Rusdi Jeung Misnem: Nyawang Kahirupan Barudak Jaman Kolonial
Judul: Rusdi jeung Misnem Jilid Kahiji
Pangarang: A.C. Deenik, R. Djajadiredja Medal: -
Saupama urang ngabandingkeun kahirupan barudak jaman ayeuna
jeung barudak jaman baheula utamana barudak jaman kolonial tangtu wae beda, lir ibarat tanah ka langit. Bedana teh bisa ditingali tina kadaharan, kaulinan, pakean, paripolah jeung sajabana. Anu jadi panyababna teh rupa rupa, nanging anu jadi panyabab utamana mah nyaeta di jaman kiwari mah pangaruh kabudayaan luar teh kacida kuatna mangaruhan kabudayaan urang. Beda deui jeung jaman kolonial, sok sanajan bangsa urang dijajah ku bangsa sejen tapi pangaruh kabudayaan luar ka kabudayaan urang teh henteu kuat teuing cara ayeuna.
Salah sahiji cara pikeun nyawang kahirupan barudak di jaman kolonial
nyaeta ngaliwatan buku Rusdi jeung Misnem anu ditulis ku A.C. Deenik katut R. Djajadiredja. Buku ieu teh nyaritakeun ngeunaan dua budak leutik nyaeta Rusdi katut Misnem. Rusdi teh nyaeta hiji budak leutik anu keur meujeuhna resep ulin. Ari pangawakanna gembru da resep barang dahar, ceuk emana mah dadaharanna unggal poe beak dua kati. Ari Misnem nyaeta adina Rusdi, sok sanajan kitu pangawakanna beda jeung Rusdi. Ieu mah rada kuru meueusan kusabab barang daharna teu pati gembul, teu kawas Rusdi. Ceuk emana barang daharna dina sapoe ukur beak saboboko. Tapi ari kanu ulinna mah estuning sarua wae kawas Rusdi.
Dina buku Rusdi jeung Misnem kagambarkeun kumaha kahirupan
barudak jaman kolonial, anu kahirupanna teh deukeut keneh jeung alam. Pangulinana teh tara jauh tina susukan, sawah, kebon, sisi walungan jeung sajabana. Saperti anu kacaritakeun dina salah sahiji bagean anu judulna "Titimplukan". Carita ieu teh ngeunaan hiji kaulinan anu ngaranna titimplukan anu dipaenkeunna di sisi walungan, cara maenkeunna teh nyaeta nyieun dua gugunungan tina keusik anu pahareup-hareup oge nyieun bobolaan tina keusik, tuluy bola eta teh digorolongkeun ti luhur gugunungan sangkan dua bola eta teh paadu, saha anu bolana peuray eta anu eleh.
Anu jadi kakurangan ti barudak jaman kolonial salah sahiji nyaeta
pengetahuan umumna kurang, maklum da ari jaman sakitu mah can aya Taufik Rahmadiansyah 180210220044
internet. Dina bagean anu judulna "Buhaya", didieu kagambarkeun kumaha
kurangna pengetahuan umun ti Rusdi jeun Misnem tepi ka teu apal kumaha rupa ti buhaya. Rusdi nanyakeun ka emangna kumaha ari rupa buhaya, bari ngira-ngira ngabayangkeun yen rupa buhaya teh jiga gurame cecepetan. Kitu teh pangna di jaman sakitu mah sumber inpormasi teh ukur dua nyaeta ku cara ningali langsung atawa numutkeun beja ti batur.
Salian ti kaulinan, anu jadi pangaresep barudak jaman kolonial teh
nyaeta kariaan. Kariaan biasana diayakeunna teh ku menak pikeun ngareah- reah acara-acara khusus saperti nyepitan putrana. Dina carita anu judulna "Pesta" digambarkeun kumaha jalanna kariaan di jaman eta. Kacaritakeun yen kariaan teh dimimitian kira dina wanci pasosore ku kembang api anu dituluykeun ku acara tayub dugi ka subuh anu diiluan ku menak-menak jeung tamu-tamu ondangan anu sejen. Ari kabeurangnakeun, saperti anu dicaritakeun di "Pesta Ti Beurang", kariaan teh diramekeun ku acara naek tangkal jambe, balap jajangkungan, ogel, badud jeung buncis oge aya lais.
Buku carita "Rusdi jeung Misnem" ku pangarangna ditujukeun pikeun
bacaan budak leutik. Tapi taya salahna lamun dibaca oge ku rumaja atawa dewasa sabab loba pangajaran oge wawasan anu bisa dipulung tina ieu buku. Ku sabab asalna ieu buku asalna ditujukeun pikeun budak leutik atuh basa jeung alurna oge basajan sangkan gampang dipikaharti ku budak leutik. Bisa jadi pikeun pamaca anu leuwih kolot mah buku ieu teh pikaboseneun atawa kurang menarik. Tapi sok sanajan kitu henteu ngurangan pangaken tina buku ieu, buku ieu kaasup kana karya sastra sunda anu munggaran jadi layak pikeun dibaca.