THU TATUAM August 11, 2013 Weekly Siyin News

Nini Ciang CDK Meeting Om Tuh Ciimnuai Donghuu Kipawlna sia Malaysia sung ah om Zomi kipawlna tatuamte ahi Zomi Innkuan Malaysia (ZIM), Tedim Community in Malaysia (TCM), Siyin Organization Malaysia (SOM), Tonzaang Lawm (TZL) le Malaysia Zo Organization (MZO) te i ki pawl khopna hi aa, January 1, 2013 in aki pan khia ahi hi. Ciimnuai Donghuu Kipawlna (CDK) in Malaysia ah om Zomi cimaw, dongtawkte i vai, hamsatna theampo panhpui tuh ngiimna nei hi. January 1, 2013- August 9, 2013 sung Zomi luang 4 kivui in, zumhvaite theampo kisai sak hi. Thongtaakte tam tatak zongh suaktaak natuh vai hawmpui hi. August 17, 2013 sun nai 2:00pm in Full Gospel biakinn ah ki muh khopna nei nuam ahi man in Biakna lampui le khua lampuite kihel tek tawng. Falam Ah Pagoda Thak Sak Tuh Kikhaam Falam khua ah Kawlte Pagoda thak khat kisaksawm ahikom, Falam khangno kipawlna Falam Youth Organization in nasia tatak khaam sawm uh hi. Academy Thet Mon Myint le Hmawbi phunggyipa ii vaihawmna ii kison aa, FYO in nasia tatak khaam sawm hamtang in kisonhi. Falam khua ah mi 50,000 tukhawng pan Kawl kumhpi naseam sia 300 bangh, Kalate sia 50 bangh pha ci hi. Tapidaw biakinn 30, Phonggyi saanginn 3 le Pagoda 3 om ci hi. KBZ Bank Panh Ngaltaaite Atuh Huuna Kanbawzah bank in, Myanmar Peace Centre tungtawn in Kawlngam sung ngaltaaite atuh huuna million 50,000,000 pia ci hi.

w w w . th ut a tu a m. ne t
India Le Kawl Ngamngi Vai Buai Kawl ngam le India kilaklaw ngamngii sia tai 1010 sau in, 1967 ciang ngii vawt natuh vai thukimna nei uh hi. Maangkaangte hun lai in, ngamngii khuam 39 khen in, Naga taw kimemat na san NSCN (Naga hiam toai kipawlna) te in, phiat mai in, Tamu le khampat kilaklaw sia, KNF (Thado hiamtoaite) in kaapsia in. Cikha le Lamka khawk kilaklaw sia, ZRA te in phiat ahikom, ngamngii sia, tulaitak dinmun tel meal om ngawl hi. August 9, 2013 Kawl (Myawaddy News) le Tusung teng India news pawlkhat in, hi ngii vai taw kisai in, son kaakna tatuam nei lai aa, India le Kawlte in hun tam vei ma laa in, kikup kul nanaak tuh hi. Hari Raya Ni Thalup Thuak Malaysia, Penang, George Town ah Hari Raya (malay kumhthak nikhatni) in, Pasal kalate khat kaalup thuak hi. August 8, 2013 zingsang nai 11:30 pawl in , amawtaw BMW 5 tung ah, Amawtaw hui tatak panh akaalup hi tuak in, ataksa tung ah thautang tang 12 kimu ci hi. August 9 nitak Penang night club khat ah khat kikap ahi hang, aphei lang bek liam law hi. ATM Taw Cip Nguu Malaysia Kulai Ah August 9, 2013 zing nai 3;00 pawl in ngutate in, ATM set taw cip sum nguuksak ci hi.

Pakistan Ah Muslim Tetek Kithat Pakistan ngam Quetta ah, August 9 in, Sunni te biakbuk mosque ah suicide bomber khat hang mi 10 peuma thi in, adang 24 liam law ci hi. August 7 in, suicide bomber khat in, tua khuapi ah mi 37 that hi. Pakistan Peoples Party provincial minister, Ali Madad Jatak athunget laitak hi in, ama sia banghma tat ngawl bilbel in kison hi. Pakistan ngam sia Sunni Muslim tam zaw in, Shiite muslimte sia 10% bek hi aa, shiite-te akithalup sim Iran ngam in Shiite ngumh vilvel aa, tutuung asia zongh Irante taw kisaina om tuh muanmawk na zongh om hi. Billy Graham Tapa AG Kikhoppi Ah Thuhil Tutuung Leitung buppi AG kikhoppi (Assemblies of God General Council) ii 55th cinh kikhoppi sia USA ngam Orlando ah August 7,2013 in vawt in, Leitungbup evangelist minthang Billy Graham ii tapa Franklin in thuhilna nei hi. Leitung Inn Sang Bel Sen-ngam In Saksawm Sen ngam thang sang Changsha ah leitung ah asangbel inn khat sia sak tuh kipanh zo in, 2014 ciang man tuh hi. Pi 2749 sang tuh aa, tulaitak leitung ah asang bel Dubai aa, Burj Khalifa sang in pi 749 sang zaw tuh hi.

Kawlpi Ah 8888 Silver Jubilee Kikhop Kawlpi NLD lampuina tawh ngambuai kumh 25 cinh poai se, Kawlpi , Aungmingalar veang, zatyung sung ah August 8,2013 zingsang in vawt uh hi.President U Thein Sein zongh sapsawm hi. U Thein Sein asapnopna ahang sia 1988 lai Sagaing Division's 89th Infantry Battalion ah commander sia Kawlpi ah zumh to ngei hi. Phonggyi Khat Ama-le-ama Kihallumh Mongywa , Phonggyi kumh 23 apha khat sia August 8, 2013 zing nai 2:00 pawl in, ama le ama mei taw kihallumh ci hi. Ama taw a omkhawm Phonggyi khat ii sondan hi leh, akithatlumh pa sia, tuu ni 3 sung, a tat zia lamdang ngiat in son hi. Bang hang kithat lumh ci lai zongh nusiat ci'n kison hi. Saudi Ngam In Israel Le Iran Ngiim Ziam? Saudi Arabia ngam rocket phualpi panh Israel le Iran sia kaap lian tuh aa tuung-sa in koi ci'n "jpost" news sung kisua hi. Launch pad-te sia 301 degrees asawi-sa in kikoi aa, Israeli target hi tuh in muangmaw ua, akhat sia muanmawk10 degrees, kikoi ahikom Iran ngam tuungsa in koi hi tuh ci hi Saudi Arabia te ii DF-3 missiles sia Senngam pan 1980 lai alei uh hi in, tai 1,500-2,500 akuala-na munh kaap zo tuh ci hi. Saudi Arabia ngam in, Syria ngam buaina ah zongh kumhpi langpante , tank kaapna launcher pia in, Iran ngam in, Syria kumhpi sang pang hi. Kachin Ngalhangte-ni Kachin ngam khuapi Laiza, ah August 10,2013 ni in, Kachin ngalhangte-ni (Martyr' Day) vawt ci hi. Rakhine Ngam Ah Buaikik August 9 ni in, Mithiluang khat sia, banghang thi ci kihe ngawl aa, Palikte in Rohingyate mawsiat in, Rohingyate in Palikte mawsiat hi. Kam kitam in buaina piang aa, Rohingyate sonna bangh hi leh amate 6 thi ci aa, palikte sonna ah amate 1 khat thi ci hi.