HAZRAT MUHAMMAD MUSTAFA

SALLAL LAAHU ALAIHI WA SALLAM KI SEERAT

PART I - PAIDAISH SAY 40 SAAL TAK

Quraish Makkay Mukarramah ka ek mashhoor qabila hai jo Hazrat Ismaeel a.s. ki aulaad
mien say hai , qabila quraish mein kayee baday baday khandaan thay un mein ek
khandaan Bani Haashim ka tha , Haashim apnay khandaan mein baday muazzaz ,sakhee
aur mehmaan nawaaz shaks thay , Haashim kay betay Shaiba hai jo Abdul Muttalib say
mashhoor huay , Abdul Muttalib kay betay Abdullah hai , Abdullah apnay baap kay
mehboob betay thay unki shaadi qabilay quraish hi kay ek baday gharanay mein huyi
unki biwi ka naam Aamina tha , Hazrat Bibi Aamina kay ghar ek bachcha paida hua jisnay
andhayri duniya ko ujalay mein badal diya Arab ki sooti bastiyon ko jaga diya , yehi woh
bachcha hai jis ko duniya MUHAMMADUR RASOOLUL LAAH SAWS kay naam say yaad
karti hai , Arab kay dastoor kay mutabiq daayi Haleema nay Aap SAWS ko doodh pilaya.

Aap SAWS jab 6 saal kay huay to Aap SAWS ki walidah ka inteqaal
hogaya aur Aap SAWS kay us duniya mein tashreef laanay say pahlay hi Aap kay walid
ka inteqaal hogaya tha aur Aap 8 saal 2 mahinay 10 din kay huay to dada Abdul Muttalib
ka bhi inteqaal hogaya. Phir Aap SAWS kay chacha Abu Talib kay saath Mulk e Shaam ka
pahla safar kiya.

Quraish kay loog Aap SAWS ko ameen aur sadiq kehtay thay, isliye Aap
SAWS amanatdaar aur sachchay thay Hazrat e Khadija (R.A.) nay Aap SAWS ko maal
tijarat say kar Mulk e Shaam rawana kiya, Aap SAWS nay poori amanatdaari say tijarat ki
Aap SAWS kay akhlaaq say woh bay-had mutasir huyi, kuch arsa kay baad Hazrat e
Khadija (R.A.) nay nikaah ka paighaam bheja, Aap SAWS nay manzoor farmaya, nikaah
kay waqt Huzoor SAWS ki umar 25 saal aur Hazrat e Khadiya ki umar 40 saal thi, Aap
SAWS kayee-kayee din ka khaana – paani lay kar ek pahaad kay ghaar jis ka naam Ghaar
e Hira tha tashreef layjaatay thay aur wahaan Allaah ki ibadat kartay thay.

PART II - 40 SAAL SAY 53 SAAL TAK

Jab Aap SAWS ki umar 40 saal ki huyi to Hazrat e Jibraeel (A.S.) Ghaar e Hira
mein tashreef laaye aur Aap SAWS ko us baat ki basharat di kay Aap SAWS Allaah kay
Rasool hai Quraan e Majeed ki pahli ayatein “ iqra bismi rabbikal lazee khalaq – khalaqal
insaana min alaq” nazil huyi, Aap SAWS nay pahlay-pahlay chupay-chupay islaam ki
dawat di, sub say pahlay Aap SAWS ki biwi Hazrat e Khadija (R.A.) nay islaam qubool
kiya, mardon mein Hazrat e Abu Bakar Siddiq (R.A.), ladkon mein Hazrat e Ali (R.A.) aur
khadimo Zaid bin Harisah (R.A.) nay islaam qubool kiya.

Rafta-rafta islaam ki awaaz loogon kay kaano mein padhnay lagi, 3 saal tak
barabar chipay-chipay islaam ki tableegh hoti rahi, is arsay mein 30 - 35 aadmiyon nay
islaam qubool kiya, Kaaba kay qareeb ek gali mein Hazrat e Zaid bin Arqam (R.A.) kay
makaan mein Huzoor SAWS aur tamaam musalmaan jama hokar Allaah ki ibadat kartay
thay. 3 saal baad khullam - khulla islaam ki dawat di gayi, uskay saath hi Huzoor SAWS
aur Aap par emaan laanay walon par takleefon aur e’zaaon ka silsila shuruh hogaya.
 Hazrat e Hamza (R.A.), Hazrat e Umar R.A.) wa ghairah nay bhi islaam qubool karliya,
Arab kay sardaaron wa ghairah ki takleefon say tang aakar sab say pahlay Huzoor SAWS
kay kukum say Habsha (ek shaher) ki taraf chand sahaba aur sahabiyaat (R.A.) nay hijrat
ki, usi zamanay mein Aap SAWS nay Taif (ek shaher) ka tableeghi safar farmaya aur
meraaj ka woh hairat-angeez waaqiah pesh aaya jis ko hum baar-baar suntay hai, Makka
kay loogon ki takleefon aur e’zaaon ki ziyaadati nay sahaba ikraam (R.A.) ko majboor
kardiya tha kay woh Makka choor kar kahein chalay jaayein to Huzoor SAWS ki ijazat say
sahaba ikraam (R.A.) nay Habsha aur Madinah Munawwarah ki taraf hijrat ki yahaan tak
kay ab Makka mein Huzoor SAWS Hazrat Abu Bakar (R.A.), Hazrat Ali (R.A.) aur chand
kamzoor musalmaan kay siwa koi na tha, us tarah Aap SAWS nay paidaish say 53 saal
tak Makkay Mukarramah mein apni zindagi guzari yaani nabuwwat kay milnay kay 13 saal
tak musalsal takleefon ko bardasht kartay huay Makkay Muazzamah mein zindagi guzari.

PART III - 53 SAAL SAY 63 SAAL TAK

Nabuwwat kay terway 13 saal jab kay Aap SAWS ki umar 53 saal thi, Aap SAWS nay
Hazrat Abu Bakar (R.A.) kay saath Makka say Madinah ki taraf hijrat farmayi , Aap SAWS
ki hijrat kay saal say hi islaami sun hijri ka hisaab shuru hota hai, us tarah hum aasani
say pahchaan saktay hai kay Huzoor SAWS ki hijrat huay kitnay baras huay. Hijrat kay
dauraan Aap SAWS nay Madinah Munawwarah say taqreeban 30 meel kay faaslay par ek
choti si basti jis ka naam Qubaa hai, qiyaam farmaya aur wahaan ek masjid tameer
farmayi jis ka naam ‘Masjid e Qubaa’ hai.

Madinah kay ansaar nay Aap SAWS ka pur josh isteghbaal kiya , Aap SAWS
nay Hazrat Abu Ayyuub Ansaari (R.A.) kay ghar mein qiyaam kiya farmaya , Madinah
Munawwarah mein 2 yateem bachchon ki zameen thi Aap SAWS nay us zameen ko
khareed kar us mein masjid tameer farmayi jo aaj bhi ‘Masjid e Nabawi’ kay naam say
mashhoor hai, Huzoor SAWS nay Makka say hijrat karnay walay muhajireen aur Madinah
kay ansaar mein bhai charagi ka silsilah qaaim farmaya.

Hijrat kay doosray saal ‘Gazway Bada’r pesh aaya jis mein sirf 313 musalmaan
thay aur kaafir hatyaaron say lais hazaron ki tadaad mein thay, us jung mein musalmaano
ko kamiyaabi mili, 70 kaafir maaraygaye aur 70 qaid huay sirf 14 musalmaano nay
shahadat ka muqaam paya.

Sun 2 hijri mein Huzoor SAWS ki sahabzaadi (ladki) Hazrat Fatima (R.A.) ka nikaah Hazrat
Ali (R.A.) say hua , sun 3 hijri mein ‘Jung e Uhad’ huyi jis mein pahlay to ek hazaar
musalmaan thay aur phir 300 munafiq maidaan say nikal gaye, sirf 700 musalmaan rah
gaye thay, jung kay shuru marhalay mein musalmaano kay qadam ukhad gaaye, usi jung
mein Huzoor SAWS kay dandaanay mubarak (teeth) shaheed huay, aur 70 musalmaan
shaheed huay.

Sun 6 hijri ko Hudaibiyah ki sulah huyi , sun 8 hijri ko Makka fatah hua aur musalmaan
fateh ki haisiyat say Makkay Mukarramah mein dakhil huay, usi saal ‘Jung e Hunain’ bhi
huyi , sun 9 hijri ko ‘Jung e Tabook’ huyi, sun 10 hijri ko Huzoor SAWS nay aakhiri hajj
farmaya, usi aakhiri hajj kay mauqay par Aap SAWS nay Arfaat kay maidaan mein woh
tareekhi khutbah diya jis ka har har lafz ummat kay liye pesh baha khazana hai.
HUZOOR SAWS KA HAJJATUL WIDAA KA KHUTBAH

Aap SAWS nay farmaya,

 aye loogon ! meri baat kaan laga kar suno, nahi maloom aaeindah saal tum say
milon ya na milon to is waqt meri baat gaur say suno,
 dekho ! tumhara mabood ek hai aur tum ek baap Hazrat Aadam (A.S.) ki aulaad ho,
sub musalmaan bhai - bhai hai, kisi ko kisi par badayi nahi haan jis kay amaal neik
ho,
 aur suno ! Auraton kay baaray mein Allaah say dartay rahna, tum doono ka ek
doosron par haq hai,
 aur dekho ! gulaamo kay saath ziyaadati na karna, jaisa khana waisa khilaana aur
jaisa pehna waisa pehnana
 aur yaad rakho! Tumhaara khoon, tumhaara maal ek doosray par haraam hai,
 dekho meray baad gumrah na hojaana kay ek doosray ko qatal karnay lago,
 sunlo tum ko Khuda kay huzoor mein hazir hoona hai, jahaan tum say tumhaaray
amal kay baaray mein pooch hogi.

In tamaam hidayaat kay alawah aur bhi hidayaat Aap SAWS nay di. Aakhiri hajj say farigh
hokar Huzoor SAWS 14 Zil Hijja ko namaaz e fajar kay baad Madinah Munawwarah
kayliye rawana huay, Makka pahonchnay kay kuch dino baad Aap SAWS nay Safar 11
hijri ko Mulk e Shaam ki taraf ek lashkar rawana farmaya unhi dino Aap SAWS bimaar
huay, bil aakhir 12 Rabi ul Awwal 11 hijri do shumbah kay din 63 saal ki umar mein Aap
SAWS ki rooh mubarak jism mubarak say nikalkar ‘A’laa Elliyeen’ mein pahonch gayi.