IN KASILASA...

in puunan sin kasilasa daing ha Allah SWT. Tanda niya wayruun makaingat manusiya biyadiin in kalabay atawakan kasud sin kasilasa sin hambuuk tau pa hambuuk tau. Mapuas daing sin unu-unu na in hinang sin hambuuk tau hakatampalan mawn pa liyasa niya. In kasilasa in puunan niya daing ha atay. Hakalahil niya dugu nakumpul sagawa in kahalus niya tuput Tuhan in nakaingat. In atay upamakun server ha ginhawa baran sin manusiya. Lahil iban batin in masakup niya. Bang siya kimangi, kumangi da isab in katan lamud katabunan in pagkahalga niya.

Amuna in sataas-taas kalagihan dautun sin hambuuk magtutulak ha dan kabatinan. Karna

In kasilasa ha atay in liyabayan niya. Adapun in sariat niya nakabutang ha pamayhuan sin manusiya. In hambuuk tau lumasa pa hambuuk tau sabab sin kaul piil kakitaan niya duun ha kikita niya. Misan pa biyadiin ngi kasuddahan tau bang piyakikitaan dayaw atay ha pamayhuan, tantu di siya makahinang sin bukun marayaw maun papagkahi niya. In kasilasa yan ha manga sila paham ha tungud kabuhi iban agama. Bang wala duun nakabutang ha manga tau bihan dagbus ayaw kaw magad sin pamaham niya, misan pa in kaawnan hambuuk siya pagaaddatan. In kasilasa nagalam ha nakatampal iban nakatapuk. Awn tau masuwak magpakita sin kasilasa niya pa anak asawa iban papagkahi. Awn isab yan bukun matagi. Hangkan na di makajari in tau magpanghukum ha hinang wala niya kikita, karna in nakatapuk tuput Tuhan da in makahukum. In kasilasa laung sin manga sila; magpakabuta, magpakaumaw, magpakarupang. In unu-unu katan bang ta kiyasi iban liyasa misan unu pa in imiyan katu sulang ha liyasa ta di tara agun dungugun. Karna in kignut sin atay ta timubu didtu. Hangkanna in atay ini ayaw tuud pa kasi iban lasahun ha di makadihil kapaiddahan dunya iban ahirat. Sabab bang yan kaluunan sin kaput tantu lumummi siya. In katan sin marayaw mahamut pa atay adapun in katan sin mangi lassun kaniya. In atay sussi maingat minig hawnu in marayaw iban mangi. Adapun in atay kiyatatabunan sin akkal ayaw paka in di kumangi in asal mangi misan in marayaw kumangi da. In kasilasa bang mapaluk marayaw amuna in sarayaw-rayaw hinangun lakutabiat. Wayna suntuan sarayaw-rayaw upihan in Junjungan Nabi Muhammad SAW. Karna wayruun na nabantug nagdara sin sataas-taas pangaddatan marayaw mapuas daing kaniya. Manginduwaa kitaniyu pa Allah SWT sarum saadlaw bangman in atay ini tuput magsangsa Kaniya. Karna hapagsangsa pa sataas-taas Tagdapu sin Kasilasa, in balik niya kasilasa wayra isab tubtuban. Ayaw natu hinangun tabiat in magpamali atay sin tau, misan pa hapangatud natu tau babak atawa nakarusa katu. Amuyan in sataas-taas paganaran sin kitaniyu barhajat ha pagparagbus sin kasilasa sin Tuhan pa baran natu, pa anak asawa iban papagkahi. Ayaw mu isab lasaha in pagkahi, sagawa in baran piyasasaran mu; subay man unahun in baran. Karna bang in magpasaplag sin kasilasa amupa in barhajat ha kasilasa, misan maraw dungugun sa bukun marayaw tanam. Wayruun na kumasi iban lumasa ha baran bang bukun hi tagbaran. Sharif Muhammad Yazir Rajim An-Nawiyah

Kasilasa
hi Babai mangi pa Usug Bar-iman
iman.

Awn hambuuk kissa kiyasuysuy kamu sin guru namu palihalan sin hambuuk babai mangi ha laum kawman limasa ha hambuuk usug barIn ngi sin babai ini agad pamukpukan siku sin katan kamaasan. Misan isab mangi in kakahinang adapun in lingkat sin pamayhuan niya wayruun hikaruwa ha laum sin paghula nila. Katan usug ha laum sin kawman yadtu agad nakausal ha babai ini. Karna in siya hambuuk babai pagbayaran. Hambuuk adlaw kita sin babai in usug bar-iman. In kiyaawnan natarsangngang in babai ini sin dayaw ragbus sin usug diyuhunan pa sin sahaya sin pamayhuan hapagammalan. In usug ini mahang magguwa bay, sabab in hinang niya wayna dugaing daing sin magammal pa Tuhan. Naglaw in babai ha dagbus sin usug yaun. Karna ha taud na isab sin usug ha laum sin kawman yadtu bukun da biya sin usug bar-iman yaun. Hakahawpuan niya laung sin bata bihaun na In love in babai isa-isa niya. Adlaw-adlaw in babai way hinang daing sin madtu pa bay sin usug, magpakita ha usug bar-iman sin baya niya. Sagawa di magabjan in usug. Misan bihadtu hambuuk adlaw kiyabungat da sin babai pa usug in hajat niya. Nasusa in usug pagingat niya sin miyaya kaniya in babai mangi yaun. In kiyasusahan sin usug bar-iman bang yaun asawahun niya landu tuud in laggu sin kasipugan mara niya. Hambuuk adlaw awn piyaglanggal sin usug yaun maas usug buggul. In agi kaniya sin buggul yaun subay mu asawahun ya kaw usug bar-iman in babai yaun. Kiyublaan in usug yaun pagdungug niya sin bissara bihadtu. In agi sin usug bar-iman di aku makahalal kaniya karna in siya babai malummi. Laung sin buggul ha usug, bunnal tuud in siya babai malummi sagawa in kabuhi niya yaun bukun malummi. Subay mu siya asawahun karna siya ra in maksud sin kabuhi mu miyari pa dunya.

Hambuuk adlaw miyadtu na isab in babai pa bay sin usug bar-iman. Biyaytaan niya na sin hajat niya marayaw pa babai. Ha hawpu bissara, natiyaun sila karuwa daing ha panuguti sin maas sin babai. Pila adlaw nakalabay daing ha pagtiyaun, miyadtu in babai pa bay sin maas niya nanibaw. Ubus niya man simalam ha lawang nagasubu in ama niya bang hisiyu in liyawag niya. Nainu-inu in babai mayta siya di kakilahan hi ama niya. Nanaug siya daing ha bay iban paginu-inu. Subay na hiyatud sin bana madtu pa bay ampa kiyakilahan sin ama niya sin amunaun in anak niya nakabana pa bar-iman. In kaawnan sambil kausugan amun nakausal ha babai yaun di na makakila. Karna pinda sin Allah SWT in pamayhuan sin babai yaun, nagsabab daing ha landu in pagmabuga sin bar-iman yaun madtu Kaniya. Miyabut man pituhan, nasakit in usug bar-iman. Nagdanan daing hakasakit yadtu amunadtu in sabab sin kiyamatay kaniya. Amura in kiyabin sin usug ha asawa niya in singsing piyagkawinan kanila. Limandu in susa sin babai, sambil pagabut hikatu sin adlaw miyatay ra isab in babai. Ha kahawpuan niya nakapagunung-unung da sila didtu ha ahirat, sambil piyasud sila karuwa sin Allah SWT pa laum sin sulga.

Sharif Muhammad Yazir Rajim An-Nawiyah

Bihan in pamung sin hambuuk manusiya bang magsusun na sin dusa nahinang.

TAUBATA AKU!

Laung sin bahasa: Salaggu-laggu dusa malaggu in Ampun. Wayruun dusa nahinang sin hambuuk manusiya in di ampunun sin Allah SWT. Bihan in lasa iban kasi sin Tuhan ha iypun piyapanjari Niya. Sagawa mayta baha isab in iypun ha laum na hadja himihinang sin piyanglangan sin Tuhan. Unu baha hinasil na sin manusiya in magpakahinang dusa? In manusiya asal bardusa, sabab sin awn in manasat piyapanjari sin Tuhan. Bang in katan manusiya di magpakadugtul dusa wayruun iypun hisabun sin Allah SWT ha adlaw paghukum. Adapun in Allah SWT landu in paslud sin ingat magpaamu sin katan. Wayruun piyapanjari ha liyukupan alam in wayruun kamaksuran nila, luba labi na in bangsa Manusiya. Bimana asal in magpakahinang dusa kariyasali na sin bangsa Manusiya. Sagawa misan isab kariyasali, bukun nagmaksuri bat subay ha bihadtu na hadja in kahalan sin sila. Ha dalam sin nagdurusa in hambuuk iypun awn da isab jalan biyaktul sin Allah SWT - Pagtaubat - ha supaya siya makapuklas daing ha nahinang kangian. In Pagtaubat bang ha sinug pagpinda in maana niya magpinda daing ha hambuuk kahalan pa hambuuk kahalan amun labi makadihil dayaw. Suntu niya daing ha mangi pa marayaw atawa daing ha marayaw pa labi pa marayaw. Bimana bukun hadja tuwi subay nakahinang mangi ampa magtaubat sambil tau maghihinang sin karayawan subay ra daran magpinda ha supaya madawhat niya in sarayaw-rayaw kakahinang di ha adlaw dunya. In magpakadugtul dusa hambuuk kahalan hipagpakila sin Allah SWT pa kaawn Niya. Awn waktu bang in manusiya di magpakahinang dusa di siya makatumtum pa Tuhan niya. Buat malaingkan in manga tau bihaini asal awn kabuga niya pa Tuhan. Amuhadja biyutang siya duun ha hambuuk panulaysulay ha supaya tumampal in pagkamanusiya niya iban tumampal in pagkatuhan sin Allah SWT. Ayaw hadja amun manga manusiya wayna misan biya hanglup pangilahi pa Allah SWT. Misan pa nakamataud himinang dusa, di na in dusa yadtu mahinang sabab sin hikahidayat kanila pa dan kabuntulan. In maghinang sin karayawan, hangkan subay ra awnun in pagtaubat, ha supaya in hinang niya marayaw di muku pa kangian. Asal matampal ha pamandu sin agama in kakahinang sin hambuuk Muslim misan marayaw bukun magtuy taymaun katan. In katan yan hilabay muna ha malaikat sin Tuhan ha di pa dumagpak madtu pa hadarat sin Allah SWT. Kitaun pa duun in hinang bang wayra kagaw niya. Ayaw maniguru hi magiibadat sin ammal niya bang di niya ra matantu lappas na siya daing ha Takabbul, Jingki, Hasad, Ujub, Nifaq, Riya, iban sin kaibanan pa. Bang kaw makalappas na daing hayan insyaallah Tuhan dakuman in magtantu sin hidihil kaymu hukuman. In pagtaubat bukun hikakangi pa manusiya, gamman amuini in hikarayaw kanila. In hambuuk Muslim daran nagtataubat daran makasuuk pa Tuhan. Adapun in pagtaubat, labi awla in dusa dakula, subay bukun makamataud pagbalikan. In pagtaubat bukun magpapas sin dusa, sagawa magpahundung hadja sin paghinang dusa. Bang ha tatkala in dusa hinangun magbalik misan kiyapagtatawbatan na, balik batangun na isab kaniya magbalik itungun. In sarayaw-rayaw pagtaubat amunain di pagbalik-balikan, gamman magpataud na sin pangayu kaampunan iban magtuyu maglawag sin dan hikasuuk iban hikakasi kaniya sin Allah SWT.

Sharif Muhammad Yazir Rajim An-Nawiyah