PAGBENDITA HAN CORONA HAN ADBYENTO

P: Ha ngaran han Amay, han Anak ug + han Espiritu Santo.

B: Amen.

P: An Ginoo maada ha iyo.

B: Ngan maada man ha imo.

P: Bungata Ginoo an amon mg aim-im.

B: Ngan an amon baba magdayaw ha Imo.

P: An aton panabang aada han ngaran han Ginoo

B: Nga naghimo han langit ug tuna.
 
P: Pag-ampo kita:
Ginoo namon nga Dyos
gindadayaw ka tungod han imo Anak, hi Jesucristo:
hiya an Emmanuel, an paglaum han imo katawhan,
hiya an an kinaadman nga nagtututdo ug naggigiya ha amon,
hiya na Magtaralwas han ngatanan nga mga nasud.
Ginoo nga Dyos.

Ibubo an imo mga bendisyon ha amon +

ug ini nga corona han adbyento
magin tigaman ini han amon pag-ihap han mga adlaw
diin nagpapamulat kami han Iya pagbalik.
Ha amon pagdagkot hini nga mga kandela
an iya siga magin tigaman han kan Cristo saad
hin pagtalwas ha amon.
Pakadi Ginoo, ayaw na paglangan.

Tungod kan Jesucristo ngahaw nga amon Ginoo.

Amen.

PASI-UNA HA PAGDAGKOT HAN KANDELA HAN ADBYENTO

Syahan nga Domingo han Adbyento – Paglaum

Yana nga Domingo aton gindadagkutan an syahan nga candela han Adbyento,
an candela han Paglaum (dagkutan an candela). Ibutang naton an aton paglaum
ngada han tiarabot, an iginsaad nga maabot nga tikang sa Dyos hin pagdara ha aton
han maupay nga sumat han katalwasan. Naglalaum kita nga pag-uunhan kita han
Ginoo dida han paglalakataon ha kapawa. Naglalaum kita nga diri kita niya tutugatan
nga magpuyo dida hini nga tuna han kasisidman, kundi ngadto han hitaas nga bukid
han kapawa han Ginoo. Gindadagkutan naton ini nga candela han paglaum. Hini nga
adlaw, aton gindudumdom nga malauman nga nagpapamulat han pagkanhi ni Cristo.

Ikaduha nga Domingo han Adbyento – Kalinaw

Han naglabay nga Domingo an aton ginparuktan an candela han Paglaum,

pagdumdum han malaumon nga pag-abot ni Cristo. (Dagkutan an candela). Yana aton
gindadagkutan an ikaduha nga candela han Adbyento, an candela han kalinaw. An
kaburut-on san Dyos nga maghadi an kalinaw ha kalibutan, ngan naghihingyap kita
hini nga kalinaw ha kalibutan diin an kasamok ug kagubot hinumduman nala han mga
naglabay ngan diin liwat kita magsasaro dida hin usa la nga pangaraunan.
Gindadagkutan naton ini nga candela han kalinaw. Hini nga adlaw aton gindudumdom
nga an Ginoo han ngatanan maghahatag ha aton han kalinaw nga labaw pa han aton
pagsantop.

Ikatulo nga Domingo han Adbyento – Kalipay

Han naglabay nga Domingo gindagkutan naton an candela han Paglaum, ha

pagsabot nga an paglaum aada gud la kan Cristo, ug aton gindagkutan an candela han
Kalinaw, ha pagdumdum han kanan Dyos tuyo nga maghadi an kalinaw ha kalibutan.
(Dagkutan an candela 3). Yana aton gindadagkuta an candela han Kalipay. Hini nga
panahon han Adbyento, aada kita hini nga panahon hin paghulat. Sugad han mga
Israelitas nga naglakaton ha kamingawan, naghuhulat han tuna nga iginsaad, hi kita
liwat naghuhulat han pag-abot han Kalipay han ngatana nga panuigon. Naghuhulat
kita han adlaw diin kita magkakaurusa hin usa la nga tingog upod han mga angheles
hin pagkanta “Paglipay kalibutan, an Ginoo inabot na!” naghuhulat kita hiton nga
adlaw diin an waray pagkatapos nga kalipay nga maangkon han tagsa ha aton.
Gindadakutan naton ini nga candela nga tugod hin kalipay. Hini nga adlaw aton
gindudumdom nga an Espiritu Santo maghuyop ha aton hin kalipay ngada ha aton
mga kinabuhi.

Ikaupat nga Domingo han Adbyento – Gugma

Han naglabay nga Domingo aton gindagkutan an candela han kalinaw ha

pagdumdom nga an paglaum natikang han Ginoo, an candela han kalinaw,
pagdumdom han kaburut-on san Dyos nga maghadi ha kalibutan an kamurayaw, ngan
an candela han kalipay, ha pagdumdom nga an kalipay maaangkon naton tungod han
Espiritu Santo nga aada ha sag-od naton. (Dagkutan an candela 4). Yana aton
gindadagkutan an an ikaupat nga candela han Adbyento, an candela han Gugma. An
Bibliya nagsisiring ha aton “waray kahahadlokan han gugma, kay an hingpit nga
gugma nagtatabog han kahadlok” (1 Jn 4:18). An Dyos nagtuha han kalibutan dida ha
gugma ngan an kalibutan matatapos dida han gugma san Dyos, An gugma san Dyos
nakakalukop han ngatanan nga kahimtang han aton kinabuhi. Tikang aton katawo
ngadto ha kamatay, ha kasakit ug kalipay, an gugma san Dyos nakada ha aton. Aton
gindadagkuta an candela han Gugma. Yana nga adlaw aton gindudumdon nga an
Dyos gugma.

(An masunod in pananglitan la kon may-ada candela han pagkatawo han Ginoo,
mas upay kon an gamiton an candela han Pasko han Pagkabanhaw. Pero mahimo
gamiton nga pasi-una hiton katutnga nga misa han Pasko han Pagkatawo).
Katutnga han Pagkatawo han Ginoo – Kapawa

Han bug-os nga panahon han Adbyento, nagpuyo kita, nagpamulat kita ngan
nagdumdom ha paglaum, kalinaw, kalipay ug ha gugma san Dyos dida kan Cristo
(Dagkutan an mga candela). Yana nga gab-I nag-uurosa kita ngan ginparuktan naton
an mga candela ha pagpasidungog han bata nga Jesus. Ha pagkatawo ni Cristo, an
katalwasan nagbanaag ha aton. An pulong nga nakada san Dyos, nahimo nga tawo
ngan nakig-usa ha aton. Sugad nga nakada kita nagpupuyo han lambong han
kamatayon , an bag-o nga kapawa sumiga para ha aton, hi Jesucristo nga aton Ginoo.
An aton gindadakutan candela ni Cristo. Hini nga gab-I, aton gindudumdom an Dyos
nakig-usa ha aton dida han pagkatawo han dyosnon nga bata, hi Jesucristo.

Ginhikay ni:

Padre Julio O. Gaddi Jr, SLL; JD

Tinaglawas han Komisyon han Liturhiya
Diyosesis han Calbayog
11-26-2022