THU TATUAM August 18, 2013 Weekly Siyin News

UNHCR In Register Pia Kik Tuh UNHCR in, Aug 15 ni in KL Chinese Assembly Hall ah meeting sam in, minam lampuite tung ah Sep 2 zawk ciang, mobile register pia kik tuh ci hi. Apiak tuh teng sia March 6,2013 ma in community card vawtteng hi tuh hi. Amunteng sia 1) Perak 2) Cameron Highland 3) Kuantan 4) Jahor Bahru 5) Seremban 6) Kuala Lumpur teng hi in, adetail tatak sia, SOM tungtawn in hong kizasak kik tuh hi. Innkuan tumh pui tuh in lai atinte ki hel tuh hi. Innkuan tumhpui tuh atinte sia kumh 2 sung sam kik tuh ci aa, Bio Data lai in khutzung meak tha teng kihel tuh hi. Avekpi mi 16,000 piaksawm hi. Rohingyate kihel ngawl aa, Rohingyate sia UNHCR zumh ah tua hun ciang kipia tuh ci thu kiza hi. CDK Meeting CDK (Ciimnuai Donghuu Kipawlna) Meeting zeini tak in Malaysia FGA biakinn Pudu ah kivawt hi. Thukikupna sung ah - 2014 ciang pa kipan mihing khat RM 10 - Nausen tha khat nuaisia bekma athong kihui tuh - Nausen suak in athite nulepa in huu hong ngen le kivai hawm tuh (Zato Panh Medical Test Atuh Mithi Kingen Om Thei in apia nuam ngawl te atuh) - Member hong lut papo hong lutni CDK email leh sumkeampa tung ah palaite in amanlaang zasak tuh (Online & ATM) - December 13, 2013 ciang KL UPC biakinn ah kivawt tuh hi. Ngitlo Huu Kawlsum 50 Leau Singapore ah Yangon August 14 ni nitak nai 2:30 pawl in acia MAI vanleang tung to Kawlte khat sia vanleang tung ah tatsia ahikom, Yangon athet ciang Palikte in man aa, thukhen zumh ah puak ci hi. thukhen zumh in kawl sum 50 leau sak hi.

w w w .t h u t a t u a m. n e t
Malaysia Palik Athau Kisuu Sak Malaysia , Salangor Shah Alam , section 7 ah Aug 12, 2013 in Palik sergent khat amut laitak athau kinguuk sak ci hi. Sargent-pa sia apa thi hi in, athaandal ni ngim lei ahikom, lampi hui ah zing nai 1:45 pawl in, amawtaw tawlnga in lumh ci hi. Amawtaw kongkha alang hong ahikom, amut zawk tawm vei ciang, akawn panh akaai khat om in a et leh, athau bawm sung panh athau kikaih sak aa, banghma tungh man ngawl in, Honda motorcycle san khat taw, taai suak ci hi. Ama ii ID, smartphone le RM600 zongh nguuk sak ci hi. Malaysia Om Zomi Nguta Khat Malaysia ngam om Buanman khuami suapui Lian Pum Pau omna ah Kawlnuai khuami akici khat (Malaysia , Salangor, Cheras Block B om) in avanh nguuk sak hi. Ngutapa in ama le ama akison bangh hi leh Aug 11 nitak "Taman Midah" bus stand mawtaw ngak in a omlaitak Kala phalakte in aneisa-teng sut ahikom, Asia Jaya dong peang in pai kici hi. Suapui Lian Pum Pau kung vateak ah huu gen ahikom, zaan khat taam sak hi. Zingsang 11:30 PJ-8, OKay Restaurant suapui Lian Pum Pau nasep parttime akuan tuh ciang , lamsap RM 10 kipia in, cia sak hi. Suapui Lian Pum Pau a inn ah sun nai 3:00 pawl in a inn ah acia kik leh, a innkong honsa om in, a inn sung a et leh,aleangnapa in a samsung phone le vanh pawlkhat nguu tuh in akipat laitak ci hi. Zomi tetek thukhualna taw Palikte khut sung aap ngawl aa, nasia tatak thuhilna nei zawk ciang tha kik hi. SOM Meeting Thasim nipi thumni sim in SOM Kipawlna lampuite leh Khua lampuite meeting kinei tawntung in Aug 18 ni in zongh nei tuh uh hi. Register ciang kingin khol tuh dan leh, mailamsang kalsuan zia tuhte kikumh tuh uh hi.

Nganhing Lamdang Khat South America (Ecuador le Colombia) Andean mual ah akimu vom nam khat sia olinguito ci'n min pia uh hi. Vom le ngeaungaw taw kibang in, thingkung tung ah om hi. Hi nganhing bangh sia tuma kumh 35 lai in khat vei kimu ngei aa, tu asia taw a 2na ci hi. Khangham Bel Bolivia Immigration te ii chepte bangh hi leh, Carmelo Flores Laura akicipa sia kumh 123 cing in, Leitung ah khangham bel hong suak tuh hi. Taa 3, Tuu 16, Tuusalawn 39 nei hi. 1890 kumh in suak aa, nung tha in, kumh 123 cing hi. Ngalpi khat lai in kumh 24 pha aa, Elizabeth kumhpi asep ciang kumh 62 kacing ci hi. Guinness World Records bangh hi le tulaitak khangham bel sia Misao Okawa akici Japante hi in kumh 115 pha hi. Pyintitte khat sia 1997 kumh in thi aa, athi lai in, 122 kumh hi. Tawpi Taang In Ui Kizangh Sen ngam, Henan, Park of Luohe ngan khawina ah, Tawpi (lion) om ngawl ahikom, Tawpi taang in, Ui mul nei thipthup khat koi aa, "African Lion" ci'n laisuang luilamh ci'n news sung kisua hi. Egypt Buaina Mi Tam Mama Thi Egypt ngam Aug 14 buaina huu in mi 356 thi ci'n kison hi. Gehad ElHaddad akici muslimte news sung bangh hi leh 2000 thi aa, 10000 liamlaw ci hi. President Morsi sia ngalkap kumhpi in keam ahikom, Morsi nungzui mipite omna sia Ngalkapte in, asuam cip dan inkison hi. Ngalkapte sang pang mipi om in, Morsi sang pang mipi om hi.Banghun ciang paw Egypt ngam buaina hong kamh katawm , ahi ba leh, Syria bangh in tualngal hong tho katawm?

Kawlte Submarine Leisawm Bangaladesh ngam in, sen ngam panh Romeoclass Tuinuai Teambaw (Submarine) 2 lei ci'n Kawl Navy news sung kisua hi. Hi Romeo Submarine-te sia ngalkap 50 , Mine le 533-mm torpedos pua thei hi, Ahi hang sente kung panh alei ahikom sen te in modify zo hi. Thai ngam in zongh German vawt Dolphin-class submarine leisawm ahikom, tulaitak Muslim ngam ahi Bangaladesh ngam in Budah le Muslimte buai hun sun lei ahikom, Kawlngam Navy thusua sung " Russian Submarines For Burma Navy: Kilos Or Foxtrots?" ci thulu taw lai at uh hi. Kawlngam International Airport Bago khua naina ah Hantarwaddy International Airport ci'n vanleang tual khat sak kipanh hi. Hi vanleang tual sak natuh companyte kidem sak in, Korea Ancheon International Airline te in ngaa sak aa, kumh 4 sung sa tuh ci hi. Hi vanleang tualpi sung le naina ah, Hotel, Shopping mall le taxi stand te International level in vawt sawm hi. Kawlte Palik Le Palik Kiman Abosa hunsung Palik tetek sia khat le khat khialna a om ciang, kitelchiam vazeau ahi ta zong tu ciang, palik tatek, thukun zui ngawl a om leh kiman tuh dan hi. Hi bang ahi le Kawlngam ii pai zia sia, ahoi lam manaw hi. Lashio zatopi mai ah, palik 2 sia lukhu khu ngawl aa, mawtaw cycle to ahikom duty laa, traffic palik 2 in man hi. Ngul Tumdang Khat Dragon Ngul Dragon Nguul (Dragon Snake, Xenodermus javanicus ) sia South East Asia ngam teng ah taa in, apumpi sia awle bangh in kimu hi. Acii (Color) sia meikhu (gray) hi in, Pi 2' 3" bangh sau thei hi.Taangciinna, ulol kua sung om nuam saap in kison hi. Topa Taw Maangkhawm Pau Thian Muang 24 S/o Pau Cin Kam in August 13 , 2013 zing sang nai 9:00 Ci-eng Natna taw, Kuala Lumpur zatopi HKL Zato pan hong nusia hi. Thuklai Khuami Pa Ngin Za Lian (S/oBo Thuam Khua Thawng) in Hakha khua panh Aug 14 ni in mawtaw suakkhial aa hong nusia hi. Aluanghawm sia 16 ni kivui hi.