MASIROM NGA GAB-I HAN KALAG

San Juan de la Cruz

Hubad ni Jonathan T. Raagas

Dida hin usa, masirom nga gab-i,

Mga ungara hin gugma naglalaga
O malipayon nga palad!
Linmakat ako, waray may kinmita,
An balay ko nagmingaw na.

Ha kasirom ug ha katay-aw,
Han tago nga hagdan, sinalipdan,
O malipayon nga palad!
Ha kasirom ug ha katago,
An balay ko nagmingaw na.

Hiton nga malipayon nga gab-i,

Hin hilom kay waray may kinmita,
Ngan waray ko man liwat kinita,
Waray bisan tugway o suga
Labot la han ha dughan ko nasiga.

Ito manta ha akon nagdara,

Piho pa han kanan kaudtuhon pawa
Ngadto kon diin naghuhulat hiya,
Hiya nga suok gud akon kilala,
Ha dapit nga waray may kinikita.

O gab-i nga nagtugway!

Kay han kaagahon makaruruyag pa!
O gab-i, hingpit nga nag-usa
Nahigugma nga’t han Hinigugma
Binabag-o hiya nga’t han Nahigugma!

Didi hinin bukaron nga dughan nga

Bug-os iginahin ko para la ha iya,
Didto hiya kinmaturog, hinmigda,
Ngan ginmayuyo ko hiya,
An mga sedro ginpaypayan hiya.

Samtang ginpapalid an iya buhok

Han hangin nga ha torre naguwa
An akon li-og ginsamad niya
Han kamot niya nga magaan
Mga pag-abat ko nawara ngatanan

Nagpadayon an akon pagkawara,

Sinanding an ulo ha akon hinigugma,
Hinmunong tanan, pati ako manta,
Mga kinalilisangan binayaan,
Kinalimtan dida ha mga azucena.