CHRISTMAS EXPOSURE: HOLY CROSS – SINAIT, ILOCOS SUR INCLUSIVE DATES: DECEMBER 10, 2022 – DECEMBER 27, 2022 MAIKLING PAGLALARAWAN: Napapaloob dito ang mga nangyari sa loob ng humigi’t dalawang linggong pagkakadestino ko sa Diyosesis ng LUISA sa Parish of the Holy Cross-Sinait. PAGSUSURI: Maliban sa aking Summer Exposure naman ay sa aking sariling parokya ng St. Anne Piddig – sa Diyosesis ng LAOAG noong ako ay nasa unang taon palang ng aking pag-aaral dito sa mahal na seminaryo, ito palang ang unang beses na nadestino ako sa North- Central Luzon dahil kadalasan nadedestino ako sa mga diyosesis na napapaloob sa South-Central Luzon gaya ng sa Our Lady of the Rosary – Luisiana, Laguna at St. Anthony of Padua – Ferrol, Romblon Sa buong Simbang gabi, dalawang beses kaming may misa, magsisimula ito sa Parokya sa oras ng 4:00 AM at may misa sa iba’t ibang barangay ng 6:00 PM sa mga covered court nila dahil wala pang mga naipapatayong mga outstations, at kapag Linggo naman ay dalawang beses ang Misa, 5:00 AM at 8:00 AM. May family ministry ako kada hapon at minsan pati sa umaga at dahil dito nagkasakit rin ako ng mga ilang araw dahil sa pagod at puyat isama narin ang lamig ng panahon. Nagserve rin ako sa ibang mga services ng simbahan noong mga panahon na nandoon ako. Nagkaroon rin ako ng pagkakataon na makapagbigay ng Reorientation sa mga sacristan nila at makapagturo ng iilang kanta na dagdag sa mga gagamitin nila sa pagsamba. At noong araw bago ako umuwi ng December 27, nagkaroon kami ng dalawang misa para sa Fiesta ni San Esteban kasabay ng Christmas Fellowship ng parokya at 16 th Sacerdotal Anniversary ng aking supervisor na si Rev. Digna C. Blanco. Kinahapunan nagkaroon ako ng parte sa ginanap na Christmas Fellowship ng kabataan ng mga parokya ng Sto. Domingo, Cabugao, at Sinait dahil di natuloy ang Christmas Institute sa Lagangilang, Abra. Ito ang unang beses kong makasali sa Christmas Fellowship ng mga kabataan at unang beses na nakapagbigay ng Act of Commitment. Kinaumagahan inihatid ako ng mga kasamahan sa simbahan sa mismong bahay namin para mamalagi sa aming bahay sa mga nalalabing araw ng aming Christmas Break at para makapagserve narin sa aking parokya bilang isa ng ganap na Subdeacon. Hindi ko makakalimutan ang lahat ng aking mga naranasan doon, maliban sa karanasan sa usapin ng aking pagmiministriya, tatatak rin sa akin ang mga turo at mga tao na itinuring akong kapamilya sa bayan ng Sinait na magagamit ko lang rin sa aking buhay ministriya at sa aking sariling buhay. PAG-AARAL NG MGA PANANAW:
Magsilbing aral ang lahat ng nangyayari sa ating buhay.
Isipin at alagaan rin ang sarili upang makapagsilbi pa ng mas maayos. Magsilbi sa Diyos at sa kanyang mga anak hangga’t kaya at may pagkakataon. TEOLOHIKAL NA REPLEKSYON: Ang karamihan sa atin kapag ganitong mga panahon ay itinuturing na BAKASYON at makakasama pa natin dapat ang ating mga pamilya, ngunit sa ating mga taong simbahan ay itinuturing natin itong BOKAYSON dahil sa dami narin ng ating gagawin sa ganitong panahon. At ngayon nataon na nadestino ako sa Diyosesis ng LUISA, sa bayan ng Sinait at dito nakahanap ako ng aking mga kapamilya sa mga mahahalagang araw na ito. At dahil malapit lang ito sa Ilocos Norte, may mga pagkakataon na makakapasyal ulit ako doon at magkakaroon ulit ako ng pagkakataon upang makapagpasalamat sa lahat ng naitulong nila sa akin sa kahit anumang paraan. At bilang pangwakas, mag-iiwan ako ng isang talata mula sa Ebanghelyo ni SAN JUAN 12:26 “Ang naghahanda na maglingkod sa akin ay dapat na sumunod sa akin, at saanman ako naroroon ay pumaparoon din siya. Pararangalan ng Ama ang sinumang maglingkod sa akin.”.