya mensahe.
Para sa mga bata pareho ko, maninguha kita sa pagtubo, sa pihak sang mga problema nga aton
gina atubang indi kita mag untat sa pagtawag sa ngalan sa Dios.

Kabay ang Dios magdugang sang kaalam agud aton ma inchindihan kag magamit sa aton
pagkinabuhi ang mensahe nga aton nabatian subong. Madamo gid nga salamat. Ang Dios
magapadayon gid sa paghatag sang mga panalangin.