( KOLOSE 1:1-14 ) Huria Ni Tuhanta !

– Molo tasuan sada hau, isarani mangga manang apokat, aha do na

tahirim sian natasuan i ? Parbuena do ? manang marparbue ? Ra godang do sian hita na mandok tumagon
do Parbuena daripada Marparbue. Alai Sasintongna Andorang So Marparbue Na Tasuan I, Porlu Do Taboto
Songon Dia Do Pardalanan Ni Suansuanon I Sahat Tu Namarparbue.
1. Tubu (Tumbuh)
Ditingki Mananom sada suansuanon, sai tahirim do ingkon tubu do parjolo angka suansuanon i, ala
molo so tubu angka suansuanon i, tontu gabe tubu ma angka pandelean, jala ujungna ndang olo be
hita manuan angka suan-suanon i, molo so tubu denggan.
2. Marurat (Berakar)
Ndung tubu suansuanannta i, tahirim do muse asa marurat angka suansuananta i, asa hot batang ni
tanoman i. Jala molo so denggan marurat angka suansuananta i, boi do gabe melos ujungna alani
udan dohot alogo laos dohot ma melos rohanta mamereng angka suansuananta i.
3. Magodang Laos Marparbue (Bertambah Serta Bertumbuh)
Sihirimon do sian disada-sada suansuanon ndung tubu jala marurat batang ni tanoman i, boe ma nian
magodang dohot marparbue. Jadi molo tasuan hau mangga manang alpokat, tahirim do lam
magodang jala marparbue ma nian na denggan. Ai ido na tahirim marhite angka suansuanon i, boe
marparbuehon parbue na godang dohot parbue na tonggi.

Amanami Inanami!
Hurang lobi songoni do nuaeng na taida na masa di bagasan turpuk on. Las do roha ni Ap. Paulus
mambege barita ni huria na adong di Kolosse. Adong do hamajuon ni haporseaon, suang songoni nang di
holong ni roha di huria i. Ndang tubu be dinasida istilah “ SLAMET ” (Sai lam holan na metmet).

- Isarani parSikola, naik kelas do nasida, dihaporseaon nang di parhuriaon.

- Songon Indahan, Ndang mulak tata be indahan na talompai, alai gabe indahan na tonggi ma i gabe
gogo naimbaru dipamatangta.
- Manang songon haporseaon na ingkon lam bagas, ndang holan rarat di permukaan sajo.

Songon na didok di ayat 4 dohot di ayat 6 Ido, “Ai hubege hami do barita ni haporseaonmuna di Kristus
Jesus, nang holong ni rohamuna mida saluhut na badia” jala “ na marparbue doi jala lam ganda “
(berbuah dan berkembang). Jadi na binege ni Ap. Paulus sasintongna barita good news do ndang barita bad
news, manang kabar-kabar burung na so pas parpeakna.

Jala Dos songon tudosan ni partubu ni hau I, dung tubu ingkon Magodang jala marparbue. Ima na niigil ni
Apostel Paulus sian huria i. Nunga mangolu be nasida di bagasan haporseaon di Jesus Kristus jala nunga
mangolu di bagasan holong ni roha. Alai nang pe songoni, ndang sukkup olat ni i. Ingkon sahat do nasida
mananda lomo ni roha ni Debata, jala Marparange na tama di Tuhan i.

Songoni do nang hita di bagasan tingki on. Nunga be tajalo jala porsea hita di Tuhan i. Ingkon Mangolu hita
di bagasan holong ni roha, Jala ingkon lam ganda dohot lam matoras ma hita di haporseaon dohot di ngolu
ni hakristenon i. Asa dilehon Debata pantas ni roha di hita laho mangolu dohot mangula. Amen!