¿PITAQ WAÑUCHIWACHKANCHIK?

Dr. Ciro Gálvez Herrera

Mana llakipayakuq llaqtapi, qacha yakuyuq, qacha wayrayuq llaqtapi

wakcha wischupasqa kawsani.
Arí musyanim, llaqtay qayawasqanta,
wawqiykunata kallpanchanaypaq, sapinchikkunawan tinkuspa
purmasqamanta hatarichinaypaq.

Sachakunapas, urukunapas wañuchkan,

riti urqukunapas chulluchkanña, chakraykunapas qalayasqaña
minakunapas, fabrikakunapas manas yakuta, nitaq wayrata qanrachanchu
hinaptinqa, pitaq wañuchiwachkanchik?
Pim cansirta qallaykachirqa, sapa punchaw runa wañunanpaq?
pitaq yanayta wañuchirqa?

Mama kukallay willaykullaway, pitaq wañuchiwachkanchik?

protestaqkunam balyasqa wañuchkan, wakinñataq yarqaymanta, utaq cansirwan,
hinallañam wañuypipas kawsaypipas kayqa,
yanaypas wañusqaña kaptinqa, imapaqñataq kawsayman?
wakchalla churichaykunapas, chiwchicha hinam simichanta kicharin
tantachata mañakuspan.

Wañuymanta kutimuyta atispaqa, paykuna raykuch kutimuyman

Chakraykuna raykutaqcha kutimuyman, saqisqay chakraykuna rayku,
yanay raykutaqcha kutimuyman, wañuypiwan kawsaypichá kayman.
wiñaypaq kuskalla kananchikpaq.

Ripukusaq, ripukusaq, kunan hina watankama,

kawsaspaycha kutimusaq, wañuspaycha manañaqa
Mama pachallay, tayta Wamani, chaskiykullaway,
kunan hina watankama, kawsaspaycha kutimusaq, wañuspaycha manañaqa.