ACARA PARNINGOTAN HAHEHEON NI TUHAN JESUS

PASKAH II HKBP SE- RESSORT SIAK

Langkai, Senin, 21 April 2014

01. Pamuhai:
U : Hamu angka dongan sahaporseaon sadarion Pesta Bolon do di hita halak
Kristen, lumobi di Hurianta HKBP pola dua ari i tapestahon, na ginoaran
Pesta Paska, i ma ari Haheheon ni Tuhanta Jesus Kristus. Na marningot hita
di hangongot ni Tuhanta Jesus sian hamatean i, manaluhon dosa dohot
sorop ni hamatean i. Hita pe hehe do muse marhite haheheonNa i gabe
sonang hita rap dohot Tuhan Debata Amanta i. Dibahen i mardongan las ni
roha pinasahat tu hamu: Selamat Paskah:
H : Tutu nunga hehe Kristus i!
H : BE. 93: 1-2 “Pesta Paska, Hatuaon!”
Pesta Paska, hatuaon! Pesta Paska haluaon, sian hamatean i! Sian hamatean
i! Tuhan Jesus do pasuang hangoluan, hasonangan tu saluhut jolma i.

By: Pdt. M.P.Sinaga’April 2012 1

U : Nunga tulus sangkap ni Debata, nunga monang Kristus, talu hamatean, talu
banua toru. Kristus Tuhan, Nunga hehe Ibana!
H : Tutu nunga hehe Kristus i.
U : Mauliate ma di Debata, Amanta i na manatap pardangolanta, dibahen i
dipalua hita sian sahitta dohot sian angka dosanta. Tapuji ma Ibana marende
ma hita:
H : Marende BE. 90: 1 ” Sai tapuji Debatanta “
Sai tapuji Debatanta, ale hajolmaon i! Ai naung hehe do Tuhanta sian
hamatean i. Dipasidung Jesus i ulaonNa sasude. Patupahon haluaon di
saluhut hajolmaon.
U : Sogot di manogotna i borhat do angka parompuan tu tanoman i laho
patuduhon holong dohot denggan ni rohana tu Jesus i, alai ida ma!
H : Nunga harhar batu i, nunga loha hurungan i, nunga rumar tanoman i!
U : On do barita las ni roha di hita, didok Surusuruan i do: “Boasa luluanmuna
na mangolu di inganan ni angka na mate? Ida ma Ndang disi be Ibana,
nunga hehe Ibana!
H : Marende BE. 90: 2:
On tongtong do huhalashon: Nunga hehe Jesuski. Dohot ma hamu
donganku angka na tinobus i. Sai tapuji Debata, sai tadok Haleluya! Na
mangolu do Tuhanta ala ni sai las rohanta.
U : Laho marningot angka na binahen ni Parompuan i, laos nasida do
panindangi parjolo di Haheheon ni Jesus i. Hita pe naeng dohot gabe
sitindangi jala siboan barita Haheheon i, alani hehe ma hamu parompuan ni
Hurianta!
H : Ale Jesusku bahen ma au gabe parjambar di haluaon na binahenMi,
Paimbaru ma rohangku, ingani ma i upa ni HalojaonMu, pargogoi ma au
manghatidanghon Ho ariari!
U : Didok tu angka boruboru i“Unang mabiar hamu”, i do soara ni Debata
Paposhon rohanta marhite Haheheon i, asa malua sian Biar, arsak, ganggu
dohot lomos ni roha. Dungi didok tu punguan ni angka sisean i: “Dame ma
di hamu”, Haheheon ni Jesus Paluahon hita sian Hansit ni roha, hosom,
parsalisian dohot na suman tusi. Alani hehe ma hita manghatindanghon
Jesus i:
By: Pdt. M.P.Sinaga’April 2012 2
H : BE. 96: 2 “Nunga Talu Hamatean” (huhut Jongjong):
Ia angka boruboru lao do tu Tanoman I ndang disi be Tuhan Jesus nunga
hehe sian I, Haleluya, haleluya nunga hehe Jesus i. Haleluya, haleluya
nunga hehe Jesus i.

03. VOTUM: (MangendehoN: Haleluya …)

04. Marende BE. 95: 1 ”Ngot ma ho dijou soara”

Haleluya taendehon nuaeng di ari haheheon Tuhanta Siparmonang i. Ai
malua do Ibana, Haruar sian tanomanNa; Na talu hamatean i. Sun ulaonNa i
dibaen Tuhanta i, Haleluya. Naung sahat di Tuhanta i, upaNa na sumurung i.
05. Renungan di Haheheon ni Tuhan Jesus:
U : Nunga tarbondut hamatean, nunga soluk hamonangan. Jo, hamatean, didia
hamonanganmi? Jo hamatean, didia soropmi?
H : Puji ma Tuhan ale Tondingku, naung manaluhon hamatean i. Puji ma Tuhan
ale tondingku naung manghamonanghon jolma pardosa songon au on.
H : Mangendehon: REFF.96: “Haleluya heleluya nunga hehe Jesus I,
haleluya, haleluya nunga hehe Jesus i.
U : Alai mauliate ma di Debata, na pamonang hita marhitehite Tuhanta Jesus
Kristus. On, pe marsihohot, jala so mubauba ma hamu, jala lam sumurung
ma tongtong di bagasan ulaon ni Tuhan i. Ai diboto hamu do; ndang
magopo halojaonmuna di bagasan Tuhan i.
H : Puji ma Tuhan ale tondingku, naung manjou ho tu parsaoran dohot Debata
dohot tu ulaon na denggan.
U : Dungo ma hamu, marsihohot marhaporseaon, tang ma hamu jala margogo.
Porsea ma hita di barita nauli ni Tuhanta I, Ibana do haheheon dohot
hangoluan.
H : REFF.96: “Haleluya heleluya nunga hehe Jesus I, haleluya, haleluya
nunga hehe Jesus i.
U : Di Hurianta HKBP, digoari do Minggu Parningotan Haheheon ni Tuhan
Jesus, gabe Minggu Haheheon ni angka Parompuan. Sialani ganup taon do
hape disungguli Tuhanta ruas ina ni HKBP asa hehe di haporseaon, hehe di
holong ni roha, hehe di ulaon na denggan! Alai torop na i do pe angka ruas
By: Pdt. M.P.Sinaga’April 2012 3
 ina ni HKBP na sai manggompang haporseaonna, lalap di angka hasomalan
na so marimpola i ma halosohon, parmungutmunguton, panihaion, na
marhosom dohot na manghata dongan. Marhite Pestanta sadari on naeng
hehe Ruas ina ni Hurianta, songon angka Parompuan hehe gabe sitindangi
di Haheheon ni Jesus i, marhite Ulaon na denggan gabe ina Sipujion,
soripada na marsahala di tonga ni bagasna nang di Huria!Antong tatangihon
ma Patik ni Debata di Pestanta sadarion, tarsurat di Heber 10: 24-26: On
ma hata na: Masiantoan ma hita, masipajujuan tu haholongon dohot tu
angka ulaon na denggan
H : Unang tatadinghon parpunguanta hian songon na hinasomalhon ni na
deba; tung masipaingotan ma hita, jala lam I ma nian, ala lam jonok
diida hamu ari i.
U : Ai anggo tatuntun mardosa dung jolo tajalo parbinotoan di hasintongan,
ndang adong be dapot pelean pasaehon dosa. Rap mangido gogo ma hita:
06. BE. 622:2 “Mansai nalnal di angka partingkian” (Jongjong…)
SilangMu Kristus tanda ni holongMu pahisar tondi na magopu i.
Mangalononghon sasude dosangku mabaor tu laut asi ni rohaMi.
Naung tubu hami gabe na imbaru, na niurasan sian dosa i.
Ala mudarMu na niusehonMu, di Golgata, di hamamateMi.
07. MANOPOTI DOSA: Manopoti Dosa dohot Bagabaga ni Debata
U : Hamu angka dongan! Di pardalanan ni ngolunta on, jotjot do ro alogo na
gogo na mambahen lomos, tarsulandit, jala tinggang hita. Godang do na
mangelaela hita asa manirpang sian patik ni Debata ima hisaphisap ni roha
na roa i ro di angka pingkiran na jahat i. Alani i tung tapaunduk ma rohanta
di jolo ni Debata manopoti dosanta na godang i. Ale Debata Amanami na
di banua ginjang! Na jongjong do hami halak pardosa on di jolo ni habangsa
habadiaonMi manopoti jala manganggukhon dosanami. Tung jotjot do hami
manimbil sian patikMu ima marhite hata, pingkiran dohot pambahenan
nami na roa i. Atik pe hubege hami patikMi di ganup parmingguon, jotjot
do ndang huhangoluhon hami, jotjotan do hami mangasahon pingkiran,
gogo nang bisuk nami!
H : Jotjot do hupangasahon hami dirinami laho sumarihon angka na ringkot i di
ngolunami: angka sipanganon, parabiton, parsingkolaan ni dakdanak ro di
sude haporluan siapari. Jotjot gabe holsoan hami pasarisari sudena i, gabe
By: Pdt. M.P.Sinaga’April 2012 4
 lupa hami di Ho Ama Pargogo naso hatudosan na tuk manarihon
ngolunami. Asi ma rohaM, sai sesa ma dosanami.
U : Loja hami mandiaori na tau hasonangnami sian angka arta na ditano on, sai
songon laut na so habinsatan jala hira rura na so hagohan rohanami ganup
ari gabe jotjot lupa hami mandok mauliate tu Ho. Asi ma rohaM, sai sesa
ma dosanami.

H : Mangendehon BE. 82:2 Tung di patMu, O, Jesusku, solsolanku rohangki.

Tangisanhu na tinaonMu, ala jat ni rohangki.
Parompuan: Songon ina di tonga ni Keluarga nang di tonga ni Huria i, patut ma
nian gabe tiruan hami di angka na denggan, di panghataion na
lambok, tiruan di haringgason tarlumobi tiruan di haporseaon.
Alai jotjot na i hami sibingkasi di angka na humurang di
rumatangga, marsalisi dohot hombar jabu, marhosom di angka na
sapunguan. Ale Tuhan asi ma roham di hami!
U : Ale Tuhan sai ajari ma hami, asa umbiar, umpos, jala humolong rohanami
di Ho asa na adong di portibion, asa tung pos situtu rohanami mandok:
Amanami situtu do Ho marhite Jesus Kristus AnakMi. Amen.
----- Musik: BE. 82 -- - - - -

U : Tabege ma bagabaga ni Debata taringot tu hasesaan ni dosanta! Humophop

hita, gabe dosa do Ibana na so tumanda dosa dibahen Debata, asa gabe
hatigoran ni Debata hita, marhitehite Ibana. Hasangapon ma di Debata na di
Ginjang!
H : Amen!
08. KOOR: P. AMA DAMULI
09. Marende: BE. 94: 3 “Ale tondingku naung hehe”
Tahaburjuhon mangalo dosanta, jala tabaen Tuhan Jesus donganta.
Pos ma rohanta di Tuhanta i. :;:PamonangonNa do hita sude:;:
10. EPISTEL: Heber 9: 11-15
11. KOOR: INA SA- RESSORT “Pasupasu ma hami on Tuhan”
12. BE. 632: 1 “Nunga Hehe Kristus”

By: Pdt. M.P.Sinaga’April 2012 5

 Nunga hehe Kristus marsihohot ma hamu. Lam sumurung hita di ulaon ni
Tuhanta, lam sumurung hita di ulaon ni Tuhanta. Radot ma hita lao
mangula tu Tuhanta, radot ma hita lao mangula tu Tuhanta. Amen.
13. MANGHATINDANGHON HAPORSEAON:
14. BE. 91:1-- “Hatuaon do” (Pelean 1A/B)
Hatuaon do las ni roha do. Hangongot ni Tuhanta i. :;:Mago do hita, ngot ma
Tuhanta. Las be las be ma rohanta i:;:
Hatuaon do las ni roha do. Hangongot ni Tuhanta i. :;:Monang do Jesus talu
sibolis. Las be las be ma rohanta i:;: (MUSIK..)
Hatuaon do las ni roha do. Hangongot ni Tuhanta i. :;:mungkap do dalan tu
hangoluan. Las be las be ma rohanta i:;:
Hatuaon do las ni roha do. Hangongot ni Tuhanta i. :;:i ma gogonta
dompak dosanta. Las be las be ma rohanta i:;:
15. JAMITA: Johanes 20: 19-23
16. BE. 93: 1-2 “Pesta Paska, Hatuaon!”
Pesta Paska, hatuaon! Pesta Paska haluaon, sian hamatean i! Sian hamatean
i! Tuhan Jesus do pasuang hangoluan, hasonangan tu saluhut jolma i.
Talu ho banuatoru, ndang tarbahen tiopanmu. Raja Siparngolu i. Raja
Siparngolu i. Hamatean, hamagoan na so pola habiaran; nunga talu i, sude.
--- MUSIK ---
Tuhan Jesus do na monang, Tuhan Jesus do Pasuang. Las ni roha dame pe,
las ni roha dame pe. Dongan golom ma hataNa: Na porsea di Ibana, ndang
tarbahen mago be.

17. PANUTUP/TANGIANG ALE AMANAMI/ PASUPASU/ AMEN.

ACARA DUNG SIMPUL PARMINGGUON

1. Konsumsi
2. Mandok Hata Panitia
3. Mandok Hata Utusan Sian Huria Sa- Ressort
4. Arahan sian Pendeta Ressort
5. Pembacaan Juara dan Penyerahan Hadiah
6. Doa Penutup

By: Pdt. M.P.Sinaga’April 2012 6

 Selamat Jalan Sampai Ketemu Kembali Pada Pesta Parheheon
Ina Sa- Ressort Berikutnya…!

By: Pdt. M.P.Sinaga’April 2012 7