Cantonese Conversations: 004 Cantonese Dating

Sally: 喂喂喂Sunny，今日二月十四喎，你有冇人約啊？

Sunny: 我梗係有啦！你又去邊先？

Sally: 你一定係約周公咋嘛？

Sunny: 誒，咁都畀你估到啊。

Sally: (笑) 咁你之前有冇拍過拖啊？

Sunny: 誒，咁都有啲經驗嘅。

Sally: 嘩，你要諗嘅，有冇搞錯呀！

Sunny: 嘩，好耐之前啦嘛。

Sally: 咁你拍拖嘅時候會做啲咩㗎？

Sunny: 拍拖嘅時候呀，都好多嘢做㗎喎......嗯，行街睇戲食飯啦。

Sally: 嘩，咁行嘅你講啲嘢，有冇搞錯呀。對於女仔嚟講，其實拍拖係一樣好鬼需要男仔支持
嘅嘢嚟嘅。

Sunny: 點解咁講先？

Sally: 因為我哋成日女仔都會期望好多嘢囉，但往往我哋就會期望越大，失望越大。

Sunny: 嘩，你咁講又唔得喎。你又唔講出嚟，個男方點會知你諗乜啫。

Sally: 吓，咁個男仔應該要知㗎嘛。嗱，你諗下喎，我哋第一次去拖手，第一次去睇戲，第一
次去食飯，第一次去邊度邊度，你全部都應該要記得嘅。

Sunny: 咁高難度？咁但係你又記唔記得先？

Sally: 誒，呢個就再講啦吓。

Sunny: 哦，咁但係你平時拍拖會去邊度玩㗎？

Sally: 拍拖呀，除咗你講嘅行街睇戲食飯，我呢就鍾意去山。

Sunny: 行山拍拖咁特別?

Sally: 係呀，因為我覺得兩個人呢，一齊做啲比較有健康嘅嘢呢，係好有意義㗎。

Sunny: 哦，我都周不時去行山㗎喎，都有啲心得。
Sally: 但你就一支公去，係咪呀？

Sunny: 一支公都可以行啫。

Sally: (笑) 哎，不過我覺得始終行山都係揾個伴好啲嘅。

Sunny: 嗯，都係呀，有咩事可以照應下啊嗎。

Sally: 係呀，不過除咗行山嚟講，我覺得情人呢，最鍾意嘅活動都一定係去旅行。

Sunny: 去旅行拍拖呀，咁洗費都好大喎。

Sally: 哎，乜你個人咁現實㗎。嗱，你諗下喎，你兩個人去旅行，做乜都得真係好開心㗎。

Sunny: 做乜都得啊，咁要發揮想像力先。

Sally: 喂喂喂，你唔好諗埋啲核突嘢先得㗎。

Sunny: 嗯。

Sally: 我指嘅做乜都得係當你去到其他地方，你淨係得兩個人，咁你又唔使顧你側邊嘅人嘅目
光啦。可能有時，大佬你係香港咁細，拍拍下拖做咗一啲比較親熱嘅行為嘅時候，又無啦啦撞
到啲朋友仔喎，咁都幾尷尬㖭㗎。

Sunny: 啊，冇錯冇錯。我之前呢都係喺呢個社交平台睇過條片呢，就係話有對情侶啊，喺地
鐵度親熱俾人影低咗呀。

Sally: 嘩，呢啲真係完全冇面去提番呢件事啊。

Sunny: 係呀，我都覺得好核突啊。

Sally: 係呀，所以我覺得其實情侶呢，雖然佢都有佢哋嘅自由嘅，但係我覺得始終都要顧及下
大眾，唔好成日係啲比較公共嘅地方啦，譬如可能係電梯上面呀，係 入面呀，或者係啲公共
場所嘅時候呢就做啲過份親熱嘅行為，咁令到其他人都比較反感㗎嘛。

Sunny: 嗯，冇錯呀冇錯呀。但係講到今日情人節喎，你仲咁得閒坐係度嘅？

Sally: 誒......

Sunny: 誒，冇地方去呢？

Sally: 你以為啦，一陣就約咗人去食大餐啦。

Sunny: 嘩，食大餐咁開心呀。

Sally: 係呀，因為通常呢香港人點樣慶祝情人節嘅方法呢，就係一係就會約大家呢去啲可能比
較高級啲嘅餐廳啦，可能食吓法國菜呀，意大利菜呀咁樣囉。

Sunny 哦，然之後再睇套戲！
Sally: 睇戲都會㗎。

Sunny: 嗯，咁我覺得呢其實好多......多數係比較後生啲一輩啦，就好鍾意去公園度行㗎喎。

Sally: 係呀，因為佢哋覺得呢一路行海濱長廊好浪漫囉。

Sunny: 哦，等我得閒試下先。

Sally: 你又自己一個去呀？

Sunny: 誒，體驗吓咁囉。

Sally: (笑) 不過講起一啲比較青年人會慶祝情人節嘅方法，就一定唔少整朱古力啦。

Sunny: 嘩，整朱古力......係喎，整朱古力好似好難咁喎。

Sally: 係呀，話說我之前都整過，係中學嘅時候，不過我係整比我啲朋友仔食。

Sunny: 哦，都好嘅，整朱古力都算係一個情人節嘅一個傳統嚟嘅。

Sally: 係呀，仲諗諗吓，有時呢，去尖沙咀呀，者中環海旁嘅時候呢，都會有好多唔同嘅人呢
，問你買唔買花送畀女朋友男朋友咁樣。

Sunny: 呀，冇錯呀，通常呢，都係見住人哋拍緊拖啦，一男一女嗰啲呢，佢就會行過嚟問你
買唔買花啦。

Sally: 係呀，我仲記得有一次呀，嘩，見住有對情侶攞住九十九枝玫瑰呀，都唔知鄧佢重好呀
，定鄧佢開心好呀。

Sunny: 嘩，咁都幾辛苦㗎喎。

Sally: 係呀，不過係女仔嘅角度嚟講，又真係幾羨慕嘅。

Sunny: 哦，但我覺得而家呢，好多人拍拖呢，都好注重影相喎。

Sally: 嘩，真係，講起影相呢樣嘢，一到二月十四呀，或者二月十五號嘅朝頭早，你就會見到
......見到社交平台嘅每一對情侶呢喺度上載佢哋自己放閃光彈嘅相。

Sunny: 冇錯呀，都唔知嗰張相係影咗幾多百張之後呀，先可以挑選出嚟呀。

Sally: 不過冇計啦，佢哋咁幸福咁幸運咁遇到對方，都係值得高興嘅事嚟嘅。

Sunny: 嗯，冇錯，咁我都要快啲去搵返個伴，等我好好過呢個情人節先！

Sally: 咁又唔使咁急住，講到情人呢樣嘢最緊要都係搵到個自己最鍾意嘅，又唔好為...... 為咗
咁急想拍拖，或者因為想人哋拍我又拍呢個心態而咁急去搵一個伴侶畀自己。

Sunny: 嗯，你講得好啱，咁我都係做多啲準備先，例如諗下拍拖之後可以去邊度玩啦，呢樣
嘢都係一個好重要嘅一個要諗嘅嘢嚟㗎嘛。
Sally: 係呀，仲有其實女仔呢都注重呢佢收到啲咩禮物㗎，所以你都要小心啲呀。