Most Holy Trinity Cathedral Parish

Diocese of Talibon, Parish Rectory, Talibon, Bohol, Philippines 6325

OFFICIAL
MISSALETTE
WEDDING
RITE
(Cebuano)
 RITUAL SA KASAL SULOD SA SANTOS NGA MISA
PASIUNA
KOMENTADOR: Ang Dios nagmugna sa tawo tungod sa gugma, ug nagtawag kaniya sa paghigugma—ang ulohang
bokasyon sa matag tawo gikan pa sa iyang pagkahimugso. Kay gimugna sa Dios si ______ ug _____, ang
ilang paghigugmaay nahimong larawan sa hingpit ug matinud-anong gugma sa Dios. Dili mahimong bulagon
ang kahiusahan sa lalaki ug babaye diha sa sakramento sa kaminyoon. Kini ang kabubut-on sa Dios, “Ang
gihiusa sa Dios dili bulagon sa tawo.” Ubanan ta si _____ ug _____ diha sa pag-ampo sa ilang pagsugod sa
ilang panaw sa pagtoo, paglaum ug paghigugma. (Magsugod pagpanglakaw ang sakop sa bridal entourage).
AWIT SA PAGSUGOD UG PROCESSIONAL
PAGTIMBAYA UG RITO SA PAGHINULSOL
KOMENTADOR: Palihog manindog ang tanan kay atong sugdan ang pagsaulog sa Santos nga Eukaristiya. Ato
karong awiton ang awit sa pagsugod.
CELEBRANTE: Sa ngalan sa Amahan, sa Anak ug sa Espiritu Santo.
KOMENTADOR: Amen.
CELEBRANTE: Ang grasya sa atong Ginoong Jesukristo, ug ang gugma sa Dios nga Amahan, ug ang panaghiusa
sa Espiritu maanaa kaninyo.
KOMENTADOR: Maanaa usab kanimo.
CELEBRANTE: Ang santos nga kasabutan sa kaminyoon, diin si _____ ug ______ nagtukod og usa ka pakig-alayon
sa tibuok nilang kinabuhi, gitumong alang sa kaayuhan sa magti-ayon ug sa pagpahimugso ug pag-edukar sa
mga anak. Kining kasabutan tali sa mga binunyagan giisa ni Kristo atong Ginoo ngadto sa dignidad isip
sakramento. Busa atong iampo si _____ ug _____ aron ang Dios mopadayon pagpanalangin ug pag-amping
kanila diha sa gugma bisan unsay mahitabo, maayo o dautan, sa kahamugaway ug kapit-os, sa sakit ug
maayong panglawas, hangtud ang kamatayon mobulag kanila,
Mga igsoon, ilhon ta ang atong mga sala aron kita maandam sa pagsaulog niining santos nga mga misteryo.
(Pamalandong diha sa kahilom)
CELEBRANTE: Nagakompisal ako…
KOMENTADOR:..SA DIOS NGA MAKAGAGAHUM SA TANAN, UG KANINYO MGA IGSOON NGA NAKALAPAS
AKO UG DAKO UYAMOT, SA HUNAHUNA, SA PULONG UG SA BUHAT UG SA WALA PAGBUHAT SA
KINAHANGLAN KONG BUHATON. KAY AKONG SALA, AKONG SALA, AKONG DAKONG SALA. BUSA
NANGAMUYO AKO KANG SANTA MARIA, KANUNAYNG ULAY, SA TANANG MGA ANGHEL UG MGA
SANTOS, UG KANINYO MGA IGSOON, ARON INYO AKONG IAMPO SA GINOO NGA ATONG DIOS.
CELEBRANTE: Kaloy-an unta kita sa Dios nga makagagahum sa tanan ug pasayloon sa atong mga sala. Dad-on
unta kita niya ngadto sa kinabuhing dayon.
KOMENTADOR: Amen.
KYRIE paga-awiton.
GLORIA (OPTIONAL)
CELEBRANTE: Himaya sa Dios didto sa langit….
KOMENTADOR: Ug kadait sa iyang mga tawo dinhi sa yuta, Ginoong Dios, langitnong Hari, Dios Amahan
makagagahum sa tanan, nagasimba kami kanimo, nagapasalamat kami kanimo, nagadayeg kami kanimo,
tungod sa imong himaya. Ginoong Jesukristo, bugtong Anak sa Amahan, Ginoong Dios kordero sa Dios, Ikaw
nagawagtang sa sala sa kalibutan: kaloy-I kami. Ikaw nagalingkod sa too sa Amahan: dawata ang among mga
pangamuyo. Kay ikaw lamang ang santos, ikaw lamang ang Ginoo, ikaw lamang ang labing Halangdon, O
Jesukristo, uban sa Espiritu Santo diha sa himaya sa Dios Amahan. Amen.
CELEBRANTE: Mag-ampo kita (hunong): O Amahan, gihimo mo ang bugkos sa kaminyoon nga usa ka santos nga
misteryo, usa ka timaan sa gugma ni Kristo. Patalinghogi ang among mga pag-ampo alang kang ______ ug
______. Ubag pagtoo kanimo ug sa usag usa nagapasalig sila karong adlawa sa ilang panaghigugmaay. Ang
ilang mga kinabuhi mahimo unta kanunay nga mga saksi sa katinuod sa ilang gugma. Kini among gipangayo
pinaagi sa maong Ginoong Jesukristo nga imong Anak, nga buhi ug hari uban kanimo ug sa Espiritu Santo,
Dios hangtud sa kahangturan.
KOMENTADOR: Amen.
LITURHIYA SA PULONG
KOMENTADOR: Palihog manlingkod alang sa Liturhiya sa Pulong.
UNANG PAGBASA: PAGBASA KINUTLO GIKAN SA BASAHON SA GENESIS:
Ang Ginoong Dios nag-ingon, “Dili maayo sa tawo nga mag-inusara. Magmugna akog iyang kauban aron
motabang kaniya.” Ug busa mikuha siyag lapok gikan sa yuta ug kini iyang giumol aron mahimong mga hayop ug
kalanggaman. Unya, iya kining gidala ngadto sa lalaki aron iya kining hinganlan. Mao kini ang paagi nga nabatunan
sa tanan ang ilang ngalan. Ug busa gihinganlan sa lalaki ang tanang mga kalanggaman ug kahayupan; apan wala
niini nahimong tukma nga kauban aron motabang kaniya. Unya gipakatulog sa Ginoong Dios ang tawo, ug samtang
kini nahinanok, iyang gikuha ang usa sa iyang mga gusok ug giuli ang iyang unod. Iyang giumol ang usa ka babaye
gikan sa maong gusok ug gidala ngadto sa lalaki. Unya ang lalaki miingon, “Sa katapusan, aniay susama kanako—
bukog sa akong bukog, ug unod sa akong unod. “Babaye” ang iyang ngalan tungod kay siya gimugna man gikan sa
lalaki.” Tungod niini, kinahanglang mobiya ang lalaki sa iyang amahan ug inahan ug makig-uban sa iyang asawa, ug
silang duha mahimong usa.”
Ang pulong sa Ginoo.
KOMENTADOR: Salamat sa Dios.

SALMO RESPONSORIO
SALMISTA: MALIPAYON SILA NGA NAGATUMAN SA GINOO.
KOMENTADOR: MALIPAYON SILA NGA NAGATUMAN SA GINOO.
SALMISTA: Malipayon sila nga nagatuman sa Ginoo,/ nga nagpuyo diha sa iyang mga sugo./ Ang imong buhat
magatabang sa imong mga panginahanglan,/ ug ikaw magmalipayon ug mauswagon.
KOMENTADOR: MALIPAYON SILA NGA NAGATUMAN SA GINOO.
SALMISTA: Ang imong asawa magmatinud-anon/ sama sa bagun diha sa imong panimalay./ Ang imong anak
mahisama sa mga olibo diha sa imong kan-anan./ Sa tawo nga matinumanon sa Ginoo, ang panalangin
madagayaon.
KOMENTADOR: MALIPAYON SILA NGA NAGATUMAN SA GINOO.
SALMISTA: Ang Dios magapanalangin sa Bukid sa Sion./ Makita mo unta ang Jerusalem nga mauswagon sa tanang
adlaw sa imong kinabuhi./ Mabuhi ka unta aron pagtan-aw sa mga anak sa imong mga anak./ Kalinaw maanaa
unta sa siyudad sa Jerusalem.
KOMENTADOR: MALIPAYON SILA NGA NAGATUMAN SA GINOO.

IKADUHANG PAGBASA (Optional): KINUTLO GIKAN SA SULAT NI SAN PABLO NGADTO SA MGA TAGA
CORINTO
Mahimo nga makasulti ako sa nagkalainlaing pinulongan sa mga tawo ug bisan sa mga anghel, apan kon
wala akoy gugma, sama ra ako sa masaba nga agong ug sa piyangpiyang nga nagatagingting. Bisag may hiyas ako
nga linamdagan nga pagwali, ug makabaton sa tanang kahibalo ug makasabot sa tanang tinago; bisan may pagtoo
ako nga makapabalhin sa mga bukid---apan kon wala akoy gugma, wala akoy kapuslanan. Bisag ipanghatag ko pa
ang tanan kong katigayonan ug ipasunog ko ang akong lawas, apan kon wala akoy gugma, wala kiniy kapuslanan.
Ang gugma mapailubon ug maloloy-on; ang gugma dili masinahon o tigpagawal o garboso; ang gugma dili
bastos o hakog, o suk-anon; ang gugma dili madinumtanon, ang gugma dili malipay sa dautan, kondili sa
kamatuoran. Ang gugma mapailubon, ang gugma matinuohon, ang gugma malaumon ug molahutay gayod bisan
unsa pay mahitabo. Ang gugma dili matapos.
ANG PULONG SA GINOO.
ANG PAGDAGKOT SA MGA KANDILA
KOMENTADOR: Palihog manindog alang sa Ebanghelyo (Samtang awiton ang Alleluia, dagkotan ang mga kandila).
ALLELUIA
CELEBRANTE: Ang Ginoo maanaa kaninyo.
KOMENTADOR: Maanaa usab kanimo.
CELEBRANTE: Ang santos nga Ebanghelyo sumala ni San Mateo.
KOMENTADOR: Himayaon ikaw, O Ginoo.
CELEBRANTE: Ang mga Pariseo miduol kang Jesus aron paglaang kaniya pinaagi sa pag-ingon, “Gitugot ba sa
atong balaod nga ang usa ka tawo makahimo pagpakigbulag sa iyang asawa sa bisan unsang hinungdan?” Si
 Jesus mitubag, “Wala ba kamo makabasa sa kasulatan nga nag-ingon: sa sinugdan, gibuhat sa Dios ang lalaki
ug babaye? Tungod niini, kinahanglang mobiya ang lalaki sa iyang amahan ug inahan, ug makigtipon sa iyang
asawa, ug silang duha mahimong usa.” Busa dili na sila duha kondili usa lamang. Kinahanglang diil bulagon sa
tawo ang gihiusa sa Dios.
Ang ebanghelyo sa Ginoo.
KOMENTADOR: Daygon ikaw, O Kristo….Palihog manlingkod ang tanan alang sa pagwali.
WALI
RITUAL SA KASAL
KOMENTADOR: Ato karong himoon ang ritual sa kasal. Gihangyo nato ang mga sponsors ingon man ang mga
ginikanan sa babaye ug lalaki sa pagtindog ug pagsaksi sa kahiusahan ni ______ ug _______.
CELEBRANTE: Minahal uyamot nga _____ ug _____, ania kamo karon dinhi aron paghingpit sa bugkos nga way
pagkabadbad sa inyong gugma atubangan sa Simbahan. Nagpasalig ako karon kaninyo sa mga pag-ampo sa
atong katilingban aron ang Dios mobubo sa iyang daghan nga panalangin ug motabang kaninyo diha sa
pagtuman sa mga katungdanan sa kaminyoon.
(He addresses the community). Ug karon mga igsoon, hangyoon ko kamo sa pagtabang kanila ni __________
ug _______ pinaagi sa inyong mga pag-ampo ug sa pagdawat kanila nga bag-ong kinasal diha sa atong
katilingbang kristohanon.
PAKISUSI
CELEBRANTE: Ug kamo, __________ ug ___________ hangyoon ko kamo sa pagtubag sa tinuoray niining
mosunod nga mga pangutana
________________ (bride) mianhi ba ikaw sa imong kabubut-on aron pagbugkos kanunay sa imong kabubut-
on diha sa paghigugma ug pag-alagad sa imong bana?
BRIDE: Oo, padre.
CELEBRANTE: _________________ (groom), mianhi ba ikaw sa imong kabubut-on aron pagbugkos kanunay sa
imong kaugalingon diha sa paghigugma ug pag-alagad sa imong asawa?
GROOM: Oo, Padre.
CELEBRANTE: _____________ ug _________ , tumanon ba ninyo ang pag-agak sa mga anak nga ihatag o gihatag
na kaninyo sa Dios aron mahimong mga maayong Kristianos?
BRIDE AND GROOM: OO, Padre.

PAGBAYLOAY SA PAG-UYON
CELEBRANTE: __________ ug ___________, sanglit buot man kamo magminyo, paggunitay kamo sa inyong tuong
kamot ug ipahayag ang inyong tuyo atubangan sa Dios ug sa Iyang Simbahan.
____________ (bride), kini sa _____________ (groom) nga ania karon dinhi, dawaton ba nimo siya nga imong
bana sumala sa lagda sa atong Inahan Santa Iglesia?
BRIDE: OO, akong dawaton.
CELEBRANTE: Uyon ka ba nga iyang asawa?
BRIDE: Oo, uyon ako.
CELEBRANTE: Dawaton mo ba siya nga imong bana?
BRIDE: Oo, akong dawaton.
CELEBRANTE: __________ (groom), kini si _________ (bride) nga ania karon dinhi, dawaton ba nimo siya nga
imong asawa sumala sa lagda sa atong Inahan Santa Iglesia?
GROOM: OO, akong dawaton.
CELEBRANTE: Uyon ka ba nga iyang bana?
GROOM: Oo, uyon ako.
CELEBRANTE: Dawaton mo ba siya nga imong asawa?
GROOM: Oo, akong dawaton.
CELEBRANTE: Palihog sabat kamo kanako: ITUGOT, GINOO, NGA KAMI MAGKAHIUSA SA KASINGKASING UG
HUNAHUNA SUKAD KARONG ADLAWA BISAN UNSAY MAHITABO: MAAYO O DAUTAN, SA SAKIT O SA
MAAYONG PANGLAWAS, HANGTUD ANG KAMATAYON MOBULAG KANAMO.
PAGLIG-ON SA GAPOS SA KAMINYOON
CELEBRANTE: Ug ako, sa gahom sa simbahan, sinaksihan sa tanan nga ania karon dinhi, nagalig-on ug nanalangin
sa bugkos sa kaminyoon nga inyo karong gihimo. Sa ngalan sa Amahan, sa Anak ug sa Espiritu Santo.
KOMENTADOR: Amen.
CELEBRANTE: Si _____________ug __________ karon bana na ug asawa. Ato silang pahalipayan sa usa ka
masipang pakpak.
KOMENTADOR: Gihangyo ang mga ginikanan ug principal sponsors sa paglingkod.

PAGPANALANGIN SA SINGSING
KOMENTADOR: Gihangyo ang mga ring ug coin bearers sa pagduol alang sa pagpanalangin.
CELEBRANTE: _______ ug ______ , karon panalanginan ko ang inyong singsing. Ang Ginoo maanaa kaninyo.
KOMENTADOR: Maanaa usab kanimo.
CELEBRANTE: Mag-ampo kita: Panalangini, O Ginoo, kining mga singsing, aron si _____ ug si ____ magpuyo
kanunay diha sa paghigugma sa usag-usa ug sa pagbinuotan nga walay paglubag pinaagi ni Kristo nga among
Ginoo.
KOMENTADOR: Amen.
ANG PAGSUL-OB SA SINGSING
CELEBRANTE: Karon, ihatag kining mga singsing sa usag usa ug sabat kanako:
GROOM: ________ (bride), isul-ob kining singsing timaan sa akong paghigugma ug pag-unong kanimo sa ngalan sa
Amahan, sa Anak ug sa Espiritu Santo.
BRIDE: _________ (groom), isul-ob kining singsing timaan sa akong paghigugma ug pag-unong kanimo sa ngalan
sa Amahan, sa Anak ug sa Espiritu Santo.
ANG PAGHATAG SA MGA ARAS
CELEBRANTE: Mag-ampo kita: Panalangini, O Ginoo, ang imong mga alagad nga si ____ ug _____, aron
makabaton sila sa mga kinahanglanon sa kinabuhi nga maoy gihulagway niining mga aras aron unta ila kining
gamiton alang sa pagkab-ot sa kinabuhing dayon. Pinaagi ni Kristo nga among Ginoo.
KOMENTADOR: Amen.
CELEBRANTE: Karon, _______ (groom), ihatag kining mga aras ngadto kang ______ (bride) ug sabat kanako.
GROOM: ________ (bride), Ako nagahatag kanimo niining mga aras, pasalig sa akong paghalad sa akong
kaugalingon alang sa imong kaayohan, sa ngalan sa Amahan, sa Anak ug sa Espiritu Santo.
BRIDE: Ug ako kining dawaton.
KATILINGBANONG PAG-AMPO
KOMENTADOR: Palihog manindog ang tanang alang sa katilingbanong pag-ampo.
CELEBRANTE: Mga minahal uyamot, mag-ampo kita alang sa Simbahan ug alang sa bag-ong kinasal nga atong
mga igsoon kansang kaminyoon nagahulagway sa panaghiusa ni Kristo ug sa iyang Simbahan. Ug moingon
kita: GINOO, DUNGGA KAMI. Atong usbon:
KOMENTADOR:GINOO, DUNGGA KAMI.
PANGULO: Alang sa santos nga Simbahan nga lukop sa kalibutan, alang sa atong Santo Papa _______ ug sa atong
Obispo _______ ug alang sa tanang nag-alagad sa Simbahan. Mag-ampo kita sa Ginoo.
KOMENTADOR:GINOO, DUNGGA KAMI,
PANGULO: Alang sa mga nagmando sa atong nasud. Mag-ampo kita sa Ginoo.
KOMENTADOR: GINOO DUNGGA KAMI,
PANGULO: Alang sa mga kabus ug mga masakiton ug alang sa mga gisulay ug gisakit. Mag-ampo kita sa Ginoo.
KOMENTADOR: GINOO, DUNGGA KAMI.
PANGULO: Alang ni ____ ug _____ aron imong usahon sa kanunay ang ilang mga kasingkasing. Mag-ampo kita sa
Ginoo.
KOMENTADOR: GINOO, DUNGGA KAMI.
PANGULO: Luwasa sila sa dautan, gaana ang ilang mga palas-anon ug lig-ona sila diha sa mga pagsulay. Mag-
ampo kita Ginoo.
KOMENTADOR: GINOO, DUNGGA KAMI.
PANGULO: Nga ang tanan nga mga minyo nga ania karon dinhi mobulig sa grasya sa Sakramento aron
magmabungahon kini. Mag-ampo kita sa Ginoo.
KOMENTADOR: GINOO, DUNGGA KAMI.
CELEBRANTE: Makagagahum ug tunhay nga Dios, sud-onga nga mapuanguron kining imong mga alagad. Itugot
nga magpabilin sila nga maunongon Kanimo ug sa usag-usa. Tapos sa taas ug maayong kinabuhi, gantihi sila
sa kalipay nga dayon uban sa ilang mga anak ug sa tanan nga nahigugma kanila. Kini among gipangayo
pinaagi ni Kristo nga among Ginoo.
KOMENTADOR: Amen…. Palihog manlingkod alang sa paghalad.
(Offertory hymn is sung)
PAGDALA SA MGA HALAD
PAGBUTANG SA BELO UG CORD
(Samtang awiton ang awit sa paghalad, isul-ob ang belo ug cord)
KOMENTADOR (human ang awit): Palihog manindog.
CELEBRANTE: Mga igsoon, pag-ampo kamo aron ang ako ug ang inyong sakripisyo dawaton unta sa Dios nga
Amahan, makagagahum sa tanan.
KOMENTADOR: Dawaton unta sa Ginoo ang sakripisyo gikan sa imong kamut, alang sa pagdayeg ug paghimaya sa
iyang ngalan, alang usab sa atong kapuslanan ug sa tibuok niyang santos nga Simbahan.
KOMENTADOR: Palihog manindog ang tanan.
CELEBRANTE: O Ginoo, patalinghogi ang among mga pag-ampo ug dawata ang mga gasa nga among gihalad
alang kang _____ ug _____. Karon gihiusa mo sila dinhi sa sakramento sa kaminyoon. Magdugang unta sa
ilang gugma alang kanimo ug sa usag usa kanila ang misteryo sa dili-hakog nga gugma ni Kristo, nga among
gisaulog niining Misa. Kini among gipangayo pinaagi ni Kristo nga among Ginoo.
KOMENTADOR: Amen.
PAG-AMPONG EUKARISTIKANHON
CELEBRANTE: Ang Ginoo maanaa kaninyo.
KOMENTADOR: Maanaa usab kanimo.
CELEBRANTE: Ibayaw ang inyong mga kasingkasing.
KOMENTADOR: Amo nang gibayaw ngadto sa Ginoo.
CELEBRANTE: Magpasalamat kita sa Ginoong atong Dios.
KOMENTADOR: Angay ug matarong.
CELEBRANTE: Santos nga Amahan, Dios nga tunhay ug makagagahum sa tanan, angay ug matarong gayud nga
magpasalamat kami kanimo, kanunay ug sa tanang dapit.
Kay pinaagi niining sakramento ang imong grasya nagadugtong sa lalaki ug babaye sa gugma ug kadait.
Ang tuyo mo sa putling gugma sa bana ug asawa mao nga mosanay ang banay sa mga tawo ug nga ang
imong kaugalingong banay madugangan og mga sakop nga matawo pinaagi sa bunyag.
Ikaw ang mahigugmaong Amahan sa kinaiya ug usab ang mahigugmaong Amahan sa grasya. Diha sa
kaminyoong kristohanon gidugtong mo ang duruha ka matang sa mga binuhat: ang gasa sa kinaiya nga mao
ang mga anak nakapabulahan sa kalibutan ug ang imong gasa sa grasya nakapabulahan usab sa imong
simbahan.
Pinaagi ni Kristo ang mga anghel ug ang tanang mga santos nagadayeg ug nagasimba sa imong himaya.
Ang among mga tingog moduyog unta sa ilang way hunong nga pag-awit sa ilang pag-ingon:
SANTOS
KOMENTADOR: (Human sa awit nga Santos…) Mangluhod palihog.
CELEBRANTE: Santos gayud ikaw, O Ginoo, ang tuburan sa tanang kasantos. Ipadala ang imong Espiritu aron
pagsantos niining mga gasa, aron mahimo kini alang kanamo nga Lawas ug Dugo ni Jesukristo nga among
Ginoo.
Sa pagpasakit sa iyang kaugalingon, mikuha siya og pan mipasalamat kanimo, mipikas ug mihatag niini
ngadto sa iyang mga tinun-an ug miingon, DAWATA KINI NINYO NGA TANAN UG KAN-A, KAY KINI MAO
ANG AKONG LAWAS NGA ITUGYAN ALANG KANINYO.
Sa samang paagi, tapos ang panihapon, mikuha siya sa kalis, mipasalamat kanimo pag-usab, mihatag niini
ngadto sa iyang mga tinun-an ug miingon: DAWATA KINI UG PANGINOM KAMO NGA TANAN GIKAN NIINI;
 KAY KINI MAO ANG KALIS SA AKONG DUGO, SA BAG-O UG TUNHAY NGA KASABUTAN, ANG DUGO
NGA IULA ALANG KANINYO UG ALANG SA TANANG MGA TAWO, ARON ANG MGA SALA MAPASAYLO.
BUHATA KINI ARON SA PAGHANDUM KANAKO.
Kini ang misteryo sa pagtoo.
(Acclamation is sung)
CELEBRANTE: Aron paghandum sa kamatayon ug pagkabanhaw ni Jesukristo, nagahalad kami kanimo, Amahan,
niining pan sa kinabuhi ug kalis sa kaluwasan. Nagapasalamat kami kanimo tungod kay imo kaming giisip nga
angayan nga moatubang ug moalagad kanimo. HImoa nga kami nga mangalawat sa Lawas ug Dugo ni Kristo
magkahiusa diha sa Espiritu Santo.
Hinumdomi Ginoo ang imong Simbahan sa tibuok kalibutan, himoa nga mahingpit kami diha sa gugma,
uban ni _____ among Papa, ni _____ among Obispo, ug sa tanang mga pari.
Hinumdomi usab ang among mga igsoon nga nangamatay, malaumon nga mabanhaw sila ug ang tanang
nangamatay diha sa imong kalooy. Dad-a silang tanan sa pagsud-ong sa kahayag sa imong nawong.
Kaloy-i kaming tanan: himoa kaming angayan nga makaambit sa kinabuhing tunhay, uban ni Maria ang
inahan nga ulay sa Dios, ni San Jose iyang bana, uban sa mga Apostoles, ug sa tanang mga santos nga
nagatuman sa imong kabubut-on latas sa katuigan. Uban kanila amo ikaw nga daygon, ug amo ikaw nga
himayaon, pinaagi ni Jesukristo nga imong Anak,
PINAAGI KANIYA, UBAN KANIYA UG DIHA KANIYA, GIHATAG NGANHA KANIMO MAKAGAGAHUM
NGA AMAHAN, DIHA SA KAHIUSA SA ESPIRITU SANTO, ANG TANANG DUNGOG UG HIMAYA, HANGTUD SA
KAHANGTURAN.
KOMENTADOR: (mahimong awiton) Amen…Palihog manindog.
AMAHAN NAMO
CELEBRANTE: Karon mag-ampo kita sa Amahan, atong awiton ang mga pulong nga gitudlo kanato sa atong
Manunubos.
KOMENTADOR: (mahimong awiton) AMAHAN NAMO….
PANALANGIN SA KAMINYOON
CELEBRANTE: Mga igsoon, pangayoon ta sa Dios ang iyang way puas nga mga panalangin alang ni ______ ug
_______.
Santos nga Amahan, magbubuhat sa tanang kalibutan, ang naggama sa lalaki ug sa babaye sa imong
kasamahan tinubdan sa panalangin alang sa kinabuhi nga minyo, nangamuyo kami nga mapaubsanon alang
niining asawa nga karong adlawa nahiusa sa iyang bana dinhi niining sakramento sa kaminyoon.
Mokunsad unta kaniya ug sa iyang bana ang labing bug-os mong panalangin aron mangalipay silang duha sa
imong gasa sa gugma nga ilaha sa mga minyo (ug aron madugangan ang Simbahan pinaagi sa ilang mga
anak.)
Ginoo, magdayeg unta sila kanimo ug modangop kanimo sa ilang mga kaguol. Malipay unta sila sa imong
hinabang diha sa ilang mga buhat ug masayod unta sila nga ikaw nagauban kanila diha sa ilang mga
panginahanglan. Mag-ampo unta sila kanimo tipon sa katilingban sa Santa Iglesia, ug maimong mga saksi dinhi
sa kalibutan. Makadangat unta sila sa gulang nga panuigon tipon sa ilang mga higala, ug sa katapusan moabot
sila sa gingharian sa langit. Kini among gipangayo pinaagi ni Kristo nga among Ginoo.
KOMENTADOR: Amen.
PAG-AMPO SA PANAGDAIT
CELEBRANTE: Ginoong Jesukristo, nag-ingon ka sa imong mga apostoles, “Ang kalinaw ibilin ko kaninyo, ang
akong kalinaw ihatag ko kaninyo.” Ayaw tan-awa ang among mga sala, kondili ang pagsalig sa imong
Simbahan, ug sibo sa imong kabubut-on, hatagi kami sa imong kalinaw ug kahiusa, ikaw nga buhi ug hari
hangtud sa kahangturan.
KOMENTADOR:Amen.
CELEBRANTE: Ang kalinaw sa Ginoo sa kanunay maanaa kaninyo.
KOMENTADOR: Maanaa usab kanimo.
CELEBRANTE: Ipakita ta ang timaan sa atong panag-inigsoonay.
KORDERO SA DIOS
KOMENTADOR: (Human sa awit nga Kordero sa Dios) Palihog manluhod.
CELEBRANTE: Kini mao ang Kordero sa Dios nga nagawagtang sa sala sa kalibutan. Bulahan kitang gidapit alang
sa bangkete sa Ginoo.
KOMENTADOR: Ginoo, dili ako angay nga mokalawat kanimo, apan ipamulong lamang ug mamaayo ako. (Human
sa diyutayng kahilom…) Palihog manlingkod ug mangandam alang sa santos nga pagkalawat.
(Human makakalawat ang bag-ong kinasal, mahimo nang tangtangon ang belo ug ang cord.)
PANGALAWAT
PAG-AMPO HUMAN SA PANGALAWAT
KOMENTADOR: (Human makakalawat ang tanan) Palihog manindog.
CELEBRANTE: Mag-ampo kita: O Ginoo, tungod sa imong gugma gihatagan mo kami niining pagkalawat aron
mahiusa kami sa usag usa ug kanimo. Maingon nga gihiusa mo si ____ ug ____, dinhi niining sakramento sa
kaminyoon ( ug diha sa pagpanag-ambit nila sa usa ka pan ug usa ka kalis), sa ingon hiusaha sila diha sa
gugma alang sa usag usa kanila. Kini among gipangayo pinaagi ni Kristo nga among Ginoo.
KOMENTADOR: Amen.
RITO SA PAGTAPOS
CELEBRANTE: _______ ug ______, karon nga nakadawat na kamo sa sakramento sa kaminyoon, tambagan ko
kamo sa pagpabilin nga makanunayon sa usag usa.
__________ (bride) higugmaa ang imong bana ug pagbinuotan nga asawa, pagpadayon diha sa pagtoo,
paghigugma ug kasantos.
__________ (groom), higugmaa ang imong asawa maingon nga si Kristo nahigugma sa iyang Santa Iglesia ug
pagpakigtipon kaniya diha sa santos nga kahadlok sa Ginoo.
KATAPUSANG PANALANGIN
CELEBRANTE: Ang Ginoo maanaa kaninyo.
KOMENTADOR:Maanaa usab kanimo.
KOMENTADOR: Gihangyo ang tanan sa pagduko sa iyang ulo ug sa pagtubag “Amen” sa matag panalangin.
CELEBRANTE: Ang Dios, Amahan nga way katapusan mag-amping kaninyo diha sa gugma sa usag-usa, aron ang
kalinaw ni Kristo magpabilin uban kaninyo ug sa kanunay maanaa sa inyong panimalay.
KOMENTADOR: Amen.
CELEBRANTE: Manalangin unta kaninyo ang inyong mga anak, maglipay kaninyo ang inyong mga higala ug
makigdait kaninyo ang tanang mga tawo.
KOMENTADOR: Amen.
CELEBRANTE: Mahimo unta kamo kanunay nga mga saksi sa gugma sa Dios dinhi niining kalibutan aron ang mga
nag-antus ug ang mga nagkinahanglan makakaplag diha kaninyo og mga higala nga manggihatagon, ug
magdawat kaninyo didto sa mga kalipay sa langit.
KOMENTADOR: Amen.
CELEBRANTE: Ang Dios nga makagagahum manalangin unta kaninyong tanan, ang Amahan, ang Anak ug ang
Espiritu Santo.
KOMENTADOR: Amen.
CELEBRANTE: Nahalad na ang misa, dad-on nato ang kalinaw ug gugma ni Kristo.
KOMENTADOR: Salamat sa Dios.