THU TATUAM January 5, 2014 Weekly Siyin News

Australia Suutpom Visa Suutpom taw kisai Visa nam 5 om hi. 4 sia suutpom nam 4 atu hia, 1 sia Special Humanitarian Programme(SHP) visa ki ci hi. Australia ngam a thengsa, ateang sa mi khat, kipawlna khat pan apai natu lamsaap sik aa, aki paite sia SHP visa kici hi. 2012-2013 kum sung SHP taw mi 500 Australia ki pai sak hi. 1 Jul 2013- 30 Jun 2014 sung mi 5000 sia SHP visa taw ki pai sak tu ci hi.2013-14 kum sung sia suutpom visa taw apai tu sia nidang saang tawm zaw tu ci hi. SHP visa taw apai nuamte proposal Form 681 taw ki ngen thei hi. Hi form 681 sia: www.immi.gov.au/allforms/pdf/681.pdf pan ki la thei hi. Form 681 sung hong ki dong teng na zo (fill up)zawk ciang, email taw immigration.kualalumpur-refugee@dfat.gov.au ah thak in. Email taw na thak thei bale Laito pan; anuai aa, address ah thak in. Offshore Humannitarian Processing Center Department of Immigration and Border Protection GPO Box 9984 , SYDNEY NSW 2001 Hi SHP visa sia taw pai nuam ahihang, sum haksate; www.iomaustralia.org/projects nils.htm ah huna ki ngen thei hi. Australia ah mealheak na nei le lungngul huai sa ing. Suutpom Vai Min Sazian Kitin Kik Zo Tunung hiat in, suutpom vai taw kisai angaa ngawllai theampo ii min sazian vawtte kitin sak siat zo hi. Tua sung ah :2009 ma Malaysia theng in angaa ngawllai-te 2010-zawk malaysia theng na pi tunung mithak kipiakna ah apai ngawl te/ ahe ngawlte le alaplaa te hi. Kumh thak sung SOM card vawt tuh vai sia, mai nipi sung kizasak tuh ci thu SOM sangpanh kiza hi. Thongtaakte U Theinsein In Hesuakna Pia January 4,2014 kawlngam suataak kumh 66 thupha vawtna in, U Thein Sein in, thongtaakte hesuak piakna anuai abangh in nei hi. 1) Thi daan ngaa tute tawntung thongtaak tu aa, 2) Ciangtat nei ngawl te, thong kumh 40 3) Thong kumh 40 te, Kumh 30 kikhep sak hi. Kumhpi langpanhte, muan-mawk thathong taw atakte mithattha te thong theampo panh suaktaak in, Kawlpi thong panh sia 357 suakta hi.

w w w.t h u t a t u a m. n e t
Thingunau Ah Cycle Suakkhial Limkhai khua Pu Zam Cin tapa Pa Khai Khan Mang 40 in January 1, 2014 in Thingunau khua ah cycle suakkhial in hong nusia hi.Aluanghawm sia January 3, 2014 ni akhua Limkhai (Bungh) ah vuina ki nei hi. Azi le ata pa kumh 4 le atanu kumh 2 te le a it amealheak te tung ah Topa in henepna mailam ah mapai daupaina cidamna le ngupna namcin taw hong ngum ta hen. Malaysia om asuapuinu Kaang Cing henep topuina January 3 in MSCCF pawlpi in nei hi. Passport Zumh Hakha Ah Ki-hong Ngamdang pai thei natu Passport laibu thukna zumhkhe(branch) khat sia January 2, 2014 in Hakha, Myotit, Tatkong lam ah zing nai 8:00 honna nei hi.Chin (Zomi) te atuh lamsap, zintun manh, anneakna atuh sumbo/ paai bo liang aa mundang pai tengtong kul ngawl in, thuneite ii vaihawm sakna hi.Laibu vawtmanh sia kawlsum 20,000/- bo tuh aa, Laibu seau le thuk sia ni sawm bek hai tuh ci'n Deputy officer Saan Oo in son hi.Kawlngam sung munh tatuam ah zong hong in, Naypyidaw ah zongh Jan 2 ni hong hi. Zatawp Thei-te Atu Thukun Thak Zatawp thei te atuh Malaysia thuneite in, thukun thak khat January 1, 2014 in suak sak hi. Thukun (Amendments to the Control of Tobacco Product Regulations 2004 under the Food Act 1983) bangh hi leh, cigarette bung tung ah Malay thuneite ii chepteena lai a om ngawl peuma kikham hi. Thuneite ii chepteena lai akihel ngawl peuma azuak, alei khat in, leau sum RM 10,000 ahi bua le thong kumh nii, ahibua leh, aniima ngaa thei hi. Tuaahikom Malaysia om suapuite zatawp thei te in, ih lei tuh Cigarette sia ii bung tung ah , chepteena a om hamtang tuh ci sia ih heak kul tuh hi. Laibu/ permit nei ngawl in, Puno(palik)te ii mattu sang in, zabung tung ah chepteena lai a om ngawl khat khut sung vom thak tuh lauhuai zaw hi.

Malaysia Sang Thu Laithiangtho Bu Kimatsak : Malaysia Islamic kipawlna-te in, Malay kam taw akikhen Laithiangbu hon khat January 2,2014 in mat sak hi. Amatna ahang sia Laithiangtho tung ah "Allah" ci kammal kizangh hi.Tua Laithiangbu-te sung ah Arab kam pathian "Allah", prophet "nabi" , gospel "injil" ci kammal te kizangh ci'n Selangor state Islamic Religious Department, Ahmad Zaharin Mohamed Saad in son hi.Laithiangthobu 320 hi in, Malaysia Bible Soceity president Lee Min Choon le manager Sinchlair Wong te man in ar-mah-khan taw suakta sak kik hi. Hi Laithiangthobu-te sia Indonesia panh hong pai hi tuh in, muangmaw aa, Sahbah le Sarawak state ah sia suakta tatak hawm sak thei tuh ci hi. Kithat: Malaysia Puchong, Batu Tiga Belas ah Kawlngammi Bo Bo Ha 36 sia, Dec 29 zing nai 2: 50 pawl in zuu kham in kitom ahikom, alawm kawlngammite ma in, naam taw hol ci hi.Aliamma taw meter 700 akikhuala factory ah huu nget tuh in pai ahihang, factory huang sung tumna gate pan ding zo ngawl puk vawk ci hi. Kawl Numei 2 Thalup Thuak : Malaysia ngam Penang ah Kawlte numei 2 thalup thuak hi. Thay Thay Tan 21, Thay 41 hi in, Thay Thay Tan 21 sia a-ngawng panh ki aat aa, Thay 41 sia amai le apumpi tung ah hollupna maa kimu ci hi. Vanh bangh mama amate taw om ngawl ahikom, thalup zawk, avan-te kitaai pui hi tuh in muang maw hi. Zan 12:15 pawl hi in, auna thawm-nging zongh aza om aa, amu zongh om ahikom, mittang taw amu te panpuina taw, tualthat kawlngam mi kumh 30 kiim tuh pasal 2 minit 30 zawk ciang man ci'n CID te in son hi. Sen Ngam Sung Thu Sen ngam sak-nitumna sang Xijiang state ah Muslim hiam toai te in, Palikte Dec 29 ni suam sawm ahikom, palikte in, 8 kaap lumh hi. Xinjiang ah 20. 8 million bangh om in, Muslimte sia 58 % bangh hi in, Budah biakna le ngeina biaknate bia uh hi. Kala-ngo meal pua Uyghurs minam 58 %, Han minamte 41 %, Kazakh 7 %, Hui 5 % hi in, adangte sia minam tawmte hi. Sen Ngam Ah Nau 2 Nei Thei Tuh Sen ngam National People's Congress ii committee in, nupa pawlkhat ii nau 2 anei tuh thukun khat om sak hi. Sen ngam ah sia 1970 zawk nau khat bek nei tuh thukun om hi in,Communist Party panh thu nei pi teng ii kikupna taw awi hi. Amate ii launa sia khangham mi tam zaw lau uh hi. 2050 ciang see-li -sua-see-khat sia kumh 65 val tuh hi.

Mopoai Sapna Hong thengtu 11/1/2014 < sat >ni MSCCF Biakinn ah sun nai 11AM hun in , Khuasak Khua teang < Pa. Thawng Cin Thang> + Nu. Neam Za Cing te tapa Hang Cin Pum<Cinpum> le < Pa . Vum Za Pau > + Nu . Ngiak Dim te tanu Ngin Khan Neam< Neam > te , Topa mai le mite mai ah, a thiangtho kiten na Revd. Philip Pum Khan Khai inh hong neisak tu a himan, a kuama po nong kihel natu Jesu min zaataak na pia in kongsam uh hi. Cinpum + Neam Pumkhatsua Thungetna Mopoai Tg Zam Khan Khup le Lia Dim Saan Lun te pumkhat sua thunget laakna mopoai sia January 4, 2014 ni 1:00 PM hun in, Pa Thuam Khan Dal inn Kepong Wangsa Permai ah vawt tu hi.Suapui Zam Khan Khup sia Khuasak khua Pa Zam Pum le Nu Cing Khan Uap te ta pa a lian bel hi in, Suapui Dim Saan Lun sia Khuasak khuami Pa Thuam Khan Dal le (Nu Mang Khan Dim) te ii tanu nobel hi. ZCD In Zomi Citek Leang Ci Zei! Yangon Tedim Biakinn TBC ah Dec 30, 2013 ni in, Zomi Congress for Democracy (ZCD) party in, 2014 ngam mi simna taw kisai thupulaakna khat nei hi. ZCD secretary Pu Gin Kam Lian in, " 2014 ciang Zomi min zak tuh biakna sang lampuite tung ah heak sakna ci hi. 2014 January sung Kawlpi ah zongh ngam misimna census taw kisai zongh kikhopna tatuam vawt sawm uh hi. Melbourne Sizaang Inn Kuan te Picnic Pai Melbourne om Sizaang Inn Kuan te 28/12/13 ni in Footscray Park ah Picnic pai na le Makai thak ki teal na nei hi. Melbourne om sizaang mi 98% hong ki hel thei hi. Melbourne ah Sizaang Inn ( minam dang zi/pasal nei ki ngawm) 21 pha aa, Mimal in 60 kiim bang pha zo hi. Makai thak ki teal na ah Mai kum sung hong makai tu in a nuai a bang in ki teal kik hi. Chairman - Pa Ngo Tun Cin Thang ( Tun no) ( Liim Khai) Secretary - Pa Thawng Khan Dal ( Dal no) (Hiang Zing) Sum Keam - Pa Sing Kho Hau ( Liim Khai) Limkhai khuami Pu Suakpum 88 in khangham natna taw Dec 31 ni hong nusia hi.