EXPERIENCIA DE APRENDIZAJE 4 | V CICLO

Texto 3

¿Awayninchikkuna ima niwanchiktaq?

Tapukukkuna: Sumaq p’unchaw Tayta Cirilo, ¿Allillanchu,
imaynallam?
Tayta Cirilo: Sumaq p’unchaw warmakuna
Tapukukkuna: ¡Tayta punchuykiqa munaymi kachkan!, ¿Chaymanta
rimarisunmanchu?
Tayta Cirilo: Riki, Kay punchuchaytaqa unay watañan yanay
ruwapuwarqan, ichaqa manayá thantakunchu tukuy sunquwan ruwasqa
kaptin. Alpaka, uwiha millmawan awasqan.
Tapukukkuna: ¡Kay punchuchaykiqa ancha munasqamá kasqa!
Tayta Cirilo: Arí, yanaypaq sunquntayá apakachani punchuchypi, kaypin
kawsayninchikkuna kachkan, qhawarillaypas kaymi puma ñawi chaywanmi
lluyta rikukun, llapampas yachakullanmi; tayta intipas kaypi kallantaq
payqa sapa p’unchaw nuqanchikwan kuska purin, mikhuyninchikkunapas
kachkallantaqmi trigo kaypi kachkan chakrapas kachkallantaq, t’ikakunapas
chaymi nin munay kawsayninchik ayllunchik ukhupi kaqta. Chaymi
punchuchayqa nuqawan kusqalla purin.
Tapukukkuna: Lliw punchukunachu kaq puralla kanku.
Tayta Cirilo: Manan, sapanka ayllukunan awayninkunapi kawsayninkunata
riqsichiwanchik. Tinta, Canchis ayllukunapin yuraqta aswanta qawanku
pallayninkunapitaqmi t’ikakuna, sach’akuna, phalaqkuna ima ruranku,
chaymi paykunaq kawsaynin; Chumbivilcas ayllukunataqmi pukatañataq
aswanta qhawanku awayninkunapin rikusun wakakunata, kawallukunata
herrajeskunata, qarawatanakunata ima chaypim paykuna uywa
munakusqankuta qhawachiwanchik; Quispicanchis ayllukunapitaqmi
imaymana llinp’ikunayuqta awanku chaypin rikusunman mikhuykunata,
chakrankunata, tayta intita ima. Chhaynatan sapanka ayllukuna awayninpi
kawsayninta riqsichiwanchik.
Tapukukkuna: Añay Tayta Cirilo, anchatan kunan p’unchaw
yacharquyku, munaytam kawsayninchikkunamanta willariwankiku. Añay.
¡Tupananchikkama!

Vuelve a leer el texto y responde las siguientes preguntas:

• ¿Imaraykutaq Tayta Cirilo punchuchanta apakachanpuni?
• ¿Imaynataq Tayta Ciriloq yanan kanman?
• ¿Awayninchikkuna ima niwanchiktaq?