HURIA KRISTEN BATAK PROTESTAN (HKBP)

BORNEO RESSORT BANJARMASIN

Jl. Bandarmasih Komp. DPR Gg. IV No. 6, RT.036/RW.003
Belitung Selatan - Banjarmasin, Kalimantan Selatan
Pimpinan Jemaat : Pdt. Apriando J. Rajagukguk (0821-4808-9192)
No. Rek. HKBP Borneo : 00010-01-50-042749-2 (Bank Tabungan Negara)
No. Rek. HKBP Borneo Pembangunan : 00010-01-54.000709-0 (Bank Tabungan Negara)

Bahan Sermon Parhalado Jumat, 10 Pebruari 2023

“Tua ni halak na Daulat marroha”

Psalmen 119, 1-8

Dihasomalhon do di keluarga halak Batak molo paborhathon

ianakhonna laho marjalang, ditariashon do hata pasupasu, poda dohot
singotsingot asa gabe sitiopon jala siingoton ni na marjalang i. Hata
pasupasu na mardongan tona dohot poda sian keluarga, huhut do
manggombarhon panghirimon ni keluarga tu ianakhon na laho marjalang i,
anggiat gabe hasea ibana disiala diharinghothon mangulahon na denggan
jala monang maradophon ragam gulmit nang hamaolon di ngoluna. Songon
na nidok ni umpasa, “pantun hangoluan, tois hamagoaní”. Alani i sian mulana
nunga ingkon diharinghothon na naeng marjalang i, manghalomohon angka
poda, manghaburjuhon ulaon angka parsiajaran, ingot di angka tona,
mangargahon angka parsaoran, marsihohot jala marsitutu mangulahon na
denggan. Asa “dapot na nijalahan, jumpang na niluluan”.

Adong opat tona sihangoluhononta sian turpukta on, i ma:

1. Tudosan ni ngolu partondion : Molo pinatongon hasomalan na
pinatorang di na parjolo i, tu turpuk Psalmen 119:1-8, boi do i songon
tudosan laho mangalapati barita na disurathon di bagasan Psalmen bindu
119. Gabe turpuk patujolo/pengantar do turpuk on tu 21 turpuk nari sahat tu
ayat 176. Holan di ayat 1 dohot 2 do adong tarsurat hata ‘martua’, na
mamungka barita di Psalmen 119. Hata pasupasu do pandohan “martua” i,
songon formula berkat na pinasahat ni malim di bagas joro. Laos i ma
panomunnomuon di haroro ni angka na bongot tu bagas joro. Dijangkon
Jahowa do angka na pinilit-Na i bongot tu joroNa (ida-Psalmen 65:5; 84:5),
unang adong biar nang hatahuton pe.

1
2. Bagabaga Hatuaon : Tangkas do na nidokna ise do na martua. I ma,
halak angka na daulat marpangalaho, angka na marpangalahohon patik ni
Jahowa dohot halak angka na mangaradoti angka panindangionNa i, angka
na mangalului Ibana sian nasa roha. Angka nasida on do na manjalo
bagabagaNa asa gabe martua binahen ni Jahowa. Atik pe panindangion ni
parpsalmen i do pandohan martua i alai porsea do ibana na pasupasuon ni
Jahowa do manang ise na manghalomohon patikNa jala na masihol tu
Jahowa. Nunga jumolo diparade Jahowa pasupasuNa i na laho lehononNa tu
ganup halak na patuduhon roha na marsitutu mangoloi Ibana. Tontu
pasidingonna ma angka dalan hageduhon (ay. 3), angka na so hombar tu
patik dohot panindangion ni Jahowa (ay. 1 dht 2). Naeng ma bagabaga i
manambai pos ni roha asa marsihohot mandalani ngolu siapari, atik pe
mubauba do saluhut angka na masa di hasiangan on. Di angka na marsitutu
jala na marsihohot di haporseaon nang panghirimonna i do na dapotan tua
na sian Jahowa.

3. Ramot Di Angka Ruhut Partondion : Ndang tubu sandiri roha na pantun

manang pangalaho na sintong. Sian pangajarion dohot panogunoguon do i
disuanthon tu bagasan roha nang pikirnan ni jolma. Jamita, poda, tona,
singotsingot na diajarhon jala dihatahon (lisan), manang angka hata ni
Debata, patik dohot aturan na tarsurat marlapatan do i manambai
pangantusion dohot parbinotoan. Songon na nidok ni apostel Paulus : “Ai
nasa Surat i, sinihathon ni Debata do; jala hasea mamodai, maminsang,
pauliulihon, manogunogu di bagasan hatigoran,” (2 Timoteus 3:16), songon i
do dihaburjuhon parpsalmen on, marsihohot di dalanNa jala mangaradoti
aturanNa (Psalmen 119:5), mamparateatehon tonaNa (ay. 6), mangguruhon
uhum hatigoran (ay. 7) dohot mangaradoti angka aturanNa (ay. 8). Arga
situtu do na manghaburjuhon marguru jala marsiajar sian patik, uhum nang
angka aturan na sian Debata. Hadedenggan (kualitas) ni parngoluon pe arga
situtu dipanghilalaan ni parpsalmen i. Alani i, ndang tagamon tarurak manang
dipermalukan (ay. 6) ibana, ala singkop do ngoluna dibohali jala dihobasi.

4. Ringkot Situtu Pandonganion ni Jahowa. Toho do ringkot mangguruhon

dohot mangulahon patik dohot ruhutruhut na mangajarhon asa
marpangalaho na denggan. Arga do nang mangaradoti uhum dohot
mangulahon poda dohot aturan na ditonahon manang na tarsurat. Alai
parhitean dohot ulaulaNa sambing do saluhutna patik, uhum nang angka
ruhut i. Ai holan dalan do i laho patuduhon hadirionNa di tongatonga ni
2
hajolmaon. lobi sian i. Na rumingkot i ma haradeon ni Jahowa di siganup
tingki. Tudos tu masin ndang mangolu molo so adong bahan bakar, manang
lampu listrik ndang mangolu molo so tersambung tu sumber energi, laos
songon i do, saluhut angka ruhut, aturan tona, jamita, patik dohot
pangajarion i dang marlapatan i guruhonon jala niantusan molo ndang
pangoluhon haporseaon dohot panghirimon jala mambahen hita holang sian
Debata Jahowa. I do alana umbahen di pangujung ni turpuk on, didok
parpsalmen do, “unang tung tadingkon ahu situtu.” (ay. 8). Hirim situtu do
rohana naeng sai tong mian Debata raphon ibana. Pandonganion ni Jahowa
do mambahen pos rohana nang sude angka na porsea. Asa nang sisean ni
Jesus pe pos do roha nasida borhat tu ganup luat di portibi on disiala Tuhan
Jesus Sipalua i do na mandok, “sai na dongananku do hamu ganup ari,
rasirasa ro ajal ni hasiangan on!” (Matius 28:20b).

Pangidoan ni parpsalmen di ayat parpudi (8) paingothon hita asa

manat mangalapati pandohan ‘martua’ na dibagabagahon di ayat 1-2. Ndang
ingkon angka na domu tu materi/mamon, pardagingon nang sangap ni portibi
on na paboahon/ membuktihon hatuaonta, manang na patuduhon na
dipasupasu Debata ngolunta. Molo tajaha jamita ni Tuhan Jesus di dolok na
tarsurat di Maateus 5:3-11, tarida do disi lam bagas jala torang do songon
dia pangajarion na manogu hita asa martua. Ngolu ni Tuhan Jesus sandiri
gabe panindangion ni na manggohi patik. Ala “Kristus do ujung ni patik i, laho
mamintori nasa na porsea.” (Roma 10:4). Amen