CATHOLIC BASIC PRAYERS

Ding Panalangin a Sukat Abalu ding Katoliko

ING TANDA NING KRUS (PAMANGURUS)

Ing Krus ya ing tanda o simbulo ning kaligatasan, uling kapamilatan ning pamailasa at
kamatayan ning Guinung Jesus kimtan tamu ing kaligtasan.

Potang mangurus tamu nga tamung sasabi: KING LAGYU NING IBPA, AMPON NING
ANAK, AMPON NING ESPIRITU SANTO. AMEN. Iting makuyad a “panalangin” a
kekatamunng sasambitan neng mangurus tamu ya ing buud o summary ning kekatamung
kasalpantayanan. Sasalpantayanan tamu king atin METUNG A DIOS AT ATLU YA
PERSONA: Ing Ibpa, a Talapaglalang king sabla; ing Anak a Talapangabus; at ing
Espiritu Santo ing Talapamatula.

Ing Pamangurus gagawan taya bayu at kaibat mangadi o manalangin. Inya dapat tayang
pangadian at gawan mipnung kagalangan.

ING TANDA NING KRUS

KING LAGYU NING IBPA,

AMPON NING ANAK,

AMPON NING ESPIRITU

SANTO.

AMEN.
IBPA MI

Ing Ibpa Mi mayayaus ya namang “Ing Panalangin ning Guinu” pablasang ing Guinung
Jesus mismu yang mituru kaniting panalangin karing kayang Apostoles inyang lepitan de
at karelang inyawad “Guinu turu mu kaming manalangin.” (Mateo 6:9-13, Lukas 11:1-4)

IBPA MI

IBPA MI, A ATIU BANUA,

MISAMBAN YA ING LAGYU MU
DATANG KEKAMI ING KAYARIAN MU
MIPAMINTUAN YA ING LUB MU
KETI SULIP ANTI BANUA.
ING KAKANAN MI KING ALDO-ALDO
IBIE MU KEKAMI KING ALDO NGENI
AMPON IPATAWAD MU KEKAMI
DING SALA MI KEKA
ANTI ING PAMAMATAWAD MI
KARING MIKASALA KEKAMI,
E MU KE PAISAUL KING TUKSU
NUNE IKABUS MU KAMI KING MAROK.
AMEN.
Balang pangadian ta ya ing Ibpa Mi, kekatamu lang pigunaman ding Pitung Kayaduanan
o Seven Petitions.

1. MISAMBAN YA ING LAGYU MU.

Adwan tamu king ing Dios makilala ya, luguran ya, igalang ya at suyuan ya. Aliwa
mu itamu, nune kilalanan, luguran, igalang at suyuan de ring sablang tau.

2. DATANG ING PAMAGARI MU

Aduan tamu ing magari ya kekatamu ing Dios at datang ing panaun ing akayabe
taya king kayang Kayarian.

3. MIPAMINTUAN ING LUB MU…

Aduan tamu, ing grasyang agampanan tamu ing kaburian ning Dios king aldo-aldo
tamung pamibie-bie.

4. ING KAKANAN MI KING ALDO-ALDO IBIE MU KEKAMI…

Aduan tamu king Dios nung nanu mu ing pamangailangan tamu balang aldo,
maging iti pamangailangan na ning katawan o ning kaladua.

5. PATAWARAN MU KAMI KARING PAMIKASALA MI…

Aduan tamu ing kapatawaran ning Dios karing kasalanan tamu at ing grasyang
patawaran la ding dinapat sala kekatamu.

6. E MU KE IPAISAUL KING TUKSU.

Aduan tamu ing grasya ning Dios ing eta manabu king tuksu at magtagumpe tamu
laban king amuyut ning marok.

7. IKABUS MU KAMI KING MAROK.

Aduan tamu king Dios ing ilisya na katamu king sablang pamikasala at sablang
karokan.
BAPU MARIA
Ing Bapu Maria metung yang panalangin king Nuan a Indung Virgen. Ing mumuna nang
dake ning panalangin, pamamugue la king Virgen Maria a abasa tamu king Ebanghelyo
nang San Lukas.

King Ebanghelyo nang San Lukas 1:28, nganang memalita ning Anghel Gabriel kang
Maria: “Bapu, Ikang kipnuan king grasya! Ing Guinu atiu keka.” At king pamandalo ning
Virgen Maria king pinsan nang i Santa Isabel, nganang migsalitang Isabel: “Nuan ka
karing sablang babai! Nuan ya ing bunga ning atian mu!”

Ing kayaduanan “Santa Maria, Indu ning Dios, ipanalangin mu kaming makasalanan…”
midagdag ya at paniwalan king iti ibat ya king metung a Santong Heswita, i Petrus
Canisius.

BAPU MARIA

BAPU MARIA
MIPNU KA KING GRASYA
ING GUINU ATIU KEKA.
NUAN KA KARING SABLANG BABAI
AT NUAN YA PA NAMAN
ING BUNGA NING ATIAN MU,
I JESUS.
SANTA MARIA,
INDU NING DIOS
PANALANGIN MU KAMING MAKASALANAN
NGENI AT KING ORAS NING KAMATAYAN MI.
AMEN.

Sukat tayang pangadian mipnung kagalangan ing Bapu Maria bilang kapurian king Nuan
a Indu ning Dios at Indu tamu naman. At aduan tamu ing kayang pamamilatan angga na
king oras ning kekatamung kamatayan.
LIGAYA (DOKSOLOHIYA)

Ing Ligaya metung yang Doksolohiya o makuyad a dalit kapurian king Santissima Trinidad
--- Ibpa, Anak at Espiritu Santo.

Ing Ibpa a linalang king sabla at lelangan na katamu agpang king kayang wangis. Ing
Anak a mikatawan tau, migpakumbaba at tinggap na ing kamatayan king krus para king
kaligtasan ning tau, sinubling mebie at ngeni kayabe ning Ibpa king kayang Kayarian. Ing
Espiritu Santo a tinipa inyang Pentekostes at minie sikanan karing Apostoles ban deng
ipanaral ing Mayap a Balita. Iti ya naman ing tinggap tamu karing Sakramento ning Binyag
at Kumpil at ya ing babie diwa king Santa Iglesia ban ing balang metung kekatamu
manigobra ya para king pamipalaganap king Kayarian ning Dios.

LIGAYA

LIGAYA KING IBPA AT KING ANAK

AT KING ESPIRITU SANTO
ANTIMO ING SADYA RANG LIGAYA
IBAT KING KAMUMULAN
NGENI’T KAPILAN MAN
MANGGA MAN KING ALANG ANGGA.
AMEN.

CHARLES HENRY C. ESPIRITU

Program Coordinator

Archdiocesan Lay Formation Institute

and Catechetical Center (8 December 2020)