Ang panitikan ay nagsasabi o nagpapahayag ng mga kaisipan, mga damdamin, mga karanasan, hangarin at diwa ng mga tao. At ito rin ang pinakapayak na paglalarawan lalo na sa pagsulat ng tuwiran o tuluyan at patula, na ayon kay Bro. Azarias na ang panitikan ay pagpapahayag ng damdamin ng tao sa lipunan,sa pamahalaan,sa kapaligiran,sa kapwa at sa dakilang lumikha. Ayon naman kay Ramos, Ma na ang panitikan ay kasaysayan ng kaluluwa ng mga mamamayan. Sa panitikan nasasalamin ang mga layunin, damdamin, panaginip, pag-asa, hinaing at guniguni ng mga mamamayan na sumulat sa maganda, makulay, makahulugan, matalinhaga at masining na pahayag. Batay sa Webster anumang bagay na naisatitik basta`t may kaugnayan sa pag-iisip at damdamin ng tao maging ito`y totoo, kathang isip o bungang tulog ay maaaring tawaging Panitikan. Sa kabuohan ang panitikan ay nagbubunsod ng pagkilos ng mga mamamayan sa kanilang pagkamakabayan. Ito ay lakas na nagbubuklod ng kanilang damdamin na mayroong kamalayan sa katwiran at katarungan.
2. Ano ang kahalagahan ng Pag-aaral ng Panitikan?
Upang mapa-unlad ang kakayahan at kaalaman sa sariling wika. Kadalasan nasasalamin ang ating kultura sa ating mga panitikan, paniniwala at pagkakakilanlan bilang isang mamamayan. Ang mga panitikan ay kapupulutan rin ng aral. Mga aral sa moral at pagiging mabuting tao na maaaring magamit sa tunay na buhay. Ito din ay upang makilala natin ang ating sarili bilang Pilipino at matalos ang ating minanang yaman ng isip at angking talino ng ating pinanggalingang lahi. Ng ito`y mabatid natin na tayo ay may dakila at marangal na tradisyong siya nating ginagawang sandigan ng pagkabuo ng ibang kulturang nakarating sa ating bansa.Matatanto din natin ang ating mga kakulangan sa pagsulat ng panitikan at makapagsanay na matuwid ito`t mabago. Ating mas lalong makilala, magamit ang ating mga kakayahan sa pagsulat at magsikap na ito`y malinang at mapaunlad. At higit sa lahat, maipamalas ang pagmamalasakit sa ating sariling panitikan.
3. Ano ang panunuring Pampanitikan?
Ang panunuring pampanitikan ay isang pagsusuri nang malalim at kritikal sa mga akda ng mga manunulat upang mahimay ang kanilang mga likha at malaman ang tunay na mensahe nito. Ang pagsusuri ng mga akda ay makatutulong sa mga pag- aaral upang malaman ang kanilang gustong iparating sa mga mambabasa o kaya suriin ang iba’t ibang simbolismo na ibinigay ng may akda. Sa panunuri rin ay mabubuksan ang mga kritisismo hinggil sa akda, dito makikita ang maaaring patlang o kakulangan sa isang likha dahil pinupuna nito ang mga teknikal na kabuuhan. Maganda na may panunuring pampanitikan dahil naiwawasto at napapaunlad ang mga gawain.
4. Bakit kailangang suriin ang isang akdang Pampanitikan?
Ang isang akda ay maituturing na isang sining na likha ng isang manunulat at
maituturing rin na yaman ng ating bansa sapagkat nabibilang ito sa panitikan. Ang pagsusuri ng akda ay isang malaking tulong upang mas lalong mapaganda ang isang akda, maitama ang mga mali, mabigyan ng ideya para mas gumanda pa ang akda, mabigyan apresihasyon ang may-akda upang mas lalo pa siyang ganahan at malaman ng may akda ang mga kailangan niyang pagyamanin sa mga susunod pang pagsulat ng akda ng upang masiguro na ito ay tama at upang maiwasan ang pagkalat ng maling impormasyon.