ZIRLAI 26

PI PUII (DR. GWYNETH PARUL ROBERTS)

Chhiar tur :Lk 4:16-22, 33-41

Thuhmahruai: Vawiin hian missionary doctor thiam tak mai chanchin chu kan zir dawn a. He doctor hi Dr. Gwyneth
Parul Roberts a ni a, Mizote chuan Pi Puii kan ti a, Pi Puii tiin kan sawi zel tawh ang.

1. Pi Puii: Pi Puii hi tuna Bangladesh ram ni ta Sylhet-ah khuan November 1, 1910 khan a lo piang a. A pa Rev. J.W.
Roberts-a leh a nu hi chutah chuan missionary-in an thawk a ni. Pi Puii hi Wales rama Rhyl khuaah High School
thleng a kal a. Chumi hnuah Intermédiate of Science (tunlaia Class XI-XII Science ang hi) Bangor University College-
ah a zo leh a. Chumi hnuah Cardifff-a National School of Medicine a\angin B.Sc. kum 1930- ah a zo a, M.B.B.Ch.
(Tunlaia M.B.B.S. ang hi) pawh kum 1933 khan a zir zo leh a ni.

2. Mizorama a rawngbawlna: Doctor a zir zawh hnu hian Sap ram damdawi in hrang hrangah a thawk kual a.
Chumi hnu, June 1938 khan Liverpool khuaah Wales ram Presbyterian Kohhran missionary turin a inpe a. Kohhran
chuan a tirh chhuah tak tak hmain Lóndon-ah Tropical Medicine (ram luma damdawi hna) zir turin an tir leh te te
a. Chumi hnuah chuan Mizorama missionary hna thawk turin an rawn tir ta a. Kum 1938 December 3-ah Aizawl a
lo thleng a ni.

3. Doctor hna a thawk: Pi Puiin Mizorama rawng a bawl chhung zawng (kum 20 chuang lai) chu Durtlanga
Presbyterian damdawi inah hian a bur ngar ngar a, amah chauh doctor awm chhun a ni bawk. A lo thlen tirh chuan
damdawi inah khian khum 38 a awm a, a hnuah khum 100 lai awmna turin an ti lian a. Heta a thawh chhung hian
thingtlang khaw \henkhatah dispensary-te pawh an hawng bawk.
Pi Puii kha mi zai thiam tak a ni a, a bik takin awr puar a zai hnem hle. Damlote a duatin a hmangaih thei
hle a, damlo na zual an awm phei chuan zanah pawh vawi hnih vawi thum te a tlawh \hin. Chhun lamah inentirnaah
a \huin damlote a en a, ward a vil pah reng bawk a. Electric eng awm mumal lo karah pawh chhun zan zawmin rim
takin a thawk \hin. Nurse zirna lam a ngai pawimawh hle a, zirlaite taima takin a zirtir \hin. A hun lai hian Nursing
School chu Indian Nursing Council-in a pawm a ni.
4. Kohhran lamah: Damdawi inah hun awl nei mang lova hna thawk a nih avangin kohhran lamah nasa takin a
inhmang thei lo va. Sunday School leh kohhran inkhawm erawh a ngai pawimawh em em \hin. Zaipawl zai a ngainat
avangin a banglaah hla an zir fo a. |halai leh naupangte nun kawng dik kawhhmuh a ngai pawimawh hle \hin.
5. A mizia: Pi Puii chu Pathian \ih mi, \awng\ai peih tak a ni a, Johana 3:16 hi a ngaina hle. Mi inren tak a ni a, mi
rethei leh chanhaite a khawngaih a, a \anpui \hin. Mi taima leh thil duh uluk tak a ni a, nungchate a humhalh tlat
\hin: A chanchina an sawi uar tak chu ‘a tih theih sang ber leh \ha ber mi dang tana tih duh mi a ni' tih hi a ni.

6. A hun hnuhnung lam: Kum 23 zet Durtlang damdawi ina a thawh hnuin a pa damloh avangin kum 1961 March
thla khan kum 50 mi niin Sap ramah a haw a. Lo chhuah leh a duh viau laiin a pain a boral san ta si a, a nu tar tawh
tak enkawl a \ul tak avangin a rawn chhuak leh thei ta lo a ni. Sap rama a haw hnu hian damdawi lam a zir belh
leh a, hnimhlum leh kah hit lam hna a thawk zui a. Mi thiam indaih loh avangin a pension hnu kum 70 a nih thleng
(1980) a thawk a ni. Khawtlang lamah pawh a inhmang nasa hle a, mi beidawngte enkawlna in ngaihtuahtu pawl
a din a, Founder President-ah a \ang zui nghal bawk a. A hnathawh \hat avangin kum 1997 khan British
chawimawina sang Member of the Order of The Bristish Empire (MBE) a dawng hial a ni.

February 27, 2007 khan kum 97 mi niin Pi Puii hi a thi a, Mizoram Presbyterian Kohhran pawhin Pi Puii
thlahna inkhawm hi Durtlang Biak Inah February 3, 2007 khan kan nei a ni. Hetiang rawngbawltu ropui tak mai
Pathianin min lo pe kha a lawmawm hle a ni.

Thuvawn: Johana 3:16 (Pi Puii Bible chang ngainat ber)

Pathianin khawvel a hmangaih em em a; chutichuan, a Fapa mal neih chhun a pe a, amah chu tu pawh a
ring apiang an boral lohva, chatuana nunna an neih zawk nan.