Kapistahan sa Our lady of Snows Gisaulog

Malinawon ug malipayong gisaulog niadtong Agosto 5, 2020, ang Kapistahan sa Our Lady of
Snows, El Salvador diha sa Santos nga Misa nga gipangunahan ni Arsobispo Antonio J.
Ledesma, SJ, DD, uban ni Fr. William Salva, Kura paroko ug sa ubang kaparian sa
arkidiyosesis ning syudad.

Diha sa iyang homiliya, gipaambit sa arsobispo nga pagabendisyonan ang estatuwa sa dose ka
apostoles kay sila man ang pundasyon sa Simbahan ug si Maria mao ang “Reyna sa mga
Apostoles. “Uban kang Maria, sila ang timaan nga sila ang magbalantay sa Kristohanong
katilingban ug pinaagi kanila, magpadayon ang misyon sa pagpaambit sa pagtoo sa tanan, “
matod niya.

Nag-ingon siya nga si Maria gihatagan ug titulo nga “Inahan sa Simbahan” (Mother of the
Church) diin ang Simbahan gipanalipdan ni Sta. Maria pinaagi sa iyang “intercession.” “Sama
sa pagtabang ni Maria kang Isabel hangtod siya nanganak , si Maria usab ang nagtabang sa
parokya sa Our Lady of Snow diin ubos kini sa iyang titulo ug nag-uban sa atong paningkamot
labi na karon sa panahon sa pandemiya;” dugang pa niya.

Gipunting usab ni Abp. Ledesma ang bag-ong titulo ni Maria: Bitoon sa Bag-ong
Ebanghelisasyon (Star of the new Evangelization) diin uban kaniya, ang Simbahan nagtinguha
sa pagpaambit sa pagtoo sa tanang katawhan nga adunay nagkalainlaing kultura ug relihiyon.
(Bag-ong Lamdag News)