THU

Ephesi 4:29 Thu tha lo reng in kaan chhuak suh se, a tulzia ang zela siam tha turin thu tha apiang
chhuak zawk rawh se, a ngaithlatute tan khawngaihna a lo nih theih nan.

Magic hi kan hria a. Mit dawivaih te kan tia, trick te kan tia. Magician in thehlar ho tih ber hi chu
Magic Trick an tih hi a nia. Magic tak tak kan tih dawi hmang ho hi chu sumdawn nan hmang tho
mahse an in ti lar ve vak lemlo. Magic Trick tak hi chu trick mai mai a nia. Mit in a hmuh thiam loh
dan ber tura thil duan diam tawh mipui tihlim tura thil show a ni ber a. A hmuhnawm hle a ni. Min
tihlim a. A hmuhnawm a. En te hi a chakawm em em thin a ni.

Chuan thil dang leh a awm a. Chu chu rimawi kan tih music hi a ni a. Music hi thil ri mawi deuha
chhuak kan benga kan ngaihthlak a, min tihlim veng veng thei thil hi a ni a. Mi thenkhat te phei hi
chuan rimawi tello a awm thiamlo te hi an awm a. Pathian in mihring te hnena a pek khawvel miten
universal language an tih mi zawng zawng hriatthiam a ni.

Magic kan tih leh Music kan tih te anga thil ropui deuh mai a dang pakhat a awm leh a. Enge a nih in
rin le? Chu thil chu THU hi a ni. Saptawnga word kan tih hi a ni a. Magic anga hman theih mi dawi
thei thil a ni a. Music ang pawh a hman theih kan benga kan ngaihthlak a kan rilrua cham reng thei
thil hi a ni bawk.

Zanin a kan ngaihtuah ho atan ka rawn duan chhuah ve chhin chu kan thupui tur chu THU a ni.

Medical lam mithiam te zirna atanga kan hriat thil pakhat chu, cancer thlen tu lian ber pakhat chu
cigarette hi a ni a. Mahse kum 2003 khan Sweden rama DNA lam zir mi te chuan cancer thlen tu hi
cigarette zuk vang nilo in genetic a ni tih an hmuchhuak a. Chu chu mi pakhat chuan a thianpa a hrilh
a. A thianpa zial zu ngai miah lo khan a zuk phah ta. Mahse hei hi dawt a ni. Awm ang taka a dawt
sawi avangin zial zu ngailo chuan zial a lo zuk phah daih. Engatinge? THU vang a ni.

Khawvela thil pawimawh em em, a tello a kan awm theihloh chu THU hi a ni. Tawngtheilo tak ngial
pawn kut zai zirin (sign language) thu an sawi thin a. Mitdel te pawn thuziak chhiar nan Braille an zir
a. Chuti khawpa pawimawh THU chu enge?

1. THU pawimawhna:

Thu pawimawhna chu mitin te hian mahni ngaihdan theuh ziak rawh u ti dawn ta ila, kan ziak treuh
thei ang. A pawimawh zia hria kan ni vek. Thu in mi a tih danglam theih zia te pawh kan hria a.
Thu chuan mi a ti lungai thei a, a ti mangang thei. A ţah tir thei a, a nun a tihchhiat sak thei.
Chutiang bawkin a tihlim thei a, a ti nui thei. Beiseina a pe thei a, hlawhtlinna a pe thei.
Thu chuan mi ngaihtuahna thlak danglam sak thei a, mi chunga a rilru puthmang a thlak thei. Chu
thu vek chuan nun thar a pe thei a, nun hlui ah pawh a kir tir leh thei a ni. Thu chuan thil tam tak a ti
thei. „Ţawngkam ţha in sial a man‟ tih kan pi pute tawngkam hman thin te pawh kan hria. Thu thiam
nih kan chak vek. Keichu thu ka thiamlo a kan tihna chhan ber pawh mi rilru hneh theih ve kan chak
thin vang a ni. Thu thiam te hi mihring te hian kan ngaisang a, kan zah thin.

Counselling ah ngat phei chuan tawngkam pawimawh zia chu, thu chheh sual zeuh avangin
counselling a fail vek thei a ni.

Chutiang taka pawimawh chu a ni a. Thu chu enge?

2. THU leh hla:

Thu leh hla tiin ka dah ve ngawt a. Mahse hla lam ka sawi dawn lo. Thu hi kan beng ah a thleng thin
a, kan mitin kan chhiar bawk a. Kan rilru in a ngaihtuah chhunzawm thin a ni.

MLTR in Lammual ah concert an rawn nei dawn a. Thu leh hla a tam em em a ni. Sawi a tam a,
ngaihdan a dang a, thlir dan thiam a har a ni. MLTR ngaisang tu tamtak ten an concert hma a zai tur
te an ngaihsan ve loh avangin an sawisel a. Mizo mipui te an lungawilo, mahse ngaihdan in an loh
avanga lungawi lo an ni zawk si. Sawitu leh sawi a tam na na na chuan ngaihven ve lo tu te beng hial
a thleng ve a. Mak tiin thlir an hlawh phah hial a ni. A bul ţanna, THU a ni.

Thusawi pakhat ka ngaihthlak ah chuan speaker khan nu ho a zilhna tawngkam pakhat a ni. “In pa te
bulah mi rel rel suh u, an huat loh pui pawh an huat phah thin a nia” a tia. Nu ho a zilhna mah ni se,
ngaihtuahna a ti thui ve hle chuan ka hria. Mi zaidam leh dawhthei tak te pawh hi (keimah ang te) an
lakah mi an phun an phun chuan a dawhtheihna leh zaidamna avang khan a dawh tluan dawn miahlo.
A dawhtheih chhung kha a rei a nimai. Tlin loh tawp ah chuan rik ve leh hluai zel a awl tho.

Dawt a inpuh te, in hauhna tawngkam te, mi huatna tawngkam te, hmuhsitna tawngkam te, ai chuan
hmangaihna tawngkam te, induhsakna tawngkam te, inngaihsakna tawngkam te hian mi thinlung a
hneh zawk fo a ni.

THU leh hla hian thui takin kan nun a kaihruai a ni. Anih THU chu enge?

3. THU chu enge?

THU chu enge? Kan sawi tawh a, thu tello chuan mihring te hi kan famkim lo. Thu vangin kan lawm
thin a, thu vang vekin kan inchhir thin. Thu vangin kan nun a danglam thin a, thu vangin nun thar
kan nei thin. Thu vangin kan chezia a lo danglam thin a, thu vangin mi thar ah kan chang thin. Thu
vangin hrehawm kan tuar thin a, thu vangin kan chhel thin. Thu chuan min thlamuan thin a, thu
chuan min hnem thin. Thu tello chuan kan chakna zawn ka hre theilo thin a, thu chuan chakna min
pe thin. Thu chuan mi nun siam tha turin theihna min pe thin a, thu chuan hmun hla ah te min hruai
thleng thin.

In hnen a ka sawi duh chu, THU chu Isua Krista a ni tih hi a ni. Pathinin min pek THU chu a Fapa
Isua Krista hi a ni.

Johana 1:1-5 A tirin Thu a awm a, Thu chu Pathian hnenah a awm, Thu chu Pathian a ni. Chu mi
chu a tirin Pathian hnenah a awm. Engkim a zain ama siam a ni; thilsiam zawng zawng hi ama siam
loh engmah a awmlo. Amahah chuan nunna a awm; chu nunna chu mihringte enna a ni a. Eng chu
thim zingah a lo eng a; thimin chu chu a hre lo.

Krista vangin kan nun, kan THU i ti danglam ang u. Krista chu THU a ni si a. Chu THU chu i nunpui
ila, Krista tan tiin nitin a THU i nunpui ang u.