KAGURANGNAN JESU CRISTO, DAING SAGKOD NA HALANGKAW NA

PADI
Jueves paka-Pentecostes

Antifona sa Paglaog Salmo 109:4

An Kagurangnan nagsumpa asin dai niya ini babaweon:
Ika padi sagkod pa man sosog sa orden ni Melkizedek.

Pamibi sa Pagpoon

Mamibi kita...

Ama, para sa saimong kamurawayan

asin para sa samong kaligtasan,
ginibo mo si Jesucristo bilang halangkaw na padi.
An banwaan na saiyang ilinigtas huli kan saiyang dugo
makahiras man lugod sa kapangyarihan kan saiyang cruz
asin pagkabuhay-liwat sa pagcelebrar kaining Eucaristia.
Ini hinahagad mi huli ki Jesucristo, Kagurangnan niamo,
Saimong Aki, na kaiba mong nabubuhay asin naghahade,
kasaro kan Espiritu Santo, Dios,
sa kapanahonan kan mga panahon.

Pamibi sa mga Dolot

Kagurangnan,
maidolot mi man lugod na maninigo
asin dayaday, ining mga misterio
huli ta kun an sacrificio ginigiromdom,
nababago an gibo nin pagtubos sa samo.
Huli ki Cristo na samong Kagurangnan.

Prefacio sa Banal na Eucaristia I o II

Antifona sa pagcomunion 1 Corinto 11:24-25

Iyo ini an sakong hawak na idinodolot para saindo. An kalis na ini iyo an bagong
tipan nin sakong dugo. Sa lambang pag-inom nindo kaini, giboha sa pagromdom
sako.
Pamibi Paka-Comunion

Mamibi kita...

Kagurangnan,
sa pagheras niamo sa sacrificiong ini
na ipinagtugon kan Saimong Aki
na samong gibohon sa pagromdom Saiya,
magin man lugod kami sa kaibahan Niya,
mga balaog na daing sagkod para Saimo.
Huli ki Cristo na samong Kagurangnan.

TAON A

Enot na Babasahon Genesis 22: 9-18.

Pagbasa sa Libro nin Genesis.

Pag-abot ninda sa lugar na ipinahiling nin Dios saiya, naggibo si Abraham nin sarong
altar dangan pinakarahay an mga kahoy sa ibabaw kaini. Pakatapos, ginapos niya si
Isaac asin ibinugtak sa altar, sa ibabaw kan mga kahoy. Dangan kinua niya an kutsilyo
tanganing gadanon si Isaac. Alagad, hale sa langit an anghel nin Dios nag-apod saiya:
“Abraham, Abraham.”
“Uya ako,” simbag ni Abraham.
An anghel nagsabi: “Hare pagbingatan an saimong kamot laban sa aki. Dai mo siya
pagkolgan. Ngonian aram ko na ika may pagkatakot sa Dios. Dai mo isinayuma sako an
saimong aki, an saimong bugtong na aki.” Pagtingkalag ni Abraham, nahiling niya an
sarong kanero na an sungay nakapuropot sa balagon. Kinua ni Abraham an karnero
inatang na kasalihid kan saiyang aki. Hale sa langit an anghel nagsabi giraray ki
Abraham: “Ako minasumpa huli ta dai mo isinayuma sako an saimong aki,
bebendicionan taka, an saimong mga aki papadakulon ko siring sa mga bitoon sa langit
asin siring sa mga baybay sa tampi kan dagat. Masasakopan kan saimong mga aki an
mga pintoan kan saindang mga kaiwal. An gabos na banwaan sa daga magigin paladan
huli kan saimong mga aki, bilang balos kan saimong pagtubod.”

Tataramon kan Kagurangnan.

O kaya Hebreo 10: 4-10

 Pagbasa sa Surat sa mga HEBREO

Huli ta an dugo nin mga toro asin nin mga kanding dai makakapara kan mga kasalan.
Kaya kan si Cristo magdigdi sa kinaban, ini an saiyang sinabi:
Mga atang asin dolot habo mo, kaya sarong hawak tinagama mo para sakuya:
Holokausto asin atang para sa kasalan dai mo nagustohan: kaya ako nagsabi:
“Uya ako, O Dios, sa pag-utob kan saimong kabotan” siring sa nasusurat dapit sako sa
linukot na libro. Enot na sinabi: mga atang asin dolot habo mo: hulukausto asin atang
para sa kasalan dai mo nagustohan – an mga bagay na ini na idinodolot susog sa
pagboot kan tugon – dangan sinabi: “Uya ako, O Dios, sa pag-utob kan saimong
kabotan”. An enot na atang hinahale asin sinasanglean kan ikaduwa, an atang ni
Cristo. Sa bagsik kan kabotan na ini kita nagin banal dahel sa saiyang hawak na
inatang makasaro sagkod lamang ni Jesucristo.

Tataramon kan Kagurangnan.

Salmo-Responsorio Salmo 40:7-8a, 10-11, 17

UYA AKO KAGURANGNAN,

UYA SA PAG-UTOB KAN SAIMONG KABOTAN.

Dangan ako nagsabi,

“Uya ako; mga katukdoan mo nasusurat sa libro.
O Dios ko, naoogma ako sa pag-utob kan kabotan mo;
an saimong tugon rimpos ko sakuyang puso.” (Simbag)

An bareta nin kaligtasan dai ko tinago para sa sako lamang;

ibinareta ko an saimong pagkamaimbod asin kaligtasan!
Dai ko tinago sa katiriponan
an danay mong pagkamoot asin pagkamaimbod.
Hare pagsayuma sako an saimong pagkaherak, Kagurangnan.
Ingatan lugod ako kan saimong pagkamaimbod
asin danay na pagkamoot (Simbag)

Maluya ako saka dukha, Kagurangnan,

alagad dai mo ako linilingawan.
Ika an sakuyang tabang asin paraligtas;
hare paghaloy, O sakuyang Dios! (Simbag)

Evangelio Mateo 26: 36-42

Pagbasa kan Evangelio na sinurat ni San Mateo
Si Jesus, kaiba an mga disipulos, nakaabot sa tatamnan na inaapod Getsemani, asin
nagsabi sainda: “Tukaw kamo digdi, mantang ako maduman asin mamibi.” Ipinag-iba
si Pedro asin an duwang aki ni Zebedeo, dangan inabtan nin dakulang kamunduan asin
kahorasaan. Nagsabi sainda: “Ako magagadan sa kamundoan. Pawalat kamo digdi asin
magpuka sa kaibahan ko.” Ruminayo nin kadikit, luminaob sa daga asin namibi: “Ama
ko, kun mahihimo pa sana, palihisa sako an caliz na ini: alagad koyogon bako an boot
ko, kundi an boot mo.” Dinolok an mga disipulos, nahiling na tororog asin nagsabi ki
Pedro: “Dai kamo nakapagpuka nin sarong oras sa kaibahan ko? Magpuka asin mamibi
na dai mahulog sa sogot; an espiritu makosog, alagad an laman maluya.” Giraray si
Jesus ruminayo asin namibi: “Ama ko, kun ini dai makalihis na dai ko inomon,
koyogon an boot mo.”

An Marhay na Bareta kan satong Kagurangnan.

TAON B

Enot na Babasahon Jeremias 31:31-34

Isinasaysay sa enot na babasahon an gigibohon na tipan nin Kagurangnan. Himateon po an

tataramon nin Kagurangnan.

Pagbasa sa Libro ni Profeta Jeremias.

“Madatong an mga aldaw,” olay nin Kagurangnan, “na ako makikipagtipan sa harong
nin Israel asin harong ni Juda. Bakong arog kan tipan na ginibo ko sa saindang mga
magurang kan aldaw na sinda sakong kinua asin ilinuwas sa daga nin Ehipto. Dai
ninda inutob an sakong tipan, kaya ipinasabot ko sainda kun siisay an Kagurangnan,”
olay nin Kagurangnan. “Ini an tipan na gigibohon ko sa harong nin Israel,” olay nin
Kagurangnan. “Todok sa puso ninda ibubugtak ko an sakong Tugon: isusurat ko sa
puso ninda. Ako magigin saindang Dios, asin sinda magigin sakuyang banwaan. Dai na
kaipuhan na tukdoan ninda an saindang katood asin kapwa kun siisay an
Kagurangnan. Ako mamimidbid ninda sadit asin dakula.” Olay nin Kagurangnan.
“Patatawaron ko an saindang kasombikalan asin dai ko na gigirumdumon an saindang
kasalan.”

Tataramon kan Kagurangnan.

O kaya: Hebreo 10:11-16

 Pagbasa sa surat sa mga Hebreo

Lambang padi naglilingkod aroaldaw, paulit-ulit na idinodolot an mga atang na dai

nanggad makakapara kan mga kasalan. Alagad si Cristo saro sanang atang na
nagdadanay an idinolot para sa mga kasalan, dangan nagtukaw sa too nin Dios:
duman siya naghahalat sagkod na an saiyang mga kaiwal gibohon na tungtungan nin
saiyang mga bitis. Sa bagsik nin saro sanang atang napabanal niya sagkod pa man an
gabos na saiyang pinapabanal. Nagpapatotoo kaini an Espiritu Santo: huli ta nagsabi,
enot:

“Ini an tipan na gigibohon ko sainda,

kun dumatong an mga aldaw na iyan.
Ibubugtak ko an sakuyang mga tugon sa isip ninda.
Isusurat ko sa puso ninda.”
Dangan nagsabi pa siya: “Dai ko na gigiromdomon an saindang mga kasalan o an
saindang mga kasumbikalan.” Kun an gabos na mga kasalan pinatawad na, an atang
dai na kaipuhan na idolot pa para sa kasalan.

Tataramon kan Kagurangnan.

Salmo Responsorial Salmo 110:1,2,3

IKA PADI SAGKOD PA MAN, SA ORDEN NI MELKISEDEK.

An kagurangnan nagtaram sa sakong Kagurangnan,

"Tumukad ka sa too ko, sagkod na an mga kaiwal mo
gibohon kong tungtongan kan mga bitis mo." (Simbag)

Ipapadara nin Kagurangnan hale sa Sion

an setro nin saimong kapangyarihan.
Maghade ka sa tahaw kan saimong mga kaiwal! (Simbag)

Sa aldaw na labanan mo an saimong mga kaiwal,

sa marahay na boot ibahan ka kan saimong banwaan.
Siring sa ambon nin kaagahon, an mga aki pang lalaki
madatong saimo diyan sa banal na kabubulodan. (Simbag)

Pagrokyaw kan Evangelio Hebreo 5:8-9

Maski Aki siya nin Dios nakanood siyang magin makinuyog-kuyog sa paagi kan
saiyang mga pagdios. Kan nautob na niya ini, siya nagin burabod nin kaligtasan na
daing kataposan para sa gabos na nagkukuyog saiya.

Evangelio Marcos 14:22-25

Pagbasa kan Evangelio na sinurat ni San Marcos

Mantang sinda nagkakakan, kinua ni Jesus an tinapay, benendicionan, binaak, itinao sa

mga disipulos, asin nagsabi: “Akoa nindo: ini an sakuyang hawak.” Dangan kinua an
calis, nagpasalamat, itinao sainda asin gabos nag-inom. Asin nagsabi: “Ini an sakuyang
dugo, dugo sa bagong tipan, dugo na papaboloson para sa gabos. Totoong sinasabi ko
saindo: dai na ako mainom kan bunga nin ubas sagkod sa aldaw na ako mag-inom nin
bagong arak sa kahadean nin Dios.”

An Marhay na Bareta kan satong Kagurangnan.

TAON C

Enot na Babasahon Isaias 6:1-4, 8

Pagbasa sa Libro ni Profeta Isaias

Kan taon na magadan si Hadeng Uzzias, nahiling ko an Kagurangnan. Nagtutukaw

siya sa saiyang trono, halangkaw saka mamuraway, asin an bilog na Templo napapano
kan saiyang gubing. Sa palibot niya nagtitindog an mga seraf; an lambang saro sainda
igwa nin anom na pakpak: an duwa pantahob kan saindang lalawgon, an duwa
pantahob kan saindang mga bitis, asin an duwa ginagamit ninda sa paglayog.

Nag-iinapodan sinda nin makusog: "Banal, banal, banal an Kagurangnan nin mga
hukbo; an bilog na daga pano kan saiyang kamurawayan."

Natanyog an fundacion kan Templo huli sa kusog kan saindang tingog asin napano nin
aso an Templo.

Dangan nadangog kong naghapot Kagurangnan, Siisay an sakong susugoon? Siisay an

satong magigin sugo?” Nagsimbag ako, “Uya ako! Ako an sugoa”

Tataramon kan Kagurangnan.

O kaya Hebreo 2:10-18

Pagbasa sa Surat sa mga Hebreo

Kaya maninigo na pakabanalon niya, huli sa pagtios, an lider na madara sainda sa
kaligtasan. Kaya dai ikinakasupog ni Jesus na apodon sindang tugang, susog sa
nasusurat: Irorokyaw ko an saimong ngaran sa sakong mga tugang: Aawitan taka sa
tahaw nin katiriponan.
Sinasabi pa niya, “Mananarig ako sa Dios.” Dangan, “Uya ao kaiba kan kaakian na
itinao sako nin Dios.”
Huli ta an mga aki igwa nin dugo asin laman: si Cristo man nagkaigwa kan siring na
dugo asin laman, tanganing sa saiyang kagadanan, madaog niya an demonyo na may
kapangyarihan sa kagadanan, asin iligtas an gabos na nasa kaoripnan, huli sa takot sa
kagadanan bilog nindang pagkabuhay. Dai siya nakisumaro sa mga anghel, kundi sa
mga aki ni Abraham. Kaya sa gabos na bagay siya nagin arog sa saiyang mga tugang,
tanganing magin maheherakon asin maimbod na padi nin Dios: tanganing mabayaran
an mga kasalan nin banwaan. Nin huli ta siya nagtios, nakakatabang man sa mga
nagtitios.

Tataramon kan Kagurangnan.

Salmo Responsorial Salmo 23: 2-3, 5, 6

AN KAGURANGNAN SAKUYANG PASTOR,

DAING ANOMAN NA MAGKUKULANG SA SAKO.

Pinapahingalo niya ako sa mga berdeng sabsaban,

asin dinadara niya ako sa mga tubig na malinaw.
Giraray pinapakusog niya an sakong kalag.
Pinapangenotan niya ako
sa mga dalan nin katanosan,
huli sa saiyang ngaran. (Simbag) )

Nag-aandam ka nin sarong bangkete para sako

sa atubang nin sakong mga kaiwal;
an sakong payo linalahidan mo nin lana,
an sakong caliz nagsusupay. (Simbag)

Totoong an karahayan saka an pagkaherak

magdadanay sako sa gabos na aldaw nin sakong buhay;
mag-eerok ako sa harong nin Kagurangnan
sagkod na ako may buhay. (Simbag)

Pagrokyaw Ezekiel 36:25a, 26a

Malinig na tubig ioola ko saindo asin kamo malilinigan. Lilinigan ko kamo sa gabos na
digta asin sa gabos na anito. Bagong puso itatao ko saindo, asin bagong espiritu
ibubugtak ko saindo.

Evangelio John 17:1-2, 9, 14-26

Pagbasa kan Evangelio na sinurat ni San Juan

Si Jesus nagtingkalag sa langit asin nagsabi: --Ama, duminatong na an oras,

pamurawaya an saimong Aki, tanganing an saimong Aki magmuraway saimo. Itinao
mo saiya an kapangyarihan sa gabos na tawo, tanganing an buhay na daing kasagkoran
itao niya sa gabos na ipinaniwala mo saiya.

Sinda sakuyang ipinagpamibi; dai ko ipinapamibi an kinaban, kundi sinda na itinao

mo sakuya, asin sinda an sakuyang kamurawayan.

Itinao ko sa sainda an saimong tataramon; ikinaongis sinda kan kinaban, huli ta bako
sindang taga-kinaban. Dai ko ipinapamibi na haleon mo sinda sa kinaban, kundi na
sorogon mo sinda sa maraot. Bako sindang taga-kinaban, siring na ako bakong taga-
kinaban. Pakabanal sinda sa katotoohan; an saimong tataramon katotoohan. Siring na
ako sinugo mo sa kinaban, sinda man sinusugo ko sa kinaban; huli sainda ako
nagpapakabanal, tanganing sinda man mapabanal sa katotoohan. Bako sanang an mga
parasunod ko an sakong ipinapamibi; ipinapamibi ko man an mga matubod saimo huli
kan saindang tataramon: na gabos magkasararo, siring na ika uya sako asin ako yaon
saimo: na sinda man magin siring satuya, tanganing an kinaban magtubod na ako
sinugo mo. Itinao ko sainda an kamurawayan na itinao mo sako: na sinda
magkasararo siring satuya: ako sainda asin ika sakuya, tanganing magkaboronyog sa
pgkasararo; makaaram an kinaban na ako sinugo mo asin sinda namomotan mo siring
sa pagkamoot mo sakuya. Ama, sinda itinao mo sakuya; boot ko na, kun haen ako,
yaon man sinda kaiba ko, nganing mahiling ninda an sakong kamurawayan na itinao
mo sakuya, huli ta namotan mo ako bago linalang an kinaban. Maugayon na Ama, dai
ka namidbid kan kinaban, namidbid taka, asin an mga ini nakamidbid na ako sinugo
mo. Ipinamidbid ko an saimong ngaran sainda asin sakuyang ipapamidbid, tanganing
an pagkamoot mo sakuya mapasainda asin ako man mapasainda.

An Marhay na Bareta kan satong Kagurangnan.