TEMAS E AUTORES DOS 80 E DOS 90. POETAS E TENDENCIAS ACTUAIS MÁIS RELEVANTES.
Actualmente a liña socialrealista que representaban nos anos 60 e 70 autores
como Celso Emilio Ferreiro ou Manuel María será seguida na segunda metade desta última década por un grupo de poetas máis novos que teñen en común a ideoloxía nacionalista e revolucionaria. Entre os máis importantes podemos citar a Ferrín, Lois Diéguez ou Darío Xohán Cabana. Desde o punto de vista formal non engaden nada novo, conque a temática de denuncia social irá perdendo interese segundo se vai achegando a década dos oitenta e se vai asentando o sistema democrático, o que permite a total normalización do mundo literario galego. A renovación poética que se levará a cabo nos anos 80 ten o seu primeiro fito na aparición de diversos colectivos, como o “Grupo Rompente”, integrado entre outros por Antón Reixa e Alfonso Pexegueiro, ou “Cravo fondo”. Foi decisiva a influencia que sobre estes poetas novos exerceu a obra de poetas dos cincuenta, como Arcadio López Casanova (Mesteres, 1976) ou Xosé Luís Méndez Ferrín (Con pólvora e magnolias). Deste poemario tan influente cómpre sinalar as características do emprego de metáforas recorrentes como o ourizo ou a pedra (que expresan a dor), o tema do mundo do sexo como algo cotián e nostálxico, a defensa da loita armada e marxista ou a mestura do clásico e a contracultura beat e hippy (amosando un claro interese polo culturalismo), ademais dunha sintaxe totalmente innovadora. Sen negar a evidencia destas fontes, algúns críticos falan da importancia decisiva da publicación en 1980 do libro Herba aquí ou acolá, de Álvaro Cunqueiro, e da súa relación formal e temática (culturalismo, discurso coidadoso e musical con coidado pola forma...) coa poesía dos novos vates dos anos 80. En primeiro lugar, entre os poetas da promoción dos oitenta podemos citar a Xavier Rodríguez Baixeras (Fentos no mar), Xosé María Álvarez Cáccamo (Praia das furnas), Xulio López Valcárcel (Víspera de día), Xesús M. López Valcárcel (Tránsito), Pilar Pallarés (Entre lusco e fusco), Manuel Rivas (Libro do Entroido), Ana Romaní (Palabra de mar), Lois Pereiro (Poesía última de amor e enfermidade) e outros como Xavier Seoane, Ramiro Fonte, Miguel Anxo Fernán-Vello, Manuel Forcadela... Algunhas das características desta poesía dos anos oitenta son o afán culturalista, que provoca un afastamento entre o poeta e a sociedade que non estea formada na cultura internacional, o coidado formal dalgúns poetas, o intento de síntese entre modernidade e tradición, o gusto pola experimentación e a interdisciplinariedade (que é o encontro con outras disciplinas, como a música ou as artes plásticas), a presenza do mundo urbano contracultural e marxinal nalgúns autores (cunha gran ligazón co mundo do rock) e mais a recuperación da temática intimista e o erotismo. En segundo lugar, no decenio dos noventa na lírica galega aséntase a poesía feminina e feminista (non exclusivamente, por exemplo, é tamén pertinente para estas poetisas a herdanza idiomática, o mundo do traballo...) da man de Lupe Gómez (Pornografía), Chus Pato (Nínive), Xela Arias (Denuncia do equilibrio), Iolanda Castaño (Vivimos no ciclo das Erofanías), Olga Novo (A teta sobre o sol), Enma Couceiro (Humidosas), Margarita Ledo Andión, Marica Campo, a finada de Luísa Villalta etc., que presentan temática e formas poéticas moi novidosas acordes coa propia condición feminina: a provocadora, a contestataria, a erótica, o marxismo nacionalista, o intimismo... Ademais, todos estes poetas continúan a súa produción literaria no s. XXI, así como os autores dos 80 e 90: Anxo Angueira (Val de Ramirás) trata o paisaxismo da comarca padronesa, Miro Villar (Equinoccio de primavera) cultiva o clasicismo, Gonzalo Navaza innova co emprego do palíndromo (versos que se len igual de dereita a esquerda e viceversa) en A torre da derrota, Rafa Villar amosa unha postura política de esquerdas na crítica social mundial con Migracións, Antonio R. López (Sucios e desexados) satiriza sobre as condutas sociais, Fran Alonso (Cidades) poetiza sobre o mundo urbano... Tamén se deben citar outros autores como María do Cebreiro, Carlos Negro, Manuel Outeiriño, María Lado etc. Finalmente, a poesía do século XXI dispón de múltiples canles e formatos á parte da clásica edición en papel: informática, medios audiovisuais, mail art, poesía visual, performances, happenings, filocafés..., e mais proliferan os grupos (Dolmen, por exemplo) e coleccións poéticas. Todo isto dificulta bastante unha clasificación máis pormenorizada do ecléctico e rico panorama poético galego actual.