PEBRERO 2023 —TAWEN A

Maikalima a Domingo
ti Kadawyan a Tiempo – Pebrero 05, 2023 .............. p. 2

Maikainem a Domingo
ti Kadawyan a Tiempo –Pebrero 12, 2023 ............... p. 7

Maikapito a Domingo
ti Kadawyan a Tiempo –Pebrero 19, 2023 ............. p. 13

Mierkoles Kurkurus –Pebrero 22, 2023 ........... p. 19

Umuna a Domingo
Ti Kuwaresma –Pebrero 26, 2023 ............. p. 25

1
 MAIKALIMA A DOMINGO TI KADAWYAN A TIEM-
PO – TAWEN A
CONSECRATED LIFE SUNDAY
Pebrero 5, 2023
Tema: DAKAYO TI ASIN KEN SILAW TI LUBONG!
I. RITO TI PANAGSAGANA

PAKAUNA:
(No naurnongen ti gimong, mairugi ti panaglualo babaen iti maiyannatup a
panglukat a kanta. Kalpasanna, irugin ti mangidaulo )

M: Iti nagan ti Ama, ken ti Anak, ken ti Espiritu Santo.

G: Amen.
Naimbag nga aldawtayo amin kakabsat. Agyamantay ti Dios ta naurnong
tayo manen ita kas maysa a pamilya tapno agdayaw ken agyaman ti Apo
babaen iti daytoy a rambak liturgia tayo. Ita met laeng a Domingo ket
rambakan ti Simbaantayo ti makunkuna a Consecrated Life Sunday.
Domingo nga impaay ti Simbaan tapno intay ikarkararagan dagiti Papadi ken
Relihioso ken Relihiosa nga nangikomit iti biag da iti panagserbi da iti
Simbaan ken iti biag misyonero ken misyonera. Intay ngarud
makipagmaymaysa iti entero a Simbaan iti daytoy a ganuat babaen met laeng
iti aktibo a pannakipassettayo iti daytoy a rambak liturgia.

RITO TI PANAGBABAWI:

Tapno ngarud maikaritayo a makipagrambak iti daytoy a misterio,

agpakumbabatayo nga agbabawi kadagiti basoltayo ket dumawattayo ti kaasi
ken pammakawan ti Apo.
Sika a naibaon tapno paimbagem dagiti puso nga agbabawi: Apo,
kaassiannakmi:
Apo, kaassiannakami.
Sika nga immay tapno ayabam dagiti managbasol: Cristo
kaassiannakami:
Cristo, kaassiannakami.
Sika a situtugaw iti makannawan ti Ama tapno ibabaetnakami: Apo,
kaassiannakami.
Apo, kaasiannakami.

Kaassiannatayo koma ti managayat a Dios, pakawanenna dagiti

basoltayo ket iturongnatayo iti biag nga agnanayon. Amen.

GLORIA ITI DIOS …

KARARAG A PANGLUKAT:
Apo, dakami a familyam, dayta laeng graciam ti panginanamaanmi.
Anansata dawatenmi ta aywanannakam kadi ket salaknibannakami a di
agsarday ta ayatmo. Gapu ken Jesucristo nga Anakmo ket Dios, isu a a
makipagbiag ken makipagari Kenka ken iti Espiritu Santo iti agnanayon nga
awan inggana. Amen.

2
II. LITURHIA TI SAO TI DIOS
UMUNA A MAIBASA: Isaias 58: 7-10
Daytoy maibasa naadaw iti libro ni Isaias
Kuna ti Apo: ibingayanyo iti taraonyo dagiti mabisin. Pasangbayenyo
dagiti napanglaw nga awan pagtaenganna. Kawesanyo dagiti awan
arwatenna, ket diyo ipaidam ti tulongyo kadagiti kakabagianyo. No
aramidenyo daytoy, kaslanto init iti bigbigat ti paraburko a mangraniag
kadakayo, ket mabi-itto a maimbagan dagiti sugatyo. Kanayonto nga addaak
kadakayo tapno isalakankayo. Ti kaaddak ti mangsalaknibto kadakayo iti
amin nga aglawlaw. No agkararagkayo, sungbatankayto. No awagandak,
ipangagkayto. No isardengyo ti panangidadanesyo, ti panangipakitayo iti
gurayo ken ti panagsaoyo iti dakes; no pakanenyo dagiti mabisin ken no
itedyo ti masapul dagiti napanglaw, ti sipnget iti aglawlawyo agbalinto a kas
iti raniag ti agmatuon.
Ti Sao ti Apo.
SALMO RESPONSORIO: Salmo 112: 4-5, 6-7, 8-9
ITI SIPNGET, AGRANIAG TI SILAW KADAGITI NASINGPET..
1. Iti sipnget, agraniag ti silaw kadagiti nasingpet, kadagiti naparabur,
naasi ken nalinteg. Nagasat ti tao a managparabur ken managpautang,
ken awan dakes a pakasarsaritaan dagiti aramidna. (S)

2. Awanto a pulos ti pakaan-anoanna, ket uray inton ano dinto malipatan.

Dinto agbuteng a makangngeg kadagiti dakes a damag. Natibker latta
ti pammatina, ket agtalek iti Apo. (S)
3. Saan nga agdanag wenno agbuteng, ta makitananto ti pannakaparmek
dagiti kabusorna. Mangted a sibubuslon kadagiti makasapul, dinto
agpatingga ti pannangngaasina; napnoan iti pannakabalin ken
mararaemto. (S)

MAIKADUA A MAIBASA: 1 Cor 2:1-5

Daytoy maibasa naadaw iti umuna a surat ni San Pablo kadagiti taga-
Corinto.
Kakabsatko, idi immayak dita tapno ikasabak kadakayo ti
pammaneknek ti Dios, diak nagaramat kadagiti agkakauneg a balikas wenno
panunot. Ta bayat ti kaaddak iti dennayo, inkeddengko nga awan ti ammok
malaksid ti maipapan ken ni Jesu-Cristo ken ti pannakailansana iti krus. Iti
kasta, idi addaak kadakayo, nakapuy ken agtigtigergerak iti buteng. Iti
panangisurok ken panangikasabak iti mensahe, diak nagusar kadagiti
makaallukoy a balikas ti kinasirib. Nagsaoak iti makaallukoy a
pammaneknek iti pannakabalin ti Espiritu ti Dios, tapno saan a maibatay ti
pammatitayo iti kinasirib ti tao, no di ket iti pannakabalin ti Dios.
Ti Sao ti Apo.
ALLELUIA
Alleluia, Alleluia!
Siak ti silaw ti lubong, kuna ti Apo;
Siasinoman iti silaw ti biag,
Ket dinto magna ti kasipngetan.
Alleluia!

3
EBANGHELIO: Mateo 5: 13-16
Daytoy sumaganad naadaw iti nasantoan nga Ebanghelio kas insurat ni San
Mateo
Kinuna ni Jesus kadagiti adalanna: “Dakayo ti pannakaasin dagiti amin
a tattao. Ngem no timmamnayen ti asin, saanen a mapaapgad. Awan
serserbina ti asin, no di ket maibelleng ket mapaypayatan.
“Dakayo ti pannakasilaw ti lubong. Saan a mailinged ti ili a nabangon iti
rabaw ti maysa a bantay. Awan tao a manggangat iti pagsilawan sana kaluban
iti salup. Iparabawna ketdi iti nairanta a pagsaadanna tapno aglawag kadagiti
amin a tattao nga adda iti balay. Masapul a kasta met ti panaglawag ti
silawyo iti imatang dagiti tattao, tapno makitada dagiti naimbag nga
aramidyo ket idaydayawda ni Amayo sadi langit.”
Ti Ebanghelio ti Apo.
Dayaw ti maipaay Kenka, O Krsito.

PAGPAMPANUNOTAN:
ITI SIPNGET, AGRANIAG TI SILAW KADAGITI NASINGPET ket
inayon tayo pay ti umuna nga paset ti Ebanghelyo:“Dakayo ti pannakaasin
dagiti amin a tattao. Ngem no timmamnayen ti asin, saanen a mapaapgad.
Awan serserbina ti asin, no di ket maibelleng ket mapaypayatan”. Silaw ken
asin ket dua nga banag nga napateg iti uneg ti balay ken familia. No awan ti
silaw iti uneg ti balay iti rabii, agtalinaed dagiti bumalay iti kasipngetan ket
amang la ket no adu pay ti madalapus da nga adda iti uneg ti balay. Kasta met
kakabsat ti panagbiag tayo, no awan ti lawag iti panagbiag tayo, agtalinaed
tayo iti kasipngetan ket adu ti mapasamak iti biag tayo nga saan nga nasayaat.
Ta no iti uneg ti balay nga awan ti lawag na, adu dagiti banbanag
amadungpar wenno madalapus tayo. Kasta met laeng iti biag-pammati tayo.
Saan tayo nga makapagturong iti nasayaat a panagbiag no nasipnget ken
nagulo ti biag tayo. Ket ti asin, no nagmawmaw ti raman ti asin napukaw na
wenno naawan ti nakaisangratan na wenno awanen ti mamaay na ta ti asin
ket isu ti pangparaman iti ania man a makan wenno lutuen iti kusina nga
mangipaay iti nanam ti makan wenno taraon.
Iti umuna a naibasa, karkariten natayo ni Profeta Isaias nga ibiag tayo
koma ti pammati tayo tapno makaited ti silaw iti pada tayo nga tao.
Ket ni San Pablo ket palagipan natayo met iti surat na kadagiti taga
Corinto nga iti misyon na nga mangipaduyakyak ti Sao ti Apo ket saan
nga marukod iti material nga banbanag no di ketdi maibasar iti
kinapakumbsaba ken panangawat ti pannubok iti cross. Aramiden tayo
koma nga amin nga aramiden tayo ken ti pannakilangen tayo ket ni
Apo Dios ti sentro ken ISU ti maidaydayaw nga saan ket a datayo ken
dagiti inaramid tayo wenno naitulong tayo iti pada tayo nga tattao.
Ania kadi ti kayat na nga sawen ti agbiag a kas tao iti pammati? Dagiti
nangegan nga naibasa ket Ipalagip na kadatayo nga ti tao nga addaan
pammati ket saan a marukod iti kinasirib, propesyon, kinabaknang ken
dadduma pay. Ti pudpudno nga pammati ken isu ti mamagbaliw iti
kinatao tayo, gutugotenna iti nga tallikudan tayo ti panagimbubukod
ken panangtaming ken panagsungbat kadagiti arungaing dagiti
agkasapulan. Dagiti tattao nga addaan iti nauneg ken pudno nga
pammati ket isuda dagiti tattao nga nalinteg, managtulong, managayat
nga saan ketdi ti pangintuturay. Dagiti addaan pudno a pammati ket
isuda dagiti NAPAKUMBABA.
Kanayon tayo ngarud koma nga dawaten iti Apo ket kuna tayo koma a
kanayon: Apo, ikkannak kadi ti naan-anay nga grasya a mangibingay ti
silaw ti pammatik iti padak a tao. Amen.

4
PANANGIPADUYAKYAK TI PAMMATI : (Nicene Creed)

MAMATIAK ITI DIOS AMA A MANNAKABALIN AMIN…

KARARAG A SAPASAP:
Impakaammo ni Jesus no kasano ti panagbalin nga asin ken silaw iti
lubong babaen kadagiti aramidna. Kumararagtayo iti managayat nga Ama
tapno tulongan natayo koma a makapudno iti dayta nga awis. Ket iti tunggal
kararag kunatayo:
APO, TIMUDEM TI KARARAGMI .
1. Idawdawatantayo ti Santa Iglesia tayo tapno kanayon koma nga agbalin
nga asin ken silaw para iti pakaidayawan ti Dios ken
pakaisalakanantayo. Kumararagtayo.

2. Idawdawatantayo ti pagiliantayo a Pilipinas. Agari koma ti kappia ken

talna iti tunggal umili ket maragpat tayo koma ti kalikagumtayo a
kappia, hustisya, panagkaykaysa ken panagdur-as. Kumararagtayo.

3. Idawdawatantayo ti babagitayo tapno agtultuloy ti panagbalintayo nga

asin ken silaw iti maysa ken maysa matungpal ti pagayatan ti Dios.
Kumararagtayo.

4. Idawdawatantayo ti kasapulan ti gimongtayo. Madegdegan koma ti

nasayaat a pannakilangentayo iti maysa ken maysa ket ad-adda koma
nga ibiagtayo ti pagayatan ti Dios iti panagbalintayo nga asin ken silaw
ti gimongtayo. Kumararagtayo.

5. Idawdawatantayo dagiti masakit ken agrigrigat ta babaen ti asi ti Dios

masarakanda koma ti namnama ket maikkan ti kaipapanan ti
panagsagabada. Kumararagtayo.

6. Idawdawatantayo dagiti pimmusayen, kaassian koma ti Dios ida ket

awatenna idan iti paarianna. Kumararagtayo.

Managayat nga Ama, ikamangmi kad dagitoy a dawatmi ket patgam

koma ket babaen met laeng ti pannulongmo, makapudnokami koma iti
awismo a panagbalin nga asin ken silaw ti lubong. Dawatenmi dagitoy gapu
met laeng ken Cristo nga Apomi.

III. RITO TI NASANTOAN A KOMUNION

(Mairuar ti Santisimo Sakramento ita manipud iti tabernakulo ket maikabil iti altar
ngem saan pay a maikkat ti kalub ti ciburium. Masindian ti dua a kandela sa
maikararag ti sumaganad a kararag.)

KARARAG TI PANAGDAYAW KEN PANAGYAMAN:

Iti amin a tiempo, agyamanak iti APO, diakto agsardeng a mangidaydayaw
kenkuana. Ket kunatayo a di agsarday.
DAYAW KEN GLORIA ITI DIOS TI KANGATOAN!

Ipannakkelko ti APO gapu iti inaramidna; mangngeg koma dagiti

maidaddanes ket agragsakda. Ket kunatayo a di agsarday.
DAYAW KEN GLORIA ITI DIOS TI KANGATOAN!
Danggayandak a mangitan-ok iti APO; agmaymaysatayo a mangidaydayaw
iti naganna! Ket kunatayo a di agsarday.
DAYAW KEN GLORIA ITI DIOS TI KANGATOAN!

5
 Makikaysakami kenni Obispomi N., ni Kura parokomi N., ken ti entero
a Simbaan iti inkam panagyaman ken panagdayaw Kenka Dios nga Amami,
babaen ti Anakmo, ni Apomi a Jesus, Isu a makipagbiag ken makipagari
Kenka ken ti pannakikaysa ti Espiritu Santo, Dios nga awan inggana. Amen

PAKAUNA TI AMAMI:
Sikakaysa ken Maria nga Ina ni Jesus ken Inatayo met, kumararagtayo
kas iti insuro ni Jesus.
AMAMI …

PANGIPAAY TI KAPPIA:

Siraragsaktayo nga ibingay ti kappia ti Apo iti maysa ken maysa.

(Saan a maikanta wenno maikararag ti “Kordero” gapu ta awan ti
panakapisi-pisi ti bagi ni Cristo a nakairantaan ti kanta a “Kordero”)

PANANGIYAWIS TI KOMUNION:
Adtoy ni Jesucristo, ti Kordero ti Dios a mangikkat kadagiti basbasol ti
lubong. Nagasat dagiti naayaban iti padayana.

APO, DIAK MAIKARI NGA UMAYKA KANIAK......

KARARAG KALPASAN TI KOMUNION:

O Dios, kinayatmo a makiranodkami iti maymaysa a padaya, tapno
madegdegan ti pannakai-kaysami ken Cristo. Ipaaymo kadi ta mamataodkami
kadagiti bunga a pakai-salakanan ti lubong. Gapu ken Cristo nga Anakmo ket
Apomi. Amen

IV. PANANGIDATON KADAGITI SAGOT KEN PANAGCOLEKTA

(Daytoy iti gundaway nga intay panagkolekta ken panangidaton kadagiti saguttayo
nga agpaay iti simbaan ken kadagiti makasapul iti tulongtayo. Agkantatayo iti
maiyannatop a kanta. cf Supplement to the Roman Sacramentary)

V. RITO TI PANANGGIBUS

PAMENDISION:
Agbiagtayo koma kas iti awis ni Apo Jesus ket bendisionannatay koma
ti managayat a Dios: ti Ama, ken ti Anak, ken ti Espiritu Santo.
Amen.

Nalpasen daytoy sangkagimongan a panaglualotayo, intayo ket agbiagtayo

kas asin ken silaw iti maysa ken maysa.

Agyamantay iti Dios.

KANTA A PANGGIBUS . . .

6
 MAIKAINEM A DOMINGO TI KADAWYAN A TIEMPO
TAWEN A
PEBRERO 12, 2023

TEMA: PANAGTULNOG ITI PAGAYATAN TI DIOS

I. RITO TI PANAGSAGANA
PAKAUNA
(No naurnongen ti gimong, mairugi ti panaglualo babaen iti maiyannatup a
panglukat a kanta. Kalpasanna, irugin ti mangidaulo )

M: Iti nagan ti Ama, ken ti Anak, ken ti Espiritu Santo.

G: Amen.

M: Naragsak ken napnoan bendisyon a Domingo tayo amin kakabsat.

Agyamantayo iti Apo a Namarsua ta innikanna ti tunggal maysa kadatayo iti
salun-at, gaget ken inspirasyon nga umay manen makipagmaymaysa iti
daytoy nakristianoan a gimongtayo tapno intay iyebkas ti panagyamantayo
kenkuana kadagiti parabur ken grasya nga ipapaayna kadatayo ken kasta met
ti intay panangidatag kenkuana kadagiti amin a karkararag ken un-unoytayo.

G: Madaydayaw ti Dios iti agnanayon.

RITO TI PANAGBABAWI:
Tapno maikaritayo a makipagrambak ita nga aldaw ti Apo, agpakumbabatayo
nga agbabawi kadagiti basbasoltayo ket dumawattayo ti kaasi ken
pammakawan ti Apo.
Agconfesarak iti Dios...
Kaassiannatayo koma ti managayat a Dios, pakawanenna dagiti basoltayo ket
iturongnatayo iti biag nga agnanayon. Amen.

LITANIA TI PANAGDAYAW ITI KAASI TI APO:

Apo, kaasiannakami…

GLORIA ITI DIOS TI KANGATOAN…

KARARAG TI GIMONG:
O Dios, ragsakem ti agtaeng iti kararua dagiti napudno Kenka.
Tulongannakam koma ngarud nga agbiag iti kasta a kinasingpet, tapno
kankanayon laeng nga agtaengka iti uneg ti pusomi. Gapu ken Apomi a
Jesucristo nga Anakmo ket Dios, Isu a Dios a makipagbiag ken makipagari
Kenka, ken iti Espiritu Santo, iti agnanayon nga awan inggana. Amen.

II. LITURHIA TI SAO TI DIOS

UMUNA A MAIBASA: Sirac 15: 15-20
Daytoy maibasa naadaw iti libro ni Profeta Sirac.

No pagayatam, mabalinmo a tungpalen dagiti bilin ti Apo. Mabalinmo

nga ikkedeng no agtalinaedka a napudno Kenkuana wenno saan. Nangikabil
iti apuy ken danum iti sangom; alaem ti kayatmo nga alaen. Sika ti agpili no
ania ti kayatmo: biag wenno patay, ket ti piliem, isu ti papanam. Niandaklan
ti kinasirib ken pannakabalin ti Apo ket makitana ti amin a banag. Ammona ti
amin nga aramiden ti tunggal tao; salluadanna ti amin nga agbuteng
7
kenkuana. Awan pay ti binilinna nga agbalin a dakes wenno inikkanna iti
pammalubos nga agbasol.
Ti Sao ti Apo.

G: Agyamantay ti Dios

SALMO RESPONSORIO: Salmo 119: 1-2, 4-5, 17-18, 33-34

NAGASAT DAGITI MANGTUNGPAL KADAGITI BILIN TI APO
1. Nagasat dagiti awan mulit ti panagbiagna, nga agbibiag kas
mayannurot iti liteg ti Apo! Nagasat dagiti mangtungpal kadagiti
bilinna, nga agtulnog kenkuana iti amin a pusoda.

2. Intedmo kadakami, O Apo, dagiti linlintegmo, ket imbilinmo a

tungpalenmi ida a siiinget. Sapay koma ta agtalinaedak a napudno a
mangannurot kadagiti ipaalagadmo!

3. Paraburannak kadi iti nawadwad, siak nga adipenmo; tapno agbiagak a

mangsalimetmet iti pannursurom. Luktam dagiti matak tapno
maimatangak dagiti nakaskasdaaw a kinapudno iti lintegmo.

4. Isurom kaniak, O Apo, ti kayat a sawen dagiti lintegmo, ket

salimetmetakto ida aginggat panungpalan. Ilawlawagmo kaniak ti
lintegmo, ket tungpalek iti amin a pusok.

MAIKADUA A MAIBASA: 1 Corinto 2:6-10

Daytoy maibasa naadaw iti umuna a surat ni San Pablo kadagiti taga-Corinto
Agsaoak met iti kinasirib dagiti nataengan iti pammati. Ngem saan nga
iti kinasirib ti agdama a panawen wenno dagiti mangituray iti daytoy a
lubong-dagiti agtuturay a mapukpukawen ti pannakabalinda. Ti nalimed a
kinasirib ti Dios ti sawek, ti kinasirib a nailemmeng kadagiti tattao ken
intudingna nga agpaay iti pakaigloriaantayo uray idi sakbay a maparsua ti
lubong. Awan kadagiti agtuturay iti lubong ti makaammo iti daytoy a
kinasirib. Ta no naammoanda, dida koma inlansa iti krus ti Apo ti gloria.
Ngem kas kuna ti Nasantoan a Surat: “Ti saan pay a nakita wenno nangngeg
ti tao, ti saan nga impagarup ti tao a mapasamak, isuda ti insagana ti Dios
kadagiti agayat Kenkuana.”
Nupay kasta, babaen ti Espiritu, impakaammo ti Dios kadatayo ti
palimedna. Sukimaten ti Espiritu ti amin a banag, uray dagiti nauneg a
panggep ti Dios.

Ti Sao ti Apo.

G: Agyamantay iti Dios.

ALLELUIA
Alleluia, Alleluia!
Agsaoka, Apo, ta denggennaka to adipenmo;
adda kenka dagiti sao a makaited iti biag nga agnanayon.
Alleluia!

8
EBANGHELIO: Mateo 5:17-37

Daytoy sumaganad naadaw iti nasantoan nga Ebanghelio kas insurat ni

San Mateo.

Kinuna ni Jesus kadagiti adalanna: “Diyo ipagarup nga umayko

waswasen ti Linteg ni Moises ken dagiti pannursuro dgiti profeta. Diak
immay tapno waswasek dagitoy no di ket tapno ipakitak ti pudno a
kaipapananda. Laglagipenyo a bayat ti panagpaut ti langit ken daga, dinto
mapukaw ti uray maysa a tulnek wenno kabassitan a paset ti Linteg, no di ket
agpautto agingga iti panungpalan ti lubong. Isu’t gapuna a ti
mangsalungasing iti kabassitan kadagiti bilbilin ken mangisungsong kadagiti
dadduma a tattao tapno agsalungasingda met, isunto ti kanumoan iti Pagarian
ti Langit. Ngem ti siasinoman nga agtungpal iti Linteg ken mangisuro pay
kadagiti sabali tapno agtungpalda met, isunto ti natan-ok iti Pagarian ti langit.
Ngarud, ibagak kadakayo: makastrek kayto iti Pagarian ti langit no
napaspasnek ti panagtulnogyo iti pagayatan ti Dios ngem ti panagtungpal
dagiti Fariseo ken dagiti mamaestro ti Linteg.
“Nangngegyo a naisao kadagiti tattao idi un-unana: ‘Dika mamapatay.
Siasinoman a pumatay, maidarumto.’ Ngem ita, ibagak kadakayo a
siasinoman a makapungtot iti kabsatna, maisaklangto iti ukom. Siasinoman
nga agkuna iti kabsatna: ‘Awan serserbim,’ maisaklangto iti sanhedrin; ket ti
agkuna iti kabsatna, ‘Maagka,’ sungbatannanto idiay infierno. Ngarud, no
mangiruknoyka iti datonmo iti altar, ket malagipmo nga adda gura kenka ti
kabsatmo, iabtim ti datonmo iti sango ti altar; umuna pay nga inka maki-
kappiaken kabsatmo sakanto agsubli a mangiruknoy iti datonmo. No adda
nangidarum kenka ket ipannaka iti pangukoman, makiaregloka pay nga
umuna kenkuana sakbay iti pannakayuli ti darum. Ta no saan, isaklangnaka
iti ukom, ket ti ukom yawatna ti pulis a mangipupok kenka iti pagbaludan.
Ibagak kenka nga idiaymonto agingga a mabayadan ti amin a multam.
“Nangngegyo a naisao: ‘ Dika makikamalala.’ Ngem ita, ibagak
kadakayo a siasinoman a mangmatmat iti maysa a babai ket gartemanna, iti
pusona nakabasolen iti panakikamalala. Ngarud, no ti makannawan a matam
ti pakaigapuan ti panagbasolmo, suatem ket ibellengmo. Nasaysayaat a
mapukaw ti maysa a paset ti bagim ngem ti amin a bagim a maitapuak iti
infierno. Ket no timakannawan nga imam ti pakaigapuan ti panagbasolmo,
putdem ket ibellengmo. Nasaysayaat nga awan ti maysa a takiagmo ngem ti
sibubukel a bagim a mapan iti infierno.
“Naisao pay: ‘Siasinoman a lallaki a mangisina iti asawana, masapul
nga ikkanna iti kasuratan ti panagsina,’ Ngem ita, ibagak kadakayo a no ti
lalaki isinana ti asawana, idinto a sipupudno kenkuana ti babai, mapabasol
dayta a lalaki iti pannakikamalala ti asawana no makiasawa manen. Kasta
met a makabasol iti pannakikamalala ti mangasawa iti naisina a babai.
“Nangngegyo a naisao kadagiti tattao idi un-unana, ‘Dimo paglikudan ti
karim, ngem tungpalem dagiti sinapataam nga aramiden iti Apo.’ Ngem ita,
ibagak kadakayo a dikay agsapata a pulos; diyo pagsaksi ti langit ta isu ti
trono ti Dios wenno ti daga ta isu ti pagbatayan dagiti sakana wenno ti
Jerusalem ta isu ti siudad ti naindaklan nga Ari. Dimo met pagsapata ti ulom,
agsipud ta dimo mapapuraw wenno mapangisit ti uray maysa laeng a buok.
Kastoy laeng ti kunayo: no wen, ‘Wen’; no saan, ‘Saan,’ ta agtaud iti
Managdakdakes ti aniaman nga inayonyo.”

Ti Ebanghelio ti Apo.

G: Dayaw ti maipaay Kenka, O Kristo.

9
PAGPAMPANUNOTAN:

NAGASAT DAGITI MANGTUNGPAL KADAGITI BILIN TI APO

Ni Sirach a nangegan tayo iti umuna a naibasa ket allukoyenna tayo nga
pilien anasayaat ti dalan nga intay suroten iti daytoy a biag. Surotentayo ti
dalan nga agturong iti Apo ket masarakan ti natalged a biag wenno ti biag
nga mangiyadayo kadatayo iti dalan nga supak wenno mangiyadayo
kadatayo kenni Apo Dios.
Iti Salmo ket napintas unay nga pagpampanunotan ti inna idiaya ta Kunana,
Nagasat dagiti mangtungpal kadagiti bilin ti Apo. Ditoy kakabsat, ipalagip
kadatayo ti Salmista ti kinagasat wenno ti pannakaawat tayo iti parabor ni
Apo Dios no tungpalen tayo ti pagayatan ken bilinna. Ania kadi dagitoy a
bilin na? Makita tayo daytoy kakabsat kadagiti kaadduan nga simbaan.
Dagiti Sangapulo a Bilinna wenno Ten Commandmets iti pagsasao nga
Ingles ket dagitoy ti giya tayo iti panagbiag a nasayaat, panagbiag a
managtungpal iti pagayatan ti Apo ken dagitoy pay meeten ti pagannurotan
tayo a Kristianos nga agbiag a nasayaat ta dagitoy a bilbilin iti mangtarabay
kadatayo iti biag a nasayaat—ti biag-moralidad.
Nagsayaat met unay iti panangigunam-gunam ni San Pablo iti maikadua a
naibasa nga nasayaat ti gunggona kadagiti agtalinaed a napudno ken
agtungpal kadagiti bilbilin ti Apo. Saan a matukod iti naindagaan nga
panagpampanunot ti liwliwa ken bendisyon ken kinagasat nga ipaay wenno
sumangbay iti panagbiag ti may a natulnog iti pagayatan ken bilin ti Dios.
Ket ni met San Mateo, karitenna met dagiti wenno datayo nga nakangeg iti
Ebanghelyona ita nga Dominggo saan laeng nga iti panagtungpal kadagiti
bilin ti Apo no di ketdi iti pay panangitultuloy iti panangibiag tayo
kadagitoy nga bilin iti inaldaw aldaw a panagbiag tayo. Karit nga sapay
koma ta ibiag tayo dagitoy bilin na a napnoan ayat nga saan laeng a kay tay
pagsasao nga “para tungpal bilin” ngem ketdi tungpalen dagitoy a bilbilin ti
Apo a napnoan ayat ket no maaramid tayo dagitoy ket isu to mangiturong
kadatayo nga agbiag a nagasat ken napnoan bendisyon.
No dadduma, tungpalen tayo dagitoy bilin ken paglintegan ti Simbaan para
laeng tapno makapagtungpal ket agpatingga laeng dita-tungpal-bilin, saan
nga aramidek daytoy gapu iti ayat a sumurot iti pagayatan ken bilin ti Dios.
Masapul nga no nagun-od kon wenno naaramid kon ti pagrebbengak a ket
huston. Kas koma iti: makapanak la ket diay Simbaan iti tunggal Dominggo,
huston ta naaramid kon ti pagrebbengan! Saan koma nga: “ay Dominggo
tatta ket mapanak diay Simbaan tapno agyaman kenni Apo Dios kadagiti
adu a parabur na kaniak”. Daytoy kakabsat ket addan nayon na nga ayat ken
panagyaman iti intay panagtungpal iti Maikapat a bilin ti Dios. To keep holy
the Lord’s Day! Saan laengen nga tapno makapagngilin iti Dominggo no di
ketdi agyaman kadagiti adu a bendisyon nga iumpaay ti Apo. Iti
pagrukodantayon iti panag tungpal ti bilin ken saanen nga eksakto laeng iti
nailanad iti bilin ngem ketdi addan ayat ken panagyaman a nayon na. Sapay
koma ta napudno tayo a kanayon kadagiti sao ken aramid tayo ken saan
koma a datayo ti rason nga agbasol ti pada tayo a tao.
Intay ngarud dawaten iti Apo ket kunata a siuulimek: Apo Dios,
tulungannak nga agayat a kas iti inbilinmo, napudno a panagayat tapno
addaak latta a mangtungpal iti bilin Mo nga agayat iti padak a tao ken
agserbi nga saan nga aguray wenno agbirok iti kasukat na ket siinanamaak
iti supapak Mo sadi langit. Amen.

PANANGIPADUYAKYAK TI PAMMATI : (Nicene Creed)

MAMATIAK ITI DIOS AMA A MANNAKABALIN AMIN…
KARARAG A SAPASAP:
Kakabsat, dawatentay ti tulong ti managparabor nga Amatayo ta iti
amin a kanito iti panagbiagtayo, agbiagtayo koma kas iti pagayatanna.
Tunggal dawat, kunatayo:

10
 APO PAGBALINENNAKAM A NALINTEG A TATTAOM.
1. Idawdawatantayo ni Santo Papa, dagiti Obispo, papadi, misionero,
relihioso ken amin a mangikaskasaba ti mensahe ti Dios tapno
mataginayon koma ti kinatarnaw ti puso ken biagda ket agserbida kas
pagsarmingan ti kinaimbag ditoy lubong. Kumararagtayo iti Apo.
2. Idawdawatantayo dagiti mangidadaulo ti gobyernotayo tapno
ipangpangrunada koma ti panagserbida para ti pagimbagan ti kaadduan
ken panagdur-as ti pagilian. Kumararagtayo iti Apo.
3. Idawdawatantayo dagiti kakabsattayo a mangmangged iti sabali a lugar
tapno maiyadayoda koma iti amin a kita ti kinadakes, peggad, basol
ken pannakaitugtuggod ket agbalinda a natalna ken sikakaradkad.
Kumararagtayo iti Apo.
4. Idawdawatantayo ti tunggal maysa kadatayo a mamati ken Jesus tapno
sangsangkamaysatayo koma a mangibiag ken agtulnog iti sursuro ni
Apo Jesus. Kumararagtayo iti Apo.
5. Idawdawatantayo dagiti kakabsattayo a natayen tapno makikaysada
koma iti pagarianna ti Dios. Kumararagtayo iti Apo.
Apo, dinakam kad ukomen ti lintegmo no di ket pagbalinennakam kadi
a natulnog iti pagayatam agingga iti pannakikaysami kenka. Dawatenmi
dagitoy gapu ken Cristo nga Anakmo ken Apomi. Amen

II. RITO TI NASANTOAN A KOMUNION

(Mairuar ti Santisimo Sakramento ita manipud iti tabernakulo ket
maikabil iti altar ngem saan pay a maikkat ti kalub ti ciburium. Masindian ti
dua a kandela sa maikararag ti sumaganad a kararag.)

KARARAG TI PANAGDAYAW KEN PANAGYAMAN:

Naparabur nga Ama, sika ti naggapuan iti amin nga imbag. Pinunnom
ti lubong iti graciam ket pinagbungam iti adu, tapno dakami amin ket
mabingayan iti sagutmo. Binendisionam dagiti aramidmi tapno magun-odmi
ti gunggona nga agpaay kadakami. Tignayennakami nga agbalin a parabur
ken ayat, ket kunami:

DAYAW KEN GLORIA ITI AGPAAY KENKA APO

Naparabur nga Ama, idi immay ditoy ni Cristo nga Anakmo,

pinaneknekanna a sika ket nasayaat a Dios a mangilala kadagiti
agladladingit ken agkasapulan. Inkasaba ni Jesus ti Naimbag a Damag
kadagiti napanglaw, pinakanna dagiti rinibu a mabisin idiay disierto, ken
binilinnatayo a mangsarungkar kadagiti naibalod, badduan dagiti lamo-
lamo, asikasuen dagiti masakit. Tignayennakami nga agbalin a parabur ken
ayat, ket kunami:
DAYAW KEN GLORIA ITI AGPAAY KENKA APO

Naparabur nga Ama, iti daytoy a panangrambakmi ti fiesta ti Epifania

linuktam ti matami kadagiti agkasapulan ket tinukaymo ti pusomi nga
agaramid iti nasayaat. Iti daytoy a sangkagimongan a panglualomi ken iti
inkam panangawat ken Cristo, Isu a taraon ti biag, impariknam ti kasapulan
dagiti nakaay-ay-ay ti panagbiagda. Tignayennakami nga agbalin a parabur
ken ayat, ket kunami:
DAYAW KEN GLORIA ITI AGPAAY KENKA APO

11
 Makikaysakami kenni Francisco a Santo Papami, ni Obispomi N., ni
Kura parokomi N., ken ti intero a Simbaan iti inkam panagyaman ken
panagdayaw Kenka Dios nga Amami, babaen ti Anakmo, ni Apomi a Jesus,
Isu a makipagbiag ken makipagari Kenka ken ti pannakikaysa ti Espiritu
Santo, Dios nga awan inggana. Amen

PAKAUNA TI AMAMI:
Kas maymaysa a pamilia, turdantayo nga umawag iti Ama babaen ti
lualo nga insuro ni Jesus kadatayo:

AMAMI . . .

PANANGIPAAY TI KAPPIA:
Intay ipaay ti kappia iti maysa ken maysa kadatayo.

(Saan a maikanta wenno maikararag ti “Kordero” gapu ta awan ti

panakapisi-pisi ti bagi ni Cristo a nakairantaan ti kanta a “Kordero”)

PANANGIYAWIS TI KOMUNION:

Adtoy ni Jesucristo nga immay tapno wayawayawaannatayo iti basol a

nangtagabu kadatayo. Nagasat dagiti umay a makipangan iti lamisaanna.
APO, DIAK MAIKARI NGA UMAYKA KANIAK...

KARARAG KALPASAN TI KOMUNION:

Kalpasan ti pananganmi iti nailangitan a taraun, ipaaymo kad, Apo, ta

kankanayon a tarigagayanmi ti tinapay ti biag. Gapu ken Cristo nga Anakmo
ket Apomi. Amen.

IV. PANANGIDATON KADAGITI SAGUT KEN PANAGCOLEKTA

(Daytoy iti gundaway nga intay panagkolekta ken panangidaton
kadagiti saguttayo nga agpaay iti simbaan ken kadagiti makasapul iti
tulongtayo. Agkantatayo iti maiyannatup a kanta. cf Supplement to the
Roman Sacramentary)

V. RITO TI PANANGIBUS

PAMENDISION:
Masarakantayo koma ti pudno a ragsak iti panagtulnogtayo iti pagayatan
ti Dios ket bendisionannatay koma ti Dios: iti Ama, ken ti Anak, ken ti
Espiritu Santo. Amen

Nalpasen daytoy a rambaktayo. Intayon iti kappia iti Apo.

Agyamantay iti Apo.

KANTA A PANGGIBUS:

12
MAIKAPITO A DOMINGO TI KADAWYAN A TIEMPO
TAWEN A
Pebrero 19, 2023

Tema: MASAPUL AWAN PAGKURANGANYO!

I. RITO TI PANAGSAGANA
PAKAUNA:
(No naurnongen ti gimong, mairugi ti panaglualo babaen iti
maiyannatup a panglukat a kanta. Kalpasanna, irugin ti mangidaulo )

M: Iti nagan ti Ama, ken ti Anak, ken ti Espiritu Santo.

G: Amen.
Kakabsat, intay iruknoy ti panagyamantayo iti Ama babaen ken Kristo
Jesus nga isu ti kiredtayo nga agserbi Kenkuana. Iti daytoy a domingo intay
manen agmaymaysa a mangidaton iti daytoy sangkagimongan a
panagkararagtayo tapno mataginayon koma ti pannarabay ken panangidalan
ti Apo kadatayo iti panangitultuloytayo a panagserbi kenkuana babaen met
laeng iti napudno ken nainkabsatan a panagserbitayo.
G: Madaydayaw ti Dios iti agnanayon.

RITO TI PANAGBABAWI
Tapno maikaritayo a makipasset iti daytoy a rambak ti fiesta ti Santo
Nino, agpakumbabatayo nga agbabawi kadagiti nagbasolantayo ket
dumawattayo ti kaasi ken pamakawan ti Apo.
Sika a naibaon tapno paimbagem dagiti puso nga agbabawi: Apo,
kaasiannakami.
Apo kaasiannakami.
Sika nga immay tapno ayabam dagiti managbasol: Cristo
Kaasiannakami.
Cristo Kaasiannakami.
Sika a sitotogaw iti makannawan ti Ama tapno ibabaetnakami: Apo
kaasiannakami.
Apo kaasiannakami.
Kaassiannatayo koma ti managayat a Dios, pakawanenna dagiti
basoltayo ket iturongnatayo iti biag nga agnanayon. Amen.

GLORIA TI DIOS TI KANGATOAN …

KARARAG A PANGLUKAT:
Mannakabalin a Dios, ipaaymo kadi ta panpanunotenmi a kankanayon
dagiti insurom, tapno iti sao ken aramid tungpalenmi dagiti makaay-ayo
Kenka. Gapu ken Cristo nga Anakmo ken Apomi. Amen.

13
II. LITURHIA TI SAO TI DIOS

UMUNA A MAIBASA: Levitico 19:1-2, 17-18

Daytoy maibasa naadaw iti libro ti Levitico.

Binilin ti Apo ni Moises nga ibagana day-toy iti gimong ti Israel,

“Agsantokayo agsipud ta nasantoanak; siak ti Apo a Diosyo.
“Diyo ipempen ti gurayo iti siasinoman ngem makilinnawagka kenkuana
tapno dika agbasol gapu kenkuana. Dikay agibales wenno agipempen iti gura
iti siasinoman ngem ayatenyo ti kaarrubayo a kas iti panagayatyo iti bagiyo.
Siak ti Apo.
Ti Sao ti Apo.

SALMO RESPONSORIO: Salmo 103:1-2, 3-4, 8,10, 12-13

MANAGAYAT KEN MANANGNGAASI TI APO.
1. O kararuak, idaydayawmo ti Apo. Amin nga adda kaniak, idaydayawyo
ti nasantoan a naganna. 0 kararuak, idaydayawmo ti Apo; dimo
liplipatan ti asina.
2. Pakawanenna ti amin a basolko ken paimbagenna ti amin a sakitko.
Yadayonak iti tanem ken bendisionannak iti ayat ken asi.
3. Managayat ken manangngaasi ti Apo; naanus, ket di agbalbaliw ti
ayatna. Dinatay dusaen, kas mayannatup iti basoltayo. Dinatay met
balsen kas mayannurot iti labsingtayo.
4. Kas iti panagaddayo ti laud ken daya, kasta met ti panangiyadayona
kadagiti basbasoltayo. Kas iti kinamanangngaasi ti ama kadagiti
annakna, kasta ti panangngaasi ti Apo kadagiti agbuteng kenkuana.

MAIKADUA A MAIBASA: 1 Corinto 3:16-23

Daytoy maibasa naadaw iti umuna a surat ni San Pablo kadagiti taga-Corinto
Diyo kadi ammo a dakayo dagiti templo ti Dios, ket agtalinaed ti
Espiritu ti Dios kadakayo? Ngarud, ti siasinoman a mang-dadael iti templo ti
Dios, dadaelento met ti Dios. Ta nasantoan ti templo ti Dios, ket dakayo a
mismo ti templona.
Awan koma ti mangallilaw iti bagina. Siasinoman a mangipagarup iti
bagina a masirib, babaen ti alagaden ti lubong, agbalin koma a maag tapno
agbalin a napay-payso a masirib. Ta minamaag iti imatang ti Dios ti amin nga
ibilang ti lubong a kinasirib. Kas kuna ti Nasantoan a Surat: “Ipalab-og ti
Dios dagiti mamasirib iti kinasikapda.” Kunana pay, “Ammo ti Apo nga
awan serserbi ti panunot dagiti mamasirib.” Ngarud, di koma pagpasindayag
ti tao ti kabaelanna nga aramiden. Kinapudnona, kukuayo amin a banag: Ni
Pablo, ni Apolos, ni Pedro, daytoy lubong, biag ken patay, ti agdama ken ti
masakbayan. Wen, kukuayo amin dagitoy. Ket kukuanakayo ni Cristo, ket ni
Cristo kukua ti Dios.
Ti Sao ti Apo

ALLELUIA
Alleluia, Alleluia!
Ti agayat kaniak, tungpalennanto dagiti saok;
ayatento ni Amak, ket siak ken ti Ama
umaykamto agtaeng kenkuana. Alleluia
Alleluia!
14
EBANGHELIO: Mateo 5:38-48

Daytoy sumaganad a maibasa naadaw iti nasantoan nga Ebanghelio kas

insurat ni San Mateo

Kinuna ni Jesus kadagiti adalanna: “Nangngegyo a naisao, ‘Mata iti mata;

ngipen iti ngipen.’ Ngem ita, ibagak kadakayo diyo balsen ti siasinoman a
mangdangran kadakayo. No adda mangtungpa iti makanna-wan a
pingpingmo, patungpam pay ti makannigid. Kasta met a no adda mangi-
darum kenka tapno alaenna ti badom, bay-am nga alaenna pay ti kagaymo.
Siasinoman a mangipapilit a kumuyogka kenkuana iti maysa a kilometro,
kuyogem pay iti maikadua. No adda dawatenda kenka, itedmo; no adda
bulodenda kenka, ipabulodmo.
“Nangngegyo a naisao, ‘Ayatem dagiti gagayyemmo ket guraem dagiti
kabusormo.’ Ngem ita, ibagak kadakayo: Ayatenyo dagiti kabusoryo ket
ikararaganyo dagiti mangidadanes kadakayo, tapno agbalinkayo nga annak ni
Amayo sadi langit. Ta padapada a pagraniagenna ti initna kadagiti naimbag
ken kadagiti dakes a tattao. Mangted iti tudo kadagiti agaramid iti naimbag,
kasta met kadagiti agaramid iti dakes. Gunggonaannakayo kadi ti Dios no
dagiti laeng agayat kadakayo ti ayatenyo? Kasta met ti aramiden dagiti
agsingsingir iti buis! Ania ngarud ti pakaidumaanyo kadagiti sabali no dagiti
laeng kakabsatyo ti kablaawanyo? Kasta met ti aramiden dagiti Gentil!
Masapul ngarud nga awan pagkuranganyo a kas ken ni Amayo sadi langit
nga awan pagkuranganna.’

Ti Ebanghelio ti Apo.

G: Dayaw ti maipaay Kenka, O Kristo.

PAGPAMPANUNOTAN:

‘MATA ITI MATA; NGIPEN ITI NGIPEN.’ Balenbales! No ngata kastoy

nga kanayon ti mapasamak, di pay ketdin puros bungi ken bulag ti tattaon
ditoy lubong? Ngem saan a kastoy ti kayat ti Apo a mapasamak iti lubong
tayo. Saan koma a ti guran-gura iti agnaed iti puso ti tunggal maysa kadatayo
no di ket ti pammakawan.
Ti nangegan tayo kakabsat iti umuna a naibasa ket iti kinasanto.
“Agsantokayo agsipud ta nasantoanak”. No tarigagay ti tao ti sumurot kenni
Apo Dios, masapul ngarud nga tuladenna ti kinasayaat ti Apo, ti Kinasanto
na. Kayatna nga sawen nga awan ti im-impen nga gura ken sakit ti nakem
wenno pungtot iti pada a tao. Daytoy ket imbilinna pay laeng idi nagkauna a
tiempo-iti Daan a Tulag. Kuna ngarud ti Salmo tayo, Managayat ken
Manangngaasi ti Apo! Ditoy nga inpakita ti Apo nga ti sumurot Kenkuana
ket sumurot met iti pammatulad na nga Isu ket managayat ken mangngaasi.
Naawis tayo ken maawis tayo manen nga agbalin a nasantoan a kas
Kenkuana ta dayta ti wagas ken galad ti maysa nga naayat a sumurot ti dalan
ti Apo. Agsipud ta datayo ket annak ti Dios a Nasantoan. Ipalagip met
kadatayo ni San Pablo iti maikadua a naibasa nga ti Espiritu Santo nga adda
iti tunggal maysa kadatayo ti mamagbalin kadatayo nga templo ti Apo. Ti
Dios ti agari ken agnaed iti puro tayo. Ket iti met Ebanghelyo ni San Mateo,
inpalawag ni Apo Jesus nga ti pundasyon wenno gubbuayan ti kinasanto ket
agtaud iti panagpanpanunot iti di agmaliw nga ayat ti Apo. Holiness is
grounded in God’s unconditional love. Ket daytoy koma ti mamagtignay
kadatayo nga iti panagserbi tayo iti padatayo nga tao ken daytay awan ti
namnamen tayo a kasukatna no di ketdi aramiden daytoy panagserbi,
panagtulong ken panagayat iti pada tayo nga tao nga awan ti knodisyon na.
Panagserbi nga agtaud iti puso tayo nga saan a mangnamnama iti
15
nainlubongan a kasukat wenno gunggona.
Ni St. John Paul II dati a Santo Papa Pablo Dos ken kinanayon na idi nga
ipalpalagip kadatayo ti kinamanagsanto. A call to Holiness. Ti kinasanto ket
saan laeng nga para kadagiti papadi, relihioso ken relihioso wenno kadagiti
tattao nga addaan naisangsangayan nga akem iti panagserbi iti Simbaan.
Ngem ketdi, amin tayo ket naayaban, makarit nga agbiag iti kinasanto uray
ania man nga estado ti biag ti adda kadatayo. Mabalin amin ti mamagsanto no
la ketdi nasayaat ken pagsayaatan ti pada tayo nga tao ti adda iti puso ken
panunot tayo nga isu met ti mamagtignay kadatayo nga agaramid iti nasayaat
nga saan nga aguray iti katukad na a supapak wenno gunggona. Ti agbalin
wenno aggagar a mamagsanto ket saan nga nalaka. Kayatna a sawen nga
amin nga tigtignay ken panunot tayo ket maiyannatop iti pagayatan ti Apo
para kadatayo. Ania kadi daytoy a pagayatan ti Dios para kadatayo? Isu iti
panagbalin tayo a nasayaat a tattao. Daytay ammo tayo ti mangisakit,
tumulong, agserbi ken kangrunaan na unay ti mangayat iti padatayo a tattao
uray pay dagitay kunatayo man a nairgat unay nga ayaten? Nga ti guran-gura
ket sukatan tayo iti ayat; ti kinadakes ket subadan tayo ti kinaimbag ken ti
riribuk sarangten tayo babaen iti kappia. Daytoy kakabsat ti pangkontra
wenno pangsumang tayo iti “mata iti mata ken ngipen iti ngipen” tapno
nasayaat latta iti panagkita tayo iti aglawlaw tayo ken napintas latta ti isem
tayo, Siempre, saan tayo a maarimid dagitoy iti kabukbukodantayo nga pigsa
ngem ketdi masapul tayo latta a kankanayon ti pannulong ti Apo isu nga
masapaul latta nga tarabayen tayo ti gagar tao nga mamagsanto babaen iti
nainget nga kararag tayo ket kunatayo ngarud a dawaten: Ama nga
nailangitan, ipatulod mo kadi ti Espiritu Santo kadakami tapno ti kasta ket
matulad mi koma ken matungpal mi ti kinunam: “Agsantokayo agsipud ta
nasantoanak” saan laeng Apo nga iti sao di ket nangruna unay iti aramidmi
ken sidadaan kami koma nga dumawat ti pammakawan Mo iti kanito nga
aglabsing kami iti pagayatam. Amen

PANANGIPADUYAKYAK TI PAMMATI : (Nicene Creed)

MAMATIAK ITI DIOS AMA A MANNAKABALIN AMIN...

KARARAG A SAPASAP:
Kakabsat, awisennatayo ti Apo nga agbalin a santo babaen ti panagbiag
nga awan pagkurangan kas kenkuana. Kumamangtay ngarud kenkuana ket
sangsangkamaysatayo nga agdawat ti tulongna ket tunggal dawat, kunatayo:

APO, DENGGENNAKAM KADI.

1. Agtalinaed koma ti Simbaan a simbolo ti panagkaykaysa ken

instrumento ti pannakaipakaammo ti biag a nasantoan babaen kadagiti
aramidna nangnangruna ti ayat ken panagpakawan. Kumararagtayo iti
Apo.
2. Agserbi koma dagiti mangidadaulo ti pagiliantayo nga instrumento ti
pannakaparnuay ti ili a pakasarakan ti ayat, kappia ken panagkaykaysa.
Kumararagtayo iti Apo.
3. Para kadatayo nga adda ita ditoy tapno kanayontayo koma a siriridam
kadagiti banag ti pammati ket maikkantayo koma ti tured ken pigsa a
mangsaksi ken mangikasaba iti dayta a pammati. Kumararagtayo iti
Apo.
4. Para kadagiti masakit ken agsagsagaba tapno masarakanda koma ti
namnama iti asi ken ayat ti Dios ket agbiagda koma kas annak ti Dios
babaen ti pammatida ken panagtalek. Kumararagtayo iti Apo.

16
5. Para kadagiti minataytayo tapno ti Dios a manangaasi ket pakawanen
ken awatenna idan iti pagarianna. Kumararagtayo iti Apo.

Nailangitan nga Ama, patgam koma amin dagitoy dawatmi sigun iti
pagayatam gapu ken Cristo nga Apomi. Amen.

III. RITO TI NASANTOAN A KOMUNION

(Mairuar ti Santisimo Sakramento ita manipud iti tabernakulo ket
maikabil iti altar ngem saan pay a maikkat ti kalub ti ciburium. Masindian ti
dua a kandela sa maikararag ti sumaganad a kararag.)
KARARAG TI PANAGDAYAW KEN PANAGYAMAN:
Naparabur nga Ama, sika ti gubbuayan iti amin a kinaimbag.
Pinunnom ti lubong iti graciam ket pinagbungam iti adu, tapno dakami amin
ket mabingayan iti sagutmo. Binendisionam dagiti aramidmi tapno magun-
odmi ti gungona nga agpaay kadakami. Tignayennakami nga agbalin a
naparabur ken naayat, ket kunami:
DAYAW KEN GLORIA ITI AGPAAY KENKA APO!
Naparabur nga Ama, idi immay ditoy ni Cristo nga Anakmo,
pinaneknekanna a sika ket nasayaat a Dios a mangilala kadagiti agladladingit
ken agkasapulan. Inkasaba ni Jesus ti Naimbag a Damag kadagiti napanglaw,
pinakanna dagiti rinibu a mabisin idiay disierto, ken binilinnatayo a
mangsarungkar kadagiti naibalud, badduan dagiti lamu-lamo, asikasuen
dagiti masakit. Tignayennakami nga agbalin a naparabur ken naayat, ket
kunami:
DAYAW KEN GLORIA ITI AGPAAY KENKA APO!
Naparabur nga Ama, iti daytoy a panangrambakmi iti Fiesta ti Santo
Niño, pagbalinem a puso ti ubing toy pusomi. Iti daytoy a sangkagimongan
a panglualomi ken iti inkam panangawat ken ni Cristo, Isu a taraon ti biag,
impariknam ti kasapulan dagiti nakkurapay ti panagbiagda. Tignayennakami
nga agbalin a naparabur ken naayat, ket kunami:
DAYAW KEN GLORIA ITI AGPAAY KENKA APO!
Makikaysakami kenni Francisco a Santo Papami, ni Obispomi N., ni
Kura parokomi N., ken iti intero a Simbaan ti inkam panagyaman ken
panagdayaw Kenka Dios nga Amami, babaen ti Anakmo, ni Apomi a Jesus,
Isu a makipagbiag ken makipagari Kenka ken ti pannakikaysa ti Espiritu
Santo, Dios nga awan inggana. Amen

PAKAUNA TI AMAMI:
Sikakaysa ken Cristo, kumararagtayo iti Ama babaen met laeng ti
insurona kadatayo.
AMAMI …
PANANGIPAAY TI KAPPIA:
Ragsakentayo nga ipaay ti kappia ti Dios iti tunggal maysa kadatayo.
(Saan a maikanta wenno maikararag ti “Kordero” gapu ta awan ti
panakapisi-pisi ti bagi ni Cristo a nakairantaan ti kanta a “Kordero”)
PANANGIYAWIS TI KOMUNION:
Adtoy ni Jesus, ti Apo ken mannubbottayo. Isu ti kordero ti Dios a
mangikat kadagiti basbasol ti lubong. Nagasat dagiti mamati ket umawat
kenkuana.
APO, DIAK MAIKARI NGA UMAYKA KANIAK…

17
KARARAG KALPASAN TI KOMUNION:
Mannakabalin a Dios, babaen ti panag-comulgarmi, inawatmi ti talged ti
pannakaisalakanmi. Ipaaymo kadi ta addanto aldaw a napaypaysonto ti
pannalak-ammi kadagiti ragsak ti langit. Gapu ken Cristo nga Anakmo ket
Apomi. Amen.
IV. PANANGIDATON KADAGITI SAGUT KEN PANAGCOLEKTA
(Daytoy iti gundaway nga intay panagkolekta ken panangidaton
kadagiti saguttayo nga agpaay iti simbaan ken kadagiti makasapul iti
tulongtayo. Agkantatayo iti maiyannatup a kanta. cf Supplement to the
Roman Sacramentary)
V. RITO TI PANANGIGIBUS
PAMENDISION:
Impakaammo ti Dios no kasano ti panagbalin nga awan pagkurangan
babaen kadagiti sursuro ni Jesus. Ragsakentayo koma ngarud nga ibiag
dagitoy a sursuro ket bendisionannatayo ti managayat a Dios: ti Ama, ken ti
Anak, ken ti Espiritu Santo. Amen.
Nalpasen daytoy a rambaktayo. Intayo ket agbiagtayo kas iti wagas nga
impakita ni Jesus.
Agyamantay ti Dios.
KANTA A PANGGIBUS:

18
 MIERKOLES KURKURUS
TAWEN A
PEBRERO 22, 2023

Tema: TEMA: AGBABAWI KA KET MAMATI KA ITI

EBANGHELIO!
I. RITO TI PANAGSAGANA
PAKAUNA:
(No naurnongen ti gimong, mairugi ti panaglualo babaen iti maiyannatup a
panglukat a kanta. Kalpasanna, irugin ti mangidaulo )

M: Iti nagan ti Ama, ken ti Anak, ken ti Espiritu Santo.

G: Amen.
Naimbag nga aldawyo amin kakabsat, ita nga aldaw ti makunkuna a
Mierkules Kurkuros wenno Ash Wendnesday. Iti tradisyon ti Simbaantayo
daytoy nga aldaw ti rugi ti uppat a pulo a nga aldaw a panagdalyasattayo iti
tiempo ti Kuaresma. Sapay koma ngarud ta iti iseserektayo iti daytoy a
tiempo ti Kuaresma ket madalusan ken mapabarotayo ti wagas ti
panagbiagtayo. Tapno ngarud maparaburantayo iti grasya a mangaramid
kadagitoy a panggep agmaymaysatay amin a mangidaton iti daytoy rambak
liturgia babaen ti aktibo a pannakipassettayo.
G: Madaydayaw ti Dios iti agnanayon.

(PENITENTIAL RITE IS OMMITED, AND THE DISTRIBUTION OF ASHES

TAKES ITS PLACE- check liturgy for Ash Wednesday in the Missal.)

KARARAG A PANGLUKAT:
Ipaaymo kad, Apo, ta babaen ti nasantoan a panagayunomi, irubuatmi ti
panagserbimi a kas soldadosmo, tapno iti pannakigubatmi kadagiti pagdaksan
ti kararruami masalaknibankami babaen ti panangparparit ken panangtep-
teppelmi iti bagimi. Gapu ken Apomi a Jesucristo nga Anakmo ket Dios, isu
a makipagbiag ken makipagari kenka ken iti Espiritu Santo iti agnanayon nga
awan ti inggana. Amen.

LITURHIA TI SAO TI DIOS

UMUNA A MAIBASA: Joel. 2: 12-18

Daytoy a maibasa naadaw iti libro ni Propheta Joel.
Kuna ti Apo: “Ngem uray ita, agbabawikayo iti amin a pusoyo ket
agsublikayo kaniak; agayunar, agsangit ken agdung-awkayo. Ipakita ti
agsensennaay a pusoyo ti ladingityo; saan nga umdas ti panangray-abyo iti
pagan-anayyo.” Agsublikayo iti Apo a Diosyo. Naasi ken manangparabur;
naanus ket tungpalenna ti karina; sidadaan a mamakawan, a saan ket
mangdusa. Nalabit a balbaliwan ti Apo a Diosyo ti panunotna, ket
paraburannakayto iti adu nga apit. Iti kasta, addanto makan ken arak nga
idatonyo kenkuana.
Puyotanyo ti trumpeta idiay Bantay Sion; ibilinyo ti panagayunar dagiti
tattao; angayenyo ti gimong. Ummongenyo dagiti tattao; isaganayo ida a
tumabuno iti nasagradoan a gimong. Yegyo dagiti babbaket ken lallakay;
ummongenyo dagiti ubbing, uray pay dagiti maladaga. Uray dagiti
kakaskasar, masapul a panawanda ti balayda ket umayda. Dakayo a papadi
nga agserserbi iti Apo, iti nagbaetan ti altar ken ti ruangan ti Templo,
19
masapul nga agsangit ken agkararagkayo; kunayo, “Kaasiam dagiti tattaom,
O Apo Dimo ipalubos a lalaisen ken pagang-angawan dakami dagiti sabali a
nasion iti panagkunada: “Sadino ti yan ti Diosyo?” Kalpasanna, impakita ti
Apo ti panangipategna iti dagana; kinaasianna dagiti tattaona.
Ti Sao ti Apo.

SALMO RESPONSORIO: Salmo 51: 3-4, 5-6, 12-13, 14, 17

KAASIANNAKAM KAD, O APO, TA NAGBASOLKAMI.

1. Bigbigek a nagbiddutak, ket dagiti basbasolko silalagipak. Nagbasolak
kenka, wen, sika laeng ti nagbasolak, nagaramidak iti dakes iti
imatangmo.
2. Adtoy a naipasngayak iti kinadakes, ket iti basol nainawak.
Tarigagayam ti kinapudno ken nadalus a puso; punoem ti panunutko iti
siribmo.
3. Isublim kaniak ti rag-o ti panangisalakanmo, ket ikannak iti tulnog nga
Espiritu. Iti kasta, isurotko dagiti bilinmo kadagiti managbasol tapno
agsublida kenka.
4. O Dios, ispalem ti biagko, ket isalakanak; iti kasta naragsakto a
mangipakaamo iti kinalintegmo.
5. O Dios, ti napakumbaba nga espiritu ti sakrifisiok kenka; dimonto
laksiden ti puso a napakumbaba ken nagbabawi.

MAIKADUA A MAIBASA: 2Corinto 5; 20-6:2

Daytoy a maibasa naadaw ti maikadua a surat ni San Pablo kadagiti taga-
Corinto.
Adtoykami a panakangiwat ni Cristo. Kasla ti Dios a mismo ti
agdawdawat kadakayo. Iti nagan ni Cristo, yunay-unaymi a makikappiakayo
iti Dios! Awan basol ni Cristo. Ngem gapu kadatayo, nairaman kadagiti
basoltayo tapno iti panakipag-maymaysatayo kenkuana, mairanudtayo iti
kinalinteg ti Dios. Ngarud, iti pannakipagtrabahomi iti Dios, ipakpakaasimi
daytoy kadakayo: Naawatyon ti parabur ti Dios ket diyo ipalubos nga awan
kapapaayanna. Ta kuna ti Dios, “Dinengngegka iti dayta a tiempo tapno
paraburanka, Tinulonganka iti dayta nga aldaw tapno isalakanka.”
Dumngegkayo: Adtoyen ti tiempo ti parabur; itan ti aldaw a pannakaisalakan!
Ti Sao ti Apo.

AKLAMASION:
Dayaw ti maipaay kenka, O Cristo, ari ti agnanayon a Gloria.
Parsuaem kaniak, O Dios, ti nadalus a puso.
Isublim Kaniak ti rag-o ti panangisalakanmo.
Dayaw ti maipaay Kenka, O Cristo, ari ti agnanayon a Gloria!

EBANGHELIO: Mateo 6: 1-6, 16-18

Daytoy sumaganad naadaw ti Nasantoan nga Ebanghelio kas insurat ni San

Mateo
Kinuna ni Jesus kadagiti adalanna: “Kitaenyo ta diyo pagpasindayag ti
panagtungpal iti pagrebbenganyo iti relihionyo. Ta no kasta ti aramidenyo,
dinakayto gunggonaan ni Amayo sadi langit. Ngarud, no manglimoska, dimo
iwarwaragawag a kas iti ar-aramiden dagiti aginsisingpet iti uneg dagiti
sinagoga ken dagiti kalsada. Ar-aramidenda daytoy tapno idaydayaw ida
dagiti tattao. Laglagipenyo nga inawatdan ti gunggonada. No manglimoska,

20
mangtedka a saan a maammoan ti uray kaasitgan a gayemmo, no di ket
aramidem a sililimed. Ket ni Amam a makakita iti aramidmo a nalimed,
gunggonaannakanto.
“No agkararagkayo diyo tuladen dagiti aginsisingpet! Igagarada ti agkararag
a sitatakder kadagiti sinagoga ken kadagiti lanlansangan tapno makita ida
dagiti tattao. Laglagipenyo nga inawatdan ti gunggonada. Ngem no
agkararagka, sumrekka iti kuartom, irikepmo ti ridaw, saka agkararag iti
nalimed, gunggonaannakanto.
“No agayunarkayo, diyo ipakita iti naliday a langa a kas kadagiti
aginsisingpet, ta agpamarangda a nakapimpiman tapno maamoan dagiti tattao
nga agayunarda. Laglagipenyo nga inawatda ti gunggonada. No agayunarka,
agdiram-os ket urnosem ti buokmo tapno awan makadlaw nga agay-ayunarka
no di laeng ni Amam a di makita. Ket isu a makaimatang iti aramidmo a
nalimed, gunggonaannakanto.”

Ti Ebanghelio ti Apo.

G: Dayaw ti maipaay Kenka, O Kristo.

PAGPAMPANUNOTAN:
Ti panawen ti KUARESMA ket mangrugi iti aldaw ti Kurkuros wenno
Ash Wednesday ket aggibus wenno agtungpal daytoy iti Misa Rambak iti
pannakaisungsong ti Eukaristia wenno Mass of the Lord’s Supper.
Ti Kuaresma ket panawen iti intay panagbabawi kadagiti nagbiddutan
tayo iti napalabas ken gundaway manen nga mangabaroanan tayo ket
ikarigatantayo nga tallikudan dagiti banbanag nga mangiyadayo kadatayo iti
dalan nga agturong kenni Apo Dios. Panawen iti personal nga intay
panangsagana iti panangpabaro tayo kadagiti sinapataan tayo idi nabuniagan
tayo nga intay tinallikudan gapu iti madi nga aramid wenno iti intay
pannakalipat iti panagarqmid iti nasayaat wenno maiyannatop ti bilin ken
pagayatan ti Dios.
Ti dapo nga maiyuged a sinan kurus iti muging tayo ita nga Mierkoles-
Kurkuros ket ipalagip na kadatayo nga datayo ket tapok ti naggapuan tayo ket
tapok met laeng iti intay pagsublian ket ngarud iti koma unos ti panagbiag ni
Kristiano ket isu koma ti kinamanagparabur ken tti pananglipat ti bukod nga
pagsayaatan para iti pagimbagan ti kaaduan. Ipalagip na nga datayo ket tao
nga adda pagkapsutanna nangruna iti intay panaglisi kadagiti nainlubongan a
sulisog. Ipalagip na nga panawen manen iti intay panagbabawi kadagiti adu
nga nagbiddutan tayo iti napalabas a panagbiag tayo. Daytoy ti mensahe ti
Kuaresma. Ti panagbabawi, panagkararag ken panangtulong iti pada a tao.
Ti panagayunar ket ita nga aldaw ti kurkuros ken inton Biernes Santo. Kas
koma iti panagayunar ita nga aldaw a kayat na a sawen nga one full meal
laeng ta ag fasting tayo a paset iti intay iseserrek iti Kuaresma ken
pannakikuyog tayo iti uppat a pulo nga aldaw a pangdalyasat idi ni Apo Jesus
sadiay let-ang a paset ti panagsakripisyo na sakbay ngarud nga naparigat ken
nailansa iti krus tapno maipatungpal ti nailanad iti Daan a Tulag nga inpadto
met laeng dagiti propeta. Ti ngarud agayunar ket mangrugi iti agtawen
sangapulo ket walo (18 years old) agingga iti lima-pulo ket siam (59). Ket
dagiti met agabstinensia wenno saan a panagsida ti karne iti tunggal Biernes
ket manipud iti edad wenno agtawen to sangapulo ket uppat (14). Agayunar
tayo tapno mawaswas tayo wenno maikkat tayo dagiti balakad wenno dagiti
makalapped iti isusurot tayo kenni Kristo. Panangdalus iti puso, panunot ken
wagas ti panagbiag ti tarigagay ti Dios kadatayo ket daytoy ket ipalagip
manen kadatayo tiu panawen ti Kuaresma. Iti kararag nga intay mangegan iti
panangawat ti dapo ket: “laglagipen nga tapok ti naggapuan ket tapok metla
ti pagsubliam.”(Genesis 3:19) wenno ti: “agbabawi ka ket mamati ka iti

21
Ebanghelyo wenno Naimbag a Damag” iti Ingles ket mangeg tayo ti: repent
and believe in the Gospel. Daytoy ket ipalagip na kadatayo nga datayo ket
aglabas laeng iti daytoy a biag ken iti Ingles adda tay pagsasao nga: “WE only
live once” ken tay “Life is short”; sapay koma ta ipapati tayo iti agbiag nga
nasayaat ken iturong ti puso, panunot ken aramid tayo kadagiti mangiyasideg
kadatayo iti pagarian ti Dios. Sapay koma ta agtalinaed kadatayo ti
kinapakumbaba, kinamanagayat ket kinamanag tulong kadagiti pada tayo nga
tao ta dagitoy ti gutgutoguten daytoy panawen ti kuaresma kadatayo.
Napintas nga pagpampanunotan ti panawen ti Kuaresma ken
panagsagsana ti kararua ken panagbiag tayo. Iti umuna a naibasa nangegan
tayo ngarud iti pannakaawis tayo nga agbabawi kadagiti basbasol tayo tapno
nakasagana tayo nga makipagbiag iti baro a biag nga magun-od ni Apo Jesus
iti inna panagungar. Iti met Ebanghelyo a nangegan tayo ita nga aldaw,
kinuna ni San Mateo nga no agayunar tayo ket saan tayo nga iparammag
wenno ipakaammo iti kaadduan ti intay panagsakripisyo. Aramiden tayo
koma daytoy nga datayo laeng ken ni Apo Dios ti makaammo. No nagayunar
tayo saan tayo nga ipakita kadagiti kaarruba tayo nga agkakapsot tato. No
manglimoska, mangtedka a saan a maammoan ti uray kaasitgan a gayemmo,
no di ket aramidem a sililimed. Ket ni Amam a makakita iti aramidmo a
nalimed, gunggonaannakanto. Sapay koma ta iti daytoy iseserrek tayo iti
panawen ti Kuaresma ket agari koma iti puso tayo ti panagayunar saan laeng
nga iti taraon ti bagi no di ketdi iti sabali pay a banag a kas koma ti
panangliklik iti panagaramid iti saan a nasayaat iti pada a tao ken dadduma
pay. Ipennek tayo koma ketdi iti aglualo ken agited ti limos kadagiti
agkasapulan. Dagitoy kakabsat ti gutugoten ti Kuaresma kadatayo:
Panaglualo-prayer, panagayunar-fasting, ken panagited ti limos-almsgiving.
Sapay koma ta kasta.

PANNAKABENDISION TI DAPU: (Para laeng kadagiti Papadi)

O Dios, ti kayatmo isu ti panagbabawi ti managbasol, a saan ket a ti

ipapatayna, timudem kad a siaasi dagiti ar-ararawmi ket bendisionam dagitoy
a dapu nga ikurusmi kadagiti ulomi; iti kasta, dakami a mangbigbig a
tapokkami ket tapokto met laeng ti pagtungpalanmi, babaen ti pasnekmi a
magannurot kadagiti ipaannong ti Kuaresma, magun-odmi ti
pannakapakawan dagiti basbasolmi, ket mapabaro ti panagbiagmi ket
mayaspingkam ken Cristo a nagungar kadagiti natay. Gapu ken Cristo nga
Apomi. Amen.

PANNAKAIKABIL TI DAPO ITI MUGING:

Agbabawika ket mamatika iti Ebanghelio!

(Maikabil ti dapu kadagiti tattao, kabayatanna makanta dagiti Panagbabawi

a kankanta)

(Saan a maikararag ti Mamatiak, sumaruno a dagus ti kararag a sapasap

kalpasan ti pannakaimaldit ti dapo kadagiti tattao)

KARARAG A SAPASAP:
Iti tarigagaytayo nga agbiag iti sidong ti Apo, dawatentay Kenkuana ti
parabur ti napaypayso a panagpakumbaba para iti isusublitayo kenkuana. Iti
tunggal dawat, kunatayo:
APO, DENGGENNAKAM KADI.

22
1. Idawdawatantayo ti Santa Iglesiatayo. Maikkan koma ti naan-anay a
pigsa ken gaget a mangituloy ti trabahona para met laeng ti panakikaysa
ti entero a sangalubongan iti Dios. Kumararagtayo iti Apo.
2. Idawdawatantayo dagiti mangiturturay ti gobiernotayo ken amin dagiti
mangidadaulo ti nadumaduma a pagilian. Maamirisda koma ti kinapateg
ti trabahoda ket usarenda koma ti turayda iti panakaipatungpal ti
pagayatan ti Dios. Kumararagtayo iti Apo.
3. Idawdawatantayo ti bagitayo, datayo a mamati iti Dios. Iti daytoy
tiempo ti kuaresma, mariknatayo koma ti kinapateg ti panagsublitayo iti
sidong ti Dios babaen ti panagbabawitayo kadagiti basbasoltayo.
Kumararagtayo iti Apo.
4. Idawdawatantayo dagiti agsagsagaba nangruna dagiti biktima ti kaawan
husticia ken dakes nga aramid. Agbalinda koma a pagsarmingan ti
nasayaat a panagbiag nangruna iti galad ti panangpakawan.
Kumararagtayo iti Apo.
5. Idawdawatantayo dagiti amin a mamati ken Jesus. Makapudnotayo
koma kadagiti annongtayo iti Dios a poontayo ket agbiagtayo koma a
sipupudno iti sidong ti Dios a namarsua kadatyo. Kumararagtayo iti
Apo.
Managayat ken manangparabor nga Ama, tulongannakam kadi a
mangibiag kadagiti bilinmo nangruna ita a tiempo ti kuaresma.
Pagtalinaedennakam kadi a napudno kenka agingga iti pannakikaysami
kenka. Dawatenmi dagituy iti nagan ni Cristo nga Apomi. amen.

III. RITO TI NASANTOAN A KOMUNION

(Mairuar ti Santisimo Sakramento ita manipud iti tabernakulo ket maikabil
iti altar ngem saan pay a maikkat ti kalub ti ciburium. Masindian ti dua a
kandela sa maikararag ti sumaganad a kararag.)

KARARAG TI PANAGDAYAW KEN PANAGYAMAN:

Gapu iti di agbalbaliw nga ayatmo, kaasiannak kadi, O Diosko.
Gapu iti kinamanang-ngaasim, punasem kadi dagiti basolko.
Ugasam a mamimpinsan ti kinadakesko ket dalusannak kadagiti basbasolko!
Ket idayawtayo ti kinaimbag ti Apo:
GLORIA ITI DIOS TI KANGATOAN!

Tarigagayam ti kinapudno ken nadalus a puso;

Punnoem ti panunotko ti siribmo.
Ugasannak iti basolko tapno nadalusak;
buggoannak ket napudpudawakto ngem kapas
a mangiwaragawag ti pagdayawko ti kinaimbagmo, O Apo:

GLORIA ITI DIOS TI KANGATOAN!

Parsuaem kaniak, O Dios, ti nadalus a puso,

ket ikkannak iti baro ken napudno nga espiritu;
dinak pagtalawen iti imatangmo; dimo ipanaw kaniak ti Espiritu Santo.
Isublim kaniak ti rag-o ti panangisalakanmo,
ket ikkannak iti natulnog nga espiritu
a mangiwaragawag ti kinaimbagmo, O Apo:

GLORIA ITI DIOS TI KANGATOAN!

23
 Makikaysakami kenni Obispomi N., ni Kura parokomi N., ken ti intero
a Simbaan iti inkam panagyaman ken panagdayaw Kenka Dios nga Amami,
babaen ti Anakmo, ni Apomi a Jesus, Isu a makipagbiag ken makipagari
Kenka ken ti pannakikaysa ti Espiritu Santo, Dios nga awan inggana. Amen

PAKAUNA TI AMAMI
Datayo a nabalakadan kadagiti makaisalakan a pammagbaga, ken
naisuro kadagiti nadiosan a banag, turdantayo ti agkararag iti Ama.
AMAMI . . .

PANANGIPAAY TI KAPPIA
Ragsakentayo nga ipaay ti kappia ti Apo iti maysa ken maysa.
(Saan a maikanta wenno maikararag ti “Kordero” gapu ta awan ti
panakapisi-pisi ti bagi ni Cristo a nakairantaan ti kanta a “Kordero”)

PANANGIYAWIS TI KOMUNION: (no adda)

Adtoy ni Jesus, ti timmao a mannubbot kadatayo. Isu ti kordero ti Dios a
mangikat kadagiti basbasol ti lubong. Nagasat dagiti mamati ket umawat
kenkuana.
APO, DIAK MAIKARI NGA UMAYKA KANYAK . . .

KARARAG KALPASAN TI KOMUNION: ( tumakder amin )

Ipaaymo kad Apo, ta saranayendakami dagiti sacramento nga inawatmi
iti kasta makaay-ayo Kenka ti panagayunomi, ket agserbi nga agas a
mangpaimbag kadakami. Gapu ken Cristo nga Anakmo ken Apomi. Amen.

IV. PANANGIDATON KADAGITI SAGOT KEN PANAGCOLEKTA

(Daytoy iti gundaway nga intay panagkolekta ken panangidaton
kadagiti saguttayo nga agpaay iti simbaan ken kadagiti makasapul iti
tulongtayo. Agkantatayo iti maiyannatop a kanta. cf Supplement to the
Roman Sacramentary)

V. RITO TI PANANGGIBUS
PAMENDISION:
Maysa kadagiti nasayaat a bambanag iti panagbiagtayo ket ti maikkan ti
gundaway nga agbabawi ken agbaliw. Masarakantayo koma ti kinaimbag
daytoy tiempo ti kuaresma babaen ti panangibiagtayo kadagiti awis ni Jesus
kas panagsaganatayo. Ragsakentayo koma nga ibiag ti pamatitayo ket
bendisionannatay ti managayat a Dios: iti Ama, ti Anak, ken ti Espiritu
Santo. Amen.
Nalpasen daytuy sangkagimongan a panaglualotayo. Intayo ket agbiagtayo iti
sidung ti namarsua kadatayo.

Agyamantay iti Dios.

KANTA A PANGGIBUS. . .

24
 UMUNA A DOMINGO TI KUARESMA TI
TAWEN A
Migrants’ Sunday
Pebrero 26, 2023

Tema: IBIAGMO TI SAO TI APO!

I. RITO TI PANANGIRUGI
PAKAUNA:
(No naurnongen ti gimong, mairugi ti panaglualo babaen iti
maiyannatup a panglukat a kanta. Kalpasanna, irugin ti mangidaulo )

M: Iti nagan ti Ama, ken ti Anak, ken ti Espiritu Santo. Amen.

Iti panangrambaktayo ita ti umuna a domingo ti kuaresma,
awisennatayo ti Simbaan a mangiturong iti imatangtayo iti Apo ket intay
ibiag ti awis ti kuaresma a panagkararag, panag-ayunar ken panaglimos
kabayatan ti intay panagsagsagana para iti Easter. Ket iti daytoy a
panagdayawtayo iti Apo intay met ilagip dagiti kakabsattayo a napan iti
sabali a pagilian. Bayat iti panangibiagtayo ti pagayatan ti Dios ditoy ilitayo,
agserbi koma met dagiti adda iti balasiw taaw nga instrumento ti
pannakaiwaragawag ti pagayatan ti Dios nangruna ita a tiempo ti kuaresma.
G: Madaydayaw ti Dios iti agnanayon.

RITO TI PANAGBABAWI:
Tapno maikaritayo a makipagrambak ita nga aldaw ti Apo,
agbabawitayo kadagiti nagbasolantayo ket dumawattayo ti kaasi ken tulong ti
Apo.
Agconfesarak iti Dios...

Kaassiannatayo koma ti managayat a Dios, pakawanenna dagiti

basoltayo ket iturongnatayo iti biag nga agnanayon. Amen.

Apo, kaasiannakami (maikanta)

KARARAG A PANGLUKAT:
Mannakabalin a Dios, madaman nga annurotenmi dagiti ipaannong ti
Santa a Cuaresma. Ipaaymo kadi ta umad-adda ti pannaka-awatmi iti
misterio maipanggep ken Cristo, ket agbiagkami kas mayataday iti daytoy a
misterio. Gapu ken Apomi a Jesucristo nga Anakmo ket Dios, isu a
makipagbiag ken makipagari kenka ken iti Espiritu Santo iti agnanayon nga
awan ti inggana. Amen.

I. LITURHIYA TI SAO TI DIOS

UMUNA A MAIBASA: Genesis 2:7-9, 3:1-7
Daytoy maibasa naadaw iti libro ti Genesis.
Nangala ti Apo a Dios iti daga ket nangbukel iti maysa a tao. Insang-
awna ti anges a makaited biag iti agong ti binukelna a tao ket naaddaan iti
biag. Nangaramid ti Apo a Dios iti maysa a hardin idiay Eden, iti Daya.
Sadiay ti nangikabilanna iti tao a binukelna. Pinagtubona ti amin a kita ti
agkakapintas a kayo ken agbunga iti nasayaat. Iti tengnga ti hardin, adda
kayo a mangted iti biag ken ti kayo a mangted iti pannakaammo iti naimbag
ken iti dakes.

25
 Ti uleg ti kasikapan nga animal nga inaramid ti Apo a Dios. “Agpayso
kadi nga imbaga ti Dios a dikay mangan iti bunga ti uray ania a kayo iti
hardin?” sinaludsod ti uleg iti babai. “Mabalinmi kano ti mangan iti bunga ti
uray ania a kayo iti hardin,” insungbat ti babai, “malaksid ti kayo nga adda iti
tengnga. Imbaga ti Dios a dikam kano mangan iti bunga dayta a kayo, wenno
uray sagiden la koma; ta no aramidenmi ti kasta, mataykami.” “Saankayo a
matay! Kasta ti kuna ti Dios agsipud ta ammona a no mangankayo iti bunga
ti kayo, maaddaankayo iti pannakaammo iti naimbag ken iti dakes ken
pannakaawat kas kadagiti didiosen.” Nakita ti babai a napintas ti kayo ken
nasayaat a kanen ti bungana. “Nagpintas ket ngatan ti agbalin a masirib!”
Kinunana iti nakemna. Nangala ngarud iti sumagmamano a bunga ti kayo
ket kinnanna. Kalpasanna, inikkanna ti asawana ket nangan met. Apaman a
nakapanganda, naaddaanda iti pannakaawat ket nabigbigda a lamolamoda. Iti
kasta, namagsasaipda kadagiti bulong ti kayo nga igos a pinangabbongda iti
bagida.
Ti Sao ti Apo.
G: Dayaw ti maipaay Kenka, O Kristo.

SALMO RESPONSORIO: Salmo 51: 3-4, 5-6, 12-13, 14, 17

KAASIANNAKAM KAD, O APO, TA NAGBASOLKAMI.

1. Bigbigek a nagbiddutak, ket dagiti basbasolko silalagipak. Nagbasolak
kenka, wen, sika laeng ti nagbasolak, nagaramidak iti dakes iti
imatangmo.
2. Adtoy a naipasngayak iti kinadakes, ket iti basol nainawak.
Tarigagayam ti kinapudno ken nadalus a puso; punoem ti panunutko iti
siribmo.
3. Isublim kaniak ti rag-o ti panangisalakanmo, ket ikannak iti tulnog nga
Espiritu. Iti kasta, isurotko dagiti bilinmo kadagiti managbasol tapno
agsublida kenka.
4. O Dios, ispalem ti biagko, ket isalakanak; iti kasta naragsakto a
mangipakaamo iti kinalintegmo.
5. O Dios, ti napakumbaba nga espiritu ti sakrifisiok kenka; dimonto
laksiden ti puso a napakumbaba ken nagbabawi.

MAIKADUA A MAIBASA: Roma 5: 12, 17-19

Daytoy maibasa naadaw iti surat ni San Pablo kadagiti taga-Roma.
Immay ti basol ditoy lubong gapu iti maysa a tao, ken inkuyog ti
basolna ti ipapatay. Iti kasta, nagsaknap ti ipapatay ti amin a tao ditoy
lubong, agsipud ta nagbasol amin a tao. Agpayso a gapu iti basol ti maysa a
tao, nagturay ni patay gapu iti dayta a tao. Ngem dakdakkel nga adayo ti
inaramid ti maysa a tao nga isu ni Jesu-Cristo! Dagiti amin nga umawat iti
nawadwad a parabur ti Dios ken ti di mabayadan a sagut ti kinalintegna,
agturaydanto iti biag babaen ken Cristo. Ngarud, kas iti pannakadusa ti amin
a tao gapu iti basol ti maysa a tao, kasta met ti pannakawayawaya ken
pannaka-ited ti biag ti amin a tao gapu iti maysa a nalinteg nga aramid. Ket
no kasano ti kaadu ti nagbasol gapu iti panagsukir ti maysa a tao, kastanto
met ti kaadu dagiti mapalinteg iti sangoanan ti Dios gapu ti panagtulnog ti
maysa a tao.
Ti Sao ti Apo.

G: Dayaw ti maipaay Kenka, O Kristo.

26
AKLAMASION
Madaydayawka, O Cristo, Ari ti agnanayon a Gloria!
Saan laeng a tinapay ti pagbiag ti tao
No di pay ket ti tunggal sao nga isawang ti Dios.
Madaydayawka, O Cristo, Ari ti agnanayon a Gloria!

EBANGHELIO: Mateo 4: 1-11

Daytoy sumaganad naadaw iti nasantoan nga Ebanghelio kas insurat ni San
Mateo
Inturong ti Espiritu ni Jesus idiay let-ang tapno sulisogen ti Diablo.
Kalpasan ti uppat a pulo nga aldaw ken rabii a di nang-nangan ni Jesus,
nabisinan. Immasideg kenkuana ti Diablo ket kinunana, “No sika ti Anak ti
Dios, bilinem nga agbalin a tinapay dagitoy a bato.” Insungbat ni Jesus,
“Kuna ti Nasantoan a Surat, ‘saan laeng a tinapay ti pagbiag ti tao no di pay
ket ti tunggal sao nga isawang ti Dios.’”
Inturong ti Diablo ni Jesus iti Nasantoan a Siudad ket impanna iti
kangatoan a paset ti Templo, sana kinuna, “No sika ti Anak ti Dios,
tumappuakka man, agsipud ta kuna ti Nasantoan a Surat, ‘bilinento ti Dios
dagiti anghelesna a mangaywan kenka: Tapayaendakanto, tapno uray dagiti
sakam saan a madunor iti bato.’” Ngem insungbat ni Jesus, “Kuna met ti
Nasantoan a Surat, ‘dimo sulisogen ti Apo a Diosmo.’”
Impan ti Diablo ni Jesus iti nakangatngato a bantay ket impakitana
kenkuana dagiti amin a pagarian ditoy lubong, agraman dayagda. “Itedkonto
kenka amin dagitoy,” kinuna ti Diablo, “no agparintumeng ken agrukbabka
kaniak.” “Pumanawka, Satanas!” insungbat ni Jesus. “Kuna ti Nasantoan a
Surat, ‘Agdaydayawka iti Apo a Diosmo ket isu laeng ti pagserbiam.’”
Iti kasta, pimmanaw ti Diablo. Dimteng dagiti angheles ket nagserbida
ken Jesus.

Ti Ebanghelio ti Apo.

G: Dayaw ti maipaay Kenka, O Kristo.

PAGPAMPANUNOTAN:
KAASIANNAKAMI, O APO TA NAKABASOLKAMI.
Iti daytoy umuna nga Domingo ti Kuaresma, ipalagip na kadatayo iti intay
panagbabawi kadagiti basbasol tayo ket umawag ti kaasi ti Apo ta ammo tayo
nga saan tayo a kabaelan daytoy a panagbalbaliw iti kabukbukodan tayo a
pigsa ta datayo ket tao tayo a narukop ken nalaka la unay nga maalukoy
wenno maitebbang iti basol. Panawen daytoy iti pannakapabaro iti pigsa ken
kired tayo nga dalusan ti naespitiruan a panagbiag tayo. Mapalagipan tayo
nga awagan wenno imbitaran tayo manen ni Apo Jesus iti namagaan ken
nagbalin a let-ang iti panagbiag tayo gapu kadagiti saan a nasayaat wenno
basol nga inaramid tayo iti napalabas. Isu nga kuna ti Salmo:
KAASIANNAKAMI, O APO TA NAKABASOLKAMI. Isu nga saan koma nga
agsarday iti intay panangituloy iti panagpakumbaba tayo ket awagan tayo ti
Apo nga mangkibin kadatayo iti intay panagdaliasat iti panawen ti kuaresma.
Ket iti daytoy ngarud unos iti uppa a pulo nga aldaw (40 days), ket isu
iti intay panagdaliasat iti kaunggan tayo. Dawaten tayo ti pannarabay ti
Espiritu Santo iti intay manen panangbirok iti husto nga kinatao tayo. Am-
ammo natayo ni Apo Dios. Ket ay-ayaten natayo iti baet ti nagkurkurangan
ken pagkapsutan tayo. Ammona dagiti pakariribukan tayo, no ania dagiti
banbanag nga pagbutngan tayo ket ammo na met dagiti as-aspiraran tayo iti

27
biag. Daytoy ngarud a panawen ti Kuaresma ti panawen, nga agsubli tayo
Kenkuana ket naimpusuan koma iti intay panangabaroanan wenno iti intay
panagbalbaliw ket luktan tayo ti biag tayo ket palubusan tayo ni Apo Dios
nga mangsarut ken mangdalus iti puso, kinatao ken panagbiag tayota dagitoy
a kanito iti kinakapsut ken kinarasi tayo nga adda ni Apo Dios nga mangaw-
awis kadatayo nga agbabawi ken tallikudan koma dagiti dakes nga aramid
tayo. Kadagiti panawen nga adda ti panagduadua, ti panawen nga intay
marikna ti adu nga parikot wenno ti Ingles ket: It is in the deserts of our lives
where we are tempted by Satan. Ta mismo nga ni Apo tayo nga Jesus ket
sinulisog ni Satanans sadiay let-ang a kas iti nangegan tayo iti Ebanghelyo.
Ngem gapu iti panglulualo ni Apo Jesus ket ti Espiritu ti Dios ket adda latta
Kenkuana ket napagkitakitan na ngarud dagiti pannulisog nga indatag ti
Satanas Kenkuana. Ditoy tayo nga makita nga naibtor ti tao iti ania man a
karit iti biag no la ketdi no managkararag tayo ken no adda latta ni Apo Dios
iti sibay tayo, isu nga saan tayo koma nga maum-uma nga awagan ni Apo
Dios nangruna kadagiti panawen nga marikna tayo ti kinakapuy wenno
kinakapsot ti puso ken nakem tayo.
Malaksid no saan tayo a sumrek iti pannubok wenno kadagiti disierto
iti panagbiagtayo, saan tayo nga ma komprontar wenno masaranget dagiti
solisog iti biagtayo. Iti daytoy ngarud panawen ti Kuaresma, nga isu ti naikari
nga panawen, makarit tayo manen ken mapalagipan tayo manen nga
agbabawi ken agbalbaliw ket dalusan ti puso tayo tapno ti kasta ket
mabantayan tayo dagiti karit ken pannulisog iti panagbiag tayo ket maliklikan
tayo dagitoy babaen nga iti panagkararag, panagawag iti pannakipagdaliasat
wenno panangkibin ni Apo Duos kadatayo a mangsaranget kadagitoy karit iti
naindagaan a panagbiag. Ania kadi dagiti pannubok nga iti panagkunayo
wenno iti kaririknayo nga nalaka yo laeng nga sarangten? Ania kadi met
dagiti pagkapsutan tsyo a narigat tayo nga malisian?
Ni Apo Jesus nagtalinaed iti let-ang iti uppat a pulo nga aldaw ken
rabii, sinulisog ni Satanas. Ngem iti uneg ti uppat nga pulo nga aldaw,
nagayunar ken nagkarkararag ni Apo Jesus ket nabaelan na nga sinaaranget
wenno liniklikan ni Satanas ken ti pannulisogna. Ditoy kakabsat, inpakita ni
Apo Jesus nga daytoy uppat a pulo nga aldaw ti kuaresma ket panawen para
kadatayo nga agayunar, agbabawi kadagiti basbasol tayo ken panangited ti
limos. Kuaresma ket panawen iti PANAGARAMID iti banag nga
makapasayaat ken makapabaro ti panagbiag tayo ken iti aglawlaw tayo. Ti
panagayunar ket saan laeng nga iti taraon wenno makan no di ketdi
panagayunar manipud iti apal, gurang-gura ken dadduma pay nga saan a
nasayaat nga ugali iti biag tayo nga manglapped iti intay panangayat ken
panangtulong iti kaarruba tayo. Nalaklaka iti panagayunar iti makan ngem iti
kababalin wenno ugali nga saan a nasayaat nga isu ti mangiduron kadatayo
nga agaramid iti saan a nasayaat iti pada a tao. Ti PANAGBABAWI ket isu ti
iyaannugot tayo nga agbalbaliw ken sipapalubos nga ti Espiritu ti Dios nga
adda iti kaunggan tayo ti mamagbaliw kadatayo. Daytoy ket saan laeng nga
iti panaglualo wenno panagkararag no di ketdi iti panangibiag kadagiti
kaipapanan dagiti karkararag tayo. Ti met PANAGLIMOS ket isu ti
kinaridam tayo kadagiti pagkasapulan ti pada tayo a tao nga gumawgawawa
iti ayat ken tulong iti panawen iti panagkasapulanda. Ken intay ngarud
awagan ti Apo ket kas ti kuna ti Salmo nga isu met ti kuna tayo:
KAASIANNAKAMI, O APO TA NAKABASOLKAMI.

PANANGIPADUYAKYAK TI PAMMATI (Nicene Creed)

MAMATIAK ITI DIOS A MANNAKABALIN AMIN…

28
KARARAG A SAPASAP:
Kakabsat, iti panangibiagtayo ti pammatitayo ita a tiempo ti kuaresma,
dawatentay iti Nailangitan nga Amatayo dagiti kasapulantayo a
mangsaranget kadagiti karit ti biag nangruna tapno maisaganatayo ti
bagbagitayo. Tunggal panggep, kunatayo:

PATGAM KAD APO TI KARARAG DAGITI TATTAOM.

1. Idawdawatantayo ni Santo Papa, dagiti Obispo, papadi, misionero,
relihioso ken amin a mangiwarwaragawag iti mensahe ti Dios.
Mataginayon koma ti kinatarnaw ti puso ken biagda ket agserbida kas
pagsarmingan ti kinaimbag ditoy lubong. Kumararagtayo iti Apo.
2. Idawdawatantayo dagiti pangulo dagiti nasion. Masarakanda koma ti
ragsak iti panagserbida kadagiti tattao ket idauloanda dagiti
masakupanda iti kappia, justisya ken ayat. Kumararagtayo iti Apo.
3. Idawdawatantayo dagiti kakabsattayo nga agnanaed iti sabali a lugar.
Maiyadayoda koma iti amin a kita ti kinadakes, basol ken pannaka-
itugtuggod ket agbalinda a silaw iti aglawlawda iti laksid ti
kinaganggannaetda. Kumararagtayo iti Apo.
4. Idawdawatantayo ti tunggal maysa kadatayo nangruna kadatayo a
mamati ken Jesus. Sangsangkamaysatayo koma a mangpaksiat ti
aniaman a kita ti basol a mabalin a mamagsisina ti tunggal maysa
kadatayo ken mangyadayo kadatayo iti Dios. Kumararagtayo iti Apo.
5. Ikarkararagantayo dagiti kakabsattayo a natayen. Alaen koma idan ti
managayat a Dios ket makikaysada koma iti pagarianna.
Kumararagtayo iti Apo.
Nailangitan nga Ama, insurom kadakami no kasano a sangwenmi dagiti
solisog iti biag babaen ken Cristo. Tulongannakam kadi nga agtalinaed iti
sidungmo nangruna ita a tiempo ti kuaresma. Dawatenmi dagitoy gapu met
laeng ken Cristo nga Anakmo ken Apomi. Amen.

III. RITO TI NASANTOAN A KOMUNION

(Mairuar ti Santisimo Sakramento ita manipud iti tabernakulo ket maikabil iti
altar ngem saan pay a maikkat ti kalub ti ciburium. Masindian ti dua a kandela sa
maikararag ti sumaganad a kararag.)

KARARAG A PANAGYAMAN KEN PANAGDAYAW:

Sikakaysatayo nga agdayaw ken agyaman iti Amatayo ket kunatayo:
Agyamankayo iti Apo agsipud ta isu ket naimbag, agnanayon ti napudno
nga ayatna.
Kuna ngarud dagiti Israelita, “Agnanayon ti di agbalbaliw nga ayatna.”Kuna
ngarud dagiti papadi ti Dios, “Agnanayon ti di agbalbaliw nga ayatna.” Kuna
ngarud dagiti amin nga agbuteng iti Apo, “Agnanayon ti di agbalbaliw nga
ayatna.”
Agyamankayo iti Apo agsipud ta isu ket naimbag, agnanayon ti napudno
nga ayatna.
Luktanyo ti ruangan ti kinalinteg, ta sumrekak nga agyaman iti Apo! Daytoy
ti ruangan ti apo; dagiti laeng nalinteg ti makastrek. Agyamanak kenka, O
Apo, ta impangagnak, ken sika ti nangisalakan kaniak,
Agyamankayo iti Apo agsipud ta isu ket naimbag, agnanayon ti napudno
nga ayatna.
Ti bato nga imbelleng dagiti agipatpatakder, nagbalin a kangrunaan a pasuli.
Aramid daytoy ti apo, anian a nakaskasdaaw iti imatangtayo! Daytoy ti
aldaw nga inaramid ti Apo. Agragsak ken agrambaktayo.
Agyamankayo iti Apo agsipud ta isu ket naimbag, agnanayon ti napudno

29
nga ayatna.
O Apo, isalakannakami; dawatenmi kenka a pagballigiennakami. Nagasat ti
umay iti nagan ti Apo! Bendisionandakayo manipud iti balayna. Ti Apo isut
Dios, ket inikkannatay iti silaw.
Agyamankayo iti Apo agsipud ta isu ket naimbag, agnanayon ti napudno
nga ayatna.
Agiggemkayo kadagiti sangsanga, ket aglibutkayo a mapan iti altar. Sika ti
Diosko ket “agyamanak kenka; ipaduyakyakko ti kinatan-okmo Agyamnak
iti Apo, Agsipud ta isu ket naimbag; Agnanayon ti napudno nga ayatna.
Agyamankayo iti Apo agsipud ta isu ket naimbag, agnanayon ti napudno
nga ayatna.
Makikaysakami kenni Obispomi N., ni Kura parokomi N., ken ti entero
a Simbaan iti inkam panagyaman ken panagdayaw Kenka Dios nga Amami,
babaen ti Anakmo, ni Apomi a Jesus, Isu a nakipagbiag ken nakipagari
Kenka ken ti pannakikaysa ti Espiritu Santo, Dios nga awan inggana. Amen
PAKAUNA TI AMAMI:
Sikakaysa ken Cristo, kumararagtayo a sitatalek iti nailangitan nga
Amatayo babaen iti kararag nga insuro ni Apotayo a Jesucristo.
AMAMI …

PANANGIPAAY TI KAPPIA:
Ragsakentayo nga ipaay ti kappia iti maysa ken maysa kadatayo.
(Saan a maikanta wenno maikararag ti “Kordero” gapu ta awan ti panakapisi-pisi
ti bagi ni Cristo a nakairantaan ti kanta a “Kordero”)

PANANGYAWIS ITI KOMUNION:

Adtoy ni Jesus nga Apotayo. Isu to kordero ti Dios a mangikat kadagiti
basbasol ti lubong. Nagasat dagiti mamati ket umawat kenkuana.
Apo diak maikari …

KALPASAN TI KOMUNION:
Agyamankam Kenka, Apo, iti panang-pakanmo kadakami iti
nailangitan a tinapay, isu a mangpalagda iti pammati, mangpadegdeg iti
inanama, ken mangpapigsa iti nadiosan nga ayat. Ipaaymo kadi ta
mapasgedkami iti panagtarigagay nga umawat ken Cristo a makabiag ket
napaypayso a tinapay, iti kasta mabalinmi ti agbiag nga agpaay Kenka,
babaen ti amin a sao nga agaon iti ngiwatmo. Gapu ken Cristo nga Anakmo
ket Apomi. Amen.

IV. PANANGIDATON KADAGITI SAGUT KEN PANAGCOLEKTA

(Daytoy iti gundaway nga intay panagkolekta ken panangidaton kadagiti
saguttayo nga agpaay iti simbaan ken kadagiti makasapul iti tulongtayo.
Agkantatayo iti maiyannatup a kanta. cf Supplement to the Roman Sacramentary)

V. RITO TI PANANGIGIBUS
PAMENDISION:
Impakaammo ti Dios no kasanotayo a sangoen dagiti solisog iti
biagtayo babaen ken Jesus. Agtalinaedtayo koma met a napudno iti Dios ket
paiturongtayo koma kenkuana a kankanayon ket ti pamendision ti managayat
a Dios, bumaba ket agbati koma kadatayo a padapada: iti Ama, ti Anak ken
ti Espiritu Santo.
Nalpasen daytoy a sangkagimongan a panagrambaktayo. Intayo iti kappia
nga agayat ken agserbi iti Apo ken iti padatay a tao.
Agyamantay iti Dios.
KANTA A PANGIBUS . . .
30
 NICENE CREED

Mamatiak iti maymaysa a Dios,

Ama a mannakabalin amin,
a namarsua iti langit ken daga,
ken kadagiti amin a makita ken di makita.

Ken iti maymaysa nga Apo, a ni Jesucristo,

bugbugtong nga Anak ti Dios,
nagtaod iti Ama iti sakbay ti amin a tiempo.

Dios a nagtaod iti Dios,

Silaw a nagtaod iti Silaw,
napaypayso a Dios a nagtaod iti napaypayso a Dios.
Nayannak, saan a naparsua
Dios a kas met laeng iti Ama,
ket gapu Kenkuana naaramid dagiti amin nga adda.
Gapu kadatayo a tattao,
ken gapu iti pannakai-salakantayo,
immulog a naggaput sadi langit.

All bow at the following words to Ket nagbalin a tao.

Ket nangala iti bagina

iti tian ni Virjen Maria
iti pannakabalin ti Espiritu Santo
ket nagbalin a tao.

Kasta met a nailansa iti crus gapu kadatayo,

idi panagtoray ni Poncio Pilato,
nagtutuok ket naitanem.
Nagungar iti maikatlo nga aldaw
kas palawagen dagiti Nasantoan a Surat.
Immuli sadi langit
ket sitotogaw iti makannawan ti Ama.
Umayto manen a sidadayag,
tapno okumenna dagiti sibibiag ken dagiti natay.
Ket ti pagarianna dinto agpatingga.

Mamatiak met iti Espiritu Santo

nga Apo ken mangmangted iti biag;
Isu agtaod iti Ama ken iti Anak,
ket pagrukbaban ken daydayawen
a maitimpuyog iti Ama ken iti Anak,
ket nagsao babaen dagiti profetas.
Mamatiak met iti Iglesia a Maymaysa, Santa,
Catolica ken Apostolica.
Ipaduyakyakko ti maymaysa a bunyag
a pakapakawanan dagiti basbasol,
namnamaek ti panagungar dagiti natay,
ken ti panagbiag iti lubong a masakbayan. Amen.

31
 KARARAG MAIPANGGEP KADAGITI DATON
(Para kadagiti papadi no adda Misa)

MAIKALIMA A DOMINGO TI KADAWYAN A TIEMPO

PEBRERO 5, 2023
O Dios nga apomi, pinarsuam dagituy tinapay ken arak, tapno saranayenda ti
narasi a biagmi dituy daga. Ipaaymo kadi, ta pagbalinem pay ida a saranay ti
panakai-salakanmi. Gapu ken Cristo nga anakmo ken Apomi. Amen.

MAIKANEM A DOMINGO TI KADAWYAN A TIEMPO

PEBRERO 12, 2023
Ipaaymo kad apo ta dalusan ken pabaruennakami daytuy a sacrificio ket
agpaay koma a pakagungonaan dagiti agtungpal iti pagayatam. Gapu ken
Crito nga Anakmo ken Apomi. Amen.

MAIKAPITO A DOMINGO TI KADAWYAN A TIEMPO

PEBRERO 19, 2023
Apo, iti panangrambakmi a sipapasnek kadagituy a misterio, dawatenmi ta
dagituy daton a pagday-dayawmi Kenka, gun-odenda koma ti pannakaisala-
kanmi. Gapu ken Crito nga Anakmo ken Apomi. Amen.

MIERKOLES TI KURKURUS
PEBRERO 22, 2023
Apo, iti panagrugimi iti Cuaresma, idatonmi a sidadaeg daytoy a sacrificio.
Ipaaymo kadi ta gapu iti panagtungpalmi kadagiti ipaannong ti panagpeniten-
cia ken ti ayat, mateppelanmi dagiti makapadakes a paggustoanmi; ket iti
pannaka-dalusmi iti basol, mapudnoanmi nga ilagip ti panagtutuok ti Anak-
mo. Gapu ken Cristo nga Anakmo ken Apomi. Amen.

UMUNA A DOMINGO TI KUARESMA

PEBRERO 26, 2023
Dawatenmi, Apo, ta aramidem kadi a mapudnoanmi ti mangiruknoy kadagi-
tuy a daton, isuda a pagrubbuatanmi a mangrambak iti daytuy a napateg a
sacramento. Gapu ken Cristo nga Anakmo ken Apomi. Amen.

32