Македонскиот синдром“ не се одредува со „вината на другиот“ (Бошнаковски), туку со
незнаењето, неможноста и несакањето да се лоцира вистинскиот извор на проблемот или: кон што да се насочи творечката енергија? Иако актуелноста на македонското совремие е дефинирана од многу поприземни проблеми отколку од оние на и за културата и за уметноста, тоа воопшто не смее да биде причина вториве да бидат маргинализирани. Напротив, после „сликите“ и „приказите“ на странските медиуми за Македонија, токму културата и уметноста присутни вон од овие простори мораат да ја имаат задачата за покажување и на други „слики“ и „прикази“ од овие простори. Ова е императив на сите оние кои не сакаат да се идентификуваат со наметнатите „слики“ и „прикази“. Оттука, откажувањето на учеството на Република Македонија на 47 Венециско биенале од страна на Министерството за култура е неоправдливо и, пред сè, непростливо. Од целиот бран написи на оваа тема во печатот, а особено од неразбирливиот и неаргументираниот напад на тимот одговорен за реализација на проектот (Драган Бошнаковски и Сузана Милевска) врз Музејот на современата уметност, се стекнува една збунувачка слика, која сепак не одговара на прашањето зошто Република Македонија не учествува на Венециското биенале. Но, колку што е можно поскоро треба да се остават настрана производите на тукашната т.н. „муабетџиска култура“ (чијшто најдобар пример е и толкувањето на синтагмата „македонски синдром“ од страна на Бошнаковски), иако последиците од неа секогаш се крајно контра-продуктивни. После сè ова, се плашам и да помислам што ќе се случи со оној или оние кои сепак ќе изнајдат сили да ја прикажат рецентната уметничка продукција во Македонија во Венеција, без разлика во која форма и на кој начин, а како реакција на перманентните незадоволници и „синдромичари“.