Ang sistemang pagbibilang sa baba ay pinangalanang “Bilang Magsasaka” - kinakatawan kung
paano nagbibilang ang magsasaka at kung paano nagbibilang bilang isang magsasaka dahil sa kahalagahan ng palay. Ang sistemang pagbibilang na ito ay halimbawa ng simple grouping na binibilang ang kantidad ng mga bagay. Ito ay sumusunod sa decimal system - angkop sa pagkakaroon ng sampung daliri - kung kaya’t nagkakaroon ng bagong simbolo kada sampu. Sinusulat ito mula sa kaliwa tungo kanan, mula sa pinakamaliit na numero hanggang pinakamalaki. Galing ito sa pinakamaliit na butil hanggang sa imbakan: ang 0 ay tuyot na lupa; ang 1-9 ay mga butil ng palay; ang 10-90 ay tangkay; ang 100-900 ay bungkos; ang 1,000-9,000 ay sako; at ang 10,000-90,000 ay imbak. Ang 0 ay hindi place holder, bagkus pinapangatawan ang kawalan. Ang pag-unawa nila sa negatibong kantidad ay nagmumula sa materyal na kondisyon nila ng pagkakautang sa harap ng kawalan ng lupa at/o pera. Nakakulong ito sa kahon nang hindi pa ito “nakakalaya” mula sa utang. Kagaya ng halimbawa sa ibaba, nakakahon ang bilang 2019 na maaari rin nating iugnay sa taon kung saan ipinasa ang pahirap na Rice Tariffication Law. Limitasyon pa nito sa kasalukuyan ang 99,999, ngunit maaaring dumami pa ito sa tuluyang pag-unlad ng ating mga sakahan.