Han-ay sa Pag-ampo alang sa mga Nangamatay

Pagsugod.

Nagdumala: Ang kahayag ni Cristo mudan-ag unta ngadto sa atong mga minahal
nga mga
nangamatay.
(Mahimo nga sugdan ang kasaulogan sa usa ka awit: "Pahulay nga
dayon..." o susamang awit. O mahimong pangadyeon kining mga
mosunod nga mga bersikulo gikan sa Biblia:)
Nagdumala:
Pahiran niya * ang ilang luha * ug wala nay kamatayon * ni kasubo,*
paghilak o kasakit,* kay nahanaw na man * ang daang mga butang
(Gipadayag 21:4).
Ilisan ni Cristo * ang atong mga lawas * nga may kamatayon * sama
sa iyaha * pinaagi sa gahom * nga gigamit niya * sa pagmando sa
tanan (Filipos 3:21).
Nagdumala: Sa ngalan sa Amahan ug sa Anak ug sa Espiritu Santo. Amen.
Nagdumala: Ang Amahan sa kaluoy, ang Dios sa tanang kahupayan, maanaa unta
kanatong tanan.
Tanan: Amen

Nagdumala: Mag-ampo kita.

Makagagahom ug walay kinutoban nga Dios, tinubdan sa kaluoy ug

pasaylo, mipadala ikaw sa imong Anak nganhi sa kalibutan, dili aron
sa pagsilot kon dili aron sa pagluwas niini.

Pamatia ang among mga pag-ampo alang sa imong mga alagad, ang
among katigulangan, kaubanan, kahigalaan, ug ang mga nanaghimo
kanamo ug kaayohan, ilabi na sila si ...... (basahon ang lista) nga
karon nagpahulay na sa ilang lubnganan. Ipadangat kanila ang
kahingpitan sa kinabuhi nga imong gisaad ngadto sa mga magtuo
kanimo.

Kini among gipangayo pinaagi ni Cristo, among Ginoo.

Tanan: Amen.
 (Ug manglingkod ang tanan.)

Mga Pagbasa

Magbabasa 1:

Basahon ni Sirac (3:2-9,12-14).

(Tahora ang inyong katigulangan)

Pagbasa kinutlo gikan sa Basahon ni Sirac:

Ang Ginoo naghatag sa mga amahan ug gahom ibabaw sa ilang mga anak ug
gihatagan ang mga anak sa katungdanan sa pagtahod sa ilang mga inahan. Kon
tahuron ninyo ang inyong amahan, makabayad kamo sa inyong mga sala, ug kon
inyong pasidunggan ang inyong inahan, nagtigom kamo ug dakong bahandi. Kon
tahuron ninyo ang inyong amahan, usa ka adlaw niana ang inyong kaugalingong
mga anak maglipay kaninyo; ang Ginoo magpatalinghog sa inyong mga pag-ampo.
Kon tahuron ninyo ang Ginoo pinaagi sa pagpasidungog sa inyong amahan ug sa
paglipay sa inyong inahan, magpuyo kamo ug taas nga kinabuhi.

Tahora ang inyong mga ginikanan ingon nga kamo ilang ulipon. Pasidunggi ang
inyong amahan diha sa tanan ninyong buhaton ug isulti, aron madawat ninyo ang
iyang panalangin. Sa paghatag sa mga ginikanan sa ilang panalangin, naghatag sila
sa kusog sa panimalay sa ilang mga anak.

Anak, atimana ang imong amahan inigkatigulang na niya; ayaw siya hatagig
kaguol samtang buhi pa siya. Kaloy-i siya bisan kon ango-angohon na siya; ayaw
siya tamaya tungod lang kay ikaw malig-on ug maayo pag lawas. Ang Ginoo dili
malimot sa mga kaayo nga imong ipakita ngadto sa imong amahan; magtabang
kini kanimo aron hibayran ang imong mga kasal-anan.

Pulong sa Ginoo.
Tanan: Amen.

Salmo Responsorio (Sirac 44:1 ug 10-15)

Dayegon ta karon ang mga tawo nga Diosnon* nga gipasidunggan sa Ginoo.

Dayegon ta kining diosnon nga mga tawo,* kansang matarong nga mga binuhatan
wala gayod hikalimti.* Ang ilang kabantog magpadayon ngadto sa ilang mga
kaliwat,* ug mao kini ang ilang sulundon. Tubag:

Dayegon ta karon ang mga tawo nga Diosnon* nga gipasidunggan sa Ginoo.

Ang ilang mga kaliwat magpadayon sa pag-amping sa kasabotan, ug sa kanunay

maghimo niini,* tungod sa gihimo sa ilang mga katigulangan.* Ang laray sa ilang
banay magpadayon hangtod sa hangtod,* ug ang ilang kabantog dili gayod mapala.

Dayegon ta karon ang mga tawo nga Diosnon* nga gipasidunggan sa Ginoo.

Ang ilang mga lawas gibutang sa lubnganan,* apan ang ilang kabantog
magpadayon hangtod sa kahangtoran.* Ang mga nasod mag-asoy mahitungod sa
kaalam niining mga tawhana* ug ang katawhan sa Dios magdayeg kanila.*

Dayegon ta karon ang mga tawo nga Diosnon* nga gipasidunggan sa Ginoo.

Magbabasa 3:

Pagbasa kinutlo gikan sa Sulat ni San Pablo ngadto sa taga Colosas (3,12-21):

Kamo ang katawhan sa Dios; gihigugma kamo niya ug gipili aron maiyaha. Busa
kinahanglan nga magmaluluy-on kamo, magmahigugmaon, magmapaubsanon,
magmaaghop ug magmapailubon. Pagtinabangay ug pagpinasayloay kamo kon
duna kamoy mulo batok kang bisan kinsa kaninyo. Pagpinasayloay kamo ingon
nga gipasaylo kamo sa Ginoo. Ug idugang niining tanan ang paghigugma nga
maoy magbugkos sa tanan ngadto sa hingpit nga panaghiua.
Paharia sa inyong mga kasingkasing ang kalinaw nga gikan ni Cristo, kay alang
niining kalinawa gitawag kamo sa Dios aron mahiusa usab kamo diha sa usa ka
lawas, ug magmapasalamaton kamo. Papuy-a sa inyong kasingkasing ang mensahe
ni Cristo, uban sa tanang kabahandianon niini.

Pagtinudloay ug pagpahimangnoay kamo uban sa tanang kaalam. Pag-awit kamog

mga salmo ug balaang mga alawiton; awiti ninyo ang Dios uban sa pasalamat diha
sa inyong mga kasingkasing. Busa bisag unsa ang inyong buhaton o isulti, himoa
sa ngalan sa Ginoong Jesus, uban sa pagpasalamat sa Dios nga Amahan pinaagi
kaniya.

Mga asawa, sunda ug tahora ang inyong bana kay mao kini ang angay ninyong
buhaton ingon nga mga Cristohanon.

Mga bana, higugmaa ang inyong asawa ug ayaw silag daugdaoga.

Mga anak, pagmasinugtanon kamo kanunay sa inyong mga ginikanan kay mao kini
ang makapahimuot sa Dios.

Mga ginikanan, ayaw palagota ang inyong mga anak kay tingali unyag mawad-an
silag kadasig.

Pulong sa Ginoo.

Tanan: Salamat sa Dios.

Nagdumala inubanan sa tanan (Mahimo usab nga kantahon.): Alleluya, Alleluya.

Ang mga Pumong mo O Ginoo kinabuhi ug kaluwasan. Alleluya.

Pagbasa sa Ebanghelyo

Kinutlo gikan sa Ebanghelyo sumala ni San Mateo (7,24-27):

Unya miingon si Jesus kanila, "Busa ang tanan nga nakadungog sa akong gisulti ug
nagtuman niini mahisama sa usa ka tawo nga maalamon nga nagtukod sa iyang
balay diha sa bato. Sa dihang mibundak ang ulan, ug mibaha ang mga suba, ug ang
hangin mihapak ug mikusokuso niadtong balaya, wala kini matumba kay natukod
man diha sa bato.

Apan ang tanan nga nakadungog sa akong gisulti ug dili magtuman niini,
mahisama sa usa ka tawong buangbuang nga nagtukod sa iyang balay diha sa
balas. Sa dihang mibundak ang ulan, ug mibaha ang mga suba, ug ang hangin
mihapak ug mikusokuso niadtong balaya, natumba kini ug nagun-ob!"

Ang Ebanghelyo sa Ginoo.

Tanan: Dayegon Ikaw, O Cristo.

PAMALANDONG SA KAHILUM

Pag-ampo sa Katilingban. (Manindog ang tanan.)

Mga pangamuyo

Nagdumala: Nagatuo kita nga si Cristo mao ang Pagkabanhaw ug ang Kinabuhi.
Uban sa pagsalig modangop kita kaniya, diha sa atong pag-ingon: Ginoo nga
nabanhaw, pamati-a kami. Atong usbon.

Tanan: Ginoo nga nabanhaw, pamati-a kami.

Cristo, Anak sa Dios nga buhi, banhawa ang among minahal nga nangamatay na
ug agaka sila ngadto sa kahiusahan sa mga santos, kami nag-ampo:

Tanan: Ginoo nga nabanhaw, pamati-a kami.

Cristo, among Manunubos, tungod sa imong gugma ug kaluoy dawata nganha sa

imong himaya ang among mga nangamatay nga katigulangan, kaubanan,
kahigalaan, ug ang mga nagtabang kanamo, kami nag-ampo:
 Tanan: Ginoo nga nabanhaw, pamati-a kami.

Cristo, among Manunubos, namatay ikaw sa Krus alang kanamo, dad-a ang tanan
nga nanghikatulog uban sa timaan sa pagtuo nganha sa gingharian sa kahayag ug
kalinaw, kami nag-ampo:

Tanan: Ginoo nga nabanhaw, pamati-a kami.

Cristo, maghuhopay niadtong nanagbangotan, hatagi kami sa paglaum nga usa ka

adlaw niana, mahiusa kami pag-usab uban niadtong among mga gimahal, kami
nag-ampo:

Tanan: Ginoo nga nabanhaw, pamati-a kami.

Nagdumala:

Ginuong Jesucristo, sa Imong kabubut-on Imong gitugyan ang Imong kaugalingon

ngadto sa kamatayon, aron ang tanan maluwas ug makalabang gikan sa kamatayon
ngadto sa kinabuhi.

Ipadangat kanamo nga ang among katigulangan, kaubanan, kahigalaan, ug ang

mga nagtabang kanamo, maglipay dinha sa pagtan-aw sa Imong himaya, Ikaw nga
nagapuyo ug nagahari hangtod sa kahangtoran.

Tanan: Amen

Amahan Namo

Maghimaya ka Maria

Himaya sa Amahan

Nagdumala: Mahigugmaon nga Amahan, Imo kaming gilowas pinaagi sa

kamatyon ug pagkabanhaw sa Imong Anak.

Pamatia kining among mga pag-ampo alang sa among katigolangan,

kaubanan, kahigalaan, ug sa mga nagtabang kanamo. Sa Imong
gugma ug kaluoy, i-apil sila sa talaan sa Imong mga santos.
 Sa among kabahin himoa nga magmatinud-anon kami sa mga
maayong hiyas ug mithi nga ilang gitudlo kanamo.

Kini among gipangayo pinaagi ni Cristo, among Ginoo.

Tanan: Amen.

Nagdumala: Pahulay nga dayon ihatag kanila, O Ginoo.

Tanan: Ug ang kahayag nga walay pagkapalong magdan-ag kanila.

Nagdumala: Mamahulay unta sila sa kalinaw.

Tanan: Amen

Nagdumala: Nga ang ilang mga kalag ug ang mga kalag sa tanan nga mga
matuuhon, tungod sa kaluoy sa Dios, mamahulay unta sa kalinaw.

Tanan: Amen

Nagdumala: Ug manalangin unta kanato ang Dios nga makagagahom sa tanan, ang
Amahan, ang Anak, ug ang Espiritu Santo.

Tanan: Amen.