I n d u n i n g m asa

i n g mp
n
r yu a

ta
ina

usu
Sem

k
Novenang
k a p u r i a n
k i n g

Virgen de los
Remedios

AGOSTO 30-
SEPTIEMBRE 7 2023

Departamentu ning Sinyorhayskul

 PANALANGIN KING ALDO-ALDO

Lusuk kakatas-katasan a Birhen Maria, Indu ning Kapaldanan, sibul a e

metati at ilug a maragul a panibatan na ning pakalulu ning Dios,
gagalangan ding Angeles at sasamban ding Santos; king mal mung
arapan at king maragul a kagalangan magsakab ya ing alang
pasalamat a melalang, yadwan na keka ing pakalulwan me ining
mamintakasi keka; ba'kang lungkas a lugud, kalinis-linisan a Indu ding
palpikasala, tula ting malungkut, mapanyaup king ganang kaministilan,
papasyag kung alipin mu ku; ingatan mu ku't ampunan, ba ra kang
asuywan, at apakiyabutan ku ing yadwan ku kaniting nobena, nung
makatula king Anak mung y Jesus, layun makarangal at makaligaya
keka. Yanasa

PANALANGIN KING MUMUNANG ALDO

Makasaplalang Reyna, Indu nig Pakalulu, Ginu ning sablang kapitutulan,
hiyas ding Birhenes at lalung wagas karela ngan; pupudian da ka't
pasalamatan at paligayan, uling pepabalwan na ka ning Anghel karing
mangapalad a pengari mu inyang pangagli ra kang kipnuan king grasya,
ibat ne ketang kisap ning kalinis-linisan mung panga-tau: ipagkalam mu
Indu king uliniting e ugaling lugud ning Dios keka king pangasubalyan mu
king manang kasalanan, pakiyabutan mu sa king malugud mung
pamagampun ing mikabus ku king kasalanan, at mitapuk king pusu ku ing
matutus a kapagnasan sumuyu king Anak mu't Linalang kaku at keka
naman Indu ku, ing grasyang yaduan ku kaniting nobena, nung makaligaya
king Dios at makarangal keka. Yanasa.
 PANALANGIN KING KADWANG ALDO
Birhen Maria ning sablang kapaldanan, sari king kalinangan, Abigail a
sadsad king kayisip, ganap a uliran ding confesores a lakwas ganap dili
karela ngan; pupurian da ka't pasalamatan, uling mibayit kang masala't
maningning antimong tala ning Alaya, patuyag mu ing panyatang ning
Divino Jesus, kalugud-lugud mung Anak, at Mangabus kekami; ipayintulut
mu, Indu king pasalan ne sa ining kaladwa ku ning sulu mung maningning
a maulagang manimuna king mal mung Anak, at king uli na ning
pamamilatan mu, apalaran ke sang tanggapan layun manatili ya kanaku
manga man king manga, at akamtan ku naman ing yaduan ku kaniting
nobena nung makatula king Dios a mabibie mag-Ari ning Ibpa ampon img
Espiritu Santo, manga king alang angga. Yanasa.
PANALANGIN KING KATLUNG ALDO
Mapamakalulung Maria, mayubu't malugud a Indu mangabyasang
maestra ding anggang Doctores, mitapukanan king kabiyasnan ning
Dios maygit lalu king karela ngan sabla; sasamban da ka't pupudian,
uling dinaun da ka king Templo ning Dios, bapu ikang Divina, Señora,
ing malinang at matampa nang Templo ning Santisima Trinidad; pauli
ning e paulat a tula mu inyang akit mu ya ing mal a Anak mu king
Templo libutad ding Doctores; yaduan ku pu keka malugud a Indu king
idurup mu ku king kakatas-katasan a Dios king bie iti ba keng
apalasintan at asuywan, layun apasalamatan alang likat ketang bie
metung; ipagkalam mu pu, Indu iting lugud a yaduan ku keka keting
nobena, nung makatula king Dios at makarangal naman keka. Yanasa

PANALANGIN KING KAPAT A ALDO

Mayupayang Maria, matibe rang kuta ring Martires, matepangan dili karela;
pupudian da ka't pasalamatan, uli ning mal nang kaburyan ning Dios
midesposada ka king kapalad-palad a Patriyarka Señor San Jose, meybe
kong kawangis ning kabyayan ning Banua pagamu-amu ku pu Ginu king
ulining pangayintuliran na ning malinis mung Esposo, pakiyabutan mu sa
king Anak mu iting kalinisan king kaladwa ku, layun manatili king
masampat a pamakilimbal keka, at igale kung parati ing kapuryan mu king
ligaya banua. Yanasa.
 PANALANGIN KING KALIMANG ALDO
Kasantu-santusan a Birhen magkoronang batwin, malugud a Indu ding
nuan a Santos Apostoles, lulanan a mepiling maulaga karela; pupudian da
ka't pasalamatan, uling mepili kang milyaring Indu ning Anak ning Dios a
mikatawan tau king kalinis-linisan mung atyan, misaplala ka kanitang matas
a dangalan inyang sabyan mu: Mapalad a Ginu, akung alipan mu, pauli
niting kakatas-katasan a mysteryu pagamu-amu ku Indu, king pagkalamam
mu ku dit mu man kaniting kababan mung mekapangayintulid king uli na
akamtan ku naman sa ing maging anak na ku king grasya na, at ing lugud a
yadwan ku kaniting nobena nung makaligaya king Dios at makarangal
keka. Yanasa

PANALANGIN KING KANAM A ALDO

Kasantu-santusan a Birhen wagas malino at maningning dang sulu ding
Propeta, siwala nang marimla ning Espiritu Santo, lakwas pa king dimla't
yumu na ning siwala ra ila ngan; pupudian da ka't pasalamatan, Birhen a
miglakbe karing kabundukan pauli ning lugud mu, king pamanintun mu
king pisan mung y Santa Isabel at king e ugaling Propeta't manimuna king
Anak mu, a y San Juan Bautista, a king uli mu meging Santo ne kanita at ing
Indu na pigkalaman neng grasya ning Espiritu Santo; pagparalampu ku
Indu ku king dalawan mu ku king pamagampun mu, ban king uli na ning
malugud mung pamandalo mabating ing kabiguan a dalumdum ning
kasalanan, at apangayintuliran kung mikapnuan king sala ning Espiritu
Santo, at ing lugud a yadwan ku kaniting nobena nung makaligaya king
Dios at makarangal keka. Yanasa
 PANALANGIN KING KAPITUNG ALDO
Kalugud-lugud a Birhen Maria, mitmu king alang anggang grasya, dangalan
ding Patriayarkas makasaplalang lalu karela; pupudian da ka't pasalamatan,
pauli ning lubus mung kapamintuan king kautusan ning Emperador, miras
ka karin king Belen king maragul a kalukan, beyit me ing Ari ning alang
angga, bugtung a Anak ning Dios at Anak mu ne man, king metung a
mipayimburisan a lukib a nu ya karin ing makiput a lalabangan, ibat keti
kipnuan mung tula ing yatu't Banua, diwa't saya ding Angeles ampon tau;
pauli ning payisip a kimtan ning kalinis-linisan mung kaladwa kaniting
mapalad a oras, yaduan ku pu keka, makalmang lusuk a Reyna, pagkalaman
mu kung dit mu man king kapamintuan mu ba'kung apamistulan ing
sablang bage king bie iti, at ing lugud a yaduan ku kaniting nobena nung
makaligaya king Dios at makarangal keka. Yanasa.

PANALANGIN KING KAWALUNG ALDO

Kaliga-ligayang Birhen Maria; Birhen a mipnu king grasya, Reyna't Ginu
ding Angeles, makapalalung bina kabanalan at dangalan karelang lat;
pupudian da ka't pasalamatan, uling kaybat mung mekasaut king kepigilan
mu Ehipto, pepabalu na na ning Anghel king mibalik na ko Nazaret kambe
ning malinis mung Esposo at ing Dios a Anak mu; panigapu ku keka
masaplalang Ester, king kaybat ning pagal, kasakitan, kagulanan keting
karinan ning lua, idala mu ku king balayan ding mangapalad a matibe nang
kuta ning ligaya Banua at ing lugud a yaduan ku keka kaniting nobena,
nung makaligaya king Dios at makaragal keka. Yanasa
 PANALANGIN KING KASIYAM A ALDO
Kayumu-yumuan a Emperatris ning Banua, Kasantu-santusan a Maria,
Indu ning Ginu tang JesuCristo makapalusuk karing anggang Herarkias
at koros ding Anghel at Santo ning korti Banua; pupudian da ka't
pasalamatan king malablab nang sinta ning pusu pauli ning maligayang
bie mu keti, angga ketang mapalad a aldo a mengatmu kang kaligayan
at kamalan, misaplala ka king Koronang sidya ning Santisima Trinidad a
nung nu na ka papakorona king ligayang e mapupus kapilan man,
Reyna ra't Ginu ding anggang Anghel at Santo; pauli na ning e abut a
isip a tulang kimtan ning kalinis-linisan mung kaladwa, panigapu ku
keka ing pakiyabutan mu sa king kalugud lugud mung Anak, king ining
bie ku makiwangis king bie mu ketang ganang agyu ku ba kung
apa'laran ing milub king ligaya a atangalan ku ing maningnig mung
Ibpa, at asamban da ka king Palasyo ning ligaya, at ing lugud a yaduan
ku keka kaniting nobena, nung makaligaya king Dios at makarangal
keka. Yanasa.
PANALANGIN A KAWAKASAN KING BALANG ALDO NA NING NOBENA
O Indung Birhen Maria, Reyna ning yatu't banua, Indu ning Dios
pagparalampu ku king lubus a kapakumbaban at mipnung kagalangan,
pakiyabutan mu sa king pakamalan mung Anak, ing grasyang yaduan ku
keka; ing pagkamalan mong mabye kasalpantayanan ding e bininyagan,
isaplala me't iladlad ing Sta. Iglesya, patibayan mo lub ding kristiyanos
pamiaga't pamakimetung ding Prisipe at Aring bininyangan, pakayapan mo
ding salunan, patapangan mo ding maghingalu, sampat at dimla king
panaun, palakuan mu ing salun, palabungan ing kayatinan a ikasulung nin
kabanalan, pamisama king kasalanan, kapiyadyan king kamatayan, lalung
lalu na ing masikanan mung saup at maulagang bendisyun ketang
makatakut a oras ning matalik a pamagsulit, ban king mayubung
pamagampun mu keyan banua, a nu ka mag-Ari akamtan mi ya pauli ning
pamamintakasi mu ing mal mung Anak a kagum ning Ibpa, ampon ning
Espiritu Santo, manga man king angga. Yanasa

(Ing kawakasan ning balang aldo ning nobena tungayan ya ing Himno
opisyal ning VDLR)