AMULJE'AGHI GHURUH

Santreh se lebur abekteh ka ghurunah

Se ngasteteh ajegeh tengka ghulinah
Ka' dintoh tandeh santreh bhekal ontongah
Salamet e-dhunynyah barokah elmunah

Manabi e-kon pakon sareng ghurunah

Li dhulih karnah deri sakeng ghetenah
Mon parapa'en bedeh e-ajun ennah
Nundu' tak bengal ma onga' ka muwanah

Tak olle hukummah manggil de' ghurunah

Kalaben langsung nyebbut asma aslinah
Tapeh koduh e-ghelluin sabellummah
Kalaben gellar pangkat ka mulje ennah

Bekto acabis nundu' siyyom astanah

Kalaben bibir elong benni deinnah
Li' bheli' tello kaleh lebbi utama
Kalaben ngarep ridho ben barokanah

Bile ngaghungi ghuruh se gempang dhukah

Abe' pa sapber ikhlas ben panaremah
Payakin je' abe' keng e-pateppa-ah
Karanah abe' kaleroh e-becce-ah

Se lakar koduh lebbi e-ka tako-eh

Bile ghuruh tak pateh dhukah ka santreh
Dhukah seddhinah sobung se ngataoweh
Manabi tak ngasteteh lebbi nolaeh
Musibah manabi semma' de' ghurunah
Pas tak bisa ajhegeh tengka lakonah
Tor kadheng bedeh se sampe' ce' saranah
Ghurunah e-pade agih ben kancanah

Masemma' e-yatoreh sobung larangan

Kor senga' angguy tatakramah pa sopan
Ngasteteh ajhegeh de' ka parasaan
Bhide aghih ka ghuruh ben sa kanca an

Lamun tor mator pa bheghus angguy ennah

Je' le toleyan bileh e-yajun ennah
Ebektoh tor mator ngala' saparlonah
Ajje' ma ta' sae ka panggheli ennah

Bileh parappa en bedeh e-dhelemmah

Tak kenging langsung nukhok de' ka labengngah
Antos e-lowar sambih nundu' muwanah
Sampe' mijhil ben mareksanih parlonah

Mulje aghih potranah ben le bhelenah

Rasopan natetenah ben di' andi' nah
Mun e-pakon asapowan e-dhelemmah
Pa bhunga niat abherse-eh atenah

Manabi e-sittong bhektoh e-dhikanih

Jhe' nginthengaghi pa kabhuruh cabisih
Kalakoh sadhejeh se e-kasokanih
Salaen ma'siat de' Alloh toro'en