EXPERIENCIA DE APRENDIZAJE 3 | V CICLO

Texto 3

Animalninchikta markakunchik

Runakuna tantanakur
markakunapaq parlanllapa
uk ruranapaq parlanllapa atun
animalkunata
markananpaq marca rupachikuq,
markakuq,
cupa aypaq, waqranta aypaq,
wipiyakuq, traguta
rakir upyachikuq, qayakuq, cupa
aqcha kuchuq,
rinri, waqra kuchuq. Chaymanta
traquta rakikuq
tukuyta upyachikun. Nawpaqta
traquta pitilata
icar qallarin wanusha ayllunpa
shutinpi.
Allaq allaqla markakuqkunaqa
uk pachalaman willanakushannu
canllapa, paykunaqa imatapis alli
kamakachin, unakaqqa animalninta
aysakur, qatikur camunllapa manyaqla listapi markakunanllapapaq.
Markakuyta yacaqqa qallarishunna nitinqa, tukuymi yanapanakur
markakunllapa.
Mayqanin animal makakaypiqa qayacakutinqa amunqa ishkay botella
traquta markakuqta makyan. Chaynu qaycakurqashi animalninkunaqa kusata
achkayanqa nir. Novilluna markaypiqa nuñunta chutanllapa lichi achka
kananpaq nir, kay ñuñu chutaytaqa shipaskunami ruran.
Chay markashanpiqa animalpa llullu ismayninta llutar tukuchin, chaynu
ruranllapa ama kuru untananpaq, ama saksananpaq, ama ishquyananpaq ima.
Ayllu markakuqqa riqchaq mikuyta kamakachinllapa: pishqu aychata, saca
aychata, quisu, runtu chicharr, chaynu alli alimintakar kawsanapaq. Tragupis alli
balurta makyakun yacaqkunata tukuy ayllukunatapis.
Uyshakunatashuypaqa rinrisitunta kuchunllapa, chaynu kuchurqa sankarupa
wasinman apar panpanllapa, uyshanchikqa sankaruyupay achkayananpaq nir.
Markakur tukuchirqa animalkunata cakraman apar watarqa, atun pirurula
tar kusa mishki mikuykunata mikunllapa, aswata, traquta upyar, takir ima
samanllapa.
• ¿Imapaqtaq ayllukunaqa animalninta markayanqa?
• ¿Imanutaq tantanakunllapa animalninta markananpaqqa?
• ¿Ima yacaykunapaqtaq willamayanchik kay liyinapiqa?
• ¿Imatataq yarpunki animal markaypaq kustumrinkunapaqqa? ¿Imapaqna?