October ni 27, Pathianni-ah US President Donald Trump chuan khawvel deng chhuak tur

thu a puang a. Middle East leh khawvel hmun hrang hranga hun rei tak chhung
firfiaka lo che tawh ISIS-a an hotupa ber Abu Bakr al-Baghdadi chu Syria hmarthlang
lama a tawmbukah a thi tih hi a ni a, kum 48 mi a ni. Baghdadi US sipaite chuan a
awmnaah hian an luh chilh a, leihnuai kawngah an uisathiam chuan um lutin chutah
hian thihchilhin puakthei thil a tipuak ta a, a rual hian naupang pahnih an thi ve
bawk. A taksa hi darh nuai mah se Baghdadi ngei a ni tih chu nemngheh theih a nih
thu Trump hian a sawi a, a thih dawn hian a tapin a chiau a, hlauvin a au vak vak
mai niin a sawi tel bawk.

Baghdadi hi firfiak hruaitu zingah chuan khawthlang ramten man an duh ber, a lu man
pawh dollar maktaduai 25 an chhiar a ni a, man tuma an veh rei ber niin thihna hi a
hma pawhin a lo pumpelh thuak thuak tawh a, tum khat phei chu hetianga beihnaah
hian hliam na tak nen a dam chhuak thei hram a ni.

US President chuan Baghdadi-a man emaw thah tuma beihpuithlakna hian kar hnih
chhung vel chu a awh tawh a, Washington-a Inrinni zan dar 5 velah sipaite chuan
chet an thawhin, an che lai hi White House atangin mi pawimawhte chuan an lo
thlirpui nghe nghe a. He inbeihnaah hian America sipai zingah thi an awm lova,
Baghdadi rual hian mi 6 vel an thi thung a, an uisathiam hruai chu hliam mah se
ngaihtuahawm a ni lova, America-a an kirpui hnuah chawimawina te pawh a dawng tawh
nghe nghe a ni.

An va luhchhuahna hi tunah chuan hmuh tur a awm tawh lova, lung leh cement chimin a
khat tawh. A awmna lai hi ISIS hruaitu awmnaah chuan beisei lohna tak mai, Idlib
Province-a Barisha khuaah a ni a, a in hi fal deuh nalha awm a ni. He bial hi ISIS
te hmelma firfiak pawl dang Hurras al Din te tamna bial a ni mauh mai a, heng mite
lakah hian inhumhimna atan al-Baghdadi hian pawisa thahnem tak a pe niin a lang a,
an sum chetvel dan chhinchhiahna atanga a lan dan chuan dollar sing 6 leh sang 7
bawr vel lai an pe a. Heng sum chhinchhiahnate hi in atanga phone leh laptop bakah
pendrive an hmuh chhuah atanga hriat theih a ni a. An thil hmuh chhuah hian he
firfiak pawl inzarpharh dan leh an thuruk tam tak chu laihlan theih a beiseiawm
bawk a ni.

Idlib-ah hian Syria-a chaurau ek thai ISIS mi leh sate chu an tlan chhuak nia hriat
a ni bawk a, pawl pahnihte hi hmelma anga inen an nih avangin an hmelma thuhmun
laka tangrual tur pawhin sum leh pai sen fe an ngai a ni. Idlib-a a inkhuarnaah
hian al-Baghdadi hi July thla vel atang khan a awm tawh tura ngaih a ni bawk a.
Rinhlelh thil thu-ah thla thum leh a chanve chhung chu America chuan he in hi uluk
takin a lo enthla tawh a. Beihna hun remchang a lo melh ran tawh a, mahse firfiak
awmkhawmna a nih bakah Russia thlawp Syria sorkar chuan thlawhna tumhmun a thunun
bawk si a, chet vak ngaihna a awm lo a ni. October thla tira President Trump-a'n
Syria atanga America sipaite a hnuhkir tur thu a puan hnuah khan a bo leh mai ang
tih hlauvin an bei ta a, Pathianni khan an hlawhtling ta a ni.

America-a thuneitu thenkhat sawi danin al-Baghdadi hi a mi rin tlemte zinga mi tu

emaw chuan a phatsan a, chuvanga a awmnaa luh chhuah thei chauh hi an ni a. A ruka
intelligence lamin amah an zuitir phei hi chuan Baghdadi-a kekawrte a ru chhuak a,
chuta tang chuan a DNA an endik a, he hmunah hian a awm ngei a ni tih fiahna atan
leh, a hnua a ruang endikna atan te pawh an hmang thei ta zel a ni.

Al-Baghdadi hian vehimna a ngai pawimawh hle a, kum 6 chhung chu a mi rin zawng mi
tlemte bakah a chhungte kutah a innghat a, midang a ring meuh lo a ni. Khawvela man
tuma an zawn nasat ber a ni bawk a, hlauthawng awm reng pawh hi a nihna lai a awm.
A awmna hre tur hian ram pakhat mai ni lo intelligence te an tangrual a, America
phei chuan a lu manah dollar maktaduai 25 lai a tawktarh nghe nghe.

Kum 2014 July thlaah Abu Bakr al-Baghdadi hian Iraq-a mosque pulpit atangin
khawvela firfiak pawl inzarpharh nasa ber leh buaipuiawm em em ISIS te hotu a nih
thu a rawn puang kha a ni a. He firfiak pawl hi mi sing telin an zawm a, an vanglai
phei chuan Britian tiat ram an la hman a, khawthlang ramin an do rawn a ngai hial
bawk a ni. Kum 10 dawn lai chu man tuma hmalakna hrang hrang atangin a lo tlan
chhuak tawh a, hei hi venhimna lama a fimkhur em vang niin a sawi theih. A hote
zinga a hruaitu pawl, kum 2018-a an man tak Ismail al-Ithawy chuan al-Baghdadi an
hmuh dawn chuan sana takngial pawh hlihsak an nih thu a sawi a, an mit tuamin bus-
ah an chuantir a, darkar khat vel an tlan hnuah, an awmna hmun thuhrukah chuan al-
Baghdadi hi an va hmu thin a, hei hi inhmuhkhawm an buatsaih dan niin minute 15
atanga darkar chanve chhung vel a awh a. An zawh hnuah an hotupa hian an
inhmuhkhawmna in chu a chhuahsan hmasa ber a, midangin darkar khat hnu velah an zui
chauh thin a. An kir leh dawnah pawh hian an mit tuamin bus-in an awmnaah an va
thlah leh ta thin a ni. Middle East-a ram an lak leh rawng taka an chet lai khan
Baghdadi hi himin a inhre ngai lova, tuin nge amah phatsan ang tih chu a buaipui
hle a, tumah a ring ngai lo nia sawi a ni.

Kum 2014-a an pawlin Iraq hmun thuma thena hmun khat leh Syria ram zatve deuhthaw
an lak chu al-Baghdadi hian Muslim kulmuk ram, caliphate-ah a puang a, hetiang ram
hnuhnung ber chu Ottoman Empire kha a ni. Hetiang ram puan hi Al Qaeda hruaitu
Osama bin Laden pawh khan a lo suangtuah tawh thin a, mahse a tlin loh leh a ngam
loh chu al-Baghdadi hian a rawn tipuitling ta a. bin Laden-a hlauh, sipai chakna
hmanga run chu ISIS te hian an tawk ta reng a, mahse an ram chhuhsak tur erawh
chuan kum 5 chhung a duh thung a. He ram, Islamic State-ah hian an pawl zuitu mi
sing tel chu khawvel hmun hrang hrang atangin an pem khawm hman a, an tam lai berin
mi maktaduai 1 leh nuai 4 bawr vel ni tura ngaih a ni. An ram hian Ninevi atanga
Sinjar tlang te, Syria tuialhthei khur awmna Deir Azzour leh Palmyra te a huam a.
An awp chinah hian Muslim sakhaw thil ni lo chu an tichhe nasa a, Sinjar-ah phei
chuan sakhaw dang zuitu hmeichhiate chu an pawngsual bawk a ni.

An ram chhungah hian inkaihhruaina a khirh hle a, hmeichhe uire te chu denhlum tur
an ni a, rukrute pawh an kut tansak tur niin firfiaka tang duh lo mipate chu an lu
tansak tur a ni bawk. Hmanlai inhremna dan an kalpui hi Saudi Arabia-ah te pawh an
la kalpui tho a, mahse anni erawh hi chuan mi an tihlum lai chu khawvel hmuh
theihin an pho chhuak htung a, an lehkhabu thianghlima inhremna awm miah lo
rapthlak tak takte chu an hmu chhuak thar zel bawk. A then an hal hlum a, a then
chu bawmah khungin tuiah an thlak a, a then lah tank an rahhlumtir a, satalhna
hmunah ran anga talh te leh chansawm te thlengin an awm a ni. Heng inkaihhruaina
bakah hian an ram chu nitin khawsak phung rorelna pangngai angin an enkawl bawk a,
chhiah an khawnin chu chu sorkar inenkawlna atan hman zui thin a ni. Internet pawh
hian hmang tangkai thiam khawp mai. Khawvel hmun hrang hranga awmte chu caliphate-
ah hian an awm lo a nih pawhin an mi leh sa, internet kaltlanga rawn khawsa ve thei
angin an hrilh thin a, firfiak ni tura an chher hlek loh zingah an hminga firfiaka
che zui ta pawh hi an awm phah ta nual a. San Bernardino, California-a silai
hmehpuahna te, Germany-a Krismas bazar-a chetna te, France-a Bastille Day-a chetna
bakah Easter Sunday-a Sri Lanka biak ina puakthei thil tihpuahnaah te mawh an phur
a, an inkhuar lohnaah pawh mi sang telin nunna an la thei tho a ni. Heng firfiakte
hian mi pakhat tana an rinawmna thu an puang chhuak thin a, chu chu al-Baghdadi a
ni.

A laiah hming chu Ibrahim Awad Ibrahim Ali al-Badri a ni a, Iraq laili Al Jallam-a
piang leh seilian a ni a, an unau hi mipa 5 leh hmeichhia thahnem tak niin a pa
Sunni muslim chuan beram zuarin a enkawl thin a ni. An chhungkua hi awm thei tak
pawh an ni lem lova. Mahse an awmna hi al-Badri hnam inkhuarna a ni a, hei vang
hian Caliphate-a an hotu ber Caliph anga a hnua a inchhal ngam chhan hi ni tura
ngaih a ni a. An hnam hi Quraysh hnam peng zawlnei Mohammed-a thlah kal zel an la
ni a, chuvangin an sakhuaah pawh chungnung bik anga inngaihna al-Baghdadi hian a
nei lian hle a ni.

Primary school a zir laiin Samarra-ah an pem a, zirlai lehkha thiam thei tak a ni
lem lo. Naupang zakzum, mahnia awm cheuh cheuh thin leh ngawi chawi tak niin an
sawi a, an biak inah an lehkhabu thianghlim vawng turin a pain a ziaklut a, chu
hmun chu a tal tamna ber leh nuam a tihna ber a ni a. Biak inah hian tlawmngaiin
hna hrang hrang a thawk thin a, an lehkhabu thianghlim phei hi chu a thiam thei
hle. An school leh biak inah tawngtai hmahruaitu a ni a, a awin ngaihno a bei bawk
nen, koran chham tura an leklam ber a ni.

Hetiang lai atang hian a kulmuk zawngin sakhuana hi a la tan tawh a, an sakhuain an
khap ang chu amahin a tih loh chu sawi loh, midangin an ti pawh chu a ngaithei lo
hle a ni. Kum 1991 ah khan kum 20 mi niin Baghdad University lamah a kal a, hetah
hian BA a pass chhuak a, Saddam University-ah lut lehin an sakhaw lehkhabu
chungchangah doctorate degree a nei zui bawk. A lehkhazir lai hian Baghdad-a biak
in pakhatah inhlawhna atan an lehkhabu thianghlim a zirtir tel thin a, Sheikh
Ibrahim an ti mai thin. A zirlaite sawi leh danin, an zawhna bakin a chhang ngai
lova, thu ho mai mai leh mi rel tih vel a ti ngai lo. Mahni invawng thei tak a ni,
an ti.

Kum 2003-ah khan America chuan Iraq runin Saddam-an paihthla a, Baghdad khawpui chu
indona mualah a chang zo ta a. He khawpui hi chhuahsanin an in lamah a kir leh a
ni. Kum khat hnuah America sipaite chuan al-Baghdadi hi an man a, mi tang kawr an
haktir thin, sethlum rawng, a hnua an mi tihhlum turte ISIS hovin an haktir
chhunzawm tak chu a ha ve ran a ni. An manna hi a farnu pasal te in, Falluja-ah a
ni a, a farnu pasal hian America do zawngin silai a lo lek ve a ni awm e, chumi man
tur an thawk chhuak chu al-Baghdadi pawh hi an rut tel ve a, thla 11 chhung chu
Camp Bucca lamah a tang zui ta a ni.