MINGGU V DUNG TRINITATIS

9 JULI 2023
Evangelium: Rom 7: 15 – 25

Manghaholongi Uhum Ni Debata

I. Patujolo
Huria Rom ima huria na nianganan ni angka halak Kristen diaspora, ima halak Jahudi
(4:1; &:4-6) dohot Junani (1:5,13; 11:13), na ro sian ragam ni luat. Jadi, huria Rom ndada huria
na pinajongjong ni Apostel Paulus, alai na jongjong marhite halak Jahudi diaspora na rot u
Jerusalem (peziarah). Huta Rom ima na gabe pusat panggomgomion Kekaisaran Romawi. Surat
on digurithon si Paulus hirahira di taon 56 M di tingki marbarita nauli ibana di Korintus, laho
“memberikan karunia rohani” (1:1; pat.Ul.Ap.8:14-18; 2 Tim.1:6). Surat on ditongos tu huria
Rom marhite si Tertius (16:22), andorang so sahat tu Spanyol.
Halak Kristen di huta Rom ingkon do mangadopi ragam ni parasingan sian budaya dohot ugamo.
Sian sosial budaya ima mangihuthon budaya Romawi na hierarchis, na tandi di parasingan induk
somang (tuan) – hatoban, etnisitas (kelompok-kelompok suku), parporangan laho maralohon
angka na so sa-kelompok/ugamo. Di huta Rom na ro sian ragam ni pangisina na sian hatoban,
angka na sangap, na mamora, penguasa politik, militer, parboniagaan (pengusaha), lam tandi ma
parasingan ni sosial kemasyarakatan i. Di taon 49 M masa do pangusiron tu halak Kristen Jahudi
sian huta Rom ala ni hagunturon ala ni pangantusion taringot tu Krestos. Hape “minoritas” do
bilangan ni Kristen hatihai (hirahira 200 halak). Di ragam ni na masa I do umbahen lam bidang
do parasingan ni halak Kristen Jahudi dohot Junani.
Di tongos si Paulus surat on, marbingkas do i adong parsualon dohot parsalisian di halak
Kristen na di Rom alani angka marimbai pangantusion di panghaporseaonnasida di Jesus Kristus.
Masa do angka parbolatan di nasida na sai mangasahon hasumurunganna be, na mambahen gabe
martamba angka parungkilon di panghaporseaonnasida i. Digombarhon do adong kelompokna
gogo dohot kelompok na gale. Kelompok na gumogo ima halak Kristen Junani ala ndang adong
keterikatan di angka aturan-aturan sipanganon dohot siinumon (bebas). Didok kelompok na gale
ima halak Kristen Jahudi ima angka na rihit jala jamot di angka aturan, patik, unduk di angka
turan tarlumobi taringot tu sipanganon. Jala na dua kelompok on nang pe naung Kristen, sai
manguhum-uhumi do nasida huhut mangarehei. Di halak Kristen Jahudi na sai mangihuthon
aturan dohot patik dirajumi do dirina mandapot haluaon, diluar ni dirinasida ndang partohap disi.
Apostel Paulus mangondolhon holan marhite Kristus do adong haluaon i, asa unang adong be na
gabe ginomgoman ni patik. Ndada na mansoadahon patik, alai ndang adong sipangasahononhon
di patik i, ai manongtong do jolma i madabu tu ulaon pardagingon na gabe tu hadosaon.
Sian latarbelakang ni hajahudion ni si Paulus, na sai tongtong manjamothon parsiajaran
dohot pangantusiuonna taringot tu patik, dirajumi ibana do dirina naung “mahir” di patik i
tongtong do ndang adong kepastian na gabe rimpas pangalahona, tarlumobi ma pangantusion
taringot tu haluaon. Patik i mangaradoti ngolu ni jolma alai taringot tu pardagingon na sai olo
madabu tu hadosaon. Adong do partontangan di hadirion ni jolma i keinginan untuk melakukan
kehendak Allah alai alani dosa ndang tarbahen ni jolma i mangulasonsa ala ginomgoman ni dosa.
Halak Kristen ingkon mandompakhon ngolu partondionna tu Tuhan Jesus Kristus, na patupahon
haluaon i, asa tarbahensa mangulahon lomo ni roha ni Debata ndada mangihuthon jala dirajai
rante ni dosa. Hagogoon mangulahon i ndada dibagasan patik alai dibagasan Jesus Kristus do.

II. Hatorangan ni Turpuk

Parbue manang na hinangham ni patik dohot daging (15-20)
Mangihuthon Rm.7:1 “digomgomi patik i do jolma saleleng ibana mangolu”, holan
hamatean do na boi paholanghon jolma sian patik. Alai nang pe songoni ‘hagogoon’ patik di
jolma, ndang boi patik I mambahen jolma rimpas saleleng mangolu, alani do parulaon ni jolma
saleleng mangolu nang pe mangaradoti patik tongtong dope mamparbuehon ‘parbue ni dosa’. Di
patikhon Debata do tu jolma na parjolo (Adam dohot Hawa) di angka na laho siradotannasida asa
mangolu, unang mate (1 Musa 2:17; 2:3). Sai dihalomohon jolma na parjolo i do unduk
mangihuthon naung dipatikhon Debata tu nasida asa di nasida hangoluan. Alai di sumbia ni
sibolis na mangago nasida ndang tarbahensa be hot di patik ni Debata, gabe diihuthonnasida do
daging na laho mate i. Patik i dipasahat Debata Pargogo na so hatudosan jala na Badia, laos patik
i pe badia do jala marhagogoon mamboan jolma mananda huhut mardalan tu Silehon hangoluan
(ay.17). Alai alani dosa i mambahen ndang tarbahen ni patik i manghangham ngolu ni jolma tu
hangoluan. Jolma na tinompa tumiru rupaNa dohot pangalahoNa na margogo mangulahon patik
ni Debata gabe ndang tarbahensa be mangundukhon huhut mangulahon patik i ala nunga
diundukhon dirina tu ulaon daging (dosa). Dosa nunga mangararati, marhuaso di diri ni jolma i
umbahen ndang tarbahen be unduk di sude patik ni Debata. Jolma na dibagasan dosa nunga
dirajai ulaon dosa, jala parbuena na gabe tu hamatean. Ndang tartiop ni patik i laho mangarajai
jolma i asa unduk tu Debata ala patik i pe ndang tarbahensa mambahen jolma malua.
Apostel Paulus patuduhon parungkilon ni hajolmaonna mangulahon pardagingon i.
“Huula” (katergazesthai, prassein, poiein), na marlapatan adong parbuena hombar tu naniulana.
Alai parbue na niulana i ndada na hinalomohon ni rohana. Sian on tarida adong partontangan ni
keinginan ni jolma na songon na tinompa ni Debata dohot sumbia ni dosa i na marhagogoon
mangarajai ngolu ni jolma. Ido hataridaan ni dosa. Adong paraloan ni jolma di dirina. Parbue ni
daging (dosa) mansai patar do, jala parbue ni ulaon dibagasan patik pe patar do nang i. alai
hapapatar ni saluhut parbue i, ndang tuk mambahen kepastian di haluaon (kemerdekaan) songon
nampuna ni Kristus. Ganup jolma na manghaholongi dirina na sai dirajai dosa, jala sai
mambahen hagogoon ni ruhut-ruhut pardagingon (budaya, aturan, dna) na mangarajai dirina, ido
mambahen jolma gabe sai tongtong mangolu dibagasan daging. Apostel Paulus sandiri
manghatindanghon din a jamot ibana manjaga, mangguruhon patik i mambahen ibana gabe
garang mengalele huria i, alai dirajumi do i harugian tumimbanghon hamuliaon ni panandaon di
Kristus Jesus (Pil.3:1-11). Pardagingon dohot ruhut ni patik i do mambahen ibana gabe gale laho
mananda hamuliaon ni Jesus Kristus, laos i do na mambahen ibana manghagigihon Barita Nauli
i.
Patik ni Debata naung jinalo ni bangso Israel manogunogu bangso i mananda na
hinalomohon ni Debata. Ala sian Debata do patik i jala na badia do i, alani do ingkon Tondi
Parbadia do na manghangham ngolu ni jolma asa tarulahonsa (Mat.22:43; 2 Ptr.1:21). Alai ganup
jolma na mangolu dibagasan daging (bukan berasal dari Allah, memusuhi Allah) sai tongtong
dope i mangulahon na maralo tu lomo ni roha ni Debata, nang pe naung di ibana patik i.
Dihatindanghon si Paulus do hinadenggan (kalos = tak bercacat, indah, mulia) ni patik i.
Jesus sandiri pe mandok: “Unang ma dirimpu rohamuna Ahu ro mangarumpakhon patik i,
manang hata ni angka panurirang i pe. Ndang ro Ahu mangarumpakhon, na pajongjonghon do
Ahu.” (Mat.5:17). Molo diulahon jolma patik i na pajongjonghon tujuan ni patik i do ibana disi,
alani do hinadengganna. Alai ala sai manongtong do pangarajaion ni dosa di jolma na mambahen
ulaon hadosaon, jala tongtong jolma i dibagasan dosa i, ndang songon panompaon ni Debata tu
jolma i be hadirion ni jolma i. Ulaon dosa ndang boi gabe sidalian di angka ulaon hajahaton na
marragam, molo dung gabe halak Kristen. Dison ma na sai tongtong dope jolma mangulahon na
sian ‘daging na tartompa ni Debata’, ido na mambahen jolma i manghagigihon uhum/patik/hata
ni Debata di bagasan ngoluna.
Jesus Kristus do margogoihon jolma mangulahon dohot manghaholongi patik ni Debata
(21-25)
Di halak Jahudi naung Kristen na sai tongtong dope mangihuthon angka aturan-aturan di
patik hajahudion i gabe madabu tu ‘kesombongan rohani’. Ruhut-ruhut di aturan i do tanda na
malua jolma, didok nasida, andul sian i ndang tarbahensa be malua. Alai di parngoluanna godang
angka ulaon na maralo tu lomo ni roha ni Debata. Suang songoni halak Junani naung Kristen
nampuna kebebasan (ndang tarihot di aturan), i pe mangulahon dosa. Kedua kelompok ini sama-
sama mengalami tekanan luar dari dirinya. Dalam manusia batinnya (nous) memiliki keinginan
melakukan yang baik, akan tetapi dari luar (dosa) selalu menekan mereka untuk berbuat dosa.
Apostel Paulus sandiri pe dihantindanghon do jolma parbagasan (manusia batin – nous)
manghalomohon jala naeng mangulahon patik (nomos). ‘Nous’ diganup jolma i marhagogoon do
mananda panghorhon ni na mangulahon dohot manundalhon patik. Alai si Paulus
dihatindanghon do na sian duru ni dirina margogo laho patundukhon diri ni jolma i tu ulaon
dosa. Panghalomohonon ni roha di patik i ala dirajumi do i dalan haluaon (3Musa 18:5; Rm.10:5;
pat.Mat.7:24,26). Ganup patik manghalomohon haundukon ni jolma laho mangulahonsa, molo
so diulahon hamatean i tung mansai patar do i. ‘Ruas ni daging dohot roha’ di sada pamatang ni
jolma na nampuna hagogoon do taringot tu patik i, alai ala ndang boi holan sian ‘dirina’ laho
mangulahonsa. Alani do didok si Paulus: “Oe ahu jolma na dangol on” (manusia celaka). Alani
na sai mangulahon dosa i hamatean do upana.
Paulus manghamauliateon di naung dipapatar Jesus haluaon na sian diriNa. Jesus Kristus
do dilehon Debata laho manghangham saluhutna angka ruhut-ruhut dohot patik na nihalomohon
ni ganup jolma. Molo tung pe margogo halak Jahudi manjamothon patik i, dalannasida do i laho
mananda hagaleon ni ganup jolma sian pardagingon ai ganup jolma mardosa do (3:23; 6:23). Jala
songoni nang halak Junani (non-Jahudi) molo tung pe dirajumi ha-Kristenon i adong kebebasan,
asa saluhutna do jolma i mandalani ngoluna hombar tu panghaporseaonna di Jesus Kristus.
Ruas ni daging, dohot roha naeng ma manghalomohon uhum ni Tuhan i.
Ruas ni daging i do papatarhon angka na taula, na boi patar di ganup jolma. Roha ima na
mangonjar jolma marhite ruas ni daging laho mangulahon na hinalomohon ni Debata. Naeng do
ruas ni daging dohot roha ni ganup jolma i dipaimbaru dibagasan Kristus. Asa ganup jolma
(Jahudi dohot Junani) rap mangulahon marguru tu Jesus Kristus na hinaporseaan nasida i, ndang
be angka ruhut-ruhut na so mangalehon jaminan haluaon i na mangarajai ngolunasida. Molo sai
dipangasahon do angka ruhut i ido lam pabidang angka parbolatan. Jesus Kristus, na Sasada i do
na mangalehon jaminan tu ganup jolma taringot tu haluonna. Dilehon Tuhan Jesus do patik
naimbaru tu hita: “Patik na imbaru ma Hulehon tu hamu: Naeng ma hamu masihaholongan
hamu” (Joh.13:34), laos patik na niajarhon ni Jesus i do manghangham saluhutna nasa patik
dohot hata ni panurirang (Mat.22:40).
Di na masa sian sosial kemasyarakatan di huta Rom taringot tu tuan-hatoban, na mora –
na pogos, laos di ugamo Kristen Jahudi – Junani, na mambahen adong parsalisian i, angka ulaon
dohot ruhut na mamboan tu hamatean do isaluhutna na so dung boi masihaholongan, hape nunga
porsea di Jesus Kristus. Alani ma ganup halak Kristen sian ragam ni luat, budaya, aturan, huasa
(jabatan), ingkon ma olo dipatunduk di patik holong ni roha dibagasan Jesus Kristus, asa
tarpatundukhonsa angka hagogoon ni dosa na sai olo manosak parngoluan ni ganup jolma.
Dipapatar Jesus do hadirionNa na sai tongtong mandongani ganup na manghalomohon
mangulahon hataNa marhite pandonganion ni Tondi Parbadia. Asa ganup jolma naeng ma
marguru tu pangarajaion dohot pangajaran ni TondiNa, asa tarulahonsa.

III. Panimpuli/Refleksi
Di na rap mandalani hita di abad 21 on, lam patar do hita mandalani angka hamaolon di
tantangan siadopan ni halak Kristen laho manghangoluhon haporseaonna. Lam patar do godang
jolma na mambahen parbolat-bolatan alani angka ruhut-ruhut, sahat do I nang tu ruhut ha-
Kristenon, isarana na manguhumi angka tata cara di implementasi ni hata ni Debata di ulaon
siganup ari. Adong do na manulak angka paradaton secara total, na so manghalomohon angka
adat i masuk tu ulaon ni huria. Sahat tu partingkian on sai adong dope angka parsualon dia do
hasisintongna di hakristenon na laho siulahonon. Dungi adong muse kelompok na mambahen
kelompokna marhasurungan na gabe ‘marporang’ dompak kelompok na asing na so saruhut di
angka hasomalan. Sikap eksklusivisme, na mamaksa kehendak, dohot na mamaksa ingkon
songon na di ibana siulahonon ni ganup jolma mambahen ndang dapot arga ni barita Nauli i.
Jesus Kristus ro tu portibion tu ganup jolma na marasing di angka ruhut-ruhut pardagingon
(hajolmaon). Dilehon Jesus tiruan di hita, na olo Ibana menembus ruang batasan ni hajolmaon,
asa ndang adong mardia imbar jolma i di Ibana. Naeng ma ganup halak Kristen manghalomohon
uhum manang hata ni Tuhan Jesus na sai tongtong mangajarhon haholongon i. Holong tu ganup
jolma, na boi menjangkau dan menembus ganup angka hirehire ni hajolmaon i. Huria Kristen
Indonesia (HKI) na pinaojak ni Tuhan Jesus gabe huria na boi menjangkau sude jolma marhite
gabe huria na missioner dohot berdedikasi. HKI dipaojak Debata ndada holan tu dirina, tu
bangso Batak, di Indonesia, alai ingkon do tu saluhut jolma.