ACARA PARTANGIANGAN KELUARGA – MINGGU XVII DUNG TRINITATIS

HKBP AFDELING III MAYANG RESSORT RAJAMALIGAS I

Kamis, 23 September 2021
“Mangolu songon Parripe ni Tuhan i (Hidup sebagai Keluarga Allah)”
Pangaradeion diri dohot perlengkapan ibadah

1. Martangiang Nahohom (Saat teduh)

2. Marende BE 15 : 1 + 4 “Aut na Saribu Hali Ganda”

 Aut na saribu hali ganda saringar ni soarangki.
Naeng nasa gogo bahenonhu mamuji Debatanta i.
Paboa las ni rohangki hinorhon ni pambaenna i.
 Mauliate ma rohangku di Ho o Debata tongtong.
Dibahen sude denggan basamu naung nilehonmu di au on.
Ai dipatongon ho tongtong sude na ringkot di au on.

3. Tangiang Pamuhai sian Anggota Keluarga (Doa Pembuka)

4. Manjaha Patujolo ni Jamita (Epistel) Partangiangan sian Pilemon 1 : 8 – 17

(Dijaha ma turpuk marsingkatsorin [responsoria] manang marganti sasahalak)

5. Marende BE 656 : 1 “Parhahamaranggion”

 Parhahamaranggion i, lam hot jala togu. Singkop ma hasadaon i, di Jesus i burju.
Rap sauduran hita be marholong na tutu. Mardame, malas roha ma di Jesus i tutu.

6. Tangiang Pamuhai ni Jamita (Doa Pembuka Khotbah)

7. Manjaha Turpuk Jamita (Evangelium) ni Partangiangan sian Panguhum 14 : 1 – 4

(Dijaha ma turpuk marsingkatsorin [responsoria] manang marganti sasahalak)

8. Hatorangan ni Turpuk
(Dijahahon Uluan ni Keluarga)
Turpuk jamita partangianganta, i ma manaringoti si Simson sahalak naposo ni Debata,
na dipillit Debata gabe Panguhum (Hakim) na manguluhon bangso Israel uju i. Dipangke
Debata do si Simson marhite dalan na so somal (cara yang unik). Diparade Debata di diri
ni si Simson tagas (nafsu, hasrat, keinginan; dalam bahasa Inggris: desire) na gabe dasor
manang alasan ni parporanganna dohot bangso Pilistim. I ma marhite na dibuat ibana
sahalak boruboru Pilistim. Ummura do nian antusanta cerita taringot tu Simson on molo
tajaha bindu 14-16 di Alkitab (hata Indonesia). Asa lam antus hita di pardalanan ni ngolu
ni si Simson.
Marhite jamita on adong ma siputihononta mutiha na arga na laho sipahusorhusoronta.
Parholong jala parasi ni roha do Debata (Tuhan itu penuh kasih karunia). Holong
do roha ni Debata tu bangsoNa, i do umbahen na ditangihon Ibana hoihoi ni bangsoNa i
tongon na digomgomi Palistim nasida. Suangsongon i do nang di ganup ngolunta, ragam
ni angka hamaolon nang sitaonon na taadopi, pos ma rohanta, diboto Debata do
hoihointa. UrupanNa do hita jala pargogoanNa huhut dilehon habisuhon laho mangadopi
ragam ni hamaolon nang hoihointa, ai parholong jala parasi ni roha do Debata.
 Dipasahat Debata do angka na ringkot i tu angka na niasianNa (Tuhan
memberikan segala sesuatu yang dibutuhkan orang-orang yang dikasihi-Nya).
Mangalusi hoihoi ni bangso Israel i, dipasahat Debata ma pangurupionNa i marhite
hatutubu ni si Simson, nang pe na hol hian do anggo inana i, na so jadi hian alai jadi do
anggo di Debata (ndang adong na so tarpatupa Debata). Dipasahat Debata do marhite
TondiNa i hagogoon dohot angka na ringkot tu si Simson. Ida ma holong ni roha dohot
asi ni roha ni Debata i, dipasahat do gogo nang angka na ringkot i tu angka na niasianNa.
Asa nang tu hita pe angka na porsea di Debata, sai na pasahatonNa do angka na ringkot i
tu hita hombar tu lomo ni rohaNa.
Gabe ripe na marhabiaran tu Debata jala mangulahon lomo ni rohaNa (Menjadi
keluarga yang takut akan Tuhan serta melakukan kehendak-Nya). Parripe ni Tuhan
(keluarga Allah) marlapatan do parpunguan na niihot di bagasan sada haporseaon jala
hataridaanna i ma sisada partinaonan dohot sisada las ni roha. Ala ni i tung so boi do
angka ruas ni sada ripe masiboan rohana be di pangalaho dohot pamingkiron. Antong
unang adong be di sada keluarga na pulik pingkiran alai ingkon sai patupaon do
komunikasi laho mambuat haputusan di angka sipatupaon di tonga ni keluarga.
Ingkon jamot do ruas ni keluarga di panghataion dohot di pangalaho (Hendaknya
setiap anggota keluarga menjadi teladan melalui perkataan dan perbuatan). Ai
manginona do parange harorangon ni sahalak ruas tu ruas na asing mambahen gabe rumar
jala tarurak sude keluarga, isarana sahalak dakdanak na marnampunahon sahalak natoras
parjuji manang parmabuk gabe tongtong tuhukon ni dakdanak i ma na sai pis mata ni
halak marnidasa (anak yang akan hidup dengan menanggung stigma yang buruk dan
kemungkinan akan merasa rendah diri akibat cemoohan atau ejekan dari teman-
temannya).
Ruhut na sintong i (Hukum yang benar). Ruhutruhut na dihangoluhon ndada sai
holan na mangihuthon angka adat manang tradisi na somal, alai di keluarga ni Tuhan i
ingkon tangkas do panangihonon tu soara ni Debata. Asa hata ni Debata do hata parpudi
di sude angka sangkap dohot hatontuan sidalanhononhon di parripe ni Tuhan i. Umbahen
ni i do manang ise na naeng gabe parripe ni Tuhan i, ingkon ma marhabiaran tu Debata
jala mangulahon lomo ni rohaNa. Asa songgop jala mian tongtong pasupasu ni Debata di
tongatonga ni bagasta nang tu pangisina pe.
Amen!

9. Tangiang Panutup ni Jamita (Doa Penutup Khotbah)

10. Marende BE 720 : 1 “Naeng Marsinondang Ngolungku” – Huhut Papungu Pelean

 Naeng marsinondang ngolungku diigil Jesus i.
Manang didia pe au, tongtong huingot i.
Tiur marsinondang, i do ni igil ni Jesus.
Tongtong marsinondang pandondang do au tutu.

11. Rap Mangidohon di Tangiang Ale Amanami, diuduti Mangendehon: Amen 3x (Sama-sama
Mengucapkan Doa Bapa Kami, dilanjutkan dengan menyanyikan: Amen 3x )