NGARAS

DEFINISI

Ngaras nyaéta upacara nu dilaksanakeun ku calon pangantén, udaganana keur

némbongkeun rasa hormat ka kolot jeung ménta du'a keur kalancaran pernikahan. Sacara
étimologis, istilah ngaras asalna tina kecap ras, kecap ras mangrupa kecap anteuran kana
inget, ngaraskeun, atawa ngingetkeun.

MA'NA
Upacara ngaras miboga maksud pikeun ngélingan anak kana kamulyaan kolotna. Ku
kanyaah,ngadidik sarta ngabimbing cara hirup anu bener luyu jeung tungtunan agama sarta
hukum nagara dina ngajalankeun kahirupan di dunya.
Tangtuna, tuntunan nu disadur tina ajaran agama téh nyaéta tungtunan kumaha nempatkeun
kolotna dina wilayah iman jeung takwa ku cara hormat ka kolotna.
Islam ngawajibkeun anak hormat ka kolotna, utamana ka indung.
Dina Budaya Sunda, ngahormat ka indung-bapa nyangkaruk dina ungkara Munjung
ulah ka gunung, muja ulah ka sagara, nya munjung kudu ka indung, muja kudu ka bapa. Éta
ungkara téh tangtu waé balukar tina ungkara nya indung anu ngakandung nya bapa anu
ngayuga.
Sikep hormat tilawat ka kolot, di masarakat Sunda salah sahijina ditémbongkeun liwat tradisi
nginum cai anu dipaké pikeun ngabersihan suku kolotna nu kaasup acara utama dina tradisi
ngaras.

TUJUAN
 Miharep aya upacara nu khusyu. Nu némbongkeun baktina salaku budak ka kkolotna
 Miharep ayana upacara anu khusyu tur khusus, pikeun ngébréhkeun rasa kanyaah
kolot ka nu jadi budak.
 Miharep lumungsurna ridho Alloh.
 Ngaraketkeun deui silaturahmi babarayaan calon pangantén.
 Nuwuhkeun rasa hormat jeung ngajénan ka nu jadi kolot khususna keur calon
pangantén. Keur jalma nu nyaksian bakal katoél mamarasna yén gumelarna urang ka
dunya téh éstu ku ayana indung jeung bapa.
 Dina ngumbah suku kolotna miboga ma'na ménta ridhona kolot sangkan rarabi mulus
banglus nepi ka kolotna. Ku kituna, upacara ngaras téh dipiharep bisa ngajaga kana
runtut rautna rarabi.

RUNTUYAN ACARA
1. Mimitina, indung calon pangantén istri ngais calon pangantén maké samping,
sedengkeun bapana mawa lilin di gigireunana.

2. Calon pangantén dilepaskeun tina aisan anu diibaratkeun indung bapa ngalepas
tanggung jawabna ka calon pangantén pamegeut.

3. Calon pangantén istri ngadiukan tujuh lawon samping anu dihartikeun salaku
lalampahan hirup anu salawasna aya dina tujuh poe. Salain eta, samping ngingetkeun
urang kana maot, kusabab mayit anu tos dikafanan, dilapiskeun ku samping.

4. Panata acara nyiapkein rupa-rupa kekembangan. Éta rupa-rupa kekembangan téh

nyaéta hanjuang, seureuh, puring, malati, caringin, mamangkokan, kibeusi, waregu,
jeung handeuleum.
Kembang diibaratkeun kana perilaku calon pangantén istri anu kudu seungit jiga
kembang.
Unggal kembang miboga ma’na nyaéta :
 Hanjuang
Hanjuang téh ngalambangkeun salila urang dibéré kasempetan keur ngahanju
(engapan), urang kudu miboga kahayang. Makna séjénna nyaéta salaku
pangbates antara léléngohan jeung rarabi.

 Seureuh
Seureuh téh ngalambangkeun reureuh dina ngumbarkeun nafsu, ku sabab rék
miboga batur hirup. Ma’na séjénna nyaéta kanyaah antara calon pangantén
awéwé jeung pangantén lalaki.

 Puring
Puring téh ngalambangkeun mpu kuring. Hartina guru (mpu) anu aya dina jero
awak kuring atawa dina diri sorangan.

 Malati
Malati téh ngalambangkeun saleutik naon waé kanyaah anu dibikeun kudu
dihargaan sawening bersihna kembang malati.

 Caringin
Caringin téh ngalambangkeun dina ngalampahan kahirupan kudu bisa nuntun
jalma séjén.

 Mamangkokan
Mamangkokan téh ngalambangkeun sikep tumarima kana rizki anu dibikeun
ku Allah Swt, boh dina jumlah anu loba boh jumlah anu saeutik. Daun
mamangkokan boh nu gedé boh nu leutik, bentukna saperti mangkok, jiga
leungeun anu keur ngucapkeun rasa syukur.
  Kibeusi
Kibeusi téh ngalambangkeun kakuatan anu tohaga. Hirup salawasna
nyanghareupan pasoalan. Ku kituna, urang kudu tetep sigep dina
nyanghareupan unggal pasualan rarabi.

 Waregu
Waregu téh ngalambangkeun waruga anu kudu salawasna weweg dina
nyanghareupan pasualan rarabi.

 Handeuleum
Handeuleum téh ngalambangkeun alam ideu, angen-angen, jeung kahayang.

5. Calon pangantén ngucurkeun cai anu aya dina kendi kana paso anu geus dieusian ku
rupa-rupa kembang. Cai perlambang kasabaran sarta kabersihan, maksudna istri kudu
bersih tina ngalanjutkeun kahirupanana.
Nalika ngucurkeun cai, calon pangantén ngabasuh suku kolotna ku cai sareng
wawangian. Wawangian diibaratkeun tanda bakti anak ka indung, ibarat seungitna
indung mere kanyaah ka anakna. Kagiatan ieu mangrupa puncerna dina acara ngaras.

6. Sabari nyuuh dina suku kolotna, calon pangantén sakali séwang nyium suku kolotna
bari maca du’a.

7. Calon pangantén ngabalikeun awakna ka tukang, teras ngahurungkeun palita, biasana

ngabogaan lima sumbu anu disusun dina coét. 5 palita ngalambangkeun hirup bakal
caang lamun ngerjakeun sholat 5 waktu.

8. Pamungkas, calon pangantén ménta du’a restu ka duduluranana jeung nu séjénna ku

cara sungkem atawa sasalaman.