ACARA ADAT

MANOPOTI HAPOSEAON
(MALUA SIAN PANGKANGKUNGI)

Mamestahon na malua sian panghangkungion/Lepas sidi.

1. Molo di pestahon di jou angka horong ni hula hula , dongan sahuta dohot angka ale – ale
paradeon ni hasuhuton ma tudu- tudu ni Sipanganon.
2. Hula hula di Parade ma dekke toltol 1 ( saekor do dekke molo ulaon di jabu diulaon
marhasohotan pe tolu, ulaon panakkok saring saring, dohot horja bolon ) jala di bahen ma
dengke torop mandongani dekke toltol i.
3. Ulos parompa

1. PEMBUKAAN OLEH PROTOKOL

Denggan mulak sian Kebaktian dung hundul suhut dohot angka namardongan tubu jouon ni
Protokol ma angka horong ni Hulahula
Protokol : Santabi godang ma di hamu raja ni hula- hula nami asa masuk ma hamu raja nami tub
agas nami asa ta pukka ulaonta , Hulahula …………… tulang ….. tulang rorobotnamai
Bona tulang ……. . Ale- ale , dongan sahutanami loas songoni ma pangula ni huriaNami.
( Dung masuk hulahula pintor di jalo angka boru ma siboanboan ni hulahula jala di paune tu
inganan na)
Protokol : Marsiadoadopan ma hita Raja nami
( Molo dung tipak Hulahula sude hundul di ingananna )
Protokol : boha raja nami ngaboi mulaanta ?
( Molo dung di alusi raja ni hula hula pintor borhat ma hasuhuton pasahat Tudutudu ni sipanganon )

2. PASAHAT TUDU-TUDU NI SIPANGANON

a. Pasahat Tudu-Tudu ni Sipanganon tu Hulahula
Protokol : “Di hamu hula-hula nami Raja (didok margana), di ari na uli di bulan na denggan on hupasahat
hami tu hamu tudu-tudu ni si panganon na marsaudara, tudu-tudu ni panggabean parhorasan ma on
rajanami. Asa songon hata ni si tua-tua ma dohonon,” Bagot na marhalto ma natubu di robean,Horas
ma hamu na manjalo, horas di hami namangalean. Botima!”
b. Hulahula pasahat Dengke tu Hasuhuton.
Hulahula : “Di hamu Raja ni Pamoruonnami, asa dos tuatna dos nangkokna, mangarade ma hamu!Di son
hupasahat hami tu hamu dekke simudur-udur, dekke sitio-tio, dekkesahat. Asa sai mudur-udur ma
hamu tu dolok tu toruan, sai tio ma angka ngolu-ngolu dohot mual inumonmuna. Sahat ma tutu angka
nauli nadenggan jaloonmu sian Tuhanta, asa las ma rohamu.
Sitiptip ma sihompa golang2 pangarahutnaTung songoni pe natupa sai godang ma pinasuna.
4. TANGIANG MANGAN
a. Tangiang mangan sian Paidua ni Suhut
b. Huhuasi ni Sipanganon sian Paidua ni Suhut
4. MANGUPA NA MALUA
( Mangupa namalua boi do Tulang na/ Nantulang jala boi do natorasna )
Tulang : Di ho bere / anak hasian nungnga malua ho sadarion sian pangkangkungion ni natorasmu , alani
gabe lam matoras ma ho tujoloan on jala husulang ma berekkon / anakkon :
o Dengke Sahat, asa anggiat ma antong sahat tu ho sude Pasupasu ni Tuhanta.
o Dengke Saur do on huhut asa anggiat saur maulibulung berengku tumpahon ni Amanta Debata.
o Dengke Sitio-tio do i huhut, asa anggiat sai tio sude parngoluonmu, jala dapot ho sude na
pinarsinta ni roham

5. MAKAN BERSAMA
6. TANGIANG DUNG SIDUNG MANGAN (sian Pangula ni Huria)
7. MANJALANG NA MALUA
8. MARHATA JAMBAR
Dung sun mangan dohot manjalang na Malua, dibagi ma tudu-tudu ni sipanganon, jala
Protokol ma mangaturhon.
a. Protokol :
 Andorang so tauduti pangkataionta, jumolo ma jolo tapahantus parjambaran dohot hasahatanna, ala
surung-surungmu do i, hamuma mangatur Rajanami, songon dia somalna diparadatonta, saguru tu
hamu do hami rajanami. Botima.
b. HULAHULA
Mauliate ma Amangboru, ala tong-tong do dipasangap hamu hami hulahulamuna. Ala holong ni
rohanami tu hamu borunami, adong Jambar Taripar tu hamu horong ni borunami anggo sian hami
horong ni hulahula hamu ma na mangatur angka amang boru hombar tu adat na masa di huta muna on
amang boru .
c. Protokol :
Mauliate Rajanami, nungnga uli jala denggan i. Didok na tuatua jolo di seat hata ma asa di seat raut,
tarsongonon ma partordingna raja nami:
1. Namarngingi parsiamun : Tulang rorobot
2. Namarngingi parhambirang : boru, bere, ibebere
3. Osang parsiamun : Hulahula
4. Osang parhambirang : Pangula ni huria
5. Somba-somba : Angka Tulang dohot Hula-Hula
6. Soit : Sihal-sihal (termasuk dongan sahuta)
7. Ihur-ihur : Hasuhoton(suhut dohot dongan tubu) Botima.

9. MARHATA ADAT
Hulahula :
Mangkatai ma hita amang boru, songon nidok ni ompunta sijolojolo tubu :
“Danggur ma danggur barat, tongon tu duhut-duhut; Ia nungnga hita mangan, sagat marlompan
juhut, sombu minum tuak tangkasan, tinahu ni amanta suhut”
Ba, manungkun ma hami nuaeng tu amang boru :
“Diama langkatna, dia ma unokna; dia ma hatana, dia ma nidokna” tangkas ma paboa amang boru.
Botima.

Protokol
Ima da tutu Raja nami , ia disungkun-sungkunmuna taringot tu sipanganon i, ba alusan ma tutu, alai
parjolo ma dohonon nami, taringot di sipanganon i, ulahan nami dope mandok :
“Godang sibutong-butong, otik sipir ni tondi, tung so sadia pe na hupatupa hami i, sai pamuarnas
ma i tu pamatang, saudara tu bohi”Ia lapatan ni sipanganon i, ba’ Parhorasan, Panggabean do.
Botima.

Hata ni Hahadoli
Ba’ gabe-gabe do hape dohot horas-horas lapatan ni sipanganon I :
“Tano ni Pakat ma hatubuan ni andaliman; Ba’ horas ma hami na manganton, ba sai lam tamba
sinadongan di hamu na mangalehon” Alai amang boru, sai marangkup do na uli, mardongan do na
denggan, onpe tangkas ma paboa hamu siangkupna songon na hundul, sidonganna songon na
mardalan. Botima.

protokol
Tutu do i, sai marangkup do nauli, sai mardongan do na denggan, on pe paboaon ma tutu siangkupna
songon na hundul, sidonganna songon na mardalan.
Pandok ni Ompunta sijolojolo tubu :
“Ompu Raja di jolo martungkot siala gundi; angka na uli pinungka ni angka ompunta na parjolo,
tama do ihutonnon ni hita angka na parpudi” Mangihuthon hasomalan ni angka ompunta na parjolo i,
ia adong na masa di iba tarlumobi silas ni roha ingkon paboaon do i tu angka dongan sabutuha dohot
tu sude angka tutur.
Di bagasan ari sadari on na malua sian pangkangkungi do anak nami, na margoar si . . . . . . na
pinatupa ni hurianta marhite-hite naposoNa di gareja.
 Jadi i ma da rajnami na tahalashon di ombas on, jadi hupio hami pe hita sude, asa rap ma hita
manghalashon i huhut mandok mauliate tu Tuhanta, jala rap hita mangido asa di dongani Tuhan ibana
tu joloan on.Jadi tangiang dohot pasupasu do na hupangido hami tu hamu sude angka na
pinorsangapan, tarlumobi tu angka Tulang dohot Hulahulanami. Botima.

Hulahula
Bai’ i ma hape umbahen na dipapungu hamu hita dibagasta na marampang na marjual on, na malua
sian pangkangkungi do hape berenami nangkin sian huria ni Tuhanta. Na uli ma i antong, jadi parjolo
ma tadok mauliate tu Tuhanta Parasiroha i, na mangalehon hahipason di berenami, gabe boi ibana
sadari on manghatindangkon haporseaon na malua sian pangkangkungi.Ipe tu hita saluhutna na
huparsangapi hami, amanta raja, inanta soripada, lumobi tu hamu Tulang . . . . dohot bona Tulang .. . .
. ., dohot hita napungu dison nungnga tangkas ta bege sian hasuhuton na manghalashon ala na malua
sian pangkangkungi do hape berenami, pahompumu ido umbahen marpungu hita di tingki on. Ala
poso dope anak nami on, harop do roha nami di podamuna na denggan I, angka amang, inang,
tarlumobi di hamu Tulang dohot Hulahulanami, na gabe bohal ni anak nami on. Botima.

10. Mandok hata

 Dongan sahuta
 Pariban
 Aleale
 Pangula ni huria
 Hulahula ----
11. PASAHAT PASITUAK NA TONGGI TU TULANG DHT HULAHULA
12. MANGAMPU SIAN SUHUT
a. Boru, bere , ibebere
b. Namardongan tubu
c. Na Malua
d. Natoras ni na Malua
Tama do antong hita mandok mauliate tu Amanta pardenggan basa i na tong-tong mangiring-iring hita
saluhutna sian na mamuhai hita boi tiur jala denggan mardalan ulaonta on sahat tu na naeng
pasimpulon ta. Suang songoni nang di sude pasu-pasu naung pinasahatna tu hita ganup marsada-sada,
tarlumobi ma i di anakni ...................Dihamu Haha Anggi, Borunami suang songoni nang Raja ni
Dongan Sahuta, lumobi raja ni hulahula nami saluhutna mauliate ma hupasahat hami di harentaon ni
roha mu mangadopi gonghon dohot jou-jou nami, suang songoni di pambaenan mu nadennggan, sai
Tuhanta ma nambalos sude na i, asa songon nidok ni umpasa ma dohonon:
Tampulan Sibaganding di Dolok ni Pangringan
Horas ma hita namarhahamaranggi marsipairing-iringan.
Tu hamu Tulang nami dohot Raja i Hula-hula nami,Mauliate di sude nauli nadenggan naung pinasahat
mu tu hami ianakkonmu.Tangkas do hu pangkilalahon hami burjumu marboru .Dipasahat hamu
dengke simudur-udur, Dengke Sitio-tio, Dengke sahat. Dipasahat hamu ulos si ganjang rambu, Ulos
Holong tu Beremuna / Pahompu muna. Anggiat ma antong asi roha ni Tuhanta sahat ma tu hami
pamoruonmu tarlumobi ma iDi pahompu mu ........ songon pasu-pasu naung pinasahatmu marhite
tangiang dohot elek-elek tu Tuhanta Jesus Kristus.
Molong tung mardomu sirang pe hita pe annon sian bagas on, tangiang nami di hamu Tulang dohot
Hula-hulanami sai di dongani Tuhanta ma hamu sahat tu bagasmu ganup marsada-sada.
Tarsingot tu Hata nauli hata nadenggan dohot sipaingot naung pinasahat mu
Abing ma i antong di abingan nami, Tuat dia abara nami, Jala hot ma i antong di
 simanjujung nami, Asa songon ni dok ni umpasa ma antong dohonon nami:
Turtu inna anduhur, pio-pio inna lote
Hata nauli hata nadenggan naung pinasahat mu sai unang ma muba sai unang ma mose.
Naung sampulupitu ma juma ni sampulu ualu,
hata pasu-pasu, hata nauli nadenggan napinasahatmu na i
hu ampu hami ma i antong martonga ni jabu.

13. TANGIANG PANUTUP

Tangiang Panutup sian Hulahula.
14. PASAHAT UCAPAN SELAMAT TU NA MALUA DOHOT NATORAS NA
(MARSIJALANGAN).