HKBP SIBAGANDING

UNANG GANGGU ROHAM; SAI PORSEA MA HO!

PARTANGIANGAN BUHABUHA IJUK
Di Tonga ni Bagasta be, Minggu, 12 April 2020
I. PANGARADEON:

II. Ibadah: (U = Uluan; P = Parhalado)

01. MARENDE NO. 96:1+3 NUNGA TALU HAMATEAN BL 101

 Nunga talu hamatean dibaen Tuhan Jesus i, Ai na hehe do Ibana songon na nidokNa i.
Haleluya, haleluya, nunga hehe Jesus i, Haleluya, haleluya, nunga hehe Jesus i.
 Ia angka boruboru lao do tu tanoman i, Ndang disi be Tuhan Jesus, nunga hehe sian i.
Haleluya, haleluya, nunga hehe Jesus i. Haleluya, haleluya, nunga hehe Jesus i.
02. TANGIANG PAMUHAI

U: Ale Tuhan Debata, Amanami Parasiroha! Mauliate ma rohanami jala pujionnami ma Ho di

manogot on, marhite parsaorannami di tingki on. Mauliate Tuhan ala naung ditubuhon Ho hami
paduahalihon, sian godang ni asi ni rohaM tu pangkirimon na mangolu marhitehite haheheon ni
Tuhan Jesus sian na mate. Na marlas ni roha do hami nuaeng marningot haheheonNa i. Nunga
talu hamatean, talu banua toru. Ndang mabiar be hami mida hamatean dohot soropna, ai
nunga monang Tuhannami. Ala ni i umbahen hupangido hami: Sai asi ma rohaM, patogu ma
haporseaonnami maniop Barita Nauli, asa unang ganggu rohanami di na hubolus hami ragam ni
angka hamaolon siala pangontak ni sahit masa virus korona i, na mambahen mabiar jala ganggu
rohanami, ala tung mansai balga pangontakna di ngolunami siganup ari. Sai pasabam rohanami
jala patogu panghirimonnami, di tingki halelehetanna mansohot do sahit masa i. Marhitehite
Goar ni AnakMu Tuhan Jesus Kristus, Tuhannami. Amen.

03. MARENDE NO. 94:2-3 ALE TONDINGKU, NAUNG HEHE TUHANMU BL 44

 Talu sibolis dibahen Tuhanta, nang hamatean nang dosa sudena, sai dihalashon rohanta ma
i, pangoluonNa do hita sude. pangoluonNa do hita sude.
 Tahaburjuhon mangalo dosanta, jala tabaen Tuhan Jesus donganta, pos ma rohanta di
Tuhanta i, pamonangonNa do hita sude, pamonangonNa do hita sude.
04. Epistel: Psalmen 21: 1-7

U: Tabege ma Hata ni Debata turpuk ni Partangiangan Buhabuha Ijuk di tingki on, i ma na tarsurat
di Psalmen 21:1-7, songon on ma didok Hata ni Debata: Ende sian si Daud. Ale Jahowa, marlas
ni roha do rajai mida gogom, jala marolopolop situtu do ibana mida panumpahim. Dilehon Ho
do tu ibana pinangido ni rohana, jala ndang dijua Ho pinangido ni hatana. Ai ditomutomuhon
1
 Ho do tu ibana angka pasupasu ni hadoharon, ditalitalihon Ho do tu uluna tumpal sere palangki.
Hangoluan do dipangido sian Ho, dilehon Ho do tu ibana, diudut Ho do ariarina ro di
salelenglelengna. Timbul do hamuliaonna dibahen panumpahim; hatongamon dohot
hatimbulon diampehon Ho tu ibana. Ai parhitean ni angka pasupasu do ibana dibahen Ho
salelenglelengna, dipasabam Ho do rohana marhitehite las ni roha mida bohim. I do sahatna.

05. Marende No. 91:1 Hatuaon do BL 55

 Hatuaon do, las ni roha do, hangongot ni Tuhanta i, Mago do hita, ngot ma Tuhanta, las be, las
be ma rohanta i. Mago do hita, ngot ma Tuhanta, las be, las be ma rohanta i.
06. Jamita: Johannes 20:24-31

U: Hata ni Debata, turpuk jamita di buhabuha ijuk on, tarsurat di Johannes 20:24-31, songon on ma
didok disi: Alai anggo si Tomas, sada sian na sampuludua i, na margoar Linduat, ndang rap
dohot nasida, di na ro i Jesus. Gabe didok angka donganna sisean ma tu ibana: Nunga huida hami
Tuhan i! Alai dialusi ma nasida: Na so tupa porsea ahu, molo so huida di tanganna i bogas ni
labang i, laos dijama jarijaringku bogas ni labang i, jala ia so dijama tanganku andorana i. Dung
salpu ualu borngin, pungu ma muse angka sisean i di bagasan, rap dohot si Tomas. Dung i ro ma
Jesus, di na sordak i angka pintu, jongjong tu tongatonganasida, didok ma: Dame ma di hamu!
Dung i didok ma tu si Tomas: Boan tu on jarijarimi jala ida ma tanganku! Surdukkon ma tanganmi
manjama andorangku! Unang ganggu roham; sai porsea ma ho! Gabe ninna si Tomas ma
mangalusi Ibana: Tuhanku jala Debatangku! Jadi didok Jesus ma tu ibana: Ala diida ho Ahu,
umbahen na gabe porsea ho. Martua ma angka na porsea, atik pe so diida! Godang dope tanda
angka na asing na pinatupa ni Jesus di jolo ni angka siseanna, angka na so sinurat di buku on.
Alai umbahen na sinurat angka on, asa porsea hamu, Jesus do Kristus, Anak ni Debata; jala asa
hamu angka na porsea i dapotan hangoluan marhitehite Goarna. I do sahatna! Nuaeng
hutariashon ma tu hita jamita na pinarade ni Hurianta:
UNANG GANGGU ROHAM; SAI PORSEA MA HO!
Di ari Paska i, tongon di ari Minggu, di na hehe Jesus i, marpungu do angka sisean i, alai ndang dohot
disi si Tomas. Ndang binoto boasa ndang ro ibana tusi. Ala ni i do ra umbahen na so porsea ibana di
haheheon ni Jesus i. Adong do jolma nuaeng on ndang marminggu ala ni angka ulaon, alai laos adong
do i ala losok ni roha, adong do i ala sogo ni rohana tu sasahalak, adong do i ala dirajumi ibana ndang
marlapatan na marminggu i. Ingkon taingot, tingki ari Minggu do hehe Jesus i sian na mate, ala ni i do
ganup ari Minggu hita marpungu, marningot hinabalga ni ari haheheonNa i.
Sian ari na pitu i, ari Minggu do pamusatan ni ngolu ni parhuriaonta. Jala sian sude bagas,
gareja do bagas joro, pamusatan ni inganan ni parpunguanta dohot parsaoranta. Ala ni i, mansai
lungun do roha marnida bagas joroNa i langan ariari, ala ni sahit masa virus korona i. Alai na porsea
do hita, di tingkina sai na pasohotonNa do sahit masa i sian tongatonganta. Taingot ma hinaringkot ni
ari Minggu dohot garejanta songon pamusatan ni ngolu parhuriaonta. Ndang na mandok na so
ringkot angka ari na asing, ndang na mandok na so ringkot angka bagas na asing, alai songon halak
Kristen hita, tabahen ma ari Minggu i dohot gareja i gabe sentral di parngoluonta. Unang gabe
2
suharsuharna tabahen, unang gabe tingki mandao sian Tuhan i tabahen ari Minggu i, unang gabe
inganan na so apala taargahon gareja i di ngolunta, pola ndang tadege pigapiga bulan.

Di na so dohot i si Tomas di parpunguan ari Minggu i, ninna rohana do di bagasan: Tung na

so olo ahu porsea di Jesus! Hape, basa do Tuhan i, ndang dipaloas ibana lilu. Diauhon ibana do
salana, diakui ibana do na lilu ibana. Marhite basa ni Tuhan i gabe porsea ibana. Ndang apala ringkot
be surdukhononna jarina i tu daging ni Jesus. Hape di mulana i didok si Tomas do: Na so tupa porsea
ahu, molo so huida di tanganNa i bogas ni labang i, laos dijama jarijaringku bogas ni labang i, jala ia
so dijama tanganku andoraNa i. Alai holan dipanghilalahon Ibana balga ni holong ni Jesus i, di na
nidokNa i: Boan tu on jarijarimi jala ida ma tanganKu! Surdukkon ma tanganmi manjama
andorangKu! Ndang adong be panjuaon di si Tomas, tung dipanghilalahon ibana do na dao umbalga
holong ni roha ni Jesus sian saluhut dosana. Unang ganggu roham; sai porsea ma ho! Mamintor
porsea do si Tomas, laos ninna ma: Tuhanku jala Debatangku!

Molo mansohot sahit masa virus korona on, Molo dung mago sahit masa i, mamintor
tahalaputi ma marpungu di tonga ni bagas joroNa, unang be marsidalian. Ndang diuhumi Tuhan i
hita, ndang didok: Boasa jahat ho? Boasa ndang porsea ho? Ndang! Gariada: Dame ma di hamu!
ninna do. Ala ni i, molo salpu maon sude sahit masa on, unang be tapatangkang rohanta, unang be
tapajogal rohanta, unang be talului sidalianta. Sandok ro be ma! Paloas ma Debata mangula di
ngolum, asa marhite parheheon ni anakNa i hehe nang haporseaonta, unang olo be tarpedem, unang
adong be Kristen kapal selam na sahali duahali sataon mandega gareja, i ma tingki adong ulaon ni
ianakhonta (tardidi, malua, marnatal). Antong, taboan ma ganggu ni rohanta i tu Ibana, ai taboto do
tangi do Ibana di angka holsonta, jala dihaholongi do hita.
Parjumpangan ni Jesus dohot si Tomas mamparbuehon sada panghorhon na mansai balga di
ngolu ni si Tomas. Sian sahalak na ganggu roha gabe sahalak sisean na pir do ibana, sian sahalak na
sai mangondolhon pingkiran gabe sahalak parbarita na uli. Parjumpangan na denggan na songon on
ma na taharingkothon di partingkian na gok ganggu ni roha nuaeng on, ala pangontak ni sahit masa
virus korona i. Amen

08. MARENDE NO. 508:1-2 SAI PATOGU ROHANGKI BL 348

 Sai patogu rohangki, ale Jesus Tuhanki, golom dohot tanganMi au di pardalananki, molo
loja au dison pargogo i au tongtong, dok tu au: Hutogu pe ho tu surgo i muse.
 Mian ma di lambungki, molo ro ujian i. Unang loas ganggu au sian sinondangmu dao. Molo
maol dalan i jalan ponjot rohangki, Dok tu au : Hutogu…
09. Tangiang Pangondianon
10. Marende BE No: 396: 1-2 “Nunga Talu Musununa”
ᴥ Nunga talu musumuna, sude na tarhurung i; boi malua saonari, ai ungkap hurungan i
Reff: Sai maporus ma tu Jesus, sipasonang rohami, sai maporus ma tu Jesus sipasonang
rohami
3
 ᴥ Unang dok: sai sorimago do manggohi rohangki. Holan Jesus do pamalum, bugang na di
rohami. Reff: sai maporus....

11. PANGUJUNGI
U: Rap mandok ma hita di tangiang hatopanta i: Ale Amanami na di banuaginjang, sai pinarbadia
ma goarMu. Sai ro ma harajaonMu. Sai saut ma lomo ni rohaM di banuatonga on, songon na di
banuaginjang. Lehon ma tu hami sadari on hangoluan siapari. Sesa ma dosanami songon
panesanami, di dosa ni dongan na mardosa tu hami. Unang hami togihon tu pangunjunan.
Palua ma hami sian pangago. Ai Ho do nampuna harajaon, dohot hagogoon ro di hasangapon
saleleng ni lelengna. Amen.
Sude: (mangendehon) Amen-Amen-Amen!