19

TUPAK AMARUMAN HARAWI

Qillqaq: Alejandro Romualdo

Dinamita nisqawanmi phukuchinqaku,

Qhaqosqapin apanqaku, aysanqaku,
maqaykunawantaqmi siminta ñut’u allpawan hunt’achinqaku,
Chaymantataq phukuchinqaku, ichaqa manataq wañuchiyta atinqakuchu.

Paykunan umanpanmanta sayachinqaku.

Yuyaychasqankunata, kirunkunata, qapariyninkunata ima qechunqaku.
Sinchi phiñakuywantaq hayt’anqaku,
hinaspataq yawarchanqaku, ichaqa manataq wañuchiyta atinqakuchu!

Paykunan umanta yawarwan churanqaku;

uya tullunkunatataq saqmakunawan,
hinallataq klawukunawanpas waqta tullunkunata.
Ñut’u allpatataq mikhuchinqaku chaymantapas
maqanqakuraqtaq, ichaqa manataq wañuchiyta atinqakuchu.

Paykunan mosqokusqantapas, ñawintapas horqonqaku,

chaymantataq qapariy qapariywan aycha kurkunta rakiyta munanqaku,
chaymantapas thoqayunqaku,
wañuchiy maqaywantaq ch’antinqaku,
chaywanpas manataq wañuchiyta atinqakuchu.

Chaytataq plazaq chawpinman churanqaku,

wichayman uyayuqta, mana tukukuq qhawashaqta,
chaymantapas chakimakinkunata watanqaku, hinaspataq mana allinman_
weqch’unqaku, chaywanpas manataq wañuchiyta atinqakuchu.

Phukuyta munanqaku, ichaqa manataq phukuyta atinqakuchu.

Pak’iyta munanqaku, ichaqa manataq pak’iyta atinqakuchu.
Wañuchiyta munanqaku, ichaqa manataq wañuchiyta atinqakuchu.
Kurkun rakiyta, ñut’uyta
qhellichayta, saruyta, kallpan qechuyta,
phukuyta ima munanqaku, ichaqa manataq phukuyta atinqakuchu.

Pak’iyta munanqaku, ichaqa manataq pak’iyta atinqakuchu.

Wañuchiyta munanqaku, ichaqa manataq wañuchiyta atinqakuchu.

Kinsa p’unchay ñak’arisqanmantataq

tukuy imapas tukusqañahina kaqtintaq,
qaparispa qespikay kay pachaman
kutimunanmi nispa, ichaqa manataq wañuchiyta atinqakuchu.

Traducción por
Wayna Tunki
tiktok.com/@waynatunki
Alejandro Romualdo (1926-2008)

Revista Rimac Llaqta Número 3 - Mayo 2022