Krisna Yanti Silaban (16.

3085)
Mata Kuliah Praktek Lapangan 1
Dosen Pengampu: Pdt . Dr. Raulina Siagian

PARTORDING NI ACARA DI PUNGUAN NA MARHABOT NI

ROHA ALA NA MONDING

1. Marende sian BE. No.227 : 1-2“Jesus Ngolu Ni Tondingku”

2. Tangiang Pamuhai
3. Jamita Pilippi 1:21

Pilippi 1:21 “AI KRISTUS DO HANGOLUAN DI AHU, JALA LABA NANG HAMATEAN”
Damang Dainang, Hita na pungu di inganan on lumobi ma di punguan na marhabot ni roha na
hinaholongan di bagasan Kristus Jesus, turpuk on didok Si Paulus do di suratna uju i na tinongos na tu
huria Pilippi uju di hurungan dope ibana. Sai tarpaima do ibana di haputusan ni na mamareso
parsoalanna, boha do ujungna. Alai adong dua kemungkinan di hasil ni haputusan ima : “Mangolu
manang mate”. Alai didok ibana do di udut ni turpuk on muse, gabe dang huboto manang dia
pillitonku. Manang songon dia pe haputusanna, sarupa do dihilala ibana, songon pandohanna muse
“marsangap Kristus marhite sian daginghu, mangolu manang mate pe ahu”.
Tangkas didok ibana, Ai Kristus do hangoluan di ahu, jala laba nang hamatean. Boasa pola
songoni pandohan ni si Paulus on? Diokuhon ibana do Kristus do parmulaan ni parngoluonna uju
mardalan ibana tu Damaskus, sai songon na mamuhai parngoluon na tung mansai imbaru dihilala
rohana, ala mardalan raphon Kristus. saleleng pardalanan ni ngoluna, Kristus do dibahen ibana
ojahanna, sandok holan tu Ibana do diarahan parngoluonna, ai holan Ibana do na tuk margogoihonsa.
Tung mansai ringkot dihilala ibana Jesus di parngoluonna, dihilala ibana do gabe upa na arga i di
ngoluna, jala didok ibana, dang adong marguna parngoluonna ia so raphon Kristus. umbahen I didok
ibana, “Ai Kristus do hangoluan di ahu”.
Alai molo tung pe mate ibana, didok doi gabe laba di ibana, ai marhite hamatean do gabe
adong dalan muse tu parngoluon na imbaru rap dohot Kristus. marhite hamatean do gabe lam
jumonok tu harajaon ni Debata. Diangka na porsea tu Jesus, hamatean ima parsaoran (union) jala
parsaoran na imbaru dung sian portibion muse (reunion, persekutuan kembali) dohot Ibana jala rap
dohot angka naung jumolo borhat tu parsatongkinan i.
Ala ni ima umbahen songon na manosak panghilalaan ni si Paulus, na dia do pillitonna. Ai
molo mate ibana, borhat ma ibana rap dohot Kristus, denggan doi didok rohana, alai ringkot dope
mangolu di ibana, alai dang ala laho marpanarihon didirina sandiri ibana, alai naeng rap ibana dohot

1
huria Pilippi laho patimbul haporseaon nasida jala gabe lam sumurung pamujion nasida di Kristus
Jesus marhite haroro ni si Paulus i, molo mangolu nian ibana.
Damang dainang, punguan na marhabot ni roha, ra sai songon na alo do tu rohanta songon
pandohan ni si Paulus on tu hita di pandohanna na mandok “ ai laba do nang hamatean”. Ndada hea
tapingkiri, gabe marlaba hita, molo adong sian keluarga manang sisolhot na hamatean, gariada songon
haagoan bolon do i di hita lumobi di angka na tahaholongi. Maraburan ilu jala sai manosak ateate.
Aut sura boi tadok tu Tuhanta i, unang pola adong hamatean nian. Alai dang songon na tasangkapi, ai
sangkap ni Debata do di angka parngoluon nang hamatean. Songon pandokNa di bukku ni si Job 1:21:
”Jahowa do na mangalehonsa, jahowa do muse mambuatsa, pinuji ma goar ni Jahowa”.
Damang dainang, songon naung pinatolhas ni turpuk on, naeng ma nian tarajumi di
parngoluonta songon pandohan ni si Paulus on “Ai Kristus do hangoluan di ahu, jala laba nang
hamatean”. Di hita naung tininggalhon ni Ama na ta haholongi on, Saleleng di parngoluonta, gabe
marparbue angka ulaonta hinorhon ni Kristus jala ndang holan di dirinta sandiri hita mangolu alai
dohot do nang di angka donganta. Saleleng mangolu Amang on, ra dang habilangan be jala nunga
tung godang angka parbue na denggan naniulana tu hita saluhutna. Nuaeng nunga disangkapi Tuhanta
Ibana jala jumolo sian hita, ndang pola be mabiar hita, ai tong do mate dibagasan Kristus ibana,
songoni nang tu hita muse di parborhatta sogot, sai na mate dibagasan Kristus do angka na porsea di
Ibana jala gabe parhitean do ianggo hamatean tu parngoluon na imbaru muse rap dohot Tuhanta Jesus
Kristus
Margogo ma keluarga naung tininggalhon ni amang on, jala sai Tuhanta ma na mamasu masu.
Amen*
4. Marende sian BE.No. 279:1 “Pasahat ma sudena”
5. Mandok hata sian Parhalado (utusan)
6. Mandok hata sian Ruas
7. Mandok hata (Mangampu) sian Hasuhuton
8. Marende sian BE. No 289:1-2 “ Pos ma ho rohangku”
9. Tangiang Panutup