MINGGU IX DUNG TRINITATIS

06 AGUSTUS 2023
Evangelium: Mateus 14:13-21

Silehonlehon Ni Debata do Sipanganon Dohot Siinumon

I. Patujolo
Evangelium Mateus ima buku na parjolo di Padan na Imbaru na marisihon barita na uli
nanisurathon ni si Mateus sahalak petugas pajak (sijalo beo) na gabe sisean ni Tuhan Jesus. Sian
buku on boi dapot hita taringot tu tarombo nang partuturon ni ni Tuhan Jesus (bindu 1).
Panuraton ni buku Evangelium ni si Mateus on martujuan patoguhon haporseaon ni halak na
porsea jala paboahon naung singkop ma saluhut panurirangon ni angka panurirang di Padan na
Robi songon dalan padengganhon parsaoran ni saluhut jolma tu Debata Ama. Buku Mateus on
ndada holan naeng paboahon barita pangulahon ni Jesus Kristus di portibi on, alai lobi sian i
adong do naniigilna ima asa saluhut panjaha mangihuthon jala pasauthon saluhut pangajarion na
pinasahat ni Jesus Kristus tu angka sisean dohot tu angka natorop.
Marragam do cara na pinangke ni Jesus Kristus pararathon barita taringot tu harajaon ni Debata.
Adong do i marhite pangajarion na mura antusan sian dalan parumpamaon, adong do marhite na
patupa tanda halongangan. Jala di bagasan turpuk on, Jesus Kristus pararathon harajaon ni
Debata marhite napatupa tanda halongangan. Nian Barita taringot tu Halongangan ditamuei
Tuhan Jesus lima ribu halak marhite lima roti dohot dua dengke tarsurat do i di na opat injil
(Mateus 14:13-21; Markus 6:31-44; Lukas 9:12-17; Johannes 6:1-14). Sian na opat injil i
paboahon tu hita ianggo sipanganon dohot siinumon ima kebutuhan primer (pokok) do on di
hajolmaon na ingkon sipenuhan. Alai ingkon ingot do hita kebutuhan sipanganon dohot
siinumon on marharoroan do i sian Tuhan Debata, nang pe ingkon pangkeon ni jolma gogona
laho mangula ulaonna (Pat. II Timoteus 2:10). Molo taida do sian situasi dohot kondisina, tung
godang do tutu angka jolma na mangihuthon Jesus asa dapotan sipanganon dohot siinumon
pardagingon, ndada asa dapotan sipanganon partondion marhite hasintongan hata ni Debata.
Molo songon i do pangidoanta sian Tuhan Jesus, olo do mandao Tuhan i sian hita ai ndada di
pasupasu sipanganon dohot siinumon pardagingon hajaraon ni Debata di hata ni Debata. I do
umbahen na didok Tuhan Jesus di Mateus 6:33, “sai jumolo ma lului hamu harajaon ni Debata
dohot hatigoran, dungi tambahononna do sude angka ondeng tu hamudo”. Alai jotjot do timbul
sungkunsungkun: Molo di tingki so adong do sipanganon pardagingon taihuthon Tuhan Jesus?
Jala molo di tingki adong do sipanganon pardagingon taihuthon Tuhan Jesus? Tontu di dua
situasi i ingkon tongtong do ihuthononta Tuhan Jesus, manang aha pe na masa. Ai saluhut jolma
do dipasupasu Tuhan Debata. Boi taida di bagasan turpuk on, Ai dungkonsa diida Tuhan Jesus
angka natorop na ro mandapothon Ibana nunga male, sian asi ni rohaNa dipatupa Ibana do
halongangan bolon, boi mangan pola sahat tu na lima ribu halak holan marhite lima roti dohot
dua dengke.

II. Hatorangan ni Turpuk

Laho pamurahon hita mangantusi turpukon boi ma idaonta sian andorang so turpuk on. Dung
dibege Jesus naung dipisikhon parangan ni si Herodes ulu ni si Johannes pandidi jala diboan tu
boru ni si Herodias di atas pinggan borhat ma Jesus marparau tu sada luat na lungun asa punjung
sasadasa. Boasa mamunjung sasadasa? Di bagasan turpuk on dang apala didok sialana, alai boi
ma dohonon Jesus lao tusi ala na marsak do rohaNa ala nunga dipamate parangan ni si Herodes
si Johannes Pandidi Sitotas dalan i jala naeng mangulon ibana satongkin sian ulaon pararathon
barita harajaon ni Debata. Boasa pola dipamate si Johannes Pandidi? Boi ma dohonon sada
sialana alani huaso hagogoon napinatupa ni Jesus tu angka natorop. Molo taida marhite sian ayat
sebelumna ayat 1-2 bindu 14 on ala naung dibege raja Herodes do sar barita ni Jesus naung
patupa ulaon hagogoon. Didok si Herodes ma tu angka naposona: Ibana do si Johannes pandidi;
naung hehe do i sian angka naung mate, umbahen na tapartupasa angka ulaon hagogoon.
Dirimpu raja Herodes do napatupa huaso hagogoon i si Johannes pandidi, hape Tuhan Jesus do
napatupa hagogoon i. Napaduahon siala ima ala dipodai si Johannes pandidi do raja Herodes, na
solo roha ni raja Herodes marnida boru ni si Herodias dongan saripe ni anggina si Pilippus na
pola maruari ibana, marbagabagahon mangalehon manang dia pe sipangidoonna, ujungna
dilehon raja Herodes ma ulu ni si Johannes pandidi di atas pinggan tu si Herodias.
Alai nang pe mamunjung Jesus sasadasa tu luat na lungun sai tangi jala sai manigor ditopot
angka natorop i do Jesus tu inganan i laho mangido asi ni rohaNa. Pandohan “asi ma rohana”
patuduhon paboa Tuhan Jesus tongtong do patuduhon asi ni rohana tu ganup jolma. Daong olo
Tuhan Jesus mangida halak na marsahit, halak na male halak na mauas, na loja jala na sorat so
dihaholingi. Ai didok Tuhan Jesus do di Mateus 11:28, “Ro ma hamu tu Ahu, hamu angka na
loja jala na sorat, asa hupasonang hamu”. Jala diida Tuhan Jesus do sihol nang holong ni roha
ni natorop na mansai godang i na ro mandapothon Ibana. Angka na marsahit, marhite sian asi ni
rohaNa dipamalum do. Alani halak na sai ro mandapothon Tuhan Jesus jala nauasan di
hamamalum ni parsahiton jumpangsa do parsaulian sian Tuhan Jesus. Di inganan halongonan na
so adong boi luluan sipanganon dohot di tingki naeng bot na ma ari na nunga tung maol muse
mangalului sipanganon, marasi ni roha do angka sisean i tu angka natorop i asa boi nian angka
natorop i marsipanganon. Didok sisean i ma tu Jesus asa dipamuli angka natorop i asa laho
nasida tu angka huta manuhor sipanganon. Pola pikir ni angka sisean i molo pe ro nasida
mangihuthon Tuhan Jesus nunga adong be persiapan hepeng sipangkeon ni natorop i manuhor
sipanganon jala adong do di sude angka luat stock sipanganon di angka partigatiga. Alai andul do
ianggo alus ni Jesus tu sisean i, “ndang pola laho nasida, lehon hamu ma nasida mangan!”. Alus
ni angka sisean i tu Jesus ima holan lima roti dohot dua dengke sambing do hupeop hami dison.
Molo taida do sian godang ni roti i dohot dengke i ba holan sipanganon botari do i di sisean i
dohot Tuhan Jesus, ianggo dohot do angka natorop i manganton i hurang do i. Songon i ma
pamikiron hajolmaon ni angka sisean i. Hape didok Jesus do asa boanonna jala lehononna na
lima roti dohot dua dengke i tu Ibana. Marhite haunduhon ni sisean i mangalehon i dohot
haunduhon ni natorop i hundul di duhutduhut, ternyata asi ni roha ni Tuhan Jesus tu angka
natorop i marparbue na godang do. Ditiop Tuhan Jesus ma na lima roti dohot dua dengke i,
manaili ma Ibana tu ginjang laho mamasumasu. (Pambahenan ni Tuhan Jesus on tudos do
songon nabinahen ni angka ama ni halak Jahudi di angka jabuna molo naeng mangan, marhite
hata pandohan: pinuji ma Debata, Jahowa Debata Amanami, Raja ni portibi on, na manubuhon
angka sipanganon sian tano). Marhite sian pamujion nang tangiang ni Tuhan Jesus i terjadi ma
pelipatgandaan ni roti i gabe godang. Dungi dibagi ma roti i, diparlehon ma tu angka siseanna
asa di nasida mangalehon tu natorop i. Di pingkiran ni angka sisean i na so memungkinkan boi
mangalehon mangan angka natorop i, tusi do jumolo dipataridahon Tuhan Jesus tanda
halongangan i laos marhite nasida do disuru Tuhan Jesus laho mambagihon angka sipanganon i
tu angka natorop i. Na so mungkin di jolma alai mungkin do i anggo di Tuhan Jesus. Mangan do
luhutna natorop i jala pola sahat tu nabosuran bahkan adong dope ebaeba na lobi pola sahat tu
sampuludua ampang (angka “dua belas” mempunyai makna simbolis dan menunjuk kepada
kelimpahan yang lengkap, bnd.uga Flp. 4:19). Tindakan papunguhon angka ebaeba i ima
tindakan na so diulahon nasida sikap acuh tak acuh, alana molo adong do sikap acuh tak acuh tu
ebaeba ni sipanganon di hajolmaon boi do i mambahen gabe marpogos. Sian bilangan ni
sipanganon ni angka sisean dohot Jesus boi mangan lima ribu halak baoa so dohot dope dietong
parompuan dohot angka dakdanak.
III. Hahonaan
Marhite sian turpuk on boi ma idaonta hahonaanna ima parjolo: ianggo sipanganon dohot
siinumon marharoroan sian Debata Jahowa do i. Di ayat 16 didok paboa ingkon lehonon ni
angka sisean i do sipanganon ni natorop i. Memang parsuruon ni Tuhan Jesus on sada hal na
aneh do on di pingkiran ni angka sisean i, ai so adong be sipanganon siluluon di halongonan
dohot jala mareak boat ari nama. Sian parsuruon ni Tuhan Jesus on disuru do angka sisean i
patupa pelayanan sosial tu angka natorop i ima na paradehon sipanganon di nasida. Boha do
bahenon nasida patupa pelayanan tu natorop i? Dipatupa nasida pelayanan i holan marhite na
mangalehon (mau berbagi) nasa adong di nasida ima lima roti dohot dua dengke jala marhite na
marhaunduhon nasida mangulahon parsuruon ni Tuhan Jesus i.
Marhite sian ulaon pelayanan ni angka sisean on taida ma mutihana na parjolo ima na olo do
nasida berbagi. Molo olo hita berbagi, dang hurangan manang habis sian hita bahenon ni Debata.
Justru molo olo hita berbagi, lam berkelimpahan do hita. Ndang soal molo naeng godang dapot
hita ba godang ma talehon, alai molo marbagi hita ingkon sian tulus ni roha ma nian. Mutiha na
paduahon ima huaso ni Kristus Jesus di bagasan keterbatasan ni jolma. Jotjot do hita putus ala so
mampu hita mangulahon pelayanan lumobi ma mangalehon parbue ni nataula tu dongan na
hurangan. Molo terbatas jala otik do sinadonganna, adong ma na mandok ndang mampu au
mangalehon tu dongan, hape di na otik i do marhuaso Tuhan Debata manggandahon gabe
godang. Nean adong do jolma godang do di ibana sinadonganna, alai ndang mampu ibana
marbagi tu donganna, on ma nanidokna siholit mangging. Alai taida ma sian turpuk on nang pe
sian lima roti dohot dua dengke dipasupasu Tuhan Debata gabe bosuran angka natorop. On ma
nian daya dorong semangat di hita mangulahon pelayanan sosialta tu dongan na hurangan,
berbagi karena peduli. Nang pe otik alai godang panghorhonna bahenon ni Debata asal ma olo
hita mangalehon sian tulus ni rohanta. Unang ma na otik i tetap gabe otik, alai sian na otik i gabe
godang ma i bahenon ni Debata. Alani tahaporseai ma sian Tuhan Debata do sipanganon dohot
siinumon, ulahon ma ulaon pelayanan tu angka na hurangan, pasupasuon ni Debata ma hita.
Amen

MINGGU X DUNG TRINITATIS

13 AGUSTUS 2023
Evangelium : 1 Musa 39 : 1 – 5

Gabe Pasupasu Di Bagasan Tuhan

“Martua ma baoa na mangkabiari Jahowa, na lomo roha situtu di angka patikna!” (Psalm. 112:1
). Tua ima pasupasu ni Jahowa tu angka na tuk gabe haposanna. Marolopolop belum tentu na
martua. Ragam do pasupasu ni Debata tu ganup jolma, hombar tu panjaloonna be. Na porlu
siingotonta, gumodang do pasupasu i na bersifat pasupasu universal, isarana sondang ni
mataniari, alogo dohot na asing i. Laos adong do pasupasu na bersifat komunal napinasahatna tu
sekelompok halak na mangolu di bagasan dame (Psalm. 133:1-3), ima angka pasupasu na
berhubungan dohot kebutuhan bersifat kelompok ala hinaringkot ni kelompok i sandiri isarana,
kebutuhan budaya, kebutuhan makanan pokok dohot pendidikan. Sian na dua Jenis pasupasu on
tubu ma muse pasupasu na bersifat personal, songon na tu si Musa, pasupasu personal alai tujuan
bersifat Komunal dohot universal mendunia. Turpuk on paingothon hubungan dua pamilliton ni
Jahowa di dua halak na sangat berhubungan ima kasus Josep dohot Musa.
Parjolo, Dipillit jala dipabangkit Jahowa si Josep tudos songon si Musa tarpasupasu laho
mamboan bangso Israel ruas sian huta habunganna sian Misir. Nang pe dang saluhutna nasida
bongot tu huta parpadanan i, alai martua do ibana songon sada dalan ni Debata paluahon Bangso
i. Andorang so i dipatorang do tangkas proses pamilliton i marhite na dituhor si Potipar naposo
ni Firaun do Ibana sian Marga Ismael, diboan ibana mulak tu Misir. Cerita sejarah mula
habuangan ni bangso i dipatorang do tangkas marharoroan sian pangiburuon ni hahaanggina di si
Joseop, gabe didabu ibana tu sumur. Tung mansai tangkas do pangaramotion ni Jahowa di
naposoNa na daulat roha i. Dang rodi si na denggan roha ni si Josep, sahat ibana tu Misir di jabu
ni si Potipar, andap do pandonganion ni Jahowa di si Josep, gabe halak na martua ibana di bagas
ni halak Misir na so sahaporseaon dohot ibana. Tuk do dipatuduhon ibana hagogoon ni Jahowa
di ibana gabe pola (i)takjub, las roha ni si Potipar manungkun si Musa taringot tu Debatana, dung
diida rajana i na nidonganan ni Jahowa ibana, jala ditumpak Jahowa sude mula ni tanganna i.
Jadi (ii) lomo ma roha ni rajana i mida si Josep, (iii) gabe parhaladona ibana; jala dipabangkit
ibana gabe siramoti jabuna, (iv) jala sude na di ibana i, dipasahat do tu tangan ni si Josep. Jadi
olat ni na pinabangkitna i ibana bahen siramoti jabuna, ro di sude na di ibana i, dipasupasu
Jahowa ma bagas ni halak Misir i ala ni si Josep, manjadi do ditumpak Jahowa sasude na di
ibana i, di jabu dohot di balian.
Paduahon, tontu sahali ndada asal dipasahat Jahowa pasupasu i tu sahalak jolma, sai na adong do
alasan dahot dasor na tontu umbahen dipasahat. Asing ni na tarpillit ibana adong do syarat,
terutama masalah kelayakan jala dilayakkan. Angka dia ma syarat i? (i) Tu angka na biar mida
Jahowa dohot na manghalomohon Patikna (Psalm.113:1) Biar mida Jahowa ima hubungan
holong dohot komunikasi na mansai lohot di angka na pinargooan ni Jahowa dohot lomo roha di
hata ni Jahowa arian nang borngin. Biar mida Jahowa dohot manghalomohon patikna i do
hataridaan ni halak na gabe haposan ni Jahowa, patuduhon holan Jahowa do guru di ganup
gulmit ni ngoluna. Memang na so mungkin do biar sasahalak i tu Jahowa molo dang olo manang
dang diharinggashon hata ni Jahowa. Otomatis do i. Jadi dang tarsirang biar mida Jahowa dohot
manghalomohon hataNa. Molo biar do rohanta berarti andul do i sian roha ni halak portibion na
gumodangan umbiar mida portibion, isarani siubeon, dongan jolma bahkan angka kepentingan ni
portibion. Biar mida Jahowa na marlapatan do i, mamparsangapi (menghormati) Jahowa huhut
berkewajiban mangulahon tonaNa huhut padaohon diri sian laranganNa sian saluhut roha nang
pangalahona. Pangaramotion ni Jahowa do mambahen si Josep gabe halak na sukses
manontong ulaonna, marhasil nang pe mangolu di bagas ni tuanna di Misir.
(ii) Andorang so tapabagas rohanta na gabe pasupasu si Josep di bagas ni Potipar, ringkot do
botoonta angka dia ma pasupasu ni Jahowa tu angka na biar mida Jahowa, ima:
1. Sangap ma pinomparna i sogot di tano on, dapotan pasupasu ma sundut ni angka partigor
sogot. Ndada holandi sada generasi antong pasu-pasu on alai dohot do tu pomparanna
marsangap. Dang sai holan disi, ganup na mian di ibana na mangihuthon ibana (tigor marroha)
gabe bangso na tarpasupasu. Ido bagabaga ni Jahowa na umbalga. Dohot do hahaanggina
manghilala hoaso, hamoraon dohot usaha ni si Josep. Sanga do mabiar hahaanggina mida si
Josep ala ni angka pangalaha, alai dang songon i roha ni si Josep. Boanonna do bangso i mulak
tu tano na binagabagahon ni Jahowa (tu si Musa). Boi ma tapatudos bagabaga on songon na tu si
Abraham na mangalehon tano inganan hatuaonna, bagabaga pinompar jala na tarpasupasu secara
pardagingon dohot partondion. Molo biar mida Jahowa jala dihalomohon hataNa sai na
usehonNa ma bagabaga i di ngolu ni na porsea i rodi pinomparna marsundutsundut, bahkan ro di
hita tu pinomparta marsogot gabe bangso na marhagogoon sian Jahowa. Nda tung so godang
hamaolon diadopi si Josep, Musa nang si Abraham laho mangulahon tona ni Jahowa. Na pasti,
secara kemanusiaan, nunga hasea gabe jolma na martua si Josep di bagas ni Potipar, ai dipasahat
tu ibana mengawasi, mangatur saluhut bagas rodi pangisi ni tuanna i. Bahkan pengaturan
ekonomi rumah tangga pe dipasahat do tu ibana. Jadi boi dohonon hira so adong be na hurang.
Alai diingot ibana do tujuan utama pamilliton ni Jahowa di Ibana. Boi jadi do molo pataridahu pe
dibaen ibana persoalan ibadahna tu Jahowa, gabe hona uhum ma ibana maon, ditembak mate, ai
so sahaporseaon ibana dohot si Potipar bahkan tu Mesir manang Firaun. Na ingot Ibana gumogo
do Jahowa sian saluhut raja ni portibion. Hape ala pangaramotion ni Jahowa i, gabe lomo do roha
ni si Potipar mida si Josep ala ni na nidongan ni Jahowa Ibana. Gabe lomoma roha ni si Firaun
mida Debata ni si Josep.
Marhite turpuk on taboto tangkas uju di Misir si Josep mamboan angka hahaangina
(kelurgana) rodi amana tu Misir na berdampak gabe torop bangso israel di Misir na tading di
Gosyen. Marhite pangaramotion dohot haradeon ni Jahowa mamasumasu si Musa mambahen
marhasil ulaon, usaha nang mamora iba.
2. Lehonon ni Jahowa hamoraon marlobilobi di bagasan jabuna, jala hot do hatigoranna i ro di
salelenglelengna. Pasupasu on ma na sangat berhubungan tu pandohan : “Sai jumolo ma lului
hamu harajaon ni Debata dohot hatigoranna, dung i tambahononna do sude angka ondeng tu
hamuna! (Mat 6:33). Ingkon i do hataridaon ni komitmen na sintong. Hita pe, molo tahilala do
pangaramotion ni Jahowa, ingkon boi do saluhut humaliangta manghilala pangaramotion ni
Tuhan i, tu uluanta, keluarga, natoras nang anakhonta, nang saluhut na mian di humaliangta. 
Songon pantas ni roha ni si Josep dohot dihilala si Potipar na lomo roha mida ibana, gabe lomo
rohana mida Jahowa. Coba tajaha detail : Jadi dung diida rajana i na nidonganan ni Jahowa
ibana, jala ditumpak Jahowa sude mula ni tanganna i. Jadi lomo ma roha ni rajana i mida si
Josep, gabe parhaladona ibana; jala dipabangkit ibana gabe siramoti jabuna, jala sude na di
ibana i, dipasahat do tu tangan ni si Josep ” (ay.3-4). Mangolu di bagasan pangaramotion ni
Tuhan i do mambahen ganup na na biar mida Jahowa jala manghasiholi hataNa do dapotan
pangaramotion angka haposanNa. Respon na umbalga tarida sian pihak ni Potipar mangalehon
kepercayaan na luar biasa, ima dilehon haposan tu ibana, dipanaek pangkatna gabe pemimpin
dohot marhuaso na paduahon di lingkaran huaso ni Potipar (langsung menjadi orang kedua).
Dungi berdampak gabe dipasupasu Jahowa bagas ni halak Misir, huta ni Potipar i: “Dipasupasu
Jahowa ma bangsa ni halak Misir, di ditumpak Jahowa sasude na di ibana i, di jabu dohot di
balian. Diturpuk ditogihon hita marningot tona na mandok: “Ringkoti hamu huhut hasonangan
ni huta habuanganmuna na hubahen i, jala tangiangkon hamu nasida tu Jahowa, ai molo
marhasonangan huta i, marhasonangan ma dohot hamu”(Jeremia 29:7). Ibana sandiri pe lam
jonok ma hubungan komunikasina dohot raja i (..maka Yusuf mendapat kasih tuannya, dan ia
boleh melayani dia; kepada Yusuf diberikannya kuasa atas rumahnya dan segala miliknya
diserahkannya pada kekuasaan Yusuf”)
Jadi, dang buni parngoluon ni ganup halak na tinumpakan ni Jahowa. mangolu jala boi doi
hilalaon ni humaliangna. Saluhut na mangolu di humaliangna manghatindanghon hamoraon,
pangaramotion dohot huaso ni Jahowa, termasuk angka na so tumnda Jahowa hia. Keadaan
sisongon boi tarida sian pola hangoluon na berlandaskan integritas, dohot kwalitas ni ngolu i.
Saluhut do hita manghasiholi sukses ulaonta, gabe jala mamora jala dang adong na sala disi. Alai
na rumingkot marhite hamoraon, marhite kesuksesan, marhite hagabeonta i naeng ma tong
tapataridahon ia saluhutna i tajalo holan sian Debata do jala ingkon sian pamotoan ni Debata
sambing do i ulahononta. Na boi do hubunganta dohot humaliang, torop ni alealenta, torop halak
ro mangadopi ulaonta, mura dapot hita angka pangidoanta, alani adong di iba songon ni dok ni
deba: “adong diiba adong ma dongan i”. Ido pe na masa. Alai taboto ma, na so sinadongan i,
mambahen jaminan marolopolop hita, monang bangso i, malua bangso Israel sian habuangan.
Ndang sinadongan manang Uang na paluahon. Alai Jahowa do. Unang ma nian gabe tubu
kesombongan rohani di hita, na mandok, ala parminggu, partangiang do ahu dohot keluargaku,
umbahen godang arta hamoraonku, hamu pe boi do hutuhor, gabe ninna rupani. “money
rules”?, bukanlah segalanya. Alat Tuhan na terbaik, terpilih songon si Josep dohot na asing i
dipillit Jahowa dohot tujuan tarpasupasu gabe pasupasu tu saluhut. Naeng ma ingkon lam
pataridahon sangap ni Debata.
Antar torop dope halak na so tuk manghilala pangaramotion ni Debata di ngoluna bahkan ragu
bahwa saluhut na jinalona manang na adong di ibana. Bahkan dang maol luluanta halakna na
manghilala ala ni malona, IQ-na, alani ringgasna mula ulaon bahkan ala ni nasibna do umbahen
mamora, hasea jala dapotan pasupasu na balga ibana. Gabe dang mabiar ibana mida Jahowa dang
dilului ibana Jahowa di ngoluna. Alai ingotma, holan tu angka na biar mida Jahowa jala na
manghasiholi hataNa do usehonon ni Jahowa ragam pasupasu. Ndang mungkin tu angka na
holan mamingkiri dirina (egois), Jahowa mangausehon pasupasuNa. . Boi tajaha: “Hatigoran do
saluhut hata ni pamanganku, ndang adong na geduk di bagasanna, manang getegete nanggo
sada. Luhutna i unur do di halak na marroha, jala sintong di halak naung dapotan parbinotoan.
Sai jangkon hamu ma pangajaranku, unang tagonan perak; jangkon hamu parbinotoan lobi sian
sere palangki. Ai ummarga do hapistaran sian mutiha, jala saluhut mata intan ndang tarpatudos
tusi. Ahu, Hapistaran i maringan tampak dohot habisuhon, jala jumpang Ahu do parbinotoan ni
panuturion. Biar mida Jahowa do manghagigihon na jat, roha haginjangon dohot hajungkaton;
pangalaho na jahat pe dohot pamangan getegete pe na huhagigihon do. (Poda8:9-13). Biar
mida Jahowa ima angka halak na manghasogohon hajahaton, na manghasogohon ginjang ni roha,
na gok pangangkalion.
Pardalanan pasupasu na nialaman ni Jahowa di si Josep na tontong magasahon pangaramotion ni
Jahowa huhut diparsangapi Jahowa gabe dang mardosa ibana tu Jahowa. Nian dang sude jolma
na tuk memahami i, sai na maol do i apalagi prosesna agak leleng. Gabe sai intor luluanna ma
usaha manang jalan pinas mamingkiri sian gogo nang kepentinganna. Ingot keberhasilan bukan
di tangan kita, alai di Jahowa na mangalehonsa do. 
Talului ma pangaramotion ni Jahowa jala pelehonon diri dalam segala hal, gabe dapot hita ma
angka ragam pasupasu i. Debata baen dongan mi lao mangula ulaon i, songon ende i. Ibana do
mandongan hita bahkan di dalan na maol sahali, asa dapot hita kesuksesan bahkan meraih
keberhasilan na so mungki pe, molo Jahowa dongan, aha na so tarpatupa Debata. Nda ido?
BE. 465: 1-2 : “Sai naeng las roha, tondi nang pamatangta mengendehon: “Pasupasu lehononMu
i do bagabagaMi, Songon angka udan nene sai tu au manetek i.Nang tu au, nang tu au,
patetekhon i tu au. O Amang sai ro apuli dohot au na marsak i, Sai pamalum nang rohangku na
tongtong marsahit i. Dohot au, dohot au, sai pamalum dohot au Saluhut do pasupasu lehonon ni
Jahowa tu angka na biar mida Jahowa huhut manghalomohon /manghasiholi hataNa. Ndang gabe
dihomolhomol pasupasu na ro tu ibana, alai ingkon boi humaliang manghilala, pardagingon nang
partondion. Asa martua hita huhut dohot tua, pasupasu tu angka pinomparta haduan ala
diramoti Jahowa. Amen.

MINGGU XI DUNG TRINITATIS

20 AGUSTUS 2023
EVANGGELIUM : ROM 11:1-2a;29-32

Saluhut Bangso Manghamauliatehon Asi Ni Roha Ni Debata

I. Patujolo
Dalan lam mangantusi turpuk bindu 11 on naeng ma jumolo tajaha bindu 9-10, ala
jumolo ditaringoti pamilliton ni Debata tu bangso Israel na gabe bangsoNa. Alai molo
dikenyataanna, nasida na sian Israel alai dang halak Israel, manang nasida pinompar ni si
Abraham alai dang tardok gabe ianakhon ni si Abraham. Dison ma tarida kegagalan ni bangso
Israel na targoar bangso na pinillit ni Debata, hape ia angka bangso na asing dapotan haluaon
hinorhon ni haporseaonna.
Di bagasan Surat Apostel Paulus na tu halak Rom na gabe digambarho do disi
paboa adong kesan paboa na masa do ketegangan antara halak Jahudi dohot halak naso Jahudi.
Golongan halak Kristen Jahudi jotjot mempertahanthon angka peraturan-peraturan keagamaan
Jahudi na tarsurat di Padan Na Robi, isarana manaringoti makanan haram-halal, perayaan Sabat
dan berbagai kewajiban agama lainnya. Sementara golongan Kristen non Jahudi merasa paboa
dang adong kewajiban nasida laho mematuhi angka uhum, aturan- peraturan ni Hajahudion jala
dianggap nasida luhutna tahe sude bebas marhaluaon di bagasan Kristus.
Digurithon Apotel Paulus ma suratna on laho mambahen tona asa adong solusi di
permasalahan na adong di huria Rom. Dalam rangka solusi terhadap permasalahan konkret yang
ada dalam gereja Roma itulah Rasul Paulus menyampaikan secara panjang lebar pokok-pokok
pemberitaannya yaitu keselamatan hanya oleh Kasih Karunia Allah dalam Kristus.

II. Hatorangan ni Turpuk

Turpuk on dimulai marhite sungkunsungkun dohot alus na pasti, didok: “Tung
dibolongkon Debata do bangsoNa? Dao mai!”. Apostel Paulus pasahathon suratna on tu huria
Rom, ia hatiha i ruasna ima sian horong ni halak Jahudi dohot na so Jahudi. Jala isi ni suratna on
mansai ampit do nang tu partingkian nuaeng. Beha do Debata mamereng/menilai bangso na
pinillitNai (Jahudi) dipangalahona, hape nuaeng Debata nunga mambahen sada padan (janji) na
imbaru di bagasan AnakaNa Jesus Kristus? Manang gabe dohonon ma, ia halak jahudi i ingkon
manang naung dibolongkon Debata? Alusna: dang! Memang ingkon dohonon do tung torop
halak Jahudi na so manjalo Kristus i dingoluna, jala bahkan terang-terangan do nasida manjua
manang dang manjalo taringot Barita Na Uli i. Alai nang pe songon i tung tangkas do dipatorang
Apostel Paulus na so hea Debata manjua manang maninggalhon bangso na pinillitNa.
Dibuktihon Apostel Paulus do i marhite na hombar tu dirina, ia ibana sandiri tong do sahalak
sian Jahudi, pinompar ni si Abraham, marga Benjamin (ayat 1). Angka halak jahudi tongtong do
dihaholongi Debata, pamillitonNa nang angka pasupasuNa tong do sahat tu halak Jahudi.
pamillitonNa dohot pasupasuNa i digoari do na bersifat: tidak bisa diubah (Rom 11:29).
Kepedulian dohot pasupasu na naeng sipasahatonNa na bersyarat do ima molo unduk jala
mandalanhon angka na hinalomohon ni Debata. Sialani i do asa didok: “dang hea Debata
mambolongkon bangsoNa”. Tapatudos ma i tu na tarsurat di Psalmen 94:14 : “Ai dang tagamon
bolongkonon ni Jahowa anggo bangsoNa, manang tadingkononNa parjambaranNa”. Jadi umat
Tuhan tidak akan ditolak oleh Allah karena mereka adalah umat pilihan Tuhan. Orang yang
dipilih oleh Allah bukanlah orang-orang biasa tetapi orang-orang yang telah dikenal oleh Allah
sebelumnya atau sudah dipilih dari sejak sebelumnya, orang-orang itulah yang tidak ditolak oleh
Allah atau yang akhirnya akan menerima keselamatan Allah dalam Yesus Kristus. (ayat 2)
Ala bangso na pinillit do nasida, haluaon i pe nunga milik nasida, sai i ma na
tongtong dipangasahon nasida, ujungna gabe madabu tu sada pemahaman na margoar:
Kesombongan Rohani: (pat. Mateus 3:9 “Jala so tung didok hamu di bagasan rohamuna: si
Abraham do amanami! Ai hudok ma tu hamu: Tarjadihon Debata do anak di si Abraham sian
angka batu on”). Hape laos pingkiran dohot pangalaho si songon i do na so dihalomohon
Debata. Dang jaminan i, ai holan na unduk huhut marhabiaran tu Debata do asa taruli di asi ni
roha ni Debata ima Haluaon. Rasa aman dan percaya diri yang berlebihan justru akhirnya
membuat bangsa tersebut tidak lagi berupaya untuk menggumuli apa yang sesungguhnya
menjadi kehendak Allah. Bahkan lebih jauh lagi tanpa disadari mereka menjadikan dirinya
sebagai penentu keselamatan dan oleh karena itu mereka sesungguhnya tidak lagi membutuhkan
Allah sang Sumber keselamatan. Inilah awal malapetaka: merasa mendapatkan keselamatan dari
Allah tetapi ternyata justru tidak mendapatkan sama sekali. Laos tapatudos ma tu hata ni Tuhan
Jesus na tarsurat di Mateus 19:30 mandok: “Alai lan do angka naung parjolo hian gabe parpudi,
jala parpudi hian gabe parjolo”.
Toho jala taboto do, sude jolma do dihaholongi Tuhan i. Angka na porsea dihasintongan ni
Tuhan i paluaonNa do sian hadosaonna, alai angka na manggoari dirina siihuthon Kristus
manang halak Kristen hape dang dihaporseai Jesus kristus na gabe Sipalua na singkop dingoluna,
ujungna sai na hamatean do jambarna.
Pamilliton dohot holong ni Tuhan i “satu kali dan untuk selamanya” . Nang pe
jotjotan jolma i sai mangolu di bagasan hatangkangonna, alai holong ni Tuhan i dohot huasoNa
tongtong do paingothon jala manogunogu bangsoNa asa lam mananda dirina di adopan ni Tuhan
i, asa tung taruli di asi ni roha ni Tuhan i. Ndang tarpalua jolma i dirina sian hadosaonna holan
mangasahon hadirionna nang haburjuonna ia so holan sian asi ni roha ni Tuhan i. Jika bangsa
Israel diselamatkan karena perbuatan mereka atau karena garis keturunan mereka, maka itu
bukan lagi kasih karunia Allah, tapi itu menjadi arogansi manusia. Sialani i do tangkas
dihatindangkon Apostel Paulus songon na tarsurat di Rom 11:6 “Alai molo binahen ni asi ni
roha, ndang be sian parulaon; aut unang i, ndang be goaron i asi ni roha!”.
Di ayat 30-32 dijelaskan mengenai ringkasan dari rencara Allah dan maksud Allah yang selalu
didasarkan atas kemurahanNya. Allah telah menghakimi semua manusia. Yahudi maupun bukan
Yahudi telah penuh dengan dosa, Allah telah menggunakan kebutuhan dan ketidakmampuan
manusia sebagai suatu kesempatan untuk menunjukkan kemurahan pada seluruh umat manusia
yang dicakup dalam lingkungan penebusan.

II. Sipahusorhusoron
Sude do hita manghalomohon asa sai diusehon Debata pasupasuNa tu hita ganup
tingki saleleng mangolu. Ndang hea lupa hita manangianghon i. Nang pe tutu, toropan dope hita
na mangantusi, ia pasupasu i holan angka na tabo ma, isara ni pandaraman na denggan,
hahipason, ianakon na burju, jabatan na timbo, pangomoan, pardalanan na mulus tanpa
hambatan, prestasi na meningkat; maol do hita mandok, paboa sangkap parbinotoan sian Debata
do molo masa di hita parsahiton, pergumulan, sitaonon, hapogoson, harugian, kecelakaan dohot
na suman tusi, ndang piga halak hea binege manangianghon paboa sian pamotoan ni Jahowa do
angka i. Hape sian angka sitaonon, hamaolon, parungkilon na masa di tonga ni ngolunta si ganup
ari, i do dalan ni Debata di na laho patandahon dirNa tu hita, asa hita pe lam tatanda jala taboto
dina laho pajonokhon dirinta tu Ibana, asa dapotnta angka silas ni roha, boi ma antong haruar hita
sian angka permasalahan hidup..
Panjouon ni Debata tu hita gabe angka siihuthon jala sitindangi Ibana di ngolunta
on tapatupa i marhite tahi dohot asi ni rohaNa. Molo sian hadirionnta sambing ndang marhatauon
hita gabe naposoNa/IanakhonNa, alai holan asi ni roha ni Debata i do na patauon hita gabe
marhatauon. Nunga taruli hita di haluaon na sian Debata marhite Tuhan Jesus Kristus jala
marhite asi ni RohaNa na manontong i. Martua ma saluhut angka bangso/jolma na marhaposan
tu asi ni roha bolon dohot habonaron ni Debata Pardengganbasa i, huhut manghalungunhon
manghamauliatehon haluaon i di bagasan saluhut pardalanan ni ngoluna.
Na di ari Kamis, 17 Agustus 2023 ima ari Ulang Tahun Kemerdekaan ni
bangsonta na pa- 78-hon, on ma bukti holong dohot asi ni roha ni Tuhan i naung tangkas tajalo, i
do umbahen didok di Galatia 5:1.a “Asa saut malua hita, umbahen na dipalua Kristus i hita”.
Boi bebas hita mangula angka ulaonta so pola digugai bangso na asing. Ndang dipasombu Tuhan
i angka na marsitaonon molo tongtong joujou jala marhaposan tu Ibana, ido umbahen dilehon
kemerdekaan on tu hita. Molo dung dilehon, antong aha ma tanggungjawabnta na hombar
kemerdekaan on? Alusna holan sian Hata ni Tuhan i do : “Hot ma hamu jongjong, antong, jala
unang be olo hamu patuduhon ni auga parhatobanon i”. (Galatia 5:1.b); “Ai angka naung
malua do hamu, alai unang ma pinangke haluaon i mangondingi hajahaton, songon angka
naposo ni Debata ma tahe!” (I Petrus 2:16). Pasupasu ni Tuhan i ingkon argahononta. Jumpang
hita las ni roha on ndada alani hagogoon manang hamaloonta, alai sian asi ni roha ni Tuhan i do.
Antong ingkon taparhatopot, Haluaon i ima sian Holong dohot Asi Ni Roha ni Tuhan i. Na ro do
pasupasu i sian Tuhanta. Ai Ibana do nampuna saluhutna. Ndang maol di Tuhanta mamasumasu
hita martimbanghon manguhum hita. Amen.

MINGGU XII DUNG TRINITATIS

27 AGUSTUS 2023
Evangelium: 2 Samuel 7: 25 – 29
 Panghatindangion Bagabaga Haluaon Na Sian Jahowa

I. Patujolo
Dame dohot asi ni roha na sian Jahowa Debata, na sumurung sian saluhutna angka roha
dohot saluhut pangantusion ni jolma ima na tongtong mangaramoti jala manggohi hita saluhutna,
amen. Ra, hea do hita mandapot bagabaga sian jolma na asing. Tontu bagabaga i ima angka
panghirimon na manghorhon las ni roha, pangomoan dohot na boi pasonang roha. Hata bagabaga
jotjot do dipasahat sasahalak na naeng gabe uluan, caleg manang na gabe partogi di sada luat.
Dipasahat do bagabaga dalan asa ditanda halak ibana; dalan menarik hati dan perhatian halak
dipillit jala pasauthon sangkapna i. Torop jolma boi mandok jala mambahen bagabagana, alai
ndang songon toropna jolma boi pasauthon sude angka na binagabagahonna i. holan dapot na
niluluanna, dung hundul ibana di hundulanna na sangap i ndang ingot be ibana di bagabagana i,
jala ndang ingot tu jolma na manangihon bagabaga i. tubu ma pandelean dohot kekecewaan sian
angka naung manangihon jala mandapot bagabaga i.
Jamita minggu XII dung Trinitatis on ima tangiang ni raja Daud taringot bagabaga
Jahowa Debata na sahat tu Ibana. Bagabaga na sahat tu si Daud ima bagabaga taringot sipalua
manang panggomgom na marharoroan sian pomparanna. Asa lam tu antus hita mangantusi
taringot tangiang ni si Daud na marpardomuan tu bagabaga ni Debata tu ibana, masuk ma hita tu
hatorangan ni turpuk jamita on.

II. Hatorangan ni Turpuk

Buku II Samuel ima udut ni buku I Samuel na manaringoti taringot panggomgomion ni
raja Daud sian luat Judah (tungkan dangsina ni Israel (ida II Sam. 1 – 4)) sahat tu saluhut bangso
Israel na sampulu dua marga (Israel Utara dohot Israel Dangsina (ida II Sam. 5 – 24)). Sian
hatorangan i boi ma anutsanta buku II Samuel on pabotohon taringot sejarah harajaon ni Israel
dungkon gabe raja ibana taon 1010 – 970 andorang so tubu Jesus Kristus na disurathon sada
kelompok teolog Israel na digoari kelompok deutronomis.1
Dungkon gabe raja si Daud manggomgom saluhut Israel (utara dohot dangsina)
dipanghilalahon ibana do pandonganion, pangaramotion, dohot keberpihakan ni Jahowa Debata
di ngoluna sandiri. Jahowa Debata do na mamillit jala na manotophon si Daud marhite si Samuel
gabe raja gumomgom Israel singkat ni si Saul (1 Sam. 16: 1 – 13). Ndada holan na mamillit jala
manotophon Jahowa tu si Daud, dohot do na mandongani, mangaramoti jala paluahon si Daud
sian ragam angka na jat na dipatupa angka bangso humaliang Israel (1 Sam. 17: 42 – 58; 1 Sam
30 – 31) dohot si Saul na so manghalomohon si Daud gabe raja gumomgom Israel (I Sam. 19: 1
– 7; 20: 24 – 34; 26: 1 – 12) sahat tu punsu ni harajaonna manggomgom saluhut marga Israel.
Nang pe nunga sahat tu punsu harajaonna adong dope na hurang dipanghilalahon ibana,
songon na hurang singkop harajaonna manggomgom Israel jala patuduhon habalgaon dohot
hamuliaon harajaon Israel rea di sandok Israel dohot di sandok bangso humaliang Israel. Na
hurang ima ndang ojak jala ndang jongjong dope bagas joro di harajaonna. Jala marsangkap ma
si Daud laho pajongjong bagas joro, jala dipabotohon ma sangkapna i tu panurirang Natan (2
Sam. 7: 1 – 3). Molo hasomalan bangso Timur Dekat Kuno (Ancient Near East) mansai ringkot
do hajongjongon bagas joro di sada harajaon. Ndada holan inganan parsaorannasida laho
1
Kelompok Deutronomis merupakan sebutan yang diberikan kepada para teolog penafsir kitab Taurat (Kejadian,
Keluaran, Imamat dan Bilangan) yang kemudian membuat menuliskan ulang empat kitab Taurat tersebut yang
disebut dengan kitab Ulangan. Kemudian menuliskan ulang mengenai sejarah Israel setelah Israel sampai ke tanah
Kanaan sampai kepada kehancuran Israelpai ke tanah Kanaan sampai kepada kehancuran kerajaan Israel (kitab
Yosua, Hakim – hakim, I dan II Samuel, I dan II Raja-raja, I dan II Tawarikh). Kelompok Deutronomis menekankan
mengenai otoritas atau pemerintahan Allah terhadap Israel baik pada masa pra monarkhi, monarkhi sampai
kehancuran monarkhi Israel. Pada buku II Samuel kelompok Deutronomis menggunakan beberapa sumber yang
ada sebelumnya termasuk sumber Natan (2 Sam. 12) dan Gad (2 Sam. 24) ketika mereka menjadi nabi pada saat
pemerintahan Daud.
patupahon parsombaon tu debata na disomba jala dihaporseai alai hataridaan dohot hapapataron
hagogoon, hamuliaon, hasangapon ni debata na disomba. Molo dipaadop tu Israel, Bagas Joro
ima hataradiaan dohot hapapatar ni hagogoon, hamuliaon, dohot hasangapon ni Jahowa Debata
dohot hapapatar na mian do Jahowa di tongatonga harajaon ni Israel. Tutu do andorang so
jongjong bagas joro i, nunga dipajongjong bagas parlapelapean inganan habadiaon ni Jahowa
Debata na digoaranna undungundung habadiaon ni Jahowa (tabernakel) inganan parpunguan
Israel. Di tabernakel i adong do bilut inganan na sun badia, ima inaganan parmianan poti
parasian (tabut perjanjian) na marisihon replika batu na tarsurat Torah, manna dohot tungkot ni
si Aron. Ima hataridaan Jahowa sandiri na mian rap dohot bangso Israel jala manggomgom
saluhut Israel.
Tung mansai uli situtu do sangkap ni si Daud on molo hombar tu hadirionna dohot
marnida hamuliaon harajaon ni Israel na ginomgomanna dohot dipanghatindanghononna taringot
tu pangaramotion, pandonganion dohot haluaon na dipatupa Jahowa sandiri tu ibana. Nunga
patut nian dipajongjong si Daud sada bagas na timbo jala bagas joro na bidang jala na balga na
gabe inganan parmianan ni Jahowa. Jolma do marsangkapi dalanna, alai Jahowa do na
patontuhon dalanna dohot patulushon lomo ni rohaNa. Ndang ditolopi Jahowa sangkap ni si
Daud laho pajongjong bagas joro i (2 Sam. 7: 4 – 16). Nang pe disundati Jahowa sangkap ni si
Daud marhite panurirang Natan alai dipasahat do bagabaga ni Jahowa Debata tu ibana, ndada
holan tu ibana sahat do tu pinomparna di na manggom Israel (ida 2 Sam. 7: 4 – 16 patudos tu 1
Sam. 16: 11 – 13; 2 Sam. 8: 6, 14; Psalm. 89: 27). Ndung dipasahat si Natan saluhut na
nihatahon Jahowa taringot na so jadi si Daud pajongjong bagas joro di Jahowa jala taringot
bagabaga pandonganion, pangaramotion dohot haluaon na dipatupa Jahowa tu si Daud sahat tu
pinomparna, masuk ma ibana tu bilutna martangian (2 Sam. 7: 17).
Di partangianganna i jumolo ma dirujiruji si Daud hadirionna dohot mangarimangi
parulaonna boasa tung disundati Jahowa sangkap na denggan na disangkapi si Daud laho
pajongjonghon bagas joro i, jala tung aha ma keistimewaan hadirionna umbahen pola ingkon
jaloonna bagabaga pangaramotion, pandonganion dohot haluaon na pinatupa Jahowa tu ibana
sahat tu pinomparna (2 Sam. 7: 18 – 21). Dung dirujiruji si Daud hadirionna jala dirimangi
taringot parulaonna i tubu ma panghatindanghononna taringot hatimbulon hagogoon, hasangapon
dohot hamuliaon ni Jahowa Debata ni Israel mangatasi saluhut hagogoon, hasangapon dohot
hamuliaon ni saluhut debata na disomba sude bangso di sude inganan dohot di sude tingki.
Hagogoon, hasangapon dohot hamuliaon ni Jahowa na so boi disuhat marhite ruang, bilut dohot
saluhut nasa na adong di portibi on. Jahowa do na mamillit jala manodo Israel gabe bangsoNa
jala Jahowa sandiri do na manotophon Ibana gabe Debata ni Israel (2 Musa 6: 7; 3 Musa 26: 12;
Psalmen 57: 7). Laos dihatindanghon si Daud ma saluhut pambahenan ni Jahowa na patuduhon
gogo dohot hasangaponNa na so hatudosan na manaluhon gogo dohot hasangapon debata ni
Misir marhite na pinalua Israel sian parhatobanon Misir (ida 2 Sam. 7: 23–24 patudos 2 Musa
15; 5 Musa 3–4).
Antong ale Jahowa Debata! Sai pahot ma hata naung pinarbagabagaMi taringot tu
naposoMon dohot tu pinoparna (ay. 25). Hata on martudutudu tu bagabaga manang padan naung
nihatahon Jahowa hian tu si Daud marhite si Natan. Alai molo ndang marhasatiaon si Daud
dohot pomparan ni si Daud di saluhut aturan dohot uhum ni Jahowa, na so jadi masa angka
bagabaga songon na dipabotohon si Natan i. Sada sian bagabaga na nihataan ni si Natan ima
taringot haroro ni mesias na sian pomparan ni si Daud. Mesias ima na nimiakhan ni Jahowa jala
na digohi Jahowa marhite TondiNa. Sahalak na saluhut hadirionna digohi hasintongan dohot
hatigoran uhum ni Jahowa Debata. Laos i do na gabe merasa terharu si Daud manjanghon
bagabaga i (pat. Ay. 26 – 28). Ala naung sahat do bagabaga i tu si Daud marpangidoan ma si
Daud sada hot ma ibana dohot pinomparna di hasintongan dohot hatigoran patik dohot uhum ni
Jahowa, jala na so jadi pinomparna madabu tu ulaon na maralo tu hasintongan dohot hatigoran
patik dohot uhum ni Jahowa (ay. 29).
III. Hahonaan ni Turpuk
 Boha do nuaeng panghatindanghononta taringot pandonganion, pangaramotion dohot
angka haluaon ni Jahowa naung masa di ngolunta saluhutna? Aha do na boi bahenonta songon na
hataridaan panghatindanghonon i asa saluhut jolma na asing marnida dahot manangihon
panghatindanghonon i. didongani, diramoti, disarihon do ngolunta on di ragam angka na masa di
hasiangan on. uju marsahit dipasupasu do angka obat, sipanganon dohot siinumon na
diparsaulihon manghorhon hahipason; uju adong na tahirim, diparbisuki jala diramoti do hita di
saluhutna i marhite angka ulaonta asa dapot na niluluan jumpa na nihirim; disarihon do ngolunta
di angka sipanganon dohot siinumon songon i angka silasniroha asa boi hita denggan mulaulaon
di ganup hauma, di ladang, di kantor, di partigatigaan dohot di saluhut ingananta mangula na
denggan hombar tu profesinta ganup. Asa marhite angka naung ulaonta i dalan ni Jahowa
manarihon na ringkot di ngolunta. Songon i di saluhut angka pasupasu naung itajalo na so
tarpajojor saluhutna ala ni godangna. Aut sugari dipajojor saluhut pasupasu, angka panarihonon
ni Jahowa di ngolunta sian na tubu hita di hasiangan on sahat tu sadari on dang siat portibi on
ingananna.
Manang dung dapot na niluluan, dung marhahipason, dung dapot angka na pinarsinta
gabe mandao ibana sian Jahowa, jala didok rohana ala ni gogona, hamaloon dohot hadirionna
umbahen boi ima taruli di angka pansamotan dohot na denggan di ngoluna. Manang molo dang
hombar tu na tapaido manang suhar sian na tahirim gabe dalanta mandele manang mandok na so
sintong uhum ni Debata di ngolunta. Boha do panandion dohot panghatindanghononta di saluhut
pambahenan ni Jahowa? On do na gabe renungan di ngolunta marhite jamita on.
Bagabaga pangaramotion, pandonganion dohot haluaon na sian Jahowa ndada holan tu si
Abraham, si Ishak, si Jakob dohot ndada holan tu si Daud. Marudut do bagabaga i tu partingkian
si saonari, tu sundut sisaonari sahat ro disalelengnilelengna. Molo marhasatiaon do hita tu Ibana,
marhasatiaon sahat ro di ujung ni ngolunta saut ma bagabaga i tu hita. Marhasatiaon di na
mangulahon hatigoran dohot hasintongan patik dohot uhum ni Jahowa di ngolunta; burju di
angka ngolu marhadaulaton na sintong jala na so tupa be adong ganggu ni roha di panarihonon
dohot di pandonganion ni Jahowa di ngolunta. Marmulia jala marsangap ma Jahowa marhite
panghatindanghonta di bagabaga haluaon na naung dipatupa jala na naeng sipatuoan ni Jahowa
muse di ngolunta, Amen.